Аликʹарийе Бьдьнә Зарʹед «Хәриба»

1, 2. а) Зарʹед кʹочбәра рʹасти чь чәтьнайа тен? б) Кʹижан пьрса әме ве тʹемайеда шеwьр кьн?

БЬРАКИ мә бь наве Щошуа гьли дькә: «Де-баве мьн кʹочбәр ьн. Мьн жь бьчʹуктайе малда тʹәви де-баве хwә у öса жи щьватеда сәр зьмане хwә хәбәр дьда. Ле чахе әз чумә мәкʹтәбе, әз ида һини wи зьмани бум кʹидәре мә дьжит. Нава чәнд салада, әз öса һини wи зьмани бум, кö мьн ида зьмане щьвате фәʹм нәдькьр, у әʹрф-әʹдәтед де-баве мьн жи бона мьн ида хәриб бун». Чь кö тʹәви Щошуа qәwьми, гәләк щар тʹәви зарʹед кʹочбәра дьqәwьмә.

² Иро 240 000 000 зедәтьр мәрьв, wәлате хwәда нажин. Һәрге һун кʹочбәр ьн у зарʹед wә һәнә, гәло һун ча дькарьн али зарʹед хwә бькьн, сәва әwана рʹöһʹанида qәwи бьн у «нава рʹастийеда» бьминьн? (3 Йуһʹн. 4) У ве йәкеда ча йед дьн дькарьн али wә бькьн?

ДЕ-БАВНО, БЬБЬНӘ МӘСӘЛА БАШ БОНА ЗАРʹЕД ХWӘ

3, 4. а) Де-бав ча дькарьн бьбьнә мәсәла баш бона зарʹед хwә? б) Де-бав гәрәке жь зарʹед хwә чь дәʹwа нәкьн?

³ Де-бавно, сәва кö зарʹед wә бьбьнә достед Йаһоwа у жийина һʹәта-һʹәтайе бьстиньн, мәсәла wә гәләк фәрз ә. Чахе зарʹед wә дьвиньн кö һун «бәре пешьн ль Пʹадшатийа Хwәде» дьгәрʹьн, әwана һин дьбьн итʹбарийа хwә Йаһоwа биньн бона һʹәwщед хwәйи һәррʹожи (Мәт. 6:33, 34). Де-бавно, нәкʹәвьнә пәй һәбуке. Тьштед материали бьра бона wә щийе пешьн нәгьрьн. Нәкʹәвьнә бьн дәйна. «Хьзна . . . ль әʹзмен» бьгәрʹьн, демәк qәбулкьрьна Йаһоwа, нә кö һәбуке йан жи «пәсьна» алийе мәрьвада. (Бьхунә Марqос 10:21, 22; Йуһʹн. 12:43).

⁴ Бьра öса нибә кö жь бо гәләк шьхöла, wәʹде wә нәминә бона зарʹед wә. Зарʹед хwәрʹа бежьн, wәки һун wанрʹа фьрнаq дьбьн гава әwана Йаһоwа датиньн щийе пешьн, у пәй һәбуке у нав-дәнге хwә накʹәвьн. Ве дьнйайеда гәләк дьфькьрьн кö зарʹ гәрәке һәр тьшти бькә, wәки де-бав рʹьһʹәт у бехәм бьжин, ле әw ньһерʹандьн нә ль гора Кʹьтеба Пироз ә. Бир нәкьн, «нә кö гәрәке зарʹ бона де-бава бькьн, ле де-бав бона зарʹа» (2 Корн. 12:14).

ДЕ-БАВНО, БЬРА ЗЬМАН РʹЕ WӘ НӘГЬРӘ

5. Чьрʹа де-бав гәрәке дәрһәqа Йаһоwа тʹәви зарʹед хwә хәбәр дьн?

⁵ Чаwа һатьбу пʹехәмбәртикьрьне, мәрьв жь һʹәму мьләта йед кö бь щурʹә-щурʹә зьмана хәбәр дьдьн, тенә тʹәшкиләта Йаһоwа (Зәкәр. 8:23). Ле фьрqийа ортʹа зьмане де-бава у зарʹед wан, дькарә чәтьнайе пешда бинә. Де-бавно wәрʹа дьбәкә чәтьн бә рʹастийе зарʹед хwә һин кьн. Ле зарʹед wә шагьртед wәйи лапи фәрз ьн. Һун гәрәке wана Кʹьтеба Пироз һин кьн, чьмки öса әwана wе Йаһоwа «нас» бькьн у бькарьбьн жийина һʹәта-һʹәтайе бьстиньн (Йуһʹн. 17:3). Сәва кö зарʹед wә тʹәмийед Йаһоwа пебьһʹәсьн, һун гәрәке тʹьме тʹәви wан дәрһәqа Хwәде хәбәр дьн. (Бьхунә Qануна Дöщари 6:6, 7.)

6. Зарʹед wә чь кʹаре дькарьн бьстиньн һәрге зьмане wә һин бьн? (Бьньһерʹә шькле әʹwльн.)

⁶ Зарʹед wә wе зьмане хәриб һин бьн жь мәкʹтәбе у жь мәрьвед дор бәре хwә. Ле зьмане wә әwана wе һин бьн, һәрге тʹьме тʹәви wә сәр зьмане wә хәбәр дьн. Чахе зарʹ зьмане wә бьзаньбьн, wе wанрʹа һеса бә дьле хwә wәрʹа вәкьн. Диса кʹарәк һәйә чахе зарʹ сәр чәнд зьмана хәбәр дьдьн. Һʹьше wан рʹьнд дьхәбьтә у әwана һе рʹьнд мәрьва фәʹм дькьн. Һьн жи бь ве йәке һе зедә мәщала wан һәйә, кö хьзмәтийеда һе зедә бькьн. Каролина, де-баве кʹе жи кʹочбәр ьн, гьли дькә: «Щьвата зьмане хәрибда гәләк һʹәwас ә. Һьн жи чахе ль wедәре аликʹарийе дьдьм, кʹидәре кö һʹәwщәти һәйә, әз гәләк шабуне дьстиньм».

7. Һун чь дькарьн бькьн һәрге алийе зьманда малбәта wәда чәтьнайи һәйә?

⁷ Зарʹед кʹочбәра һини әʹдәт у зьмане хәриб дьбьн, у ләма гәләк жь wана ида нахwазьн у һәла һе жи ида нькарьн сәр зьмане де-баве хwә хәбәр дьн. Де-бавно, һәрге зарʹед wә жи öса ньн, wе баш бә кö һун әwи зьмане хәриб гоне һьнәки һин бьн. Һәрге һун хәбәрдана wан фәʹм бькьн, бьзаньбьн әwана чьва мьжул дьбьн, дәрсед wанә мәкʹтәбеда фәʹм бькьн, у хwәха бькарьбьн тʹәви дәрсдаред wан хәбәр дьн, öса wе wәрʹа дьһа һеса бә зарʹед хwә нава рʹастийеда мәзьн кьн. Бәле, сәва зьмане тʹәзә һин бьн, лазьм ә һьнәки щәфе бьвиньн, wәʹде хwә хәрщ кьн у мьлук бьн. Ле бьдьнә бәр чʹәʹве хwә, һәрге зарʹа wә кәрʹ буйа нәбьһиста, һуне зьмане кәрʹ-лала һин буна сәва тʹәви wи хәбәр дьн, рʹаст ә? Зарʹа кö сәр зьмане дьн һе рʹьнд хәбәр дьдә, бона wи жи лазьм ә щәфе бьвиньн, öса нинә?a

8. Һун ча дькарьн али зарʹед хwә бькьн, һәрге һун зьмане wан рʹьнд фәʹм накьн?

⁸ Һьнә де-баварʹа чәтьн ә зьмане тʹәзә һин бьн, сәр кʹижани зарʹед wан хәбәр дьдьн. Ләма жи wанрʹа дькарә һе чәтьн бә зарʹед хwәрʹа «ньвисаред пироз» шьровәкьн (2 Тимтʹ. 3:15). Һәрге һун жи wи һʹалида ньн, бәрхwә нәкʹәвьн. Һуне бькарьбьн али зарʹед хwә бькьн wәки әwана Йаһоwа нас кьн у һʹьз бькьн, ле тʹәне лазьм ә һун һьнәки щәфе бьвиньн. Рʹуспи бь наве Шан тинә бира хwә: «Дийа мә кö тʹәне мә хwәй дькьр, ньзаньбу әw зьман кʹижан мә рʹьнд фәʹм дькьр. Мьн у хушка хwә сәр зьмане де рʹьнд хәбәр нәдьда. Ле чахе мә дьдит кö дийа мә ча Кʹьтеба Пироз леколин дькә, дöа дькә, у һәр тьшти дькә сәва һәр һʹәфти qöльхкьрьна тʹәви малбәте дәрбаз кә, мә фәʹм кьр wәки йа лапә фәрз әw ә, кö Йаһоwа нас бькьн».

9. Де-бав ча дькарьн али зарʹед хwә бькьн, кʹижанарʹа лазьм ә сәр дö зьмана һин бьн?

⁹ Дьqәwьмә һьнә зарʹарʹа лазьм бә дәрһәqа Йаһоwа сәр дö зьмана һин бьн. Гәло чьрʹа? Чьмки әwана мәкʹтәбеда сәр зьманәки хәбәр дьдьн, ле малда сәр зьманәки дьн. Ләма жи һьнә де-бав әʹдәбйәтед нәшьркьри, аудио ньвисандьна, у видео сәр һәрдö зьмана жи дьдьнә хәбате. Бәле, кʹочбәр гәрәке wәʹдә хәрщ кьн у хwә бьдьнә щәфе, сәва кö зарʹед wан достийа хwә тʹәви Йаһоwа qәwи кьн.

ЩЬВАТА КʹИЖАН ЗЬМАНИ БЬЖБЕРЬН?

10. а) Малбәтеда кʹе гәрәке сафи кә, кö һәрʹьн щьвата кʹижан зьмани? б) Пешийа сафикьрьне малхе мале гәрәке чь бькә?

¹⁰ Чахе йед «хәриб» дури wан Шәʹдед Йаһоwа дьжин йед кö сәр зьмане wан хәбәр дьдьн, лазьм ә әwана һәрʹьн щьвата сәр зьмане wи щийи кʹидәре әwана дьминьн (Зәб. 146:9). Ле һәрге незики wан һәйә щьвата сәр зьмане wани де, ида пьрс пешда те: Гәло малбәта wәрʹа һе баш ә һәрʹьн щьвата кʹижан зьмани? Әwе пьрсе гәрәке малхе мале сафи кә. Әw гәрәке кʹур бьфькьрә, дöа бькә у öса жи тʹәви жьн-зарʹед хwә шеwьр бькә (1 Корн. 11:3). Ле гәло малхе мале wәʹде ве сафикьрьне гәрәке чь һьлдә һʹәсаб? Кʹижан принсипед жь Кʹьтеба Пироз әw дькарә бьдә хәбате? Wәрә чәнд принсипа шеwьр кьн.

11, 12. а) Сәва зарʹ жь щьвате кʹаре бьстинә әw йәк ча гьредайи йә тʹәви зьман? б) Чьрʹа һьнә зарʹ нахwазьн зьмане де-баве хwә һин бьн?

¹¹ Де-бав гәрәке рʹьнд бьщерʹьбиньн, һәла зарʹед wан бь рʹастийе һʹәwще чь нә. Сәва кö зарʹ кʹур рʹастийе фәʹм бькә, бәс нинә тʹәне һәр һʹәфти чәнд сьһʹәта һәрʹә щьвате. Ле бьфькьрьн дәрһәqа ве йәке: Һәрге зарʹ дьчә сәр щьвата wи зьмани кʹижани әw рʹьнд фәʹм дькә, әw дькарә һәма тʹәне сәр щьвате һаqас тьшт һин бә, кö дьбәкә де-бав әʹщебмайи бьминьн. Ле һәрге зарʹерʹа зьмане щьвате бь тʹәмами фәʹмдари нинә, әw ида һаqас кʹаре настинә. (Бьхунә 1 Корьнтʹи 14:9, 11.) У һьн жи зьмане де, нә һәртʹьм зьмане дьле зарʹе йә. Мәсәлә, һьнә зарʹ дькарьн һин бьн сәр щьвата щаба хwә бьдьн, пешанине бькьн у сәр зьмане де-баве хwә хәбәр дьн, ле әw йәк нә жь дьле wан бә.

¹² Ле тʹәне зьман нинә кö дькарә сәр дьле зарʹе һʹöкöм кә. Щошуа дәрһәqа кʹижани мә жоре гот, һәма әв йәк тʹәхмин кьр. Хушка wи Әстәр дьбежә: «Бона зарʹа зьман, әʹрф-әʹдәт у баwәрийа де-бава һәвва гьредайи нә». Һәрге бона зарʹа әʹдәте де-бава ида дьбә хәриб, әwана дьбәкә нә жи бьхwазьн зьмане де-бава һин бьн у хwә ль баwәрийа wан бьгьрьн. Пьрс пешда те: Гәло де-баве кʹочбәр чь дькарьн бькьн?

13, 14. а) Чьрʹа мер у жьнәк кö кʹочбәр ьн, сафи кьрьн кö тʹәви малбәта хwә дәрбази щьвата зьмане хәриб бьн? б) Ча әwана рʹöһʹанида qәwи ман?

¹³ Де-бавед кö Мәсиһи нә, рʹöһʹанийа зарʹед хwә датиньн щийе пешьн, нә кö кʹара хwә дьгәрʹьн (1 Корн. 10:24). Самуйел баве Щошуа у Әстәре, гьли дькә: «Мьн у жьна хwә дина хwә дьдайе, һәла зарʹед мә сәр кʹижан зьмани рʹöһʹанида qәwи дьбьн, у мә дöа дькьр wәки Хwәде биланийе бьдә мә. Щаба дöайе мә öса нибу ча әм дьфькьрин. Ле гава мә дит кö зарʹед мә кем кʹаре дьстиньн жь щьвата сәр зьмане мә, мә сафи кьр дәрбази щьвата зьмане wи щийи бьн, кʹидәре әм дьминьн. Әм тʹәвайи дьчунә щьвате у хьзмәтийе. Öса жи мә жь щьвата wедәре хушк-бьра тʹәглиф дькьр сәр хwарьне у екскурсийайе. Әwан һʹәму тьшта али зарʹед мә кьр wәки хушк-бьра нас бькьн, у öса жи Йаһоwа нас бькьн нә кö тʹәне ча Хwәде, ле ча Бав у Дост жи. Мә фәʹм дькьр кö әw йәк дьһа фәрз ә, нә кö әwана зьмане мә бьзаньбьн».

¹⁴ Самуйел дьбежә: «Сәва кö әз у жьна мьн рʹöһʹанида qәwи бьминьн, әм öса жи дьчунә сәр щьвата зьмане хwә. Бәле, wәʹде мә һьндьк бу у әм дьвәстийан. Ле әм зәʹф рʹази нә жь Йаһоwа, кö әwи щәфе мә у qöрбанед мә кʹәрәм кьр. Ньһа се зарʹед мә Йаһоwарʹа хьзмәт дькьн ча хьзмәткʹаред һәртʹьм».

ЩАҺЬЛ ЧЬ ДЬКАРЬН БЬКЬН

15. Чьрʹа хушкәк бь наве Кристина фькьри кö дькарә һе зедә кʹар бькә ль щьвата зьмане щийе кö әw дьжи?

¹⁵ Чахе зарʹ мәзьн дьбьн, дьбәкә тедәрхьн кö әwана һәрге дәрбази щьвата wи зьмани бьн кʹижани рʹьнд фәʹм дькьн, wе бькарьбьн һе баш Йаһоwарʹа хьзмәт бькьн. Һьнге, де-бав гәрәке нәфькьрьн кö зарʹ wана һʹьз накьн. Кристина тинә бира хwә: «Мьн зьмане де-баве хwә заньбу, ле щьватеда әw зьман мьнрʹа чәтьн бу фәʹм кьм. Чахе әз 12 сали бум, әз чумә сәр щьвата мәзьн сәр зьмане мәкʹтәба хwә. Һәма жь wи wәʹдәйи, мьн фәʹм кьр wәки чь кö әз дьбьһем рʹасти йә! Паше чахе мьн дәстпекьр дöа бькьм сәр зьмане мәкʹтәба хwә, мьн ида жь дьле хwә Йаһоwарʹа хәбәр дьда!» (Кʹар. Шанд. 2:11, 41) Чахе Кристина ида мәзьн бу, әwе де-баве хwәрʹа гот, wәки сафи кьрийә дәрбази щьвата зьмане wи щийи бә. Әw гьли дькә: «Әз дәрһәqа Йаһоwа педьһʹәсийам сәр зьмане мәкʹтәба хwә, у әwе йәке әз һелан кьрьм рʹöһʹанида пешда һәрʹьм». Зутьрәке, Кристина бу пешәнг у бь шабуне хьзмәт дькә.

16. Чьрʹа хушкәк бь наве Надиа ша йә, кö щьвата зьмане хwәда ма?

¹⁶ Щаһьлно, дьбәкә һун дьфькьрьн кö һе баш ә дәрбази щьвата зьмане wи щийи бьн, кʹидәре һун дьминьн. Һәрге öса нә, пьрсе бьдьнә хwә, һун чьрʹа дьхwазьн дәрбази wе щьвате бьн. Һәрге һун дәрбаз бьн, гәло әw йәк wе али wә бькә, кö дьһа незики Йаһоwа бьн? (Аqуб 4:8). Йан һун дьхwазьн дәрбаз бьн, сәва аза бьн у де-баве wә һʹәму тьштида wә контрол нәкьн? Надиа кö ньһа Бәйтʹәледа хьзмәт дькә, дьбежә: «Чахе әз, хушкед мьн у бьре мьн мәзьн бун, мә хwәст дәрбази щьвата зьмане wи щийи бьн, кʹидәре әм дьман». Ле де-баве wе заньбун wәки әw йәк бона рʹöһʹанийа зарʹед wан wе нә баш бә. Надиа дьбежә: «Ньһа әм жь де-баве хwә гәләк рʹази нә, wәки wана щәфа дькʹьшанд сәва әм зьмане wан һин бьн у щьвата wи зьманида бьминьн. Бь wе йәке әʹмьре мә һʹәwас бу у дьһа зәʹф мәщал мәрʹа вәбун wәки әм али мәрьвед дьн жи бькьн сәва Йаһоwа нас кьн».

ЙЕД ДЬН ЧА ДЬКАРЬН АЛИКʹАРИЙЕ БЬДЬН?

17. а) Йаһоwа щабдари дайә кʹе сәва зарʹа һин кьн у ширәт кьн? б) Де-бав жь кʹе дькарьн аликʹарийе бьхwазьн сәва зарʹед хwә рʹастийе һин кьн?

¹⁷ Сәва зарʹа рʹастийе һин кьн, Йаһоwа щабдари дайә де-бава, нә кö кальк-пирька йан жи кәсәки дьн. У әw рʹасти жи qәдьрәки мәзьн ә сәва де-бава. (Бьхунә Мәтʹәлок 1:8; 31:10, 27, 28.) Де-бав йед кö ньзаньн зьмане wи щийи кʹидәре әwана дьжин, ле зарʹед wан ви зьмани заньн, дькарьн аликʹарийе бьхwазьн. Ле әw найе һʹәсабе кö әwана нахwазьн щабдарийа хwә биньн сери ләма аликʹарийе дьхwазьн. Бь ве йәке жи әwана дькарьн «бь ширәт у һинкьрьна Хöдан» зарʹед хwә мәзьн кьн (Әфәс. 6:4). Мәсәлә, де-бав дькарьн жь рʹуспийа ширәта һьлдьн кö чаwа qöльхкьрьна тʹәви малбәте дәрбаз кьн у чаwа сәва зарʹед хwә һәвалед баш бьжберьн.

18, 19. а) Ча хушк-бьред рʹöһʹани дькарьн аликʹарийе бьдьнә зарʹа? б) Де-бав чь гәрәке бәрдәwам бькьн?

¹⁸ Бәʹса хәбәре, де-бав щара дькарьн малбәтед дьн жи тʹәглиф кьн сәр qöльхкьрьна малбәте. Хенщи ве йәке, щаһьл wе кʹаре бьстиньн, һәрге һәвалтийе бькьн тʹәви хушк-бьред щерʹьбанди, бәʹса хәбәре тʹәви wан һәрʹьн хьзмәтийе у тʹәви wан wәʹдә дәрбаз кьн (Мәтʹлк. 27:17). Шан дәрһәqа кʹижани мә жоре гот, гьли дькә: «Әw бьред кö әз бьн пʹәре хwәда хwәй дькьрьм, тʹьме бира мьнда ньн. Чахе wана али мьн дькьр wәки пе дәрса сәр щьвате дәркʹәвьм, әз жь wана гәләк тьшт һин дьбум. У һʹәwаса мьн дьһат чахе мә чаwа кʹом wәʹде хwә дәрбаз дькьр».

¹⁹ Әw хушк-бьред кö де-бав wана дьжберьн сәва аликʹарийе бьдьнә зарʹед wан, гәрәке тʹьме зарʹа һелан кьн кö qәдьре де-баве хwә бьгьрьн. Мәсәлә, әwана дькарьн дәрһәqа де-бава баш хәбәр дьн у щабдарийа де-бава һьлнәдьн сәр хwә. Һьн жи әwана гәрәке öса бькьн, wәки нә щьватеда, нә жи жь щьвате дәр тʹö кәс щурʹәки майин нәфькьрә у нәбежә кö тьштәки нәщайиз те кьрьне (1 Пәт. 2:12). Де-бав гәрәке ширәткьрьна зарʹа алийе рʹöһʹанида нәкьнә стуйе кәсәки дьн. Әwана гәрәке дина хwә бьдьне кö зарʹед wан ча һин дькьн у һьн жи бәрдәwам кьн хwәха зарʹед хwә һин кьн у ширәт кьн.

20. Ча де-бав дькарьн али зарʹед хwә бькьн, кö бьбьнә хьзмәткʹаред Йаһоwа?

²⁰ Де-бавно, бона аликʹарийе Йаһоwарʹа дöа бькьн у чь дәсте wә те бькьн. (Бьхунә 2 Дирок 15:7.) Бьра достийа зарʹед wә тʹәви Йаһоwа сәр щийе пешьн бә. Алийе хwәда һʹәму тьшти бькьн сәва Хәбәра Хwәде бьгьһижә дьле зарʹа. Тʹö щар баwәрийа хwә öнда нәкьн кö зарʹед wә дькарьн бьбьнә хьзмәткʹаред баш. Гава зарʹед wә гьлийед жь Хәбәра Хwәде бьдьнә хәбате у чʹәʹв бьдьнә wә, һуне жи мина Йуһʹәннайе шанди хwә тʹәхмин кьн, йе кö дәрһәqа зарʹед хwәйи рʹöһʹани гот: «Шабуна мьнә жь ве мәстьр тʹöнә, чахе дьбьһем кö зарʹед мьн нава рʹастийеда дьжин» (3 Йуһʹн. 4).