Али Хәриба Бькьн «Бь Шабуне Хöдан Бьһʹәбиньн»

1, 2. а) Иро хушк-бьред мә рʹасти чь тәнгасийа тен? б) Дәрһәqа ве йәке кʹижан пьрс пешда тен?

БЬРАК бь наве Лежә, гьли дькә: «Гава Бурундийеда шәрʹ дәстпебу, малбәта мә сәр щьвата мәзьн бу. Мә дьдит мәрьв ча дьрʹәвийан, ча гöлә дькьрьн. Де-баве мьн у әм 11 зарʹ рʹәвин сәва әʹмьре хwә хьлаз кьн. Мә тʹәне һьнә тьшт тʹәви хwә һьлдабу. Һьнә нәфәред мә 1 600 км. рʹе чун у анщах гьһиштьнә кампа рʹәвийа Малавйайеда, ле йед дьн жь һәв бәла бун».

² Нав тʹәмамийа дьнйайеда, ньһа 65 000 000 зедәтьр мәрьв һәнә йед кö жь малед хwә рʹәвийанә жь бо шәрʹ йан жи зерандьне, у нава тʹәрихийеда ве һәжмаре зедәтьр тʹöнә буйә.a Нава wан рʹәвийада, бь һʹәзара Шәʹдед Йаһоwа жи һәнә. Гәләк жь wана мәрьвед хwәйи незик öнда кьрьнә у әм дькарьн бежьн һʹәму мал-һʹале хwә жи öнда кьрьнә. Ле хенщи wан тьшта, әwана диса рʹасти чәтьнайед дьн жи һатьнә. Гәло әм ча дькарьн али wан хушк-бьра бькьн, сәва әwана wан чәтьнайада бәрдәwам кьн Йаһоwарʹа хьзмәт кьн у шабуна хwә öнда нәкьн? (Зәб. 100:2) У әм ча дькарьн wан рʹәвийарʹа йед кö Йаһоwа нас накьн, һе баш мьзгинийе бәла кьн?

ЖИЙИНА ЙЕД РʹӘВИ

3. Иса у гәләк шагьртед wи чаwа бунә рʹәви?

³ Йаһоwа бь мьлйакʹәте хwә пешда готә Усьв, wәки Һеродәс Пʹадша дьхwазә Иса бькöжә. Ләма жи Иса у малбәта wи рʹәвинә Мьсьре у кʹәтьнә хәрибийе. Әwана ль wедәре ман һʹәта мьрьна Һеродәс (Мәт. 2:13, 14, 19-21). Паши гәләк сала, шагьртед Иса дьһатьнә зерандьне у әwана «бәлайи тʹопрахед Щьһустане у Самәрйайе бун» (Кʹар. Шанд. 8:1). Иса заньбу wәки гәләк шагьртед wи wе мәщбур бьн малед хwә бьһельн, ләма жи әwи гот: «Гава нав ви бажарида wә бьзериньн, бьрʹәвьнә бажарәки дьн» (Мәт. 10:23). Бәле, фьрqи тʹöнә жь бо чь жи мәрьв мала хwә бьһелә бьрʹәвә, йәкә әw зәʹф чәтьн ә.

4, 5. Чь хоф һәйә чахе йед рʹәви а) малед хwә дьһельн дьрʹәвьн? б) кампада дьжин?

⁴ Чахе рʹәви жь wәлат дьрʹәвьн, бона wан һьн рʹева дькарә хоф бә, һьн жи кампада. Бьре Лежә йе бьчʹук Гед, гьли дькә: «Әм бь һʹәфтийа рʹеда бун у нава бь сәда щьнйазарʹа дәрбаз дьбун. Wи чахи әз 12 сали бум. Ньгед мьн öса wәрьмин кö мьн нәфәрарʹа гот wәки мьн бьһельн һәрʹьн. Qә һʹьше баве мьнрʹа дәрбаз жи нәдьбу кö мьн нава wи шәрʹида бьһелә. Әwи али мьн дькьр. Һәр рʹож мә анщах хwә йолә дьбьр. Мә һәр гав Йаһоwарʹа дöа дькьр у һәwара хwә wи дьани. Щара мә тʹәне манго дьхwар, кʹижан кö мә рʹева тʹоп дькьр» (Фили. 4:12, 13).

⁵ Жь нәфәред Лежә һʹәчʹи зәʹф гәләк сала кампада дьжитьн, кʹижан кö тʹәшкиләта Мьләтед Йәкбуйи саз кьрьнә. Ле wедәре жи хоф бу. Лежә ньһа бәрпьрсийаре мьһале йә, әw дьбежә: «Wедәре гәләк мәрьв бе хәбат бун. Wана гәвәсти дькьр, ичʹкә вәдьхwарьн, хöмар дьлистьн, дьзи у бенамуси дькьрьн». Хушк-бьред мәйә кö wан кампада дьжитьн, сәва кö нәкʹәвьнә бәр байе wан мәрьва, гәрәке бь тʹәмами хwә ль щьвате бьгьртана (Ибрн. 6:11, 12; 10:24, 25). Әwан хушк-бьра wәʹде хwә бь аqьлайи хәрщ дькьрьн, мәсәлә гәләка ча пешәнг хьзмәт дькьрьн. Әwе йәке али wан кьр, wәки рʹöһʹанида сьст нәбьн. Wана шабуна хwә öнда нәдькьр, чьмки заньбун wәки жийина wанә кампада wәʹдәлу йә, чаwа кö жийина Исраелийа бәрʹийеда wәʹдәлу бу (2 Корн. 4:18).

ҺʹЬЗКЬРЬН ҺЬНДАВА ЙЕД РʹӘВИ

6, 7. а) Һʹьзкьрьна һьндава Хwәде, Мәсиһийа һелан дькә кö һьндава хушк-бьрада ча бьн? б) Мәсәле биньн.

⁶ «Һʹьзкьрьна Хwәде» мә һелан дькә, wәки әм жи һʹьзкьрьне хушк-бьрарʹа бьдьнә кʹьфше, илаһи wанрʹа йед кö чәтьнайада ньн. (Бьхунә 1 Йуһʹәнна 3:17, 18.) Мәсәлә, qьрʹна йәкеда чахе нава Мәсиһийед Щьһудайеда хәлайи бу, хушк-бьред щьватеда кʹе чьqас дькарьбу али wан кьрьн (Кʹар. Шанд. 11:28, 29). Паwлос у Пәтрусе шанди жи Мәсиһи һелан дькьрьн кö меванһʹьз бьн һьндава хушк-бьрада (Рʹом. 12:13; 1 Пәт. 4:9). Һәрге Мәсиһи хушк-бьред меванрʹа һʹьзкьрьна öса гәрәке бьдьнә кʹьфше, ле чьqас фәрз ә илаһи али wан хушк-бьра бькьн, йед кö бьн qәзийеда ньн, йан жи бона баwәрийа хwә тенә зерандьне! (Бьхунә Мәтʹәлок 3:27.)b

⁷ Wан пашwәхтийада бь һʹәзара Шәʹдед Йаһоwа Украинайа рʹоһлатеда мәщбур бун мал-һʹале хwә бьһельн бьрʹәвьн, чьмки wедәре шәрʹ дьчу. Йазьх, һьнәк жь wан һатьнә кöштьне. Ле хушк-бьред кö Украинеда щийе майин дьжитьн у йед Урьсете, жь wана гәләк бьрьнә малед хwә. Һәрдö wәлатада жи wана тʹәвнәбуйин хwәй дькьрьн. Әwана «нә пʹара дьнйайе» бун у бәрдәwам дькьрьн бь хирәт «мьзгинийа хәбәре» бәла дькьрьн (Йуһʹн. 15:19; Кʹар. Шанд. 8:4).

БАWӘРИЙА ЙЕД РʹӘВИ QӘWИ КЬН

8, 9. а) Йед рʹәви wәлате тʹәзәда рʹасти чь чәтьнайа тен? б) Чьрʹа әм гәрәке һьндава wанда сәбьр бьн у аликʹарийе бьдьнә wан?

⁸ Һьнә мәрьв мәщбур дьбьн кö wәлате хwәда дәрбази шәһәрәки дьн бьн. Ле һәнә гәләк мәрьв жи кö мәщбур бун дәрбази wәлатәки дьн бьн, кö wанрʹа нас нинә. Рʹаст ә ль wедәре дәwләт дьбәкә wанрʹа хwарьне, кʹьнща у щи-сьтʹаре дьдә, ле йәкә wанрʹа нәһеса йә. Мәсәлә, йед рʹәви кö жь wәлате гәрм дәрбази wәлате сар дьбьн, дьбәкә ньзаньн чь кʹьнща хwә кьн. Йан жи һәрге әwана гöндада дьман, дьбәкә ньзаньн чаwа һур-муред текникийә модерн йед мале бьдьнә хәбате.

⁹ Һьнә дәwләт али рʹәвийа дькьн, сәва әwана һеса һини гöһастьна бьн. Ле гәләк щар öса дьqәwьмә кö паши чәнд мәһа, рʹәви гәрәке ида хwәха бона хwә хәм кьн. Әw йәк һеса нинә, чьмки һʹәму тьшт дькʹәвә сәр стуйе wан. Бьдьн бәр чʹәʹве хwә, әwана гәрәке зьмане тʹәзә һин бьн, һини qанун у әʹдәтед wәлат бьн, һьн жи һин бьн чаwа хәрще wәлат дадьн, чаwа тьшта бькʹьрʹьн. Хенщи ве йәке, әwана гәрәке зарʹа бьвьнә мәкʹтәбе, wана ширәт кьн у һин кьн. Әw һʹәму тьшт чәтьн ә. Ләма жи әм гәрәке сәбьр бьн һьндава wан, qәдьре wан бьгьрьн у аликʹарийе бьдьнә wан (Фили. 2:3, 4).

10. Әм ча дькарьн баwәрийа wан хушк-бьред рʹәви qәwи кьн, йед кö һатьнә wәлате мә? (Бьньһерʹә шькле әʹwльн.)

¹⁰ Щара жь бо мәрьвед дәwләте, хушк-бьред мәрʹа чәтьн ә wәлате тʹәзәда щьвате бьвиньн. Һьнә тʹәшкиләтед дәwләте хушк-бьред мә дьдьнә тьрсандьне кö wе аликʹарийе нәдьнә wан. Әwана щара дькарьн бежьн, кö һәрге рʹәви фьлан хәбате qәбул нәкьн сәва щьватед хwә бәрʹнәдьн, wе бәри wан дьн жь wәлат дәрхьн. Ле сәд һʹәйф һьнәк тьрсийан у мәщбур бун хәбатед öса qәбул кьн. Ләма жи чахе хушк-бьред рʹәви тенә wәлате мә, гәләк фәрз ә әм дәрберʹа wана бьвиньн у аликʹарийе бьдьнә wан. Öса әwана wе тʹәхмин кьн кö әм бона wан хәм дькьн. Дьлшәwатийа мә у аликʹарийа мә дькарә баwәрийа wан qәwи кә (Мәтʹлк. 12:25; 17:17).

АЛИ ЙЕД РʹӘВИ БЬКЬН

11. а) Бәре әʹwльн кʹижан аликʹари рʹәвийарʹа лазьм ә? б) Рʹәви ча дькарьн рʹазибуна хwә бьдьнә кʹьфше?

¹¹ Бәре әʹwльн әм гәрәке али хушк-бьред рʹәви бькьн, wәки хwарьна wан һәбә, öса жи кʹьнщ у тьштед майин кö гәләк лазьм ьн.c Чахе әм һәла һе тьштәки бьчʹук жи бона wан дькьн, бәʹса хәбәре һәрге галстуке пʹешкʹеши бьраки кьн, әw бона wан тьштәки гәләк мәзьн ә у wана дьлгәрм дькә. Һьлбәт рʹәви wе дәʹwа нәкьн wәки али wан бькьн, ле әwана wе рʹази бьн кö аликʹарийе дьдьнә wан. Һәрге рʹәви öса бьн, хушк-бьред кö аликʹарийе дьдьнә wан, wе ша бьн. Ле фәрз ә wәки хушк-бьред рʹәви ахьрийеда хwәха бона һʹәwщед хwә хәм бькьн. Әw йәк wе али wан бькә, wәки qәдьре хwә бьзаньбьн у һәләqәтийа баш хwәй кьн тʹәви хушк-бьред хwә (2 Тʹеслн. 3:7-10). Ле йәкә әм гәрәке диса жи али wан бькьн.

12, 13. а) Чьда әм дькарьн аликʹарийе бьдьнә рʹәвийа? б) Мәсәле биньн.

¹² Әʹсәйи нинә гәләк пʹәре мә һәбә сәва аликʹарийе бьдьнә рʹәвийа. Әwана дьһа зәʹф һʹәwщә нә кö кʹеләка wан бьн у һʹьзкьрьна хwә wанрʹа бьдьнә кʹьфше. Мәсәлә, һун дькарьн wанрʹа нишан кьн, кö чаwа дькарьн шәһәрда һәрʹьн-бен у пе чь, кʹидәре хwарьна баш у әрʹзан бькʹьрʹьн. Йан жи һун дькарьн али wан бькьн, кö һащәта хwәрʹа дәстхьн, сәва пʹешәки һин бьн у пʹәре нане хwә чекьн. Ле йа лапә фәрз әw ә, кö али wан бькьн сәва әwана һини щьвата тʹәзә бьн. Һәрге дькарьн wана тʹәви хwә бьвьн щьвате. Öса жи wанрʹа бежьн кö әwана ча дькарьн мьһала wәда мьзгинийе бәла кьн, у тʹәви wан хьзмәт кьн.

¹³ Чар бьред щаһьл йед рʹәви, аликʹарийа мәзьн стандьн алийе рʹуспийед щьвата тʹәзәда. Әwан рʹуспийа әwана һин кьрьн кö чаwа авте бажон, ча компотәре бьдьнә хәбате у ча әʹламәтийа бьньвисьн сәва хwәрʹа хәбате бьвиньн. Һьн жи wана али wан щаһьла кьрьн, кö ча wәʹде хwә рʹаст хәрщ кьн, wәки бькарьбьн Йаһоwарʹа хьзмәт кьн (Галт. 6:10). Һьнә wәʹдә дәрбаз бу, у әw һәр чар бунә пешәнг. Бь сайа ве аликʹарийе у öса жи кö wана хwәха жи дьхwәстьн рʹöһʹанида һе пешда һәрʹьн, әwана гәш бун у нәкʹәтьнә бәр байе ве дьнйа Шәйтʹан.

14. а) Рʹәви гәрәке чьда мьqати хwә бьн? б) Мәсәле биньн.

¹⁴ Һʹәму Мәсиһи, демәк рʹәви жи гәрәке мьqати хwә бьн сәва пәй һәбуке нәкʹәвьн. Әw йәк гәләк хоф ә чьмки öса әwана дькарьн достийа хwә тʹәви Йаһоwа öнда кьн.d Лежә, бәʹса кʹижани мә жоре кьр у хушк-бьред wи, тиньн бира хwә кö әwана жь баве хwә дәрсәкә фәрз һин бунә, һәла һе жи гава әwана жь wәлате хwә дьрʹәвийан. Әwи гот: «Тьштед кö мә тʹәви хwә дьбьр ле әм һʹәwщә нибун, баве мьн йәк у йәк дьавит. Ахьрийеда әwи мәрʹа чәнтʹе вала нишан кьр у бь бәшәра хwәш мәрʹа гот: ‹Һун дьвиньн? Зедә тьшт wәрʹа нәлазьм ә›». (Бьхунә 1 Тимотʹейо 6:8.)

ҺʹӘWЩӘТИЙА РʹӘВИЙА ЙА ЛАПӘ МӘЗЬН

15, 16. а) Әм ча дькарьн рʹöһʹанида аликʹарийе бьдьнә рʹәвийа? б) Ча әм дькарьн һәйра wанда бьн?

¹⁵ Рʹәви һе зәʹф һʹәwще аликʹарийа рʹöһʹани у бәрдьлийе нә, нә кö һʹәwще пʹәра (Мәт. 4:4). Мәсәлә, рʹуспи дькарьн сәр зьмане wан әʹдәбйәта дәстхьн у али wан бькьн сәва әwана рʹасти wан бьра бен, йед кö сәр зьмане wан хәбәр дьдьн. Гәләк рʹәви жь малед хwә, нәфәред хwә, бьнәли wәлат у жь щьвате qәтийанә. Әwана һини чь бунә ида тʹöнә. Ләма жи әwана гәрәке һʹьзкьрьна Йаһоwа у дьлшәwатийе нава хушк-бьрада тʹәхмин кьн. Һәрге әwана жь хушк-бьра бәрдьлийе нәвиньн, әwана wе аликʹарийе бал нәбаwәра бьгәрʹьн, мәсәлә, бал wан йед кö дьбәкә жь wәлате wан ньн, әʹдәтед wан йәк ә у һʹаләкида ньн (1 Корн. 15:33). Әм гәрәке öса бькьн, wәки әwана щьватеда хwә тʹәхмин кьн ча мала хwәда. Бона мә qәдьр ә wәки әм дькарьн хwәйкьрьна хәрибада пьштгьрийа Йаһоwа бькьн (Зәб. 146:9).

¹⁶ Иса у малбәта wи нькарьбун вәгәрʹийана wәлате хwә, һʹәта кö хернәхwазе wан һʹöкöм дькьр. Иро гәләк рʹәви жи нькарьн вәгәрʹьн wәлате хwә, чьмки ль wедәре һʹал хьраб ә у һьнәк qә нә жи дьхwазьн вәгәрʹьн wедәре. Лежә гот: «Гәләк де-бав йед кö дитьнә ча нәфәред wан хьраб кьрьнә у кöштьнә, нькарьн зарʹед хwә диса бьвьн wи щийи кʹидәре кö әʹщеба öса qәwьмийә». Бона wан әw ешәкә гьран ә, у сәва кö али wан бькьн, хушк-бьра гәрәке һьндава wан рʹәвийа «шәwат бьн, һәв һʹьз бькьн, рʹәʹм у шкәсти бьн» (1 Пәт. 3:8). Һьнә рʹәви кö һатьнә зерандьне хwә жь мәрьва дур дьгьрьн, у шәрм дькьн сәва кәсәкирʹа кöла хwә гьли кьн, илаһи бәр зарʹед хwә. Сәва бькʹәвьнә һәйрʹа wан, пьрсәкә öса бьдьнә хwә: «Һәрге әз һʹале wанда бума, мьне бьхwәста кö һьндава мьнда ча буна?» (Мәт. 7:12).

БӘЛАКЬРЬНА МЬЗГИНИЙЕ РʹӘВИЙАРʹА

17. Мьзгини ча дьле рʹәвийа рʹьһʹәт дькә?

¹⁷ Иро гәләк рʹәви жь wәлатед öса рʹәвинә, кʹидәре кö шьхöле мәйи бәлакьрьна мьзгинийе qәдәхәкьри йә у тʹö щар wана мьзгини нәбьһистийә. Әʹфәрьм wан Шәʹдед Йаһоwайи хирәтрʹа, кö wан бь һʹәзара рʹәвийарʹа «хәбәра Пʹадшатийе» гьли кьрьнә (Мәт. 13:19, 23). Гәләк жь wан йед кö «баргьран» бун, сәр щьватед мә дьлрʹьһʹәти у бәрдьли дитьн у wана дәрберʹа тедәрхьстьн у готьн: «Рʹасти жи Хwәде нав wәда йә!» (Мәт. 11:28-30; 1 Корн. 14:25).

18, 19. Ча әм дькарьн сәрwахт бьн гава рʹәвийарʹа мьзгинийе гьли дькьн?

¹⁸ Әм гәрәке «сәрwахт» бьн у билан бьн гава рʹәвийарʹа мьзгинийе гьли дькьн (Мәт. 10:16; Мәтʹлк. 22:3). Бь сәбьр гöһ бьдьнә wана, ле тʹö щар дәрһәqа сәрwера у политика шеwьр нәкьн. Әм гәрәке пәй рʹебәрийа филиале у сәрwеред шәһәре хwә һәрʹьн. Бь ви щурʹәйи әме нә хwә, нә жи кәсәки дьн бькьн бьн qәзийе. Пебьһʹәсьн дәрһәqа дин у әʹдәтед wан рʹәвийа у бь qәдьр бьн һьндава wанда. Бәʹса хәбәре, һьнә рʹәви жь wан wәлата нә, кʹидәре кö жьн щурʹәки майин кʹьнща хwә дькьн. Ләма жи чахе рʹәвийарʹа мьзгинийе гьли дькьн, әм гәрәке кʹьнща öса хwә кьн wәки wана әʹщьз нәкьн.

¹⁹ Әм гәрәке чʹәʹв бьдьнә мәрьве Самәри, дәрһәqа кʹижани Иса мәсәледа гьли кьр, демәк аликʹарийе бьдьнә wан, йед кö кöл-дәрда дькʹьшиньн, фьрqи тʹöнә Шәʹдед Йаһоwа нә йан на (Луqа 10:33-37). Чахе әм wанрʹа мьзгинийе гьли дькьн, әw аликʹарийа лапә мәзьн ә. Рʹуспик кö али гәләк рʹәвийа кьрийә, дьбежә: «Гәләк фәрз ә дәрберʹа wанрʹа бежьн кö әм Шәʹдед Йаһоwа нә у кö нета мәйә сәрәкә әw ә кö рʹöһʹанида али wан бькьн, нә бь пʹәра. Һәрге әм әwе йәке wана нәдьнә фәʹмкьрьне, һьнәк жь wан wе тʹәне бона кʹара хwә гöһ бьдьнә мә».

БӘРЕД БАШ

20, 21. а) Чахе әм бь һʹьзкьрьн рʹәвийарʹа qәнщийе дькьн, әw йәк чь кʹаре тинә? б) Готара дьнда әме дәрһәqа чь шеwьр кьн?

²⁰ Чахе әм рʹәвийарʹа һʹьзкьрьне дьдьнә кʹьфше, әw йәк кʹаре тинә. Хушкәкә мә гьли кьр, кö нәфәред wе ча жь бо пәйкʹәтьна, жь Әритрейайе рʹәвин. Чар зарʹед wе һʹәйшт рʹожа бәрʹийерʹа чун у гьһиштьнә wәлате Судан. Әwе гьли кьр: «Хушк-бьред wедәре тʹәви wан öса бун ча тʹәви нәфәред хwә. Wана хwарьн, кʹьнщ, щи-сьтʹар у пʹәре рʹе дьданә wан. Qә ве дьнйайеда кәсәк йе хәриб wе бинә мала хwә сәва ве йәке, кö әwана Хwәдеки дьһʹәбиньн? На, тʹәне Шәʹдед Йаһоwа». (Бьхунә Йуһʹәнна 13:35.)

²¹ Ле зарʹед wан рʹәвийа у кʹочбәра, һʹәwще чь нә? Готара дьнда әме шеwьр кьн ча әм дькарьн али зарʹед wан бькьн, wәки әwана бь шабуне Йаһоwарʹа хьзмәт кьн.