Лалбуне Рʹе Мьн Нәгьрт кö Мәрьва Һин кьм

WӘКӘ сала 1910-да де-баве мьн жь Тʹьлбисе (Гöрщьстан), дәрбази Канадайа Рʹоавайе бун, незики шәһәре Пеле, (Саскачеван). Мә маләкә фермеда дьжит. Әз сала 1928 һатьмә буйине, у жь 6 зарʹа әз йе бьчʹук бум. Баве мьн пешийа буйина мьн мьр, ле чахе әз һе зарʹ бум дийа мьн мьр. Wәʹдә шунда, хушка мьнә мәзьн Луси мьр, йа кö 17 сали бу. Паши ве йәке, апе мьн Ник әз у хушк-бьред мьн хwәй кьрьн.

Щарәке, чахе тʹәзә мьн дәстпекьр рʹе һәрʹьм, малбәта мьн дитьн ча әз почʹа һәспе кʹаш дькьм. Әwана тьрсийан wәки һәсп wе мьн хә у кьрьнә qажини wәки бәрʹдьм. Пьшта мьн wанда бу у мьн дәнге wан нәдьбьһист. Ча баш ә wәки әwе һәспе зийан нәда мьн, ле һәма ве рʹоже малбәта мьн фәʹм кьр кö әз кәрʹ-лал ьм.

Һәвале малбәта мә ширәт да, wәки әз тʹәви зарʹед кәрʹ-лал һин бьм. Ләма жи апе мьн Ник әз бьрьмә мәкʹтәба кʹәр-лала, кʹижан кö шәһәре Саскатунеда бу, (Саскачеван). Кʹидәре мьн дәстпекьр бьжим, жь малбәта мьн рʹийа чәнд сьһʹәта дур бу. Әз гәләк тьрсийам чьмки әз 5 сали бум. Мьн тʹәне wәʹде рʹожед һесабуне у һавинеда малбәта хwә дьдит. Ахьрийеда, әз зьмане кәрʹ-лала һин бум у әз ша дьбум кö мьн ида дькарьбу тʹәви зарʹа бьлизьм.

РʹАСТИЙЕ ПЕДЬҺʹӘСЬМ

Сала 1939-да, хушкәкә мьнә жь мьн мәстьр Марен, Бил Данилчук станд. Wана хушка мьн Франсис у әз бьрьмә бал хwә у әм хwәй кьрьн. Малбәта мәда щара пешийе әwана рʹасти Шәʹдед Йаһоwа һатьн. Һавине, wәʹде рʹожед һесабуне, wана чьqас дькарьбу чь кö жь Кʹьтеба Пироз педьһʹәсийан, мьнрʹа гьли дькьрьн. Рʹаст бежьм мьнрʹа нәһеса бу wана фәʹм кьм, чьмки wана зьмане кәрʹ-лала ньзаньбун. Ле wана тʹәхмин дькьр wәки мьн бь дьл рʹасти һʹьз кьр. Мьн дьдит әwана ль гора Кʹьтеба Пироз дьжин, у ләма әз тʹәви wан дьчумә хьзмәтийе. Зутьрәке мьн дьхwәст бемә ньхöмандьне, у 5 Илоне сала 1941-да, Бил мьн тʹәшта һʹәсьнда ньхöманд. Әwи ав жь бире һьлда, кʹижан кö гәләк сар бу!

Сала 1946 һавине wәʹде һесабуне чахе әз вәгәрʹийамә мале, әм чун щьвата мәзьнә серʹожи ль шәһәре Кливленде, (Оһайо, Дәwләтед Йәкбуйи). Сәр щьвата мәзьн рʹожа пешийе, хушка мьн фькьред жь бәрнаме мьнрʹа сәр кʹахаз дьньвиси. Ле рʹожа дöда, әз әʹщебмайи мам чахе мьн дит wәки бона мәрьвед кәрʹ-лал бәрнамә те wәлгәрʹандьне. Бәрнамә бона мьн гәләк фәʹмдари бу, у әw öса баш бу кö мьн ахьрийеда зәлал фәʹм кьр рʹастийа Кʹьтеба Пироз!

МӘРЬВА РʹАСТИЙЕ ҺИН ДЬКЬМ

Wи wәʹдәйи, Шәрʹе Һʹәмдьнйайе Дöда тʹәзә хьлаз бу у насйонализм зәʹф бәла бу. Паши щьвата мәзьн, әз вәгәрʹийамә мәкʹтәбе у мьн хwәрʹа нет дани wәки амьнийа хwә Хwәдерʹа избат кьм. Мьн ида рʹумәт нәдьда бәйрәqе у нә жи гимн дьстра сәр зьмане кәрʹ-лала. Öса жи әз тʹәви щәжьна нәдьбум у нә жи дьчумә дере чаwа шагьртед дьн дьчун. Әw йәк директоре мәкʹтәбе хwәш нәһат, у әwи дьхwәст мьн бьдә тьрсандьне, ләма тьштед дәрәw дьгот сәва әз фькьред хwә бьгöһезьм. Дәрһәqа ве йәке һәвалед дәрсханеда пеһʹәсийан у әʹщебмайи ман, ле әwе дәрәще мьнрʹа рʹе вәкьр, wәки wанрʹа шәʹдәтийе бьдьм. Ләри Андрософ, Норман Дитик, у Емил Шнидер йед кö тʹәви мьн мәкʹтәбеда һин дьбун, һатьнә сәр рʹийа рʹастийе у һʹәта рʹожа иро бь амьни Йаһоwарʹа хьзмәт дькьн.

Чахе әз дьчумә шәһәред дьн мьн хwәрʹа нет дани, wәки кәрʹ-лаларʹа шәʹдәтийе бьдьм. Мәсәлә, Монреаледа әз чум сәр щьвинәке кö кәрʹ-лал тʹәвайи тʹоп бьбун. Ль wедәре мьн шәʹдәти да Еди Тагеррʹа, йе кö щаһьл бу. Wи чахи әw сәроке кʹомәкә кәрʹ-лала бу, ле иро әw бьре мә йә, у Лаваледа (Кwебек) щьвата кәрʹ-лалада хьзмәт дькә. Мьн öса жи шәʹдәти да щаһьләкирʹа, наве wи Жуан Арданез ә. Әwи мина мәрьвед жь Бәройа кʹур леколин дькьр, сәва рʹастийа Кʹьтеба Пирозда баwәр бә (Кʹар. Шанд. 17:10, 11). Әw жи һатә сәр рʹийа рʹастийе у ча рʹуспи бь амьни Оттаwайеда (Онтарйо) һʹәта мьрьна хwә хьзмәт дькьр.

Сала 1950 әз дәрбази Вәнкувәре бум. Мьн гәләк һʹьз дькьр мәрьвед кәрʹ-лаларʹа мьзгинийе гьли кьм, ле әзе тʹö щар бир нәкьм ве qәwьмандьне кö тʹәви мьн qәwьми. Мьн жьнькәкә бь наве Крис Спайсер кʹучеда да сәкьнандьне, ле әw кәрʹ-лал нибу. Әwе qәбул кьр wәки һәр мәһ жерʹа журналед мә бьвьм, у әwе хwәст wәки әз һәрʹьм мала wан у рʹасти мере wе Гари бем. Әз чумә мала wан, у бь ньвисандьне сәр кʹахаса мә дьреж хәбәр да. Паши ве рʹоже, мә ида һәв нәдит. Ле әз әʹщебмайи мам чахе сал дәрбаз бун, мьн Торонтода сәр щьвата мәзьн әwана дитьн. Һәма ве рʹоже Гари гәрәке бьһата ньхöмандьне. Әwе qәwьмандьне кьрә бира мьн, wәки чьqас фәрз ә тʹьме мьзгинийе бәла кьн, чьмки ньзани кʹидәре йан кʹәнге wе дьле мәрьвада рʹасти мәзьн бә.

Wәʹдә шунда, әз диса дәрбази Саскатуне бум. Ль wедәре әз рʹасти жьнькәке һатьм, кʹижане мьнрʹа гот wәки әз тʹәви qизед wейә щеwи һинбуна Кʹьтеба Пироз дәрбаз кьм. Наве wан Щан у Щоан Ротенбергер бун. Әwана жи ве мәкʹтәба кәрʹ-лалада һин дьбун, кʹидәре бәре әз һин дьбум. Зутьрәке әw дö кәчʹька чь кö педьһʹәсийан, һәвалед хwәрʹа дәрсханеда гьли дькьрьн. Ахьрийеда, 5 һәвалед wан бунә Шәʹдед Йаһоwа. Йәк жь wан Йунес Колин бу. Щара пешийе мьн Йунес дит чахе мьн ида мәкʹтәба хwә хьлаз дькьр. Wи чахи әwе мьнрʹа ширьнайи да у гот кö әw дьхwазә тʹәви мьн һәвалтийе бькә. Wәʹдә дәрбаз бу у әw бу мәрьвәкә мьнә лапә незик, әw бу жьна мьн.

Чахе дийа Йунесе пеһʹәсийа кö әw Кʹьтеба Пироз һин дьбә, әwе директоре мәкʹтәберʹа гот wәки öса бькә кö qиза wе тʹәрк бьдә һинбуне. Директор әʹдәбйәт бь чь жи әw Кʹьтеба Пироз һин дьбу, жь wе стандьн. Ле Йунесе хwәрʹа сафи кьр, wәки Йаһоwарʹа амьн бьминә. Чахе әwе дьхwәст бе ньхöмандьне, де-баве wе жерʹа готьн: «Һәрге тö бьби Шәʹде Йаһоwа, әме тә жь мале дәрхьн!» Йунес 17 салийа хwәда жь мал чу у Шәʹдед Йаһоwа кö мьһала wеда дьжитьн бь дьл у щан ле бунә хwәйи. Әwе бәрдәwам кьр Кʹьтеба Пироз һин бә у ахьрийеда һатә ньхöмандьне. Чахе әм зәwьщин сала 1960-да, де-баве wе нәһатьнә дәʹwата мә. Ле сал дәрбаз бун, у wана һеди-һеди qәдьре мә дьгьртьн сәва баwәрийа мә у öса жи сәва кö мә ча зарʹед хwә мәзьн дькьр.

ЙАҺОWА ТʹЬМЕ АЛИ МЬН ДЬКӘ

Һʹәфт кöрʹед мә һәнә, ле әwана кәрʹ-лал ниньн. Бона мьн у жьна мьн, нәһеса бу зарʹед хwә мәзьн кьн, ле мә зьмане кәрʹ-лала wана һин дькьр, сәва тʹәви wан хәбәр дьн у рʹастийе бькьн дьле wан. Хушк-бьред щьватеда зәʹф али мә кьрьн. Мәсәлә, щарәке бьра незики мә бу у гот wәки кöрʹәки мә Ода Щьватеда гьлийед нәщайиз дьбежә. Бь сайа wи бьрайи мә дәрберʹа кöрʹе хwә ширәт кьр. Чар кöрʹед мьн Щеймс, Щери, Николас у Стивен тʹәви жьн у малбәта хwә бь амьни Йаһоwарʹа хьзмәт дькьн. Әw һәр чар жи рʹуспи нә. Һьн жи Николас тʹәви жьна хwә Дәбора, филиала Британйайеда аликʹарийе дьдьнә wәлгәрʹандьна зьмане кәрʹ-лала. Ле Стивен у жьна wи Шанан филиала Дәwләтед Йәкбуйида кʹома wәлгәрʹандьнеда ньн, йа зьмане кәрʹ-лала.

Мәһәк мабу кö 40 сале зәwаща мә тʹәмам буйа, Йунес мьр, чьмки рәqа (кʹансәра) wе һәбу. Нава тәнгасийа хwәда әw qәwи ма у баwәрийа wе qайим бу кö мьри wе рʹабьн. Әз гәләк һивийа ве рʹоже мә чахе диса wе бьвиньм.

Мәһа Сьбате сала 2012, әз әʹрде кʹәтьм у qорʹька мьн шькәст. Мьн фәʹм кьр wәки мьнрʹа аликʹари лазьм ә. У ләма әз чумә бал кöрʹәки хwә. Ньһа әм шәһәре Калгарида щьвата кәрʹ-лалада ньн, у ль wедәре жи әз ча рʹуспи хьзмәт дькьм. Дькарьм бежьм wәки әw щара пешийе йә кö әз щьвата кәрʹ-лалада мә. Бьдьнә һʹәсабе хwә кö әз жь дәстпека сала 1946 щьвата инглизида бум. Гәло ча әз рʹöһʹанида qәwи мам? Йаһоwа созе хwә ани сери кö хwәйе етʹима йә (Зәб. 10:14). Әз гәләк жь wан хушк-бьра рʹази мә, йед кö али мьн кьрьнә рʹöһʹанида нәкʹәвьм. Мәсәлә, wана сәр кʹахаса фькьред жь щьвате мьнрʹа дьньвисин, зьмане кәрʹ-лала һин дьбун у чьqас дькарьбун мьнрʹа wәлдьгәрʹандьн.

Рʹаст бежьм, щара әз бәрхwә дькʹәтьм, чьмки нькарьбум фәʹм кьра чь кö дьһатә готьне, йан жи кö йед дьн мьн фәʹм нәдькьрьн. Ле wи wәʹдәйида, әз сәр гьлийед Пәтрус дьфькьрим, кö әwи Исарʹа гот: «Хöдан, әме һәрʹьнә щәм кʹе? Готьнед жийина һʹәта-һʹәтайе щәм тә нә» (Йуһʹн. 6:66-68). Чаwа хушк-бьред дьнә кәрʹ-лал салийед мьнда, әз жи һин бумә бь сәбьр бьм. Әз һин бум итʹбарийа хwә Йаһоwа у тʹәшкиләта wи биньм, у әwе йәке мьнрʹа гәләк кʹәрәм анин! Ньһа сәр зьмане мьн хwарьна рʹöһʹани тʹьжә һәйә, у әз ләзәте дьстиньм кö дьчьмә сәр щьвата у щьватед мәзьн сәр зьмане кәрʹ-лалайи Америки. Бь рʹастийе әʹмьре мьн бәхтәwар у бь кʹәрәма тʹьжә бу, чьмки мьн Йаһоwарʹа, Хwәдайе мәйи Зоррʹа хьзмәт дькьр.