«Хәбәра Хwәде . . . Зор ә»

1. Әм чьрʹа дöдьли ниньн кö Хәбәра Хwәде зор у qәwи йә? (Бьньһерʹә шькле әʹwльн.)

ӘМ ХЬЗМӘТКʹАРЕД Йаһоwа qә дöдьли набьн кö «Хәбәра Хwәде сах у зор ә» (Ибрн. 4:12). Әм хwәха дьвиньн кö qәwата Хәбәра Хwәде ча сәр әʹмьре мә у öса жи сәр әʹмьре мәрьвед дьн һʹöкöм дькә. Мәсәлә, һьнәк хушк-бьред мә бәре дьз у наркоман бун, йан жи бенамуси дькьрьн. Һьнәк жи ве дьнйайеда пешдачуйи у дәwләти бун, ле әw йәк wана бәхтәwар нәдькьр (Wаиз 2:3-11). Бәле, гәләк мәрьвед кö нәрʹаст дьжитьн у нета әʹмьре wан тʹöнә бу, бь аликʹарийа qәwата Хәбәра Хwәде һатьнә сәр рʹийа рʹаст у бәхтәwар бунә. Дьбәкә wә гәләк сәрһатийед wи щурʹәйи хwәндийә «Бьрща Qәрәwьлийеда» рʹеза готарада йа бь наве «Кʹьтеба Пироз Жийина Мәрьва Дьгöһезә». У әм дьвиньн кö һәла һе паши ньхöмандьне жи Мәсиһи бь аликʹарийа Кʹьтеба Пироз бәрдәwам дькьн рʹöһʹанида пешда дьчьн.

2. Qьрʹна йәкеда qәwата Хәбәра Хwәде ча һʹöкöм дьбу сәр мәрьва?

² Әм әʹщебмайи наминьн кö бь аликʹарийа һинбуна Хәбәра Хwәде иро гәләк мәрьва әʹмьре хwәда гöһастьнед мәзьн кьрьнә. Qьрʹна йәкеда жи хушк-бьред мәйә бьжарти әʹмьре хwәда гöһастьн кьрьнә. (Бьхунә 1 Корьнтʹи 6:9-11). Чахе Паwлосе шанди дәрһәqа wан мәрьва гот, йед кö wе Пʹадшатийа Хwәде wар нәбьн, әwи зедә кьр: «Жь wә һьнәк öса бун». Ле Хәбәра Хwәде у рʹöһʹе wийи пироз али wан мәрьва кьрьн у wана әʹмьре хwә гöһаст. Чахе әwана бунә Мәсиһи, һәла һе һьнге жи һьнәка жь wан шашийед öса мәзьн кьрьн, кö әw йәк һʹöкöм бу сәр һәләqәтийа wан тʹәви Йаһоwа. Мәсәлә, Кʹьтеба Пирозда те готьне дәрһәqа Мәсиһики бьжарти qьрʹна йәкеда, йе кö гәрәке жь щьвате бьһата дәрхьстьне. Ле паше әw һатә гöһастьне у диса вәгәрʹийа щьвате (1 Корн. 5:1-5; 2 Корн. 2:5-8). Әw йәк мә гәләк qәwи дькә, чьмки әм дьвиньн кö хушк-бьред мә бь аликʹарийа Хәбәра Хwәде чәтьнайед хwә сафи кьрьнә у гöһастьнед мәзьн кьрьнә.

3. Ве готареда әме чь шеwьр кьн?

³ Qәwата Хәбәра Хwәде гәләк зор ә. У әм гәрәке Хәбәра Хwәде рʹьнд бьдьнә хәбате, чьмки әв Йаһоwа дайә мә (2 Тимтʹ. 2:15). Ве готареда әме шеwьр кьн кö чь дькарьн бькьн сәва qәwата Хәбәра Хwәде һʹöкöм бә сәр 1) әʹмьре мә, 2) хьзмәтийа мә, 3) у һинкьрьна мә жь сене. Шеwьркьрьна ве готаре wе али мә бькә һʹьзкьрьн у рʹазибуна хwә нишан кьн Баве мәйи әʹзманарʹа, йе кö мә һин дькә бона кʹара мә (Иша. 48:17).

QӘWАТА ХӘБӘРА ХWӘДЕ ӘʹМЬРЕ МӘДА

4. а) Әм чь гәрәке бькьн сәва Хәбәра Хwәде сәр мә һʹöкöм кә? б) Һун ча wәʹдә дьвиньн wәки Кʹьтеба Пироз бьхуньн?

⁴ Сәва кö Хәбәра Хwәде сәр мә һʹöкöм кә, әм гәрәке чьqас дькарьн һәр рʹож бьхуньн (Йешу 1:8). Шьхöле мә чьqас зәʹф бә жи у чь щабдарийед мә жи һәбьн, йәкә әм гәрәке wәʹдә бьвиньн сәва кö Кʹьтеба Пироз бьхуньн. (Бьхунә Әфәси 5:15, 16). Бона ве йәке әм дькарьн хwәрʹа wәʹдә кʹьфш кьн, мәсәлә шәбәqа, нивро, йан жи еваре. Әм qайил ьн тʹәви зәбурбеж кʹижани гот: «Һинкьрьна Тә чьqас әз һʹьз дькьм! Тʹәмамийа рʹоже әз сәр wе дьфькьрьм» (Зәб. 119:97).

5, 6. а) Чьрʹа фәрз ә бьфькьрьн чахе әм Кʹьтеба Пироз дьхуньн? б) Әм ча дькарьн һе зәʹф кʹаре бьстиньн чахе Кʹьтеба Пироз дьхуньн у сәр дьфькьрьн? в) Wә чь кʹар стандийә чахе Кʹьтеба Пироз хwәндийә у сәр фькьринә?

⁵ Ле тʹәне хwәндьна Кʹьтеба Пироз бәс нинә, гәләк фәрз ә әм öса жи сәр бьфькьрьн (Зәб. 1:1-3). Һьнге әме бькарьбьн ширәтед Кʹьтеба Пирозә билани әʹмьре хwәда бьдьнә хәбате. Фьрqи тʹöнә әм Кʹьтеба Пироз сәр кʹахаза бьхуньн йан бь һащәтед әләктроник, ле нета мә гәрәке әw бә, wәки гьлийед теда бьгьһижнә дьле мә.

⁶ Әм ча дькарьн һе зедә кʹаре бьстиньн чахе Кʹьтеба Пироз дьхуньн у сәр дьфькьрьн? Гәләка тʹәхмин кьрьнә wәки хwәндьна Хәбәра Хwәде һьнге кʹаре тинә, чахе пʹарәке дьхуни, дьсәкьни у пьрсе дьди хwә: «Жь ве пʹаре әз чь һин бум дәрһәqа Йаһоwа? Әw йәк чь кö мьн хwәндийә, ча әз әʹмьре хwәда ида тиньм сери? Диса чьда әз дькарьм һе пешда һәрʹьм? Һәрге әм дöа бькьн у бьфькьрьн сәр Хәбәра Хwәде, әме бьхwазьн бь тʹәмами wан ширәта биньн сери. Һьнге әме qәwата Хәбәра Хwәде әʹмьре хwәда бьвиньн (2 Корн. 10:4, 5).

QӘWАТА ХӘБӘРА ХWӘДЕХЬЗМӘТИЙА МӘДА

7. Әм ча дькарьн хьзмәтийеда Хәбәра Хwәде баш бьдьнә хәбате?

⁷ Чь wе али мә бькә, wәки Кʹьтеба Пироз wәʹде хьзмәтийе баш бьдьнә хәбате? Гава пешьн әw ә, wәки wәʹде хьзмәтийе у wәʹде һинкьрьне тʹьме рʹезед жь Кʹьтеба Пироз бьдьнә хәбате. Дәрһәqа ве йәке бьраки гот: «Һәрге wә тʹәви Йаһоwа мал бь мал хьзмәт кьра, wәйе тʹәне хwәха хәбәр да, йан wәйе бьһишта Йаһоwа хәбәр дә?» Демәк, чахе әм Хәбәра Хwәде мәрьварʹа дьхуньн, бь ве йәке әм дьһельн wәки Йаһоwа тʹәви мәрьва хәбәр дә. Рʹезәкә рʹьнд бьжарти дьһа qәwат ә, нә кö гьлийед мә (1 Тʹеслн. 2:13). Пьрсәкә öса бьдьнә хwә: «Гәло әз һʹәму мәщала дьдьмә хәбате сәва кö wәʹде бәлакьрьна мьзгинийе пʹарәкә жь Хәбәра Хwәде мәрьварʹа бьхуньм?»

8. Чьрʹа бәс нинә wәки мәрьварʹа тʹәне рʹеза бьхуньн?

⁸ Ле мәрьварʹа тʹәне рʹеза бьхуньн бәс нинә. Чьрʹа? Чьмки һʹәчʹи зәʹф мәрьв йан qә фәʹм накьн Кʹьтеба Пироз, йан жи гәләк һьндьк фәʹм дькьн. Qьрʹна йәкеда жи öса бу у иро жи öса нә (Рʹом. 10:2). Ләма жи әм гәрәке нәфькьрьн кö мәрьв wе перʹа-перʹа фәʹм кә әw рʹеза кö әм жерʹа дьхуньн. Чахе әм рʹезе дьхуньн, лазьм ә дина мәрьв бьдьнә сәр гьлийед сәрәкә жь рʹезе у паше жи шьровәкьн кö әw чь те һʹәсабе. Һәрге әм öса бькьн, Хәбәра Хwәде wе бьгьһижә дьле мәрьва. (Бьхунә Луqа 24:32.)

9. Әм хьзмәтийеда ча дькарьн хәбәрдане дәстпекьн, wәки мәрьв qәдьре Кʹьтеба Пироз бьгьрә? Мәсәле биньн.

⁹ Әм öса жи гәрәке бьфькьрьн кö пешийа хwәндьна рʹезе чь лазьм ә бежьн, wәки мәрьв qәдьре Кʹьтеба Пироз бьгьрә. Мәсәлә, әм дькарьн бежьн: «Wәрен әм бьньһерʹьн һәла Әʹфрандаре мә дәрһәqа wе йәке чь дьбежә». Ле чахе әм хәбәр дьдьн тʹәви мәрьвәки кʹижан кö Мәсиһи нинә, wе баш бә wәки әм бежьн: «Бьньһерʹьн Ньвисаред Пироз чь дьбежә». Йан жи һәрге әм рʹасти мәрьве öса бен кö тʹö рʹелигийа наһʹәбинә, әм дькарьн пьрсәкә öса бьдьнә wи: «Wә qә бьһистийә дәрһәqа ве готьнәкә бәре?» Бәле, wәʹде хьзмәтийе әм гәрәке тʹьме һьлдьнә һʹәсаб кö тʹәви кʹе хәбәр дьдьн, сәва бьзаньбьн ча хәбәрдане дәстпекьн (1 Корн. 9:22, 23).

10. а) Гьли кьн, бьраки ча Кʹьтеба Пироз да хәбате у әwе йәке чь кʹар ани. б) Wә ча wәʹде хьзмәтийе qәwата Хәбәра Хwәде дитийә?

¹⁰ Гәләк хушк-бьра тʹәхмин кьрьнә кö чахе әwана хьзмәтийеда Хәбәра Хwәде дьдьн хәбате, әw дьле мәрьва һе дьгьрә у баш сәр wан һʹöкöм дькә. Wәрә мәсәләке шеwьр кьн. Бьраки мә мерькәки әʹмьрда мәзьнрʹа бь сала журналед мә дьбьр у әwи мерьки тʹьме әw журнал дьхwәндьн. Щарәке әwи бьрайи сафи кьр нә кö тʹәне журнала «Бьрща Qәрәwьлийе» бьдә wи, ле рʹезәкә Кʹьтеба Пироз жи бьхунә кʹижан ве журналеда кʹьфшкьри бу. Әwи 2 Корьнтʹи 1:3, 4 wирʹа хwәнд кʹидәреда те готьне: «Баве дьлшәwатийе у Хwәдейе һʹәму бәрдьлийе . . . нава һʹәму тәʹли-тәнгийада дьл дьдә бәр мә». Әw рʹез öса дьле wи мерьки гьрт, wәки әwи готә бьре мә кö щара дöда бьхунә. Әwи гот кö әw у жьна wи гәләк һʹәwще бәрдьлийе бун у әw һе зедә дьхwазә дәрһәqа Кʹьтеба Пироз пебьһʹәсә. Бәле, рʹасти жи qәwата Хәбәра Хwәде гәләк зор ә (Кʹар. Шанд. 19:20).

ЧАХЕ ЖЬ СЕНЕ ҺИН ДЬКЬН

11. Чь щабдарийа wан бьра һәйә, йед кö щьватеда һин дькьн?

¹¹ Әм гьшк жи шабунәкә мәзьн дьстиньн чахе дьчьнә щьвате у щьватед мәзьн. Мәʹнийа лапә фәрз кö чьрʹа әм дьчьн wедәре, әw ә кö Йаһоwа бьһʹәбиньн. Әм öса жи кʹарәкә мәзьн дьстиньн жь wе рʹебәрийе кö щьватеда дьдьнә мә. Ләма жи бона бьра qәдьрәки гәләк мәзьн ә кö әwана щьватеда һин дькьн. Әwана гәрәке бир нәкьн, wәки әw щабдарикә фәрз ә (Аqуб 3:1). Әwана тʹьме гәрәке баwәр бьн кö чь жи әwана һин дькьн, хут сәр һʹиме Хәбәра Хwәде йә. Һәрге һун бьре щабдар ьн у щьватеда һин дькьн, ча һун дькарьн qәwата Кʹьтеба Пироз öса бьдьнә хәбате, wәки бьгьһижә дьле гöһдара?

12. Готарван ча дькарә öса бькә wәки готара wи сәр һʹиме Кʹьтеба Пироз бә?

¹² Бьрано, готара wәда Кʹьтеба Пироз гәрәке щийе лапи фәрз бьгьрә (Йуһʹн. 7:16). Әw чь те һʹәсабе? Wәʹде готаре һун гәрәке фәсал бьн wәки дина мәрьва нә кö һе зедә һәрʹә сәр мәсәлед wә йан жи щурʹе хәбәрдана wә, ле сәр рʹезед жь Кʹьтеба Пироз. Öса жи бир нәкьн, wәки һинкьрьна жь Кʹьтеба Пироз найе һʹәсабе тʹәне гәләк рʹеза бьхуньн. Бь рʹасти, чахе гәләк рʹеза дьхуньн, һʹәчʹи зәʹф мәрьв бир дькьн wан рʹеза. Ләма жи wе дьһа баш бә, һәрге һун рʹезед сәрәкә рʹьнд бьжберьн, бьхуньн, шьровәкьн, мәсәле биньн у кʹара рʹезе нишан кьн (Нәһәм. 8:8). Чахе готара wә сәр һʹиме плане йә, кʹижан кö жь тʹәшкиләта мә йә, һун гәрәке һьн плана готаре, һьн рʹезед теда рʹьнд леколин бькьн. Һун гәрәке рʹьнд фәʹм бькьн, һәла ча фькьред жь готаре гьредайинә тʹәви рʹеза. Паше жи wан рʹеза бьдьнә хәбате, кʹижан wе дина мәрьва бькʹьшинә сәр нета готарейә сәрәкә (Һун дькарьн жь кʹьтеба «Мәкʹтәба Даннасинкьрьне» ширәтед баш бьвиньн дәрсед 21 һʹәта 23-да). Хенщи wан һʹәму тьшта, Йаһоwарʹа дöа бькьн, wәки али wә бькә сәва һун фькьред qимәт жь Хәбәра wи мәрьварʹа әʹйан кьн. (Бьхунә Әзра 7:10; Мәтʹәлок 3:13, 14.)

13. а) Ча рʹеза кö сәр щьвате һатьбу хwәндьне, сәр хушкәке гәләк һʹöкöм бу? б) Һун чь кʹаре дьстиньн жь ве йәке кö ча щьватеда Кʹьтеба Пироз те хәбьтандьне?

¹³ Зарʹотийа хушкәкә мәйә жь Австралйайе зәʹф чәтьн дәрбаз бьбу у гәләк тьштед нәбаш тʹәви wе qәwьми бун. Рʹаст ә wәʹдә шунда әw дәрһәqа Йаһоwа пеһʹәсийа у һатә ньхöмандьне, ле диса жи жерʹа чәтьн бу баwәр кә кö Йаһоwа ле һʹьз дькә. Ле wәʹдә дәрбаз бу, әwе баwәр кьр wәки Хwәде ле бь рʹасти һʹьз дькә. Гәло чь әwе хушке һелан кьр wәки дöдьли нәбә wе йәкеда? Рʹеза жь Кʹьтеба Пироз кö сәр щьвате һатьбу хwәндьне гәләк дьле wе гьрт. Паше әwе әв рʹез леколин кьр у бәрамбәри рʹезед дьн жи кьр, у әwе йәке зәʹф али wе кьр.a Ле бал wә жи öса qәwьмийә кö wә сәр щьвате йан жи сәр щьвата мәзьн рʹез бьһистийә у гәләк дьле wә гьртийә? (Нәһәм. 8:12).

14. Әм ча дькарьн һʹьзкьрьна хwә Йаһоwарʹа бьдьн кʹьфше бона Хәбәра wи?

¹⁴ Бәле, әм гәләк жь Йаһоwа рʹази нә wәки әwи бь һʹьзкьрьне Хәбәра хwә дайә мә. Хwәде нә кö тʹәне соз дабу кö Кʹьтеба Пироз wе бе хwәйкьрьне, ле әwи созе хwә ани сери (1 Пәт. 1:24, 25). Ләма жи, wәрен әм тʹьме Хәбәра Хwәде бьхуньн, тʹәмийед кö теда һәнә биньн сери, у Хәбәра wи бьдьнә хәбате wәки али мәрьва бькьн. Öса әм һʹьзкьрьна хwә һьн һьндава ве пʹешкʹеша qимәт дьдьн кʹьфше, һьн жи йа лапә фәрз һьндава Автор, демәк Йаһоwа Хwәде.