ҺЬШЙАР БЬМИНЬН!
Чәтьнайед Рʹәвийа; Бь Милйона Мәрьв жь Украине Дьрʹәвьн
Ордийа Русйайе 24 Сьбате, сала 2022 дәстпекьр Украине зәфт кә. Әԝ бу мәʹни кӧ кризиса һуманитари пешда һат, ләма жи бьнәлийед ви щийи мәщбур бун жь малед хԝә бьрʹәвьн.a
«Һәр дәра бомба дьтʹәԛандьн. Әз нькарьм пе хәбәра жи шьровәкьм, кӧ әм ча зьравԛәтанди бьбун. Чахе әм пеһʹәсийан кӧ трен сәва аликʹарийа мәрьва һазьр кьрьнә, мә дәрберʹа сафи кьр жь шәһәр дәрен. Мә дькарьбу тʹәне чәнтʹәки бьчʹук тʹәви хԝә һьлда у тьштед лазьм бькьра ве чәнтʹе, мәсәлә документ, дәрман, ав у һьнә хԝарьн. Мә һәр тьшт һишт у гава әм дьчунә бәрбь трене, дор-бәри мә бомба давитьн» (Наталиа жь Харкьве, Украина).
«Әм һʹәта хьлазийе баԝәр бун, кӧ шәрʹ ԝе дәстпенәбә. Ле чахе мьн дәнге тʹәԛандьне жь һьнә щийа дьбьһист, пʹәнщәред мә педа дьһʹәжийан. Мьн сафи кьр бьрʹәвьм у тʹәви хԝә тʹәне ԝан тьшта һьлдьм чь кӧ бь рʹасти мьнрʹа лазьм бун. Шәбәԛе сьһʹәта 8:00 әз жь мал дәркʹәтьм, бь сайа трене әз гьһиштьмә Львове, ле паше бь сайа отобусе чумә Полонистане» (Надиа жь Харкьве, Украина).
Ве готареда
Чь бу мәʹнийа ве йәке, кӧ һаԛас мәрьв мәщбур бун бьрʹәвьн?
Паши ве йәке ча Русйа һатә шәрʹ сәр Украинайе, гәләк мәрьв мәщбур бун малед хԝә бьһельн. Ле диса жи, Кʹьтеба Пироз мәʹнийед дьһа кʹур әшкәрә дькә, кӧ чьрʹа һаԛас рʹәви һәнә:
Сәрԝеред дьнйайе нькарьн бона һʹәԝщед мәрьва хәм бькьн. Гәләк щар мәрьвед хԝәйиһʹӧкӧм ԛәԝата хԝә ӧса дьдьнә хәбате, сәва кӧ зийане бьдьнә мәрьва (Ԝаиз 4:1; 8:9).
Мире-щьна, демәк «сәрԝере ве дьнйайе», мәрьва ӧса кьрийә бьн һʹӧкӧме хԝә, кӧ Кʹьтеба Пирозда сәр ԝи те готьне: «Тʹәмамийа дьнйайе бьн һʹӧкӧме Йе Хьрабда йә» (Йуһʹәнна 14:30; 1 Йуһʹәнна 5:19).
Бь ԛьрʹна мәрьв рʹасти щурʹә-щурʹе чәтьнайа тен. Хенщи ве йәке әм ԝәʹдәки ӧсада дьжин, дәрһәԛа кʹижани Кʹьтеба Пирозда һатьбу пʹехәмбәртикьрьне: «Рʹожед ахьрийеда зәманед хьраб ԝе бен» (2 Тимотʹейо 3:1). Ӧса жи һатьбу пʹехәмбәртикьрьне, ԝәки рʹожед ахьрийеда ԝе шәрʹ, тʹәшԛәлед тʹәбийәте, бьрчибун у нәхԝәшийед һʹал һәбьн, жь бо чь жи мәрьв ԝе мәщбур бьн малед хԝә бьһельн у һәрʹьн (Луԛа 21:10, 11).
Гәло мәрьвед рʹәви һевийе жь кʹӧ дькарьн бьстиньн?
Кʹьтеба Пирозда те готьне, ԝәки Әʹфьрандаре мә Йаһоԝа,b һʹьзкьрьн у дьлшәԝатийе дьдә кʹьфше һьндава ԝан мәрьва, йед кӧ мәщбур бун малед хԝә бьһельн (Ԛануна Дӧщари 10:18). Хԝәде соз дьдә, кӧ әԝе бь сайа сәрԝертийа хԝәйә әʹзмани, демәк Пʹадшатийа хԝә, һʹәму чәтьнайед рʹәвийа сафи кә у ԝе дәԝса һʹәму сәрԝертийед мәрьва бьгьрә (Данийел 2:44; Мәтта 6:10). Йаһоԝа ԝе ӧса жи бь сайа Пʹадшатийа хԝә Мире-щьна кʹӧта кә (Рʹомайи 16:20). Әԝ Пʹадшати ԝе ль сәр тʹәмамийа дьнйайе сәрԝертийе бькә у ԝе һʹәму чәтьнайа бьдә һьлдане, йед кӧ жь бо фьрԛийа ортʹа мьләта пешда тен. Һʹәму мәрьв ԝе чаԝа малбәтәкә мәзьн тʹәвайи бьжин. Тʹӧ кәс ԝе ида мәщбур нибә малед хԝә бьһелә, чьмки Кʹьтеба Пироз соз дьдә: «Ԝе һәр кәс дь бьн меԝа хԝәда у дь бьн даре хԝәйи һежиреда рʹунен у йе кӧ ԝан бьтьрсинә тʹӧнә бә. Жь бәр кӧ дәве Хӧдане артешан [ордийа] вейа гот» (Миха 4:4).
Тʹәне Пʹадшатийа Хԝәде дькарә сәр һʹәта-һʹәтайе чәтьнайед рʹәвийа кʹӧта кә. Йаһоԝа ԝе бь сайа Пʹадшатийа хԝә ԝан проблема жи бьдә һьлдане, жь бо кʹижана мәрьв мәщбур дьбьн малед хԝә бьһельн. Ԝәрен әм шеԝьр кьн һьнә мәсәла:
Шәрʹ. «[Йаһоԝа] шәрʹа дьдә сәкьнандьне» (Зәбур 46:9). Сәва кӧ пебьһʹәсьн Йаһоԝа ԝе чаԝа шәрʹа бьдә һьлдане, бьхуньн готара бь наве «Гәло ԝе Чаԝа сәр Әʹрде Әʹдьлайи Һәбә?»
Зордари у зӧлми. «[Йаһоԝа] жь зерандьне у зордарийе ԝан хьлаз дькә» (Зәбур 72:14). Сәва кӧ пебьһʹәсьн, ԝәки мәрьв ча дькарьн хәйсәт-һʹӧнӧред хьраб жь хԝә дур хьн, бьхуньн готара бь наве «Чаԝа Нәфрʹәтийе жь Дьле Хԝә Дәрхьн?»
Кʹәсиббун. «[Йаһоԝа] йе кʹәсиб хьлаз дькә, кӧ гази дьке» (Зәбур 72:12). Сәва кӧ пебьһʹәсьн, ԝәки Йаһоԝа чаԝа ԝе кʹәсибийе бьдә һьлдане, бьхуньн готара бь наве «Гәло Чәтьнайед Алийе Пʹәра ԝе Кʹәнге Кʹӧта бьн?»
Бьрʹчибун. «Бьра гәньме ԝәлет бьбә бьрʹ-бәʹр» (Зәбур 72:16). Сәва кӧ пебьһʹәсьн, ԝәки Йаһоԝа ԝе ча бьрʹчибуне бьдә һьлдане, бьхуньн готара бь наве «Дьнйа бе Хәлайи-Щәлайи?»
Гәло рʹожа иройин Кʹьтеба Пироз дькарә али рʹәвийа бькә?
Әре. Хенщи ԝе йәке, кӧ Кʹьтеба Пироз һевийа баш дьдә бона рʹәвийа, әԝ ӧса жи дькарә али мә бькә ԝәʹде чәтьнайед кӧ иро щәм мә һәнә.
Принсипа Кʹьтеба Пироз: «Мәрьве сахьке дьле хԝә һәр готьне баԝәр дькә, ле йе аԛьл дина хԝә дьдә гавед хԝә» (Мәтʹәлок 14:15).
Әв чь те һʹәсабе: Пешда бьфькьрә кӧ чаԝа нәкʹәви хофийе у чаԝа хԝә бьпарези. Хԝә жь мәрьвед ӧса дур бьгьрә, йед кӧ дькарьн сәре тә бьхапиньн, жь бо ве йәке кӧ тӧ бе щи-сьтʹар и у бехофийеда нини.
Принсипа Кʹьтеба Пироз: «Ле кʹьнщ у хӧрәке мә һәбьн, бь ԝан әм рʹази бьн» (1 Тимотʹейо 6:8).
Әв чь те һʹәсабе: Бь тʹәмами дина хԝә нәдә сәр тьштед материйали. Һәрге тӧ бь тьштед кӧ щәм тә һәнә рʹази би, те ԝи чахи дьһа бәхтәԝар би.
Принсипа Кʹьтеба Пироз: «Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʹа бькьн. Әв ә мәʹна һинкьрьна Ԛануне у пʹехәмбәра» (Мәтта 7:12).
Әв чь те һʹәсабе: Ԛәнщийе у сәбьре бьдә кʹьфше. Әԝ һʹӧнӧр ԝе али тә бькьн, кӧ мәрьв һьндава тә бь ԛәдьр бьн.
Принсипа Кʹьтеба Пироз: «Жь бәр хьрабийева хьрабийе ль тʹӧ кәси нәкьн» (Рʹомайи 12:17).
Әв чь те һʹәсабе: Һәрге һьндава тәда нәһәԛи дькьн, кʹине дьле хԝәда нәжо, чьмки әԝ йәк дькарә дәрәще дьһа хьраб кә.
Принсипа Кʹьтеба Пироз: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13).
Әв чь те һʹәсабе: Бьра Хԝәде әʹмьре тәда щийе пешьн бьгьрә. Ԝирʹа дӧа бькә, сәва кӧ әԝ ԛәԝате бьдә тә, ԝәки тӧ тәйах ки.
Принсипа Кʹьтеба Пироз: «Бона тʹӧ тьшти хәм нәкьн, ле хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә … хԝәй кә» (Филипи 4:6, 7).
Әв чь те һʹәсабе: Тӧ чь дәрәщада жи ниби, жь Хԝәде әʹдьлайа дьл бьхԝазә. Дина хԝә бьдә ве готаре «Филипи 4:6, 7; ‘Бона Тʹӧ Тьшти Хәм Нәкьн’».
a Рʹожа дӧда паши дәстпебуна шәрʹ, Комисәрийа Бьльнд йа Дәԝләтед Йәкбуйи бона Аликʹарийа Рʹәвийа (UNHCR), гот кӧ әԝ дәрәщә бу йәк жь чәтьнайед лапи гьран бона рʹәвийа. Нава 12 рʹожада, зедәтьри дӧ милйона мәрьв жь Украине рʹәвийан ԝәлатед незики ԝан, ле ԝәкә милйонәк мәрьв жи дәрбази щийед бехоф бун.
b Йаһоԝа әв наве Хԝәде йә (Зәбур 83:18). Бьньһерʹьн готара бь наве «Йаһоԝа Кʹи йә?»