Ньһерʹандьна Мә сәр Шашийа Гәрәке Чаwа бә?

Тәйо у Зәйнәбa гәләк ша бун кö qиза wан малбәта хwәва, һатьн щәм wан мевани, сәва кö тʹәвайи хwарьне бьхwьн. Зәйнәб кö бәре ашпеж дьхәбьти, дәстпекьр рʹьштә тʹәви пәнир чекә. Нәбийед wе әв хwарьн гәләк һʹьз дькьрьн.

Чахе гьшк бәр сьфре рʹуньштьн, Зәйнәб һат у чʹьгун дани сәр сьфре. Чахе әwе дәвлик вәкьр, дит кö чʹьгунеда тʹәне пәнире һʹәланди бу! Зәйнәбе бир кьрьбу рʹьштә бавеже!

Фьрqи тʹöнә әм чәнд сали нә, йан чьqас щерʹьбанди нә, әм гьшк шашийа бәрдьдьн. Дьбәкә мә тьштәки бефәʹми готийә, йан тьштәки баш кьрийә нә wәʹде лайиqда. Йан дьqәwьмә мә тьштәк пьшт гöһе хwәва авитийә у бир кьрийә. Гәло чьма шаши дьqәwьмьн? Чаwа әм дькарьн öса бькьн кö шашийа нәкьн? Ньһерʹандьна рʹаст сәр шашийа, wе али мә бькә щаба wан пьрса бьвиньн.

НЬҺЕРʹАНДЬНА МӘ У ЙА ХWӘДЕ

Чахе әм тьштәки баш дькьн, әм бь шабун qәбул дькьн пʹайидайине чьмки фәʹм дькьн кö әм һежа нә. Чахе әм ньшкева шашийа бәрʹдьдьн, у һәрге йед дьнена дина хwә нәданә шашийед мә, йәкә әм гәрәке шашийед хwә биньн рʹуйе хwә. Бона ве йәке мьлукти лазьм ә.

Һәрге әм гәләк бона хwә дьфькьрьн, әме нькарьбьн сәр хwә бьхәбьтьн, чьмки әме йед дьнена нәһәq кьн, йан жи әме qайил нәбьн кö мә шаши бәрʹда. Кьред öса щар-щара бәр бь ахьрийа хьраб дьбьн. Проблем wе нәйенә сафикьрьне у мәрьвед дьн жи wе нәрʹаст бенә нәһәqкьрьне. Һәла һе жи чахе әм шашийа бәрʹдьдьн у әв йәк сәр мә хьраб һʹöкöм накә, йәкә әм гәрәке тʹьме бир нәкьн кö ль ахьрийе «жь мә һәр кәсе бона хwә щабе ль бәр Хwәде бьдә» (Рʹомайи 14:12).

Хwәде рʹаст дьньһерʹә сәр шашийа. Кʹьтеба Зәбурда, Хwәде әʹйан дьбә ча йәки «дьлшәwат у рʹәʹм»; у «Әw һʹәта хьлазийе һерс накʹәвә, һʹәта-һʹәтайе кʹине нажо». Әw фәʹм дькә кö әм гöнәкʹар ьн, кö кемасийед мә һәнә, у «Әw бьбир тинә кö әм ах ьн» (Зәбур 103:8, 9, 14).

Хенщи wе йәке ча бавәки дьлован, Хwәде дьхwазә кö зарʹед wи жи ль сәр шашийа öса бьньһерʹьн ча әw дьньһерʹә (Зәбур 130:3). Хәбәра хwәда Әw бь һʹьзкьрьн гәләк ширәт у рʹебәри дайә ньвисаре, кö али мә бькә ль сәр шашийед хwә у йед дьнена рʹаст бьньһерʹьн.

ЧАWА ШАШИЙЕД ХWӘ РʹАСТ КЬН

Гәләк щар дьqәwьмә кö чахе шашийа бәрʹдьдьн, мәри wәʹдә у qәwата хwә хәрч дькьн, кö йед дьнена нәһәq кьн йан жи хwә рʹаст дәрхьн. Ле дәwсе һәрге тә бь гьлийа кәсәк дайә хәйидандьне, бахшандьне бьхwазә кö шашийед хwә рʹаст ки у һәвалтийа хwә хьраб нәки. Дьqәwьмә тә жи һьндава кәсәкида тьштәки нәрʹаст кьрийә, жь бо чь жи тә, йан жи әwи кәси, хwә нәбаш тʹәхмин кьрийә? Дәwса кö сәр хwә һерс кʹәвьн, йан йед дьнена нәһәq кьн, wе баш бә һʹәму тьшти бьки кö шашийед хwә рʹаст ки. Ле һәрге тö тʹьме дина хwә бьди сәр шашийа, әв йәк wе бадиһәwа нәрʹьһʹәтийе пешда бинә у проблем зедә бә. Ләма жи һе баш ә, ча лазьм ә öса бьки.

Чахе кәсәк шашийа бәрʹдьдә, мәрʹа һеса йә нәqайилийа хwә бьдьнә кʹьфше. Ләма жи баш бә ширәта Иса Мәсиһ һьлдьн һʹәсаб: «Һәр чь кö һун дьхwазьн мәрьв бона wә бькьн, һун жи öса wанарʹа бькьн» (Мәтта 7:12). Чахе тö шашийа бәрʹдьди илаһи йед бьчʹук, бешьк тö дьхwази, кö йед дьнәна һьндава тәда дьлрʹәмийе бьдьнә кʹьфше, йан жи кö бь тʹәмами дина хwә нәдьнә шашийед тә. Ләма жи wе баш бә, кö тö жи qәнщийа wи щурʹәйи һьндава мәрьва бьди кʹьфше (Әфәси 4:32).

ПРИНСИПЕД КÖ АЛИКʹАРИЙЕ ДЬДЬН, WӘКИ ШАШИЙА КЕМ БӘРДЬН

Фәрһәнгәк öса дьбежә: «Шаши пешда тен жь бо сущдаркьрьнед нәрʹаст, занәбуна кем йан жи чахе рʹьнд дина хwә надьнә тьшта». Әм гәрәке фәʹм бькьн кö щарәке йан чәнд щара һʹәму мәрьв, һьнә жь wан тьште жоре готи дьдьнә кʹьфше. Һәрге әм һьнә принсипед сәрәкә жь Ньвисаред Пироз һьлдьн һʹәсаб, әв йәк wе али мә бькә кем шашийа бәрдьн.

Принсипәкә ви щурʹәйи әм дьвиньн Мәтʹәлок 18:13-да кʹидәре кö ньвисар ә: «Йе һе нәбьһисти щабе дьдә, әw беһʹьш у qара wи йә». Бәле чахе әм һʹәму тьшти һʹәта хьлазийе дьбьһен, әв йәк һәмьки аликʹарийе дьдә сәва кö бь ләз тьштәки нәбежьн у һерс нәкʹәвьн. Чахе рʹьнд гöһ дьди мәрьва, öса тöйе бькарьби хwә жь сущдаркьрьне, дур бьгьри у шашийа бәрʹнәди.

Принсипәкә дьн жь Кʹьтеба Пироз öса дьбежә: «Чьqас жь дәст wә те, тʹәви һʹәму мәрьва әʹдьлайийеда бьн» (Рʹомайи 12:18). Жь алийе хwәда һʹәму тьшти бькә кö әʹдьлайи у шьхöлкʹарийе пешда бьби. Чахе тʹәви йед дьнена дьхәбьти сәрwахт бә у qәдьре мәрийа бьзаньбә, öса жи пʹайе wан бьдә у wана һелан кә. Дәрәща öсада гьлийед бефәʹмти у шьхöл дькарьн һеса бенә бахшандьне, йане wе дина хwә нәдьнә сәр wан шашийа. У хәйда лапә гьран жи дькарә һеса бе биркьрьне.

Жь шашийа тьштәки баш хwәрʹа һин бә. Дәwса кö бьхәбьти сәва шашийед хwә рʹаст дәрхи, һе баш ә сәр ван шашийед хwә һин би хәйсәт-һʹöнöред баш нав хwәда пешда бини. Дьбә кö тәрʹа лазьм ә һе зедә сәбре, qәнщийе у хwәгьртьне бьди кʹьфше? Ле öса жи бир нәкә дәрһәqа мьлуктийе, әʹдьлайе у һʹьзкьрьне (Галати 5:22, 23). Жь шашийед хwә тö һин дьби wәки щарәкә дьн чь гәрәке нәки. Гәләк дина хwә нәдә wе йәке, кö әв йәк ча сәр тә һʹöкöм буйә. Һәрге тö һьнә тьшта бь һʹәнәк у кʹән дәрбаз ки, тöйе хwә рʹьһʹәт тʹәхмин ки.

КʹАР ЖЬ НЬҺЕРʹАНДЬНА РʹАСТ

Чахе әм ньһерʹандьна рʹаст сәр шашийа хwәй дькьн, һьнге әм хwә рʹаст дьдьнә кʹьфше, дьлрʹьһʹәт дьбьн у тʹәви йед дьнена жи әʹдьлайеда ньн. Һәрге әм дьхәбьтьн кö жь шашийед хwә һин бьн, әм даһа билан дьбьн у мәрийарʹа һеса дьбә тʹәви мә шьхöлкʹарийе бькьн. Öса әме нә жи гәләк дьлтәнг бьн у дәрһәqа хwә жи хьраб нәфькьрьн. Чахе әм фәʹм дькьн у дьвиньн, wәки йед дьн жи сәр шашийед хwә дьхәбьтьн, мәрʹа даһа һеса дьбә жь wана фәʹм бькьн. Һе фәрз әw ә кö әм һин дьбьн чʹәʹв бьдьнә Хwәде, кö һʹьзкьрьне бьдьнә кʹьфше у һазьр бьн бьбахшиньн (Колоси 3:13).

Шашийа Зәйнәбе дәрһәqа кʹижани кö жоре һатьбу готьне, малбәта wе дьлтәнг кьр? Һәмьки на. Һәр кәси бь кʹән сәр wе йәке ньһерʹи, хут Зәйнәбе хwәха, у wана wәʹде хwә рʹьнд дәрбаз кьрьн һәла һе бе рʹьштә жи! Чәнд сал шунда дö нәбийед wе әв qәwьмандьн зарʹед хwәрʹа гьли кьрьн у кьрьнә бира хwә, әw wәʹде баш йе кö wана тʹәви кальк-пирке хwә дәрбаз кьрьн. Әw тʹәне шашийа бьчʹук бу!