«Һʹьз Бькьн . . . бь Кьра у Рʹастийе»
«Нә кö әм бь хәбәр йан заре хwә һʹьз бькьн, ле бь кьра у рʹастийе» (1 ЙУҺʹН. 3:18).
1. Кʹижан ә һʹьзкьрьна лапә мәзьн, у әв һʹьзкьрьн ча әʹйан дьбә? (Бьньһерʹә шькле әʹwльн.)
ЙАҺОWА Канийа һʹьзкьрьне йә (1 Йуһʹн. 4:7). Һʹьзкьрьна лапә мәзьн «агапе» йә, кʹижан кö сәр һʹиме принсипед рʹаст ә. Рʹаст ә назькайи у дьлгәрми жи дькʹәвә нава ве һʹьзкьрьне, ле фәрз әw ә кö әв һʹьзкьрьн кʹара йед майин дьгәрʹә, нә кö кʹара хwә. Ль гора фәрһәнгәке, һʹьзкьрьна «агапе» дькарә «тʹәне пе шьхöла бе кʹьфше». Бәле, чахе әм һʹьзкьрьна ви щурʹәйи дьдьнә кʹьфше, йан жи йед майин һьндава мәда дьдьнә кʹьфше, әм бәхтәwар дьбьн у әʹмьре хwәда ша дьбьн.
2, 3. Йаһоwа ча һʹьзкьрьна хwә һьндава мәрьва да кʹьфше?
2 Йаһоwа һәла һе пешийа әʹфьрандьна Адәм у Һеwайе һʹьзкьрьн һьндава мәрьва да кʹьфше. Әwи әʹрд öса чекьр сәва мәрьв нә кö тʹәне теда бьжин, ле әʹмьре хwәрʹа бь тʹәмами ша бьн. Йаһоwа әw йәк нә кö бона кʹара хwә кьр, ле бона мә. Гава кö әwи әʹрд һазьр кьр у кьрә Щьнәт, әwи мәрьв кʹәрәм кьр у жийина һʹәта-һʹәтайе пʹешкʹеш да wан.
3 Паши ве йәке чахе Адәм у Һеwа һьмбәри Хwәде рʹабун, Йаһоwа һʹьзкьрьнәкә лапә мәзьн да кʹьфше. Йаһоwа баwәр бу кö һьнә мәрьв wе wи һʹьз бькьн, у ләма әwи соз да кö Кöрʹе хwә бьдә qöрбан сәва әwана бенә хьлазкьрьне (Дәстп. 3:15; 1 Йуһʹн. 4:10). Гава Йаһоwа соз да дәрһәqа кʹьрʹине, һәма ве гаве Әwи һʹәсаб кьр кö әw qöрбан ида һатә дайине. Паше, чахе 4 000 сал дәрбаз бу, Йаһоwа Кöрʹе хwәйи тайе тʹәне да qöрбан бона һʹәму мәрьва (Йуһʹн. 3:16). Бәле, әм гәләк рʹази нә жь Йаһоwа бона һʹьзкьрьна wийи мәзьн!
4. Чь дьдә кʹьфше кö мәрьвед гöнәкʹар жи дькарьн һʹьзкьрьна беһʹьләкʹари нишан кьн?
4 Әм дькарьн һʹьзкьрьна рʹаст бьдьн кʹьфше, чьмки Йаһоwа әм бь сурәта хwә әʹфьрандьнә. Рʹаст ә жь бо гöнә мәрʹа дькарә чәтьн бә һʹьзкьрьне бьдьнә кʹьфше, ле йәкә әм дькарьн. Мәсәлә, Һабил һʹьзкьрьн бь wе йәке да кʹьфше, кö бь дьле тʹәмьз qöрбанед лапә баш да Йаһоwа (Дәстп. 4:3, 4). Нöһ һʹьзкьрьна беһʹьләкʹари мәрьварʹа да кʹьфше, чахе бь сала әʹламәтийа Хwәде гьли дькьр, у нәдьньһерʹи сәр ве йәке кö мәрьва гöһ нәдьданә wи (2 Пәт. 2:5). Бьраһим нишан кьр кö һʹьзкьрьна wи һьндава Хwәде сәр щийе пешьн ә, гава һазьр бу кöрʹе хwә Исһаq бькә qöрбан (Аqуб 2:21). Әм жи мина wан мәрьвед амьн дьхwазьн һʹьзкьрьна хwә Хwәдерʹа бьдьнә кʹьфше wи чахи жи, гава мәрʹа чәтьн ә.
ФЬРQИЙА ОРТʹА ҺʹЬЗКЬРЬНА РʹАСТ У QӘЛП
5. Әм ча дькарьн һʹьзкьрьна рʹаст бьдьнә кʹьфше?
5 Кʹьтеба Пироз дьбежә, wәки һʹьзкьрьна рʹаст гәрәке бьдьнә кʹьфше нә кö «бь хәбәр йан заре хwә . . . , ле бь кьра у рʹастийе» (1 Йуһʹн. 3:18). Гәло әw те һʹәсабе кö әм гәрәке бь хәбәра һʹьзкьрьне нишан кьн? На! (1 Тʹеслн. 4:18). Әв гьли дьдьнә кʹьфше кö һʹьзкьрьна мә гәрәке нә кö тʹәне пе хәбәред мә бе кʹьфше, ле пе кьред мә, илаһи чахе кәсәкирʹа аликʹари лазьм ә. Бәʹса хәбәре, һәрге әм дьвиньн кö щьватеда кәсәк һʹәwще хwарьне йан кʹьнща йә, гьлийед ширьн wе кем кери wи бен (Аqуб 2:15, 16). Öса жи, һәрге әм Йаһоwа у мәрьва һʹьз дькьн, әме нә кö тʹәне жь Хwәде бьхwазьн кö хәбаткʹара бьшинә мьзгинийе бәла кьн, ле әме хwәха жи хирәт бьн wи шьхöлида (Мәт. 9:38).
6, 7. а) Чь йә «һʹьзкьрьна беһʹьләкʹари»? б) Һʹьзкьрьна qәлп чьда әʹйан дьбә?
6 Йуһʹәннайе шанди гот кö әм гәрәке «бь кьра у рʹастийе» һʹьз бькьн. Бәле, һʹьзкьрьна мә гәрәке «һʹьләкʹари нибә», демәк дöрʹу нибә (Рʹом. 12:9; 2 Корн. 6:6). Әв те һʹәсабе кö һәрге кәсәк хwә нишан дькә йанчь һʹьзкьрьна wи рʹаст ә у һʹәлал ә, ле öса нинә, бь рʹастийе öса дәрте кö әw рʹуйе хwә вәдьшерә. Ле гәло һʹьзкьрьна рʹастда дöрʹути һәйә? На. Мәрьве кö һʹьзкьрьна wи щурʹәйи дьдә кʹьфше, бь рʹастийе һʹьзкьрьна wи qәлп у пʹучʹ ә.
7 Дина хwә бьдьнә чәнд мәсәлед һʹьзкьрьна qәлп. Чахе Шәйтʹан бахче Әдәнеда тʹәви Һеwайе хәбәр дьда, пе хәбәрдана хwә әwи да кʹьфше йанчь qәнщийе жерʹа дьхwазә. Ле бь рʹастийе дьле wида qәлпи у дöрʹути һәбу (Дәстп. 3:4, 5). Öса жи биньн бира хwә Аһитофәл, кö һәвале Даwьд Пʹадша бу. Әwи хwә нишан дькьр кö йанчь һәвале Даwьд ә, ле паше әwи нәмамийа Даwьд кьр, чьмки кʹара хwә дьгәрʹийа. Öса әwи хwә әшкәрә кьр кö һәвале рʹаст нибу (2 Сам. 15:31). Иро жи һәнә рʹабәр у мәрьвед дьн, йед кö бь «заре хwәш у һʹьләкʹарийе» йәктийа щьвате хьраб дькьн. Әwана хwә öса датиньн те бежи qәнщийе дьхwазьн у һʹәйф ьн, ле бь рʹастийе әwана хwәһʹьз ьн у һʹьзкьрьна wан qәлп ә (Рʹом. 16:17, 18).
8. Кʹижан пьрсе әм гәрәке бьдьнә хwә?
8 Һʹьзкьрьна дöрʹути гәләк сосрәти йә, чьмки әв qәлп ә у мәрьва дьхапинә. Рʹаст ә мәрьв дькарә пе дöрʹутийа хwә кәсәки бьхапинә, ле Йаһоwа найе хапандьне. Иса гот wәки мәрьвед кö дöрʹутийе дькьн, wе qайим бенә щәзакьрьне (Мәт. 24:51). Бәле, хьзмәткʹаред Йаһоwа нахwазьн дöрʹу бьн. Ләма wе баш бә кö щара пьрсәкә öса бьдьнә хwә: «Гәло һʹьзкьрьна мьн тʹьме һʹәлал ә, йан щара әз йәки хwәһʹьз ьм у qәлп ьм?» Wәрә шеwьр кьн дәрһәqа нәһә тьшта, кö чаwа әм дькарьн һʹьзкьрьна бедöрʹути нишан кьн.
ЧАWА «БЬ КЬРА У РʹАСТИЙЕ» ҺʹЬЗ БЬКЬН
9. Һәрге һʹьзкьрьна мә рʹаст ә, әме чь нәкьн?
9 Бь шабуне хьзмәт кьн һьнге жи, гава шьхöлед wәйи баш кәс навинә. Әм гәрәке бь дьл у щан шьхöлед баш бона хушк-бьра «дьзива» бькьн, демәк wәки тʹö кәсирʹа нәйе кʹьфше, у дина wана нәкʹьшиньн сәр хwә. (Бьхунә Мәтта 6:1-4.) Һананийа у Саферийа дьхwәстьн кö гьшк пебьһʹәсьн wәки wана гәләк пʹәрә qöрбан кьр. Хенщи ве йәке, wана дәрәw кьр кö чьqас пʹәрә анин, у ахьрийеда сәва дöрʹутийа хwә wана һәqе хwә станд (Кʹар. Шанд. 5:1-10). Һәрге һʹьзкьрьна мә рʹаст ә, әме бь шабуне али хушк-бьра бькьн, у нәкьнә дәнги сәва пʹайа бьдьнә мә. Бәʹса хәбәре, бьред кö һазьркьрьна хwарьна рʹöһʹанида аликʹарийе дьдьнә Кʹома Рʹебәрийе, накьнә дәнги кö әwана wи шьхöли дькьн, чьмки нахwазьн дина мәрьва бькʹьшиньн сәр хwә, у нә жи дьбежьн кö сәр кʹижан әʹдәбйәте әwана дьхәбьтьн.
10. Ча әм дькарьн һьндава мәрьва qәдьр бьдьнә кʹьфше?
10 Qәдьре һʹәмуйа бьгьрьн. (Бьхунә Рʹомайи 12:10.) Иса мәсәлә мәрʹа һишт кö чаwа qәдьр у һöрмәте нишан кьн. Әwи шьхöлед öса дькьр кö ньмьз бун (Йуһʹн. 13:3-5, 12-15). Бәле, һеса нинә мьлук у шкәсти бьн, ләма лазьм ә сәр хwә гәләк бьхәбьтьн, wәки qәдьр нишан кьн һьндава мәрьва. Пешийа кö шандийа рʹöһʹе пироз бьстандана, wана бь тʹәмами фәʹм нәдькьр кö чьрʹа Иса әв йәк кьр у ча чʹәʹв бьдьнә wи (Йуһʹн. 13:7). Әм дькарьн qәдьр нишан кьн һьндава хушк-бьра, һәрге хwә сәр wанрʹа нәгьрьн. Бәʹса хәбәре, һәрге мә хwәндьна бьльнд стандийә, йан әм дәwләти нә, йан жи щьватеда щабдарийед мә һәнә, әм бәр wан хwә qöрʹә накьн (Рʹом. 12:3). Һьн жи чахе пʹайе кәсәки дьдьн, әм чʹәʹвнәбарийе накьн, ле дәwсе тʹәви wан ша дьбьн һәрге жи әм дьфькьрьн кö пʹайи мәрʹа жи дькʹәвә.
11. Чьрʹа әм гәрәке бь дьл пʹайа бьдьнә мәрьва?
11 Бь дьл у щан пʹайе хушк-бьра бьдьн. Әм гәрәке хwә нәгьрьн wәки пʹайе кәсәки бьдьн, чьмки пʹайи мәрьва дьшьдинә (Әфәс. 4:29). Ле һәрге пʹайи жь дьле мә нинә, öса дәрте әм wанрʹа дöрʹутийе дькьн. Һьн жи чахе лазьм ә кәсәки ширәт кьн, әм гәрәке хwә нәгьрьн (Мәтʹлк. 29:5). Һәрге әм пʹайе кәсәки дьдьн, ле паше пьштева сәр wи хәбәр дьдьн, әw жи щурʹе дöрʹутийе йә. Паwлосе шанди тʹьме һʹәлал бу һьндава хушк-бьра, чьмки һʹьзкьрьна wи рʹаст бу. Мәсәлә, әwи бь дьл у щан пʹайа дьда хушк-бьред жь Корьнтʹи сәва кьред wани баш (1 Корн. 11:2). Ле чахе wанрʹа ширәт лазьм бу, әwи бь нәрми у зәлал шьровәдькьр кö сәва чь wана ширәт дькә (1 Корн. 11:20-22).
Чахе әм али хушк-бьра дькьн йед кö һʹәwщә нә, бь ве йәке әм һʹьзкьрьна хwә у меванһʹьзийа хwә нишан дькьн (Бьньһерʹә абзаса 12)
12. Чаwа әм дькарьн меванһʹьзийеда һʹьзкьрьна рʹаст бьдьнә кʹьфше?
12 Меванһʹьз бьн. Йаһоwа тʹәми дайә мә кö һьндава хушк-бьрада дәствәкьри бьн. (Бьхунә 1 Йуһʹәнна 3:17.) Ле әве йәке әм гәрәке пе нета рʹаст бькьн. Пьрсед öса бьдьнә хwә: «Гәло әз тʹәне һьндава һәвалед хwә меванһʹьз ьм, йан жи һьндава wан кʹижана һʹәсаб дькьм кö щьватеда наве wан һәйә? Гәло әз wан мевана тʹәглифи мала хwә дькьм, дәсте кʹижанада һәйә у кʹе дькарә мьнрʹа qәнщийе бькә? Йан жи әз гази wан хушк-бьра дькьм, дәсте кʹижанада тʹöнә?» (Луqа 14:12-14). Бьдьнә бәр чʹәʹве хwә кö хушк йан бьракирʹа аликʹари лазьм ә, чьмки әwи тьштәкида шаши бәрʹдайә, йан жи һәрге кәсәк нашекьринә кö әм wи тʹәглифи мала хwә дькьн. Дәрәщед öсада, әм гәрәке әве тʹәмийе биньн сери: «Һьндава һәвда меванһʹьз бьн, бина хwә тәнг нәкьн» (1 Пәт. 4:9). Һәрге һун әве ширәте тʹьме биньн сери, һуне бәхтәwар бьн чьмки бь дьл у әшq мәрʹд ьн (Кʹар. Шанд. 20:35).
13. а) Кʹәнге илаһи чәтьн ә кʹомәке бьдьнә сьста? б) Чаwа әм дькарьн али сьста бькьн?
13 Кʹомәке бьдьнә сьста. Кʹьтеба Пироз тʹәмийе дьдә кö «кери кʹәтийа» бен у «һьндава һʹәмуйада» бь сәбьр бьн. Әw йәк кö әм ча әве тʹәмийе тиньн сери, дькарә әʹйан кә кö һʹьзкьрьна мә рʹаст ә йан на (1 Тʹеслн. 5:14). Гәләк хушк-бьра кö рʹöһʹанида сьст дьбьн, wәʹдә шунда диса рʹöһʹанида qәwи дьбьн. Ле тʹәви һьнәка һе зедә лазьм ә бь сәбьр бьн у пе һʹьзкьрьне али wан бькьн. Мәсәлә, әм дькарьн рʹезед жь Кʹьтеба Пироз wанрʹа бьхуньн у wана дьлгәрм кьн, öса жи тʹәви wан һәрʹьн хьзмәтийе, йан жи гава әwана дьле хwә мәрʹа вәдькьн, гöһ бьдьнә wан. Wе баш бә кö әм нәфькьрьн, wәки хушк йан бьрак «qәwи» йан «сьст ә», ле дәwсе әм гәрәке фәʹм кьн кö һәр кәс тьштәкида qәwи йә у тьштәкида сьст ә. Һәла һе Паwлосе шанди жи дәрһәqа сьстбунед хwә дьгот (2 Корн. 12:9, 10). Бәле, мә һʹәмушкʹара аликʹари у дьлгәрми лазьм ә.
14. Әм гәрәке чь бькьн сәва кö тʹәви хушк-бьра әʹдьлайе хwәй кьн?
14 Әʹдьлайе хwәй кьн. Әм гәрәке тʹьме әʹдьлайе хwәй кьн тʹәви хушк-бьра, һәла һе һьнге жи гава мә рʹаст фәʹм накьн йан жи һьндава мәда нәрʹастийе дькьн. (Бьхунә Рʹомайи 12:17, 18.) Һәрге мә кәсәк дайә хәйдандьне, бәле әм гәрәке бахшандьне бьхwазьн. Ле сәва кö дьле кәсәки нәрм кьн, бахшандьн гәрәке жь дьл бә. Бәʹса хәбәре, дәwса кö бежьн «Бьбахшинә мьн, кö тö öса хwә тʹәхмин дьки», лазьм ә бьдьн кʹьфше кö әм жи нәһәq ьн кö әw хәйди, у бежьн, «Бьбахшинә мьн, чьмки мьн пе гьлийед хwә дьле тә ешанд». Зәwащеда илаһи гәләк фәрз ә әʹдьлайе хwәй кьн. Нәрʹаст ә һәрге жьн-мер бәр мәрьва хwә нишан дькьн йанчь һәвдö һʹьз дькьн, ле чахе тʹәне нә һәврʹа хәбәр надьн, гьлийед хьраб һәвдöрʹа дьбежьн, йан жи дәсте хwә дьреж дькьн.
15. Ча әм дькарьн бьдьнә кʹьфше кö әм бь дьл дьбахшиньнә мәрьва?
15 Бь дьл у щан бьбахшиньн. Һәрге кәсәки әм данә хәйдандьне, әм дьбахшиньнә wи у хәйде жь дьле хwә дәрдьхьн. Щара мәрьв дьбәкә беһʹәмде хwә мә бьдә хәйдандьне. Һьнге жи әм гәрәке бьбахшиньн у «бь сәбьре һʹьзкьрьнеда ль бәр һәв дахьн», у һәр тьшти бькьн сәва «йәктийа рʹöһʹ пе һәвгьредана әʹдьлайийе хwәй кьн» (Әфәс. 4:2, 3). Сәва бь дьл бьбахшиньн, әм гәрәке гәләк нәфькьрьн сәр хәйде, чьмки һʹьзкьрьн «кʹине нажо» (1 Корн. 13:4, 5). Ле һәрге әм хәйде жь дьле хwә дәрнәхьн у әw мәрьв бәр чʹәʹве мә рʹәш бә, әм дькарьн һәләqәтийа хwә һьн тʹәви хушк-бьра, һьн жи тʹәви Йаһоwа хьраб кьн (Мәт. 6:14, 15). Бахшандьна мә wе бь дьл бә, һәрге әм бона wан дöа бькьн, йед кö мә данә хәйдандьне (Луqа 6:27, 28).
16. Әм гәрәке ча бьньһерʹьн сәр щабдарийед хwә?
16 Кʹара хwә нәгәрʹьн. Чахе әм щабдарийед тʹәзә дьстиньн, әм һʹьзкьрьна хwә дькарьн нишан кьн һәрге нә кö «кʹара хwә», ле кʹара мәрьве дьн бьгәрʹьн (1 Корн. 10:24). Бәʹса хәбәре, рʹожа щьватед мәзьн бьред щабдар зу тенә оде. Әwана дькарьн сәва хwә у нәфәред хwә щийед баш бьгьрьн, ле гәләк жь wан öса накьн чьмки әwана кʹара хwә нагәрʹьн у хwәһʹьз ниньн. Бәле, һʹьзкьрьна wан рʹаст ә. Ле ча һун дькарьн чʹәʹв бьдьнә мәсәла wанә баш?
17. Һәрге Мәсиһи гöне гьран кьрийә, һʹьзкьрьна һʹәлал wе бәрбь чь wи һелан кә?
17 Гöнед хwәйә вәшарти биньн рʹуйе хwә у тʹәрк бьдьн. Һьнә Мәсиһийа гöне хwәйә гьран вәшартьнә, чьмки шәрм дькьн у нахwазьн дьле кәсәки бешиньн (Мәтʹлк. 28:13). Ле әw йәк һьн wанрʹа зийане тинә, у һьн жи йед майинрʹа. Кьре öса нә бь һʹьзкьрьн ә, чьмки жь щьвате рʹöһʹе пироз дькарә бе һьлдане, у әʹдьлайа щьвате жи хьраб бә (Әфәс. 4:30). Ле һʹьзкьрьна һʹәлал wе Мәсиһи һелан кә кö гöне хwә рʹуспийарʹа әʹйан кә у аликʹарийа рʹöһʹани бьстинә (Аqуб 5:14, 15).
18. Чьрʹа фәрз ә һʹьзкьрьна мә рʹаст бә?
18 Һʹьзкьрьн һʹöнöрәкә лапә мәзьн ә (1 Корн. 13:13). Әв һʹöнöр мә әʹйан дькә кö әм шагьртед Иса нә, йед кö чʹәʹв дьдьнә Йаһоwа, кʹижан кö Канийа һʹьзкьрьне йә (Әфәс. 5:1, 2). Паwлос гот кö «һәгәр . . . һʹьзкьрьн дьле мьнда тʹöнәбә, әз нә тʹö тьшт ьм» (1 Корн. 13:2). Wәрә әм тʹьме һʹьзкьрьна хwә нә тʹәне пе зьмане хwә нишан кьн, ле öса жи «бь кьра у рʹастийе»!.