Пьрсед Хwәндәвана

Паwлосе шанди ньвиси, wәки Йаһоwа «наһелә кö һун жь qәwата хwә дәр бенә щерʹьбандьне» (1 Корн. 10:13). Дьбә кö әв те һʹәсабе, wәки Йаһоwа пешда дьвинә һәла әм чьqаси дькарьн тәйах кьн у паше дьжберә кö әм рʹасти кʹижан тәнгасийа бен?

Wәрьн әм дәрһәqа ве йәке хәбәр дьн. Щәм бьраки мә, кöрʹе кʹижани кö хwә кöшт, пьрсед öса пешда һатьн: «Гәло Йаһоwа пешда дит кö әме бәр мьрьна кöрʹе хwә тәйах кьн? Дьбәкә әw йәк Хwәде сафи кьр кö бьqәwьмә, чьмки заньбу wәки әм дькарьн тәйах кьн?» Ле гәло әw рʹаст ә wәки Йаһоwа һәр тьшти контрол дькә чь жи әʹмьре мәда дьqәwьмә?

Һәрге әм 1 Корьнтʹи 10:13 леколин бькьн, әме бьвиньн wәки Кʹьтеба Пирозда тʹö мәʹни тʹöнә баwәр бькьн, кö йанчь Йаһоwа пешда дьньһерʹә әм чь дькарьн тәйах кьн у әме рʹасти кʹижан щерʹьбандьна бен. Wәрен әм шеwьр кьн дәрһәqа чар мәʹнийа wәки чьрʹа әw йәк öса нинә.

Йа пешийе, Йаһоwа мәрьварʹа азайа бьжартьне дайә. Әw дьхwазә wәки әм хwәха рʹийа жийина хwә бьжберьн (Qан. Дщр. 30:19, 20; Йешу 24:15). Һәрге әм дьжберьн рʹийа кö Хwәде хwәш те, әм дькарьн баwәр бьн, кö әwе рʹебәрийа гавед мә бькә (Мәтʹлк. 16:9). Ле һәрге әм рʹийа нәрʹаст дьжберьн, әме бьчьньн әw чь кö дьчиньн (Галт. 6:7). Демәк һәрге Йаһоwа бьжбарта кö әм рʹасти кʹижан щерʹьбандьна бен у кʹижан на, wе öса дәркʹәта кö әw синор дькә азайа бьжартьна мә.

Йа дöда, Йаһоwа мә хwәй накә жь wәхт у qәwьмандьна (Wаиз 9:11). Жь бо щи у wәʹдәки нәбаш, qәзи йан тьштәки хьраб дькарә бе сәре мә. Щарәке Иса хәбәр да дәрһәqа qәзики, кʹидәре кö 18 мәрьв һатьбун кöштьне, жь бо wе йәке кö бьрщәк кʹәтьбу сәр wан. Иса да кʹьфше кö әw qәwьмандьн qьрарʹа Хwәде нибу (Луqа 13:1-5). Ләма жи wе нәрʹаст бә бьфькьрьн кö йанчь Хwәде пешда сафи дькә, wәки кʹи qәзийада wе сах бьминә у кʹи wе бьмьрә.

Йа сьсийа, пьрса амьнийе мә һәр кәси дькʹәвә. Бькьнә бира хwә кö Шәйтʹан амьнийа һʹәму мәрийа, йед кö Йаһоwарʹа хьзмәт дькьн, дькә бьн шьке йанчь әме нькарьбьн wәʹде щерʹьбандьна амьн бьминьн (Иб. 1:9-11; 2:4; Әʹйан. 12:10). Һәрге Йаһоwа мә хwәй кә жь тәнгасийа тʹәне жь бо wе йәке кö әме нькарьбьн тәйах кьн, öса wе бе кʹьфше кö Шәйтʹан рʹаст бу чахе гот кö әм сәва һʹалхwәшийа хwә Хwәдерʹа хьзмәт дькьн.

Йа чара, Йаһоwа нахwазә пешда һʹәму тьшти бьньһерʹә чь кö әʹмьре мәда дьqәwьмә. Һәрге әwи бьхwәста бьньһерʹә, wе бьһата һʹәсабе кö йанчь Хwәде пешда дьжберә wәки әм рʹасти чь щерʹьбандьна бен у һьм жи кö әw ахьрийа мә жи занә. Ле ньһерʹандьна öса нә ль сәр һʹиме Ньвисаред Пироз ә. Һәмьки Хwәде дькарә ль ахьрийе бьньһерʹә (Иша. 46:10). Ле Кʹьтеба Пироз нишан дькә кö Хwәде хwәха нахwазә пешда бьньһерʹә һәр тьшти чь кö ахьрийеда бьqәwьмә (Дәстп. 18:20, 21; 22:12). Йаһоwа Хwәдайе һʹьзкьрьн у һәq ә, ләма жи әw азайа бьжартьне жь мә настинә (Qан. Дщр. 32:4; 2 Корн. 3:17).

Ле wәки öса нә, чаwа фәʹм кьн әван гьлийед Паwлос: «Хwәде . . . наһелә кö һун жь qәwата хwә дәр бенә щерʹьбандьне»? Әw созе Йаһоwа кö Паwлос ньвиси, нә кö тенә сери пешийа щерʹьбандьна, ле wәʹде щерʹьбандьна. Гьлийед Паwлос мә дьдьнә баwәркьрьне, кö фьрqи тʹöнә әм рʹасти чь щерʹьбандьна бен жийина хwәда, Йаһоwа wе әʹсәйи али мә бькә һәрге әм итʹбарийа хwә wи тиньн (Зәб. 55:22). Әw гьли ль сәр һʹиме дö рʹастийед сәрәкә нә.

Йа пешьн, щерʹьбандьнед кö әм рʹаст пе тен, öса жи «тенә сәре мәрьвед майин». Һʹәта кö әм дьнйа Шәйтʹанда дьжин, әм һʹәмушк жи рʹасти дәрәщед чәтьн бен, дьqәwьмә һәла һе qәзийа жи. Ле һәрге әм хwә ль Йаһоwа бьгьрьн, әме бькарьбьн әван щерʹьбандьнада тәйах кьн у амьн бьминьн (1 Пәт. 5:8, 9). Ль wан рʹезада йе кö ньвисар ьн пешийа 1 Корьнтʹи 10:13, Паwлос гьли дькә дәрһәqа щерʹьбандьнед Исраелийа, йед кö дь бәрʹийеда рʹасти wан һатьбун (1 Корн. 10:6-11). Әwед кö итʹбарийа хwә Йаһоwа дьанин, дькарьбун щерʹьбандьнада тәйах кьн. Паwлос чар щара дьбежә, wәки «жь wан һьнәка» нәгöһдарийа хwә данә кʹьфше. Ле йазьх, жь бо wе йәке кö һьнә жь wан Исраелийа итʹбарийа хwә Хwәде нәанин, дьле wан чу пәй хwәстьнед нәрʹаст.

Йа дöда, «Хwәде амьн ә». Чахе әм дина хwә дьдьн, кö чаwа Йаһоwа бәреда дәрһәqа хьзмәткʹаред хwә хәм дькьр, әм дьвиньн кö әw бь амьни аликʹарийе дьдә wан «йед кö wи һʹьз дькьн у әʹмьред wи дьqәдиньн» (Qан. Дщр. 7:9). Әм пеһʹәсийан кö Йаһоwа тʹьме хwәйе созе хwә йә (Йешу 23:14). Жь ве йәке те кʹьфше, кö әм дькарьн баwәр бьн wәки: 1) Әw wе нәһелә кö щерʹьбандьнед мә öса мәзьн бьн, wәки әме нькарьбьн wана тәйах кьн, у 2) «әwе . . . дәлиләке жи бькә» сәва мә.

Гәло Йаһоwа ча дәлиләке дькә бона wан, йед кö wәʹде щерʹьбандьна итʹбарийа хwә wи тиньн? Һәмьки һәрге әw йәк qьрара wи бә, Йаһоwа дькарә әwан щерʹьбандьна перʹа-перʹа бьдә һьлдане. Ле һәла бькьнә бира хwә гьлийед Паwлос: «Әwе [Йаһоwа] дәлиләке жи бькә, кö һун бькарьбьн тәйах кьн». Гәләк дәрәщәда Йаһоwа «дәлиләке» дькә, демәк дьдә мә әw йәк, чь кö лазьм ә сәва кö тәйах кьн. Wәрен әм хәбәр дьн дәрһәqа һьнә тьшта, бь сайа чь жи Йаһоwа дәлиләке бона мә дькә:

• Йаһоwа «нава һʹәму тәʹли-тәнгийада дьл дьдә бәр мә» (2 Корн. 1:3, 4). Әw дькарә һʹьш у дьле мә рʹьһʹәт кә бь сайа Хәбәра хwә у рʹöһʹе хwәйи пироз. Һьм жи Йаһоwа бь сайа хwарьна рʹöһʹани, кö әм жь хöламе амьн дьстиньн, дькарә бәрдьлийе бьдә мә (Мәт. 24:45; Йуһʹн. 14:16; Рʹом. 15:4).

• Йаһоwа дькарә бь рʹöһʹе пироз рʹебәрийа мә бькә (Йуһʹн. 14:26). Чахе щерʹьбандьн пешда тен, рʹöһʹе пироз дькарә али мә бькә кö биньн бира хwә сәрһатийед у принсипед жь Кʹьтеба Пироз у паше сафи кьн кö чаwа хwә кʹьфш кьн.

• Йаһоwа дькарә мьлйакʹәтед хwә бьдә хәбате, wәки әwана али мә бькьн (Ибрн. 1:14).

• Йаһоwа дькарә бь хушк-бьра жи али мә бькә, йед кö бь хәбәр у шьхöлед хwә дькарьн мә qәwи кьн (Колс. 4:11).

Демәк чь әм пеһʹәсийан жь гьлийе Паwлосе шанди, йед кö 1 Корьнтʹи 10:13-да ньвисар ьн? Йаһоwа нажберә кö әм рʹасти кʹижан щерʹьбандьна гәрәке бен. Ле чахе жийина мәда чәтьнайи пешда тен, әм дькарьн баwәр бьн, кö: Һәрге әм бь тʹәмами итʹбарийа хwә Йаһоwа тиньн, әwе тʹö щар нәһелә кö әм жь qәwата хwә дәр бенә щерʹьбандьне; әwе тʹьме мәрʹа дәлиләке бькә, сәва кö әм бькарьбьн тәйах кьн. Бь рʹасти жи, әw гьли мә чьqас дьлгәрм дькьн!