Йаһоwа Һʹәму Чәтьнайада Дьл Дьдә Бәр Мә

1, 2. Йаһоwа ча дьл дьдә бәр мә, у Хәбәра хwәда әw чь сози дьдә мә?

БЬРАКИ щаһьл у азәп, wәрә әм wи нав кьн Едуардо, дәрһәqа пьрсәке хәбәр да тʹәви рʹуспики әʹмьрда мәзьн йе кö зәwьщи йә. Наве wи рʹуспи Стефан ә. Едуардо дьфькьри дәрһәqа гьлийед жь 1 Корьнтʹи 7:28: «Йед öса [йед зәwащеда] wе рʹасти охьрмед гьран бен». Әwи жь Стефан бьра пьрси: «Чь те һʹәсабе ‹охьрмед гьран›, у һәрге әз бьзәwьщьм, ча гәрәке wан охьрмед гьран дәрбаз кьм?» Стефан пешийа кö щаба ве пьрсе бьда, готә Едуардо кö бьфькьрә сәр ван гьлийед Паwлос: «Хwәдейе һʹәму бәрдьлийе . . . нава һʹәму тәʹли-тәнгийада дьл дьдә бәр мә» (2 Корн. 1:3, 4).

² Баве мә Йаһоwа мә һʹьз дькә у бәрдьлийе дьдә мә чахе әм рʹасти чәтьнайа тен. Дьбәкә бал wә жи öса qәwьмийә, кö чәтьнайеда Хwәде бь сайа Хәбәра хwә аликʹари у рʹебәри дайә wә. Бәле, әм гәрәке дöдьли нәбьн кö Йаһоwа ча бәре, öса жи иро qәнщийа хьзмәткʹаред хwә дьхwазә. (Бьхунә Йерәмйа 29:11, 12.)

3. Кʹижан пьрса әме шеwьр кьн ве готареда?

³ Чахе әм заньн мәʹнийа тәнгасийед хwә, wи чахи дьһа һеса йә бәр тәнгасийа тәйах кьн. Ле гәло малбәтеда мер у жьн рʹасти кʹижан «охьрмед гьран» тен кö Паwлосе шанди гот? Кʹижан мәсәлед жь Кʹьтеба Пироз у мәсәлед wәʹде мә дькарьн али мә бькьн wәки wан тәнгасийада әм бәрдьлийе бьстиньн? Щабед сәр wан пьрса wе али мә бькьн кö wан чәтьнайада тәйах кьн.

ОХЬРМЕД ГЬРАН ЗӘWАЩЕДА

4, 5. Мер у жьн дькарьн рʹасти кʹижан «охьрмед гьран» бен?

⁴ Хwәде чахе мер у жьна пешийе әʹфьранд, әwи гот: «Мере де у баве хwә бьһелә, хwә ль жьна хwә бьгьрә у бьбьнә бәдәнәк» (Дәстп. 2:24). Ле иро һʹәму мәрьв гöнәкʹар ьн, ләма жи чахе мәрьв дьзәwьщьн, щара ортʹа wан у мәрьвед wани незикда дькарә чәтьнайи пешда бен (Рʹом. 3:23). Мәсәлә, чахе qиз һе меркьри нинә, әw гöрʹа де-баве хwәда йә, ле гава кö мер дькә, ида гәрәке гöрʹа мере хwәда бә. Хwәха Хwәде меррʹа борщдари да wәки бьбә сәре жьне (1 Корн. 11:3). У бона wан йед кö тʹәзә зәwьщи нә, һеса нинә һини wан гöһастьна бьн. Ль гора Хәбәра Хwәде, жьн ида гәрәке бьн рʹебәрийа мере хwәда бә, нә кö йа де-баве хwәда. У бона жьн-мер, алийе хьнами, кöрʹап у пьсмамада жи дькарә чәтьнайи пешда бен.

⁵ Ле һьнә жьн-мер рʹасти чәтьнайед дьн тен. Мәсәлә, чахе жьн гьран дәрте, рʹаст ә әwана һәрдö жи ша дьбьн, ле öса жи мәʹни һәнә кö әwана бәрхwә дькʹәвьн. Бәʹса хәбәре, әwана хәм дькьн кö гьрани wе ча дәрбаз бә, wәки зарʹ сах-сьламәт бе буйине. Хенщи ве йәке, әwана заньн wәки хәрще wан wе зедә бә. Ле чахе зарʹ те буйине, диса хәм зедә дьбьн. Де ида тʹәмамийа wәʹде хwә сәр зарʹе хәрщ дькә у мьqати wи дьбә. Ләма жи дьбәкә wәʹде wе бона мере wе һьндьк дьминә, у жь бо ве йәке мер хwә тʹәне тʹәхмин дькә. Һьн жи һе зедә шьхöл дькʹәвә стуйе мер кö тʹәзә буйә бав. Әw ида гәрәке мьqати жьн-зарʹа хwә бә, у һʹәwщед wан рʹази кә.

6-8. Жьн-мер диса дькарьн рʹасти кʹижан охьрме гьран бен?

⁶ Жьн-мер диса рʹасти һьнә чәтьнайед дьн тен. Мәсәлә, һәрге әwана бь дьл у щан дьхwазьн зарʹа биньн, ле безарʹ дьминьн, әw жи охьрме гьран ә. Илаһи сәва жьн әw дәрдәки гьран ә чахе әw нькарә зарʹа бинә (Мәтʹлк. 13:12). Бәре wәʹде пʹехәмбәра, чахе жьн безöрʹәт бу, әw гәләк шәрм бу. Рʹаһеле жьна Аqуб, дәрдәки гьран дькʹьшанд, чьмки хушка wе зарʹ дьани, ле әwе нькарьбу (Дәстп. 30:1, 2). Иро жи һьнә wәлатада әʹдәт ә кö гәләк зарʹа биньн у бона wан әw йәк гәләк фәрз ә. Wан wәлатада гәләк щар жь мисйонера дьпьрсьн кö чьрʹа зарʹед wан тʹöнә нә. Рʹаст ә мисйонер wанрʹа бь нәрми шьровәдькьн чьрʹа нахwазьн зарʹа биньн, ле йәкә щара wанрʹа дьбежьн: «Сәд һʹәйф, әме бона wә дöа бькьн!»

⁷ Хушкәкә мәйә жь Инглистане гәләк дьхwәст зарʹ жерʹа бьбә, ле хwәстьна wе нәһатә сери. Әwе гьли кьр wәки әw чьqас дьлшкәсти бу, чьмки фәʹм кьр кö ве дьнйайеда ида зарʹ wе жерʹа нәбьн. Ләма әwе тʹәви мере хwә сафи кьр кö зарʹәке хwәрʹа һьлдьн у хwәй кьн. Ле әwе хушке гот: «Әwе йәке бь тʹәмами дәрд-кöле мьн кʹöта нәкьр. Мьн заньбу wәки зарʹа һʹәлал әw тьштәки дьн ә».

⁸ Кʹьтеба Пироз дьбежә кö жьн «зарʹанинеда . . . wе хьлаз бә» (1 Тимтʹ. 2:15). Ле әw гьли найе һʹәсабе, wәки жьн тʹәне жь бо зарʹанине wе жийина һʹәта-һʹәтайе бьстинә. Wәки öса нә, әw гьли чь те һʹәсабе? Чахе зарʹед жьне һәнә, әw wәʹде хwә сәр зарʹа у öса жи сәр шьхöлед мале хәрщ дькә. У әw йәк дькарә ле хwәй кә жь гәвәстийе у wәки нәкʹәвә нав шьхöлед мәрьвед дьн (1 Тимтʹ. 5:13). Ле диса жи жьн дькарә зәwащеда у малбәтеда рʹасти чәтьнайед майин бе.

9. Зәwащеда диса кʹижан дәрд-кöл дькарә һәбә?

⁹ Зәwащеда дькарә дәрд-кöләкә öса жи һәбә, кö жьн у мер нә жи дьфькьрин wәки тьштәки öса wе бьqәwьмә. Әw дәрд әw ә, чахе жьн йан мер дьмьрә. Әw ешәкә гәләк гьран ә у нәһеса йә бәр тәйах кьн. Ле Мәсиһи qайим баwәр дькьн кö мьри wе рʹабьн, у әw йәк бәрдьлийа мәзьн дьдә wан (Йуһʹн. 5:28, 29). Тәнгасийа öсада, Баве мәйи һʹьзкьри бь сайа Хәбәра хwә дьл дьдә мә у дьле мә һеса дькә. Wәрә әм ньһа шеwьр кьн дәрһәqа хьзмәткʹаред Йаһоwайи амьн, у бьвиньн ча wәʹде тәнгасийа wана дәсте Хwәде сәр хwә тʹәхмин кьрьнә у бәрдьли стандьнә.

БӘРДЬЛИ WӘʹДЕ ТӘНГАСИЙА

10. Һаннайе дәрде хwәда дьлрʹьһʹәти жь кʹö станд? (Бьньһерʹә шькле әʹwльн.)

¹⁰ Һанна жьна Әлкана кöл-кʹәсәр дькʹьшанд. Әw безöрʹәт бу, ле жьна Әлкана йа дöда Пенина, зарʹ дьанин. (Бьхунә 1 Самуйел 1:4-7.) Бь сала Пенина сәва ве йәке Һаннайе дькʹәнийа. Бьдьнә һʹәсабе хwә Һанна чьqас дьнәʹлийа. Ле әwе Йаһоwарʹа дöа кьр у әw дәрд-кöл да дәсте wи. Әwе бәр Йаһоwа «дöайа хwә дьреж дькьр». Һанна дьлрʹьһʹәт бу, чьмки qә дöдьли нәдьбу wәки Йаһоwа wе щаба дöайе wе бьдә. Паши дöа, әw «ида  . . . нә бь кʹәсәр бу» (1 Сам. 1:12, 17, 18). Әwе заньбу кö Йаһоwа wе йан кöрʹ бьде, йан жи бь щурʹәки майин дәрде wе дәрман кә.

11. Дöа ча дькарә бәрдьлийе бьдә мә?

¹¹ Һʹәта әм гöнәкʹар ьн у ве дьнйа Шәйтʹанда дьжин, әме рʹасти тәнгасийа у чәтьнайа бен (1 Йуһʹн. 5:19). Ле әм бона ве йәке гәләк бәрхwә накʹәвьн, чьмки әм заньн wәки Йаһоwа «Хwәдейе һʹәму бәрдьлийе» йә! Чахе әм дькʹәвьнә тәнгасийе, әм дькарьн Хwәдерʹа дöа кьн у аликʹарийе бьхwазьн. Әм жи мина Һаннайе гәрәке дьле хwә Йаһоwарʹа вәкьн. Ле wәʹде тәнгасийа, бәс нинә тʹәне Йаһоwарʹа гьли кьн кö әм чь тʹәхмин дькьн, лазьм ә дьле хwә жерʹа вәкьн у бь дöа-дьрозга жь wи һиви кьн (Фили. 4:6, 7).

12. Чь али Һанайа жьнәби кьр кö дьлтәнг нәбә?

¹² Дьqәwьмә щара һун бинтәнг дьбьн, чьмки дьбәкә зарʹед wә тʹöнә нә, йан жи дьбәкә мер йан жьна wә мьрийә. Ле ви дәрдида һун дькарьн бәрдьлийе бьстиньн. Wәрә сәрһатийа Һанайа пʹехәмбәр шеwьр кьн, йа кö wәʹде Исада дьжит. Әw һʹәфт сала тʹәви мере хwә жит у мере wе мьр. Кʹьтеба Пирозда тʹö щики найе готьне кö зарʹед wе һәбун. Гәло әwе ча бәр wи дәрд-кöле хwә тәйах кьр? Дина хwә бьдьне кö Һана 84 салийа хwәда ча хьзмәт дькьр. Луqа 2:37-да әм дәрһәqа wе дьхуньн: «Жь пʹарьстгәһе дур нәдькʹәт, шәв у рʹож бь дöа у рʹожийа Хwәде дьһʹәбанд».

13. Мәсәле биньн кö чаwа һәвалед баш дькарьн бәр дьле мәда бен.

¹³ Щьватеда әм дькарьн хwәрʹа һәвалед баш бьвиньн, йед кö wәʹде чәтьнайа дькарьн бәр дьле мәда бен (Мәтʹлк. 18:24). Хушкәкә мә бь наве Паула тинә бира хwә, wәки чьqас әw дьлтәнг бу чахе дийа wе жь рʹийа рʹаст дәркʹәт. Паула wи чахи пенщ сали бу. Әw йәк жерʹа нәһеса бу, ле һьнә wәʹдә дәрбаз бу, щьвата wеда пешәнгәк бь наве Енн тʹәви wе һинбуна Кʹьтеба Пироз дәстпекьр. Паула гьли дькә: «Рʹаст ә Енн мәрьва мьнә незик нибу, ле һʹьзкьрьн у аликʹарийа wе мьн гәләк qәwи кьрьн. Бь сайа ве йәке мьн бәрдәwам дькьр Йаһоwарʹа хьзмәт кьм». Паула һʹәта ньһа Хwәдерʹа бь амьни хьзмәт дькә, у әw гәләк ша йә wәки дийа wе диса һатә сәр рʹийа рʹастийе у әw һәрдö жи щьватәкеда ньн. Енн жи гәләк ша йә, чьмки әwе аликʹари да Паулайе сәва бәрдәwам кә Хwәдерʹа хьзмәт кә.

14. Әwед кö бәрдьлийе дьдьнә мәрьвед майин, чь кʹәрәма дьстиньн?

¹⁴ Чахе әм али йед дьн дькьн, әм чәтьнайед хwә бир дькьн у шабуне дьстиньн. Хушкед азәп у йед меркьри, шабунәкә мәзьн дьстиньн чахе мьзгинийе бәла дькьн, чьмки öса әwана тʹәви Хwәде һәвкʹарийе дькьн. Нета wан әw ә, wәки Йаһоwа Хwәде рʹумәт кьн у qьрара wи биньн сери. Әwана дьлрʹьһʹәт дьбьн гава мәрьварʹа мьзгинийе гьли дькьн. Бәле, һәр кәс жь мә дькарә бона йед дьн хәм бькә, чаwа бона мәрьвед дәшта мәда, öса жи хушк-бьред щьватеда. У öса әм һе незики хушк-бьра дьбьн (Фили. 2:4). Паwлосе шанди ве йәкеда мәрʹа мәсәләкә баш һишт. Бона щьвата Тʹесалоники әw бу ча «кәваник кö зарʹед хwәрʹа дьрʹьщьфә», әw öса жи мина бавәки рʹöһʹани бу. (Бьхунә 1 Тʹесалоники 2:7, 11, 12.)

БӘРДЬЛИ МАЛБӘТЕДА

15. Кʹе пешийе борщдар ьн зарʹа һин кьн дәрһәqа Йаһоwа?

¹⁵ Әм дькарьн али малбәта жи бькьн у бәр дьле wанда бен. Щара мьзгинванед тʹәзә дьбежьнә хушк-бьред щерʹьбанди, wәки зарʹед wан рʹастийе һин кьн, у тʹәви wан һинбуна Кʹьтеба Пироз жи дәрбаз кьн. Ль гора Кʹьтеба Пироз, де-бав борщдар ьн бәре әʹwльн зарʹед хwә һин кьн у ширәт кьн (Мәтʹлк. 23:22; Әфәс. 6:1-4). Щара дьбәкә ве йәкеда wанрʹа аликʹарийа хушк-бьра лазьм бә, ле йәкә әw борщдари диса жи сәр стуйе wан дьминә. Де-бав гәрәке тʹьме тʹәви зарʹед хwә хәбәр дьн у wана рʹьнд нас бькьн.

16. Әм чь гәрәке бира хwәда хwәй кьн гава зарʹед кәсәки һин дькьн?

¹⁶ Һәрге де йан бав дьхwазә, wәки әм зарʹед wан Кʹьтеба Пироз һин кьн, фәрз ә әм бира хwәда хwәй кьн, wәки борщдарийа де-бав һьлнәдьн сәр хwә. Щара де-бавед кö Шәʹдед Йаһоwа ниньн, дьбежьнә мә wәки зарʹед wан рʹастийе һин кьн. Wи чахи әм гәрәке бир нәкьн, кö әм бона wан зарʹа де йан бав ниньн. Һьн жи чахе әм тʹәви зарʹа һинбуне дәрбаз дькьн, wе бь билани бә кö малда бәр чʹәʹве де-бава wана һин кьн, йан жи бәр хушк йан бьраки гьһишти, йан жи кʹидәре кö мәрьв һәнә. Бь wи щурʹәйи wе мәʹни тʹöнә бә кö хәлq тьштәки нәрʹаст фәʹм кьн. У дьбәкә де-баве wан зарʹа паше хwәха бьхwазьн борщдарийа хwә биньн сери у хwәха зарʹед хwә дәрһәqа Йаһоwа һин кьн.

17. Ча зарʹ дькарьн бәр дьле нәфәред хwәда бен?

¹⁷ Зарʹед кö Йаһоwа һʹьз дькьн у тʹәмийед wи тиньн сери, дькарьн аликʹарийа мәзьн бьдьнә нәфәред мале у бәр дьле wанда бен. Мәсәлә, әwана qәдьре де-баве хwә дьгьрьн у али wан дькьн. Әwана öса жи дькарьн нәфәра рʹöһʹанида жи qәwи кьн. Мәсәлә, пешийа Селаве, Ламәх Йаһоwа дьһʹәбанд. Әwи дәрһәqа кöрʹе хwә Нöһ гьлийед öса гот: «Әве мә жь кьред мә у жь щәфед мәйә гьран ль сәр ви әʹрди рʹьһʹәт кә, кʹижан кö Хöдан ньфьрʹ ле кьрьбу». Әw пʹехәмбәрти һатә сери паши Селаве, гава Йаһоwа ньфьрʹ жь әʹрде һьлда (Дәстп. 5:29; 8:21). Иро жи зарʹед кö амьн ьн Йаһоwарʹа, дькарьн дьл бьдьнә нәфәред хwә. Әwана дькарьн али нәфәра бькьн, wәки wәʹде тәнгасийед иройин у öса жи ахьрийеда сәбьр кьн у qәwи бьминьн.

18. Чь дькарә али мә бькә кö сәбьр кьн у сьст нәбьн wәʹде охьрмед гьран?

¹⁸ Хьзмәткʹаред Йаһоwа иро бәрдьлийе дьстиньн, гава дöа дькьн Хwәдерʹа, Кʹьтеба Пироз дьхуньн у сәр дьфькьрьн, у тʹәви хушк-бьра һәвалтийе дькьн. (Бьхунә Зәбур 145:18, 19.) Бәле, әм рʹасти чь охьрмед гьран жи бен, әм бәхтәwар ьн wәки дькарьн һәwара хwә Йаһоwа биньн, йе кö тʹьме бәр дьле мәда те!