Һʹьзкьрьн; Һʹöнöрәки Гәләк Qимәт ә

ПАWЛОСЕ ШАНДИ пе рʹебәрийа Хwәде дәрһәqа нәһ һʹöнöра ньвиси, кʹижан кö бь qәwата рʹöһʹе пироз пешда тен (Галт. 5:22, 23). Әwи әв һʹәму һʹöнöр нав кьр бәре рʹöһʹе пироз.a Әw бәре рʹöһʹе пироз «мәрьве ну» дьдә кʹьфше (Колс. 3:10). Чахе бах рʹьнд те авкьрьне, һьнге әw бәр дьдә. Мина ве йәке, һәрге мәрьв пе рʹебәрийа рʹöһʹе пироз дьжи, һьнге әw wе бәре рʹöһʹе пироз бьдә кʹьфше (Зәб. 1:1-3).

Һʹöнöре пешийе кö Паwлос готьбу, әw һәйә һʹьзкьрьн, кʹижан кö гәләк qимәт ә. Чьрʹа әв һʹöнöр öса qимәт ә? Паwлос гот wәки әw бей һʹьзкьрьн «нә тʹö тьшт» ә (1 Корн. 13:2). Ле чь йә һʹьзкьрьн, у чаwа әм дькарьн әви һʹöнöри нав хwәда пешда биньн у һәр рʹож бьдьнә кʹьфше?

ҺʹЬЗКЬРЬН ЧЬ ЙӘ?

Бь гьлийа чәтьн ә әви һʹöнöри шьровәкьн, ле Кʹьтеба Пироз шьровәдькә кö мәрьве бь һʹьзкьрьн ча хwә дьдә кʹьфше. Мәсәлә, әw мәрьв «думькдьреж» у һʹәйф ә. Хенщи ве йәке, мәрьве бь һʹьзкьрьн «рʹастийерʹа ша дьбә» у «һәр гав дадьхә, һәр гав баwәр дькә, . . . һәр гав сәбьр дькә». Мәрьве öса бона йед дьн хәм дькә, дьфькьрә, у һәвалһʹьз ә. Ле мәрьве бе һʹьзкьрьн һʹәвсуд ә, qöрʹә йә, бемәʹрифәт ә, хwәһʹьз ә, зу дьхәйдә у кʹине дажо. Бәле, әм нахwазьн мәрьвнә öса бьн, ле дьхwазьн һʹьзкьрьна мә һәбә, кʹижан кö «йа хwә нагәрʹә» (1 Корн. 13:4-8).

ЙАҺОWА У ИСА ҺʹЬЗКЬРЬНЕДА МӘСӘЛА ЛАПӘ МӘЗЬН ЬН

«Хwәде һʹьзкьрьн ә». Бәле, һʹьзкьрьна Йаһоwа йа һәрә мәзьн ә (1 Йуһʹн. 4:8). Әв һʹьзкьрьн һʹәму кьред wида те кʹьфше у әшкәрә йә. Йаһоwа һʹьзкьрьна лапә мәзьн да кʹьфше һьндава инсанәте чахе Иса шандә сәр әʹрде, wәки әw бона гöнед мә әʹмьре хwә бьдә ча qöрбан. Йуһʹәннайе шанди гот: «Бь ве йәке һʹьзкьрьна Хwәде һьндава мәда хöйа бу, гава кö әwи Кöрʹе хwәйи Тайе тʹәне шандә дьнйайе, wәки әм бь wи бьжин. Һʹьзкьрьн әв ә, нә кö мә Хwәде һʹьз кьр, ле әwи әм һʹьз кьрьн у Кöрʹе хwә шанд чаwа мәщала бахшандьна гöнед мә» (1 Йуһʹн. 4:9, 10). Бәле, бь сайа һʹьзкьрьна Хwәде әм дькарьн бахшандьне бьстиньн у һивийа жийина һʹәта-һʹәтайе бьн.

Иса избат кьр һʹьзкьрьна хwә һьндава инсанәте, чахе бь рʹәзәдьли qьрара Хwәде ани сери, демәк әʹмьре хwә да ча qöрбан. Иса хwәха гот кö әw һат сәва qьрара Хwәде бинә сери. У Паwлос дәрһәqа ве йәке гот: «Бь ви аwайи Иса Мәсиһ әʹмьре Хwәде ани сери, щарәке бона һәртʹьм бәдәна хwә кьрә qöрбан, бь ве йәке әм паqьж кьрьн» (Ибрн. 10:9, 10). Жь мәрьва тʹö кәси һʹьзкьрьна öса мәзьн нәдайә кʹьфше. Иса гот: «Тʹö һʹьзкьрьн сәр wе һʹьзкьрьнерʹа тʹöнә, кö йәк әʹмьре хwә бәр достед хwәва бьдә» (Йуһʹн. 15:13). Ле гәло мәрьвед гöнәкʹар дькарьн чʹәʹв бьдьнә һʹьзкьрьна Йаһоwа у Иса? Бәле. Wәрә әм ньһа шеwьр кьн ча әм дькарьн әве йәке бькьн.

«ХWӘ ЛЬ ҺʹЬЗКЬРЬНЕ БЬГЬРЬН»

Паwлос мә һелан дькә: «Чʹәʹв бьдьнә Хwәде, чаwа зарʹед һʹьзкьри у хwә ль һʹьзкьрьне бьгьрьн, чаwа Мәсиһ жи әм һʹьз кьрьн у жийина хwә бона мә да» (Әфәс. 5:1, 2). Әм «хwә ль һʹьзкьрьне» дьгьрьн чахе һәр гав әви һʹöнöри дьдьнә кʹьфше. Әм нә тʹәне бь гьлийа, ле пе кьред хwә һʹьзкьрьне нишан дькьн. Йуһʹәнна ньвиси: «Зарʹокно, нә кö әм бь хәбәр йан заре хwә һʹьз бькьн, ле бь кьра у рʹастийе» (1 Йуһʹн. 3:18). Мәсәлә, һәрге әм Йаһоwа у мәрьва һʹьз дькьн, әме «мьзгинийа Пʹадшатийе» бәла кьн (Мәт. 24:14; Луqа 10:27). Öса жи гава әм «хwә ль һʹьзкьрьне» бьгьрьн, әме сәбьр бьн, qәнщ бьн у бьбахшиньн. Кʹьтеба Пироз дьбежә: «Чаwа Хöдан бахшандә wә, һун жи öса бьбахшиньнә һәв» (Колс. 3:13).

Һәрге әм кәсәки ширәт дькьн, әв найе һʹәсабе wәки һʹьзкьрьна мә тʹöнә. Мәсәлә, чахе зарʹ дьгьри, һьнә де-бав бәр wи дьчьн тен у һʹәму хwәстьнед wи тиньн сери, wәки тʹәне әw нәгьри. Ле де-бавед кö бь рʹастийе зарʹа хwә һʹьз дькьн, чахе лазьм ә wе зарʹа хwә ширәт бькьн. Хwәде һʹьзкьрьн ә, ле «кʹе һʹьз дькә, wи ширәт дькә» (Ибрн. 12:6). Демәк, чахе кәсәки рʹаст дькьн у ширәт дькьн wәʹде лазьмда, әв йәк әʹйанкьрьна һʹьзкьрьне йә (Мәтʹлк. 3:11, 12). Ле әм гәрәке бир нәкьн wәки әм гöнәкʹар ьн у ләма щара дькарьн бь һʹьзкьрьн нибьн. Ләма жи мәрʹа һәртʹьм лазьм ә сәр хwә бьхәбьтьн, wәки һе зедә һʹьзкьрьне бал хwә пешда биньн. Ле чаwа әве йәке бькьн? Wәрә се тьшта шеwьр кьн.

ЧАWА НАВ ХWӘДА ҺʹЬЗКЬРЬНЕ ПЕШДА БИНЬН?

Йа пешьн, жь Хwәде рʹöһʹе пироз бьхwазьн, чьмки әв һʹьзкьрьне пешда тинә. Иса гот, wәки Йаһоwа wе «рʹöһʹе Пироз бьдә әwед кö жь wи дьхwазьн» (Луqа 11:13). Һәрге әм Хwәдерʹа дöа дькьн сәва рʹöһʹе пироз бьдә мә у дьһельн рʹöһʹе wийи пироз сәр мә һʹöкöм кә, әме һе зедә бь һʹьзкьрьн бьн у әв йәк wе кьред мәда бе кʹьфше (Галт. 5:16). Бәʹса хәбәре, һәрге һун рʹуспи нә, жь Хwәде рʹöһʹе пироз бьхwазьн сәва хушк-бьра бь һʹьзкьрьн ширәт кьн. Йан жи һәрге зарʹед wә һәнә, жь Хwәде рʹöһʹе пироз бьхwазьн wәки зарʹед хwә нә кö бь һерсе ширәт кьн, ле бь һʹьзкьрьне.

Йа дöда, бьфькьрьн кö Иса ча һʹьзкьрьн дьда кʹьфше чахе wи беһöрмәт дькьрьн (1 Пәт. 2:21, 23). Мәсәла Иса али мә дькә илаһи чахе кәсәк мә дьхәйидинә, йан жи нәһәqийе мә дькә. Һьнге wе керһати бә кö пьрсәкә öса бьдьнә хwә: «Гәло Иса ве дәрәщеда wе чь бькьра?» Хушкәк бь наве Лей дит кö әве пьрсе али wе кьр, кö тʹьме пешда бьфькьрә пешийа тьштәки бькә. Әw гьли дькә: «Щарәке, һәвалхәбаткʹара мьн пе емаиле дәрһәqа мьн у хәбата кö мьн дькьр, гьлийед нәбаш йед дьнрʹа ньвиси. Дьле мьн гәләк ешийа. Ле мьн пьрс да хwә кö чаwа әз дькарьм ве дәрәщеда чʹәʹв бьдьмә Иса. Әз дьфькьрим кö һәрге Иса дәwса мьн буйа wе чь бькьра, у ләма мьн сафи кьр, wәки әве йәке бир кьм у шәрʹ-дәʹwа пешда нәйньм. Wәʹдә шунда әз пеһʹәсийам, wәки һьнге сьһʹәт-qәwата ве һәвалхәбаткʹара мьн хьраб бу у әw стреседа бу. Әз фькьрим wәки дьбәкә әwе нә жи дьхwәст дьле мьн бешинә пе ве нәʹмәке. Мьн дьани бира хwә, wәки Иса ча һʹьзкьрьн дьда кʹьфше гава wи беһöрмәт дькьрьн, у әве йәке али мьн кьр кö әз жи wерʹа һʹьзкьрьне бьдьмә кʹьфше». Бәле, һәрге әм чʹәʹв бьдьнә Иса, әме тʹьме тʹәви мәрьва бь һʹьзкьрьн бьн.

Йа сьсийа, әм гәрәке һʹьзкьрьна öса бьдьнә кʹьфше кʹижан кö нишан дькә, wәки әм йед дьн сәр хwәрʹа дьгьрьн. Һʹьзкьрьна ви щурʹәйи әʹйан дькә Мәсиһийед рʹаст (Йуһʹн. 13:34, 35). Кʹьтеба Пироз ширәте дьдә мә, wәки «нет-фькьре» мә мина йе Иса бьн. Иса сәр әʹзмана дьжит, ле бона мә әwи «хwәха хwә шкенанд», һәла һе «һʹәта мьрьне» жи (Фили. 2:5-8). Һәрге әм чʹәʹв бьдьнә һʹьзкьрьна Иса, фькьред мә у һәстед мә wе бьбьнә мина йед wи, у әме һелан бьн мәрьва сәр хwәрʹа бьгьрьн. Ле гәло диса чь кʹар һәйә һәрге һʹьзкьрьна мә һәйә?

ЧЬ КʹАР Ә ЧАХЕ ҺʹЬЗКЬРЬНА МӘ ҺӘЙӘ?

Чахе әм тʹәви мәрьва бь һʹьзкьрьн ьн, әw йәк гәләк кʹаре тинә. Wәрә әм дәрһәqа дö кʹәрәма хәбәр дьн:

• БЬРАТИЙА ҺʹӘМДЬНЙАЙЕ: Нав мәда һʹьзкьрьн һәйә, ләма жи әм заньн wәки сәр тʹопа дьнйайе әм һәрʹьнә кʹижан щьвате жи, хушк-бьра wе бь дьл у щан мә qәбул кьн. Әw кʹәрәма мәзьн ә кö хушк-бьред мә нав «тʹәмамийа дьнйайеда» мә һʹьз дькьн (1 Пәт. 5:9). Һʹьзкьрьна öса тʹö щики тʹöнә хенщи нава щьмәʹта Хwәдеда.

• ӘʹДЬЛАЙИ: Чахе әм «һʹьзкьрьнеда» ль бәр һәв сәбьр дькьн, әм «һәвгьредана әʹдьлайийе» хwәй дькьн (Әфәс. 4:2, 3). Щьватада у щьватед мәзьнда әм әве әʹдьлайе әшкәрә дьвиньн. Һуне жи qайил бьн wәки ве дьнйа һәвкʹәтида, әʹдьлайа мә рʹасти жи мәхсус ә (Зәб. 119:165; Иша. 54:13). Чахе әм әʹдьлайе дьгәрʹьн, әм һʹьзкьрьна qайим нишан дькьн, кʹижан кö дьле Баве мәйи әʹзмана ша дькә (Зәб. 133:1-3; Мәт. 5:9).

«ҺʹЬЗКЬРЬН АВА ДЬКӘ»

Паwлос ньвиси: «Һʹьзкьрьн ава дькә» (1 Корн. 8:1). Ле гәло әв чь те һʹәсабе? Паwлос нәʹма хwәйә пешьнә Корьнтʹийарʹа сәре 13-да, кʹижан кö те навкьрьне «Зәбура Һʹьзкьрьне», шьровәдькә чаwа һʹьзкьрьн ава дькә. Бәре әʹwльн, һʹьзкьрьн кʹара хwә нагәрʹә, ле кʹара мәрьвед майин дьгәрʹә (1 Корн. 10:24; 13:5). Һьн жи, чьмки һʹьзкьрьн сәбьр дькә, йа хwә нагәрʹә у qәнщ ә, әw малбәта qәwи дькә у щьвата дькә йәктийе (Колс. 3:14).

Һʹьзкьрьна мә һьндава Хwәде лап qимәт ә у бона һʹәмуйа кʹар ә. Чьрʹа? Чьмки һʹьзкьрьна һьндава Хwәде мә дькә йәк. Мәрьвед жь щурʹә-щурʹә wәлата, раса, мьләта, у зьмана, мьл дьдьнә һәв тʹәвай Йаһоwарʹа хьзмәт дькьн (Сефн. 3:9). Wәрә әм һәр рʹож әви һʹöнöре qимәт бьдьнә кʹьфше, кʹижан кö бәре рʹöһʹе Хwәдейи пироз ә.