Жь Дайине Ләзәте Бьвинә

«Отʹобус дькарә дәрбаз бә, ле әw хорте Чинайи, на!» Әв гьли Александрайе бьһист, йа кö отʹобуседа рʹуньштьбу. Отʹобуса wан гәрәке жь синоре wәлатәки Амәрикайа Башуре, дәрбази алийе дьн буйа. Александрайе дина хwә дайе у дит кö хорте Чинайи бь зьмане Испани, дькә-накә нькарʹә рʹьнд шьроwәкә синорванрʹа кö чь һатийә сәре wи. Александра дьчу сәр щьватед Шәʹдед Йаһоwайә Чинайи у зьмане wи хорти заньбу, ләма жи әwе хwәст аликʹарийе бьдә wи у хәбәрдана wи wәлгәрʹинә.

Әwи хорти гот кö әw бь qануни һатийә ль wьр, у wәки кʹахас у пʹәред wи дьзинә. Пешийе синорван wи баwәр нәдькьр у һәла һе дьфькьри жи wәки Александра жи кʹома qачахада нә, йед кö мәрийа дьфрошьн. Хьлазийе синорван баwәрийа хwә wи хорте Чинайи ани, ле йәкә әw хорт сәва щазакьрьна хwә гәрәке һьнә пʹәрә бьда, чьмки wе дәме кʹахас щәм wи тʹöнә бун. Йазьх ле пʹәре wи тʹöнә бун, ләма жи Аләксандрайе 20$ да wи. Әв хорт гәләк жь wе рʹази бу у гот wәки паше wе 20$ зедәтьр пашда бьдә wе. Александрайе шьровәкьр кö әw һивийе нинә хәлатәке жь wи бьстинә; әwе бь шабун аликʹари дьда чьмки дьфькьри wәки әw тьштәки баш дькә. Александрайе һьнә әʹдәбйәтед сәр һʹимә Кʹьтеба Пироз да wи хорти у әw һелан кьр тʹәви Шәʹдед Йаһоwа Кʹьтеба Пироз һин бә.

Бь рʹасти жи дьлгәрмийа чьqас мәзьн дьдә, чахе әм педьһʹәсьн кö һьндава мәрьвед хәриб, мәрʹдани у qәнщи дьдьнә кʹьфше. Кьред wи щурʹәйи бәлабуйи йә нава мәрьвед жь һʹәму религийа у һәла һе нава wан мәрьвада жи, йед кö тʹö религийакеда ниньн. Ле һуне һазьр бьн аликʹарийе бьдьнә кәсәки? Әв пьрсәкә һәwас ә, чьмки Иса гот: «Хwәзи ль дайийа, нә кö ль стандийа» (Кʹаред Шандийа 20:35). Зандар жи дьбежьн wәки чахе мәрьв тьштәки дьдә, әw йәк wирʹа кʹар ә. Wәрен әм бьньһерʹьн wәки кʹара wе йәке чьда нә.

МӘРЬВЕ ДЬЛ-ӘШQ

Зәлал ә wәки чахе мәрьв аликʹарийе дьдә йед дьнена, әw хwәха шабуне дьстинә. Паwлосе шанди ньвиси кö «Хwәде йе бь дьл у әшq дьдә һʹьз дькә». Әwи хәбәр дьда дәрһәqа wан Мәсиһийа йед кö qöрбанед рʹәзәдьли кьрьн, сәва кö аликʹарийе бьдьнә баwәрмәнда йед кö дәсттәнг бун (2 Корьнтʹи 8:4; 9:7). Паwлос нә дьгот кö wана аликʹари да чьмки ида бәхтәwар бун. Ле бь рʹасти әwана бәхтәwар бун, чьмки карьбун тьштәки жь алийе хwәда бькьн.

Ль гора леколинәке һатә кʹьфше wәки дайин «аликʹарийе дьдә кö шанед мәжийед мә рʹьнд бьхәбьтьн, чь кö шабуне тинә, итʹбарийе пешда тинә у мә тʹәви мәрийа незик дькә. Әw һʹәму тьшт wәк рʹонайе йә, кö баш һöкöм дькә». Леколинәкә дьн жи да кʹьфше кö «чахе пʹәра дьди кәсәки, бь ве йәке даһа шабунәкә мәзьн qазанщ дьки, нә кö wи чахи гава пʹәра сәр хwә хәрщ дьки».

Дьбәк жь бо һʹале хwә, щарна тö нькари гәләк тьшт бьки сәва кәсәки. Ле бь рʹасти һәр кәс дькарә шабуне тʹәхмин кә у бьбә мәрьве кö бь дьл-әшq дьдә. Чахе тö бь ньһерʹандьна рʹаст тьштәки дьди кәсәки, һьнге тöйе бәр хwә нәкʹәви жь бо кʹаш у баһе пешкʹеше. Йәк жь Шәʹдед Йаһоwа, нәширкʹаред ве журналерʹа нәʹмә ньвиси у жь алийе хwәда һьнә qöрбанед рʹәзәдьли тʹәви нәме шанд кʹидәре кö ньвисар бу: «Нава wан һʹәму салада мьн нькарьбу сәва qöрбанед Ода Щьвате тьштәк бьда хенщи һәвәк пʹәрә. Йаһоwа Хwәде жь wе зедәтьр да мьн. . . . Спас кö wә мәщал чекьр сәва кö әз бькарьбьм әве пешкʹеша бьчʹук wәрʹа бьшиньм. Әв шабунәкә мәзьн мьнрʹа тинә».

Дайин нә кö пʹәрава гьредайи йә. Бь рʹасти гәләк мәщалед дьн жи һәнә, кö чаwа әм дькарьн дәстwәкьри бьн.

ДАЙИН СЬҺʹӘТ-QӘWАТА ТӘ БАШ ДЬКӘ

Кʹьтеба Пироз дьбежә: «Мәрьве рʹәʹм qәнщийе ль хwә дькә, ле мәрьве берʹәʹм хьрабийе ль хwә дькә» (Мәтʹәлок 11:17). Мәрьве рʹәʹм мәрʹд ә, у әw һазьр ә сәва йед дьнена хәм бькә, һьм жи wәʹдә у qәwата хwә сәр wан хәрщ кә. Ньһерʹандьна öса, нә кö тʹәне сәва сьһʹәт-qәwата мә wе баш бә, ле һʹәму алийава жийина мәда керһати йә.

Ль гора леколине һатә кʹьфше wәки әwед кö бь рʹәзәдьли аликʹарийе дьдьнә йед дьнена һьндьк дьлтәнг дьбьн у тәнгасийа хwәда һеса тәйах дькьн. Хенщи wе йәке жийина wан даһа баш дьбә. Дайина мәрʹдани дькарә баш кә һʹале wан мәрийа, йед кö гьран нәхwәш ьн, мәсәлә нәхwәшийа скләроз әнифьрәһ (HIV), демәк әw һәйә нәхwәшийа систәма нәвроложик. Öса жи һатә кʹьфше wәки мәрьвед ичкәһʹьз йед кö ичкә тʹәрькандьнә, у паше аликʹари данә мәрьвед дьн, һьндьк дьлтәнг бунә у wанарʹа һеса буйә хәйсәтед хwәйи хьраб бьтʹәрькиньн.

Ве леколинеда öса жи һатьбу готьне wәки «чахе мәрьв рʹәʹмти у qәнщийе дьдә кʹьфше бь wе йәкә әw щи наһелә сәва емосийа у фькьред нәрʹаст». Чахе мәрьв тьштәки дьдә, бь ве йәке әw стреса хwә кем дькә у хуна wи бьльнд набә, демәк тʹансийона хуне щида нә. Öса жи мәрьвед кö жьн йан мере хwә öнда кьрьнә, карьбунә нәкʹәвнә депресийе чьмки али мәрьвед дьн кьрьнә.

Дь ве йәкеда әм накʹәвнә шьке. Бь расти жи дайин һʹалә мә баш дькә.

ДАЙИН ЛЬ СӘР ЙЕД ДЬНЕНА ҺʹÖКÖМ ДЬКӘ

Иса шагьртед хwәрʹа гот: «Бьдьн, wәрʹа wе бе дайине, бь пиванәкә тʹьжи һʹәжанди, дәwьсанди, сәри qучʹ wе бькьнә пʹеша wә. Чьмки бь чь чапе һун бьпивьн, бь wе жи wәрʹа wе бе пиване» (Луqа 6:38). Чахе тö сәва кәсәки тьштәки дьки, һʹьнге мәрьв wе даһа рʹазибуна хwә тәрʹа бьдьнә кʹьфше у wе хwәха жи мәрʹд бьн. Демәк мәрʹдани мәрийа һелан дькә һәврʹа шьхöлкʹарийе у һәвалтийе бькьн.

Зандаред кö дәрһәqа һәләqәтийа мәрийа леколин дькьн, дьбежьн wәки «әw мәрьв йед кö тʹьме мәрʹданийе дьдьнә кʹьфше, йед дьнена жи һелан дькьн wәки мәрʹд бьн. Бь расти «чахе мәрьв дәрһәqа qәнщи у мәрʹданийа кәсәки дьхунә, әw хwәха жи даһа мәрʹд дьбә». Һʹәсабәкида һатә кʹьфше кö «һәр мәрьвәк дь интәрнәтеда дькарә ль сәр сәда мәрьва һöкöм кә, рʹасти кʹижани кö әw qә нәһатийә у нас накә». Һәрге бь гьлийед майин бежьн, чахе мәрʹданийе дьди кʹьфше әw жь мәрьвәки дәрбази мәрьвед дьн дьбә у öса дәрәщәкә баш чедьбә. Wәйе бьхwәста нава мәрьвед öсада бьжита? Бәле, һәрге һе зедә мәрьв мәрʹданйе бьдьнә кʹьфшә, һьнгә кʹара ве йәке жи wе даһа мәзьн бә.

Мәрʹдани рʹьнд те кʹьфше жь мәсәла wәлате Флорида (Амәрика Йәкбуйи). Кʹома Шәʹдед Йаһоwа бь рʹәзәдьли аликʹари дьдан авакьрьна ханийада, йед кö жь фьртоне һьлшийа бун. Һʹәта кö хушк-бьред мә һивийа һащәта бун, сәва кö дәстпекьн хани чекьн, wана дина хwә да кö сура мала щинарәки һьлшийайи бу. Ләма жи wана хwәст али щинаре бькьн у сура wи чекьн. Һьнә wәʹдә шунда әв щинар нәʹмә шанд филиала Шәʹдед Йаһоwайә һʹәмдьнйайерʹа у нәʹмеда ньвиси бу: «Әзе тʹьме wан мәрьварʹа спасдар бьм. Мәрьвед öса баш, qә рʹасти мьн нәһатьнә». Жь бо рʹазибуне әwи мерьки бь мәрʹданийа хwә һьнә qöрбан шандьн, wәки ча әwи гот бьдьнә хәбате бона шьхöлед Шәʹдед Йаһоwа.

МӘРʹДАНИЙЕДА ЧʹӘʹВ БЬДЬНӘ ЙАҺОWА

Ль гора леколина зандарийе һатә кʹьфше, кö «инсанәт гәрәке нәсәкьнә у бьхәбьтә кö аликʹарийе бьдә йед дьнена». Зарʹ гәрәке һин бьн «мәрʹд бьн, һәла һе пешийа wе йәке ча әwана хәбәрдане дәстпекьн». Чьма? Кʹьтеба Пироз щаба wе пьрсе дьдә у дьбежә кö мәрьв «дьлqе Хwәдеда» һатьне әʹфьрандьне у дькарьн хәйсәт-һöнöред Хwәдейи сәрәкә бьдьнә кʹьфше (Дәстпебун 1:27).

Щәм Йаһоwа Хwәде Әʹфьрандаре мә гәләк һöнöред баш һәнә, öса жи мәрʹдани. Әwи жийин дайә мә у һʹәму тьштед кö мәрʹа лазьм ьн сәва бәхтәwар бьн (Кʹаред Шандийа 14:17; 17:26-28). Әм дькарьн дәрһәqа Баве хwәйи әʹзмана у qьрара wи сәва әʹрде, һе рʹьнд бьзаньбьн. Дь вә йәкеда wе али мә бьке Хәбәра wи демәк Кʹьтеба Пироз. Әw кʹьтеб öса жи әʹйан дькә кö Хwәде пʹешкʹешәк дайә мә сәва әм ахьрийеда бәхтәwар бьнa (1 Йуһʹәнна 4:9, 10). Чаwа әм пеһʹәсийан Йаһоwа Хwәде канийа мәрʹданийе йә у әм дьлqе wида һатьнә әʹфьрандьне. Ләма жи чахә әм мәрʹданийеда чʹәʹв дьдьнә Хwәде әм сәва хwә кʹаре дьстиньн у qәбулкьрьна Wи жи qазанщ дькьн (Ибрани 13:16).

Те бира wә Александрайе дәрһәqа кʹижане кö дәстпека ве готареда һатьбу готьне? Гәло сәрһатийа wе чаwа хьлаз бу? Әw хорте Чинайи йе кö тʹәви ве отʹобуседа дьһат, соз дабу wе кö пʹәра wәгәрʹинә. Әw хорт текли бу тʹәви һәвалед хwә йед кö дьжитьн wи шәһәрида кʹидәре кö щийе сәкьнандьна ве отʹобусе бу, у әwана дәрбера 20$ пашда Александрайерʹа wәгәрʹандьн. Хенщи wе йәке әw хорте Чинайи гöһ да ширәта Александрайе у дәстпекьр кʹьтеба пироз һин бә. Александра пʹьрʹ ша бу чахе се мәһ шунда ль сәр щьвата мәзьнә Чинайи кö Шәʹдед Йаһоwа дь Перуда дәрбаз дькьрьн, диса жи рʹасти wи хорти һат. Сәва кö рʹазибуна хwә бона qәнщийа Александрайе бьдә кʹьфше, әwи хорти, Александра у әw мәрьвед кö тʹәви wе һатьбун, тʹәглифи ресторана хwә кьр.

Дайин у аликʹари шабунәкә пʹьрʹ мәзьн тинә. Ле һе фәрз әw ә, ку чахе тö тʹьме öса дьки, бь ве йәке тö али мәрийа дьки кö һе рʹьнд нас бькьн Йаһоwа Хwәде, йе кö һәйә Канийа һʹәму пʹешкʹешед баш! (Аqуб 1:17). Бь рʹасти жи дайина wи щурʹәйи ләзәтәкә мәзьн тинә