Щаһьлно «Бона Хьлазбуна Хwә . . . Бьхәбьтьн»

1. Чьрʹа ньхöмандьн гавәкә гәләк фәрз ә? (Бьньһерʹә шькле әʹwльн.)

ҺӘР САЛ һʹәзара мәрьв тенә ньхöмандьне. Гәләк жь wана зарʹ у щаһьл ьн, йед кö нава рʹастийеда мәзьн бунә. Дьбәкә тö жи мина wан рʹастийеда мәзьн буйи. Һәрге öса нә, тö һежайи пʹайа йи. Ньхöмандьн әw һәйә дәʹwакьрьн бона Мәсиһийа, у гавәкә гәләк фәрз ә сәва хьлаз бьн (Мәт. 28:19, 20; 1 Пәт. 3:21).

2. Чьрʹа тö гәрәке тʹәсмилбуйине нәтьрси?

² Ньхöмандьн гәләк кʹәрәма тинә, ле әw öса жи щабдарийед тʹәзә тинә. Чь щабдари? Рʹожа ньхöмандьна хwә, тә гот «бәле» сәр щаба ве пьрсе: «Ль сәр һʹиме qöрбанбуна Мәсиһ, тә гöне хwә тʹобә кьрийә у хwә тʹәсмили Хwәде кьрийә, сәва кö qьрара wи бьqәдини?» Ньхöмандьна тә нишан дькә, кö тә ида хwә тʹәсмили Хwәде кьрийә. Тә соз да Йаһоwа кö wи һʹьз бьки у qьрара wи сәр һәр тьштирʹа бьгьри. Әв соз щабдарийа мәзьн ә. Ле гәло гәрәке тö пʹошман би, wәки тә созәки öса дайә? На! Тöйе тʹö щар пʹошман нәби, wәки тә хwә дайә дәсте Йаһоwа. Бьфькьрә сәр ве йәке: Мәрьвед кö Йаһоwа нас накьн, бьн һʹöкöме Шәйтʹанда ньн. У бь рʹастийе qә тʹалаша Мире-щьна тö нини у әw нахwазә тö хьлаз би. Хенщи ве йәке, әw wе гәләк ша бә һәрге тö әʹмьре хwәйи һʹәта-һʹәтайе öнда ки, бь ве йәке кö алийе wи бьгьри у пьшта хwә бьди Йаһоwа.

3. Әwед кö хwә тʹәсмили Йаһоwа дькьн, кʹижан кʹәрәма дьстиньн?

³ Дина хwә бьде, кö тә чь кʹәрәм стандийә паши тʹәсмилбуйин у ньхöмандьна хwә. Тә әʹмьре хwә дайә дәсте Йаһоwа, у ләма тö дькари бей дöдьлибуне бежи: «Хöдан тʹәви мьн ә, әз натьрсьм, инсане чь ль мьн бькә?» (Зәб. 118:6). Бәле, алийе Хwәде бьгьри у qәбулкьрьна wи бьстини, әw qәдьрәки һәри мәзьн ә.

ЩАБДАРИЙА ТӘЙӘ ШӘХСИ

4, 5. а) Чьрʹа әм хwәха щабдар ьн бона тʹәсмилбуйина хwә? б) Һʹәму Мәсиһи рʹасти чь чәтьнайа тен?

⁴ Чаwа Мәсиһийе ньхöманди, һәләqәтийа тә тʹәви Йаһоwа, де-баве тәва гьредайи нинә. Тö хwәха бона хьлазбуна хwә щабдар и, һәрге жи тö һе тʹәви де-баве хwә дьжийи. Чьрʹа фәрз ә ве йәке бир нәки? Чьмки тö ньзани ахьрийеда тöйе рʹасти кʹижан щерʹьбандьна бейи. Мәсәлә, һәрге тö зарʹ буйи гава һати ньхöмандьне, паше чахе ида мәзьн дьби, рʹасти щерʹьбандьнед тʹәзә тейи. Qизькәкә щаһьл әв йәк öса шьровәкьр: «Һәрге зарʹ мәкʹтәбеда кәри тотька кö бона рʹожа буйине йә, нәхwә, әw wе бина хwә тәнг нәкә кö әw Шәʹде Йаһоwа йә у ләма нахwә. Ле паши чәнд сала чахе әw мәзьн дьбә у хwәстьна сексуали qәwи дьбә, һьнге әw гәрәке qә дöдьли нәбә, wәки сафикьрьна лапә баш әw ә, кö гöрʹа qанунед Йаһоwа бькә».

⁵ Бәле, тʹәне щаһьл ниньн кö рʹасти щерʹьбандьнед тʹәзә тен. Йед мәзьн жи кö һатьнә ньхöмандьне, рʹасти щерʹьбандьнед öса һатьнә кö нә жи һивийе бун. Бәʹса хәбәре, рʹасти чәтьнайед зәwащеда тен, проблемед сьһʹәт-qәwатева гьредайи, йан жи хәбатеда. Әм чәнд сали бьн жи, йәкә әме рʹасти чәтьнайа бен, кʹидәреда wе лазьм бә амьнийа хwә Йаһоwарʹа хwәй кьн (Аqуб 1:12-14).

6. а) Чьрʹа созе кö тә дайә Йаһоwа, найе гöһастьне? б) Жь Филипи 4:11-13 тö чь дькари һин би?

⁶ Сәва кö һәр дәрәщада амьн бьмини Йаһоwарʹа, тö гәрәке бир нәки, wәки созе кö тә дайә Йаһоwа, найе гöһастьне. Әв те һʹәсабе кö тә Кәсе Һәри бьльндрʹа гот, wәки тöйе тʹьме жерʹа хьзмәт ки, һәрге жи һәвал йан жи де-баве тә хьзмәтийа хwә бьһельн (Зәб. 27:10). Һʹәму дәрәщада тö дькари аликʹарийе жь Йаһоwа бьстини, wәки бьжи ль гора тʹәсмилбуйина хwә. (Бьхунә Филипи 4:11-13.)

7. Чь те һʹәсабе «бь хоф у тьрс» бона хьлазбуна хwә бьхәбьтьн?

⁷ Йаһоwа дьхwазә тö бьби досте wи. Ле лазьм ә әве достийе хwәй ки у бьхәбьти бона хьлазбуна хwә. Филипи 2:12-да те готьне: «Бона хьлазбуна хwә бь хоф у тьрс бьхәбьтьн». Әв гьли тенә һʹәсабе кö тö гәрәке бьфькьри, кö чаwа достийа хwә у амьнийа хwә Йаһоwарʹа хwәй ки wәʹде чәтьнайа. Ле тö гәрәке хwәда баwәр ниби, wәки дькари пе qәwата хwә ве йәке бьки. Һәла һе хьзмәткʹаред щерʹьбанди жи жь рʹийа рʹаст дәркʹәтьнә. Ле чь дькарә али тә бькә wәки бона хьлазбуна хwә бьхәбьти?

ЛЕКОЛИНКЬРЬНА КʹЬТЕБА ПИРОЗ ФӘРЗ Ә

8. Чь те һʹәсабе һинбуна шәхси, у чьрʹа әв йәк фәрз ә?

⁸ Сәва кö бьбьнә достед Йаһоwа, әм гәрәке гöһ бьдьнә wи у тʹәви wи хәбәр дьн. Чахе әм шәхси Кʹьтеба Пироз леколин дькьн, öса әм гöһ дьдьнә Йаһоwа. Әв öса жи те һʹәсабе кö әм гәрәке Хәбәра Хwәде у öса жи әʹдәбйәтед мәйә сәр һʹиме Кʹьтеба Пироз, бьхуньн у сәр бьфькьрьн. Öса әм занәбуне дьстиньн. Ле бир нәкьн кö һинбуна Кʹьтеба Пироз öса нинә кö әзбәри һин би, чаwа wәʹде екзамина. Һинбуна керһати мина ве йәке йә, чахе тö тьштәки леколин дьки у тьштед тʹәзә педьһʹәси дәрһәqа хәйсәт-һʹöнöред Йаһоwа. Һинбуна öса wе али тә бькә кö незики Хwәде би, у паше әw жи wе незики тә бә (Аqуб 4:8).

9. Кʹижан һащәт али тә дькьн һинбуна тәйә шәхсида?

⁹ Тʹәшкиләта Йаһоwа гәләк һащәт дьдә, кʹижан кö дькарьн али тә бькьн һинбуна тәйә шәхсида. Мәсәлә, jw.org-да һәйә «Дәрсед Кʹьтеба Пирозва Гьредайи», кö рʹеза «Щаһьлада» нә. Жь wан дәрса тö дькари пебьһʹәси, кö жь сәрһатийед Кʹьтеба Пироз тö чь дькари һин би. Öса жи jw.org-да һәнә рʹебәрийед бона леколинкьрьне, бь наве «Чь Һин Дькә Кʹьтеба Пироз?». Әw рʹебәри дькарьн али тә бькьн, wәки бькарьби дәрһәqа баwәрийа хwә мәрьвед дьнрʹа шьровәки. Һинбуна тәйә шәхсида, öса жи дькарә али тә бькә готар бь наве «Щаһьл Дьпьрсьн . . . Чаwа Әз Дькарьм Хwәндьна Кʹьтеба Пироз һе Һʹәwас кьм?». Әв готар жь журнала «Һʹьшйар Бьн!» йа мәһа Нисане йә, сала 2009. Леколинкьрьн у фькьрандьн сәр Хәбәра Хwәде, роләкә фәрз дьлизьн wәки бона хьлазбуна хwә бьхәбьти. (Бьхунә Бьхунә Зәбур 119:105.)

ДÖА ГӘЛӘК ФӘРЗ Ә

10. Чьрʹа бона Мәсиһийа дöа гәләк фәрз ә?

¹⁰ Бь сайа һинбуна шәхси тö гöһ дьди Йаһоwа, ле бь сайа дöа тö хәбәр дьди тʹәви wи. Бона Мәсиһи дöа гәрәке ритуал нибә, йан жи чаwа тәлисмә, кʹижан кö бона ве йәке йә, сәва һʹәму тьшт тәрʹа ләв бе. Дöа әв һәйә хәбәрдана реали тʹәви Әʹфьрандаре мә. Йаһоwа дьхwазә бьбьһе, кö тö чь дьхwази жерʹа бежи. (Бьхунә Филипи 4:6.) Чахе тö бона тьштәки бәрхwә дькʹәви, Кʹьтеба Пирозда ширәт те дайине кö «баре хwә бьдә Хöдан» (Зәб. 55:22). Ле тö баwәр дьки кö әв ширәт дькарә хут али тә бькә? Бь милйона хушк-бьра һәнә, йед кö дькарьн тәрʹа гьли кьн чаwа әwе ширәте али wан кьрийә. Әw дькарә али тә жи бькә!

11. Чьрʹа тö гәрәке тʹьме шькьрийе бьди Йаһоwа?

¹¹ Әм гәрәке тʹәне бона аликʹарийе Йаһоwарʹа дöа нәкьн. Кʹьтеба Пироз дьбежә: «Шекьрдар бьн» (Колс. 3:15). Щара әм öса дькʹәвьн һʹәйра чәтьнайед хwә, кö кʹәрәмед хwә бир дькьн. Ләма жи wе баш бә кö һәр рʹож бьфькьрьн, мәсәлә сәр се тьшта кö әм дьшекьриньн, у паше дöада рʹазибуна хwә Йаһоwарʹа бьдьнә кʹьфше. Хушкәкә мәйә щаһьл бь наве Абигаел йа кö 12 салийа хwәда һатә ньхöмандьне, дьбежә: «Әз дьфькьрьм кö жь һәр кәси нава дьнйайеда Йаһоwа һежайи шькьрийе йә. Әм гәрәке һәр гав жь wи рʹази бьн бона һәр пʹешкʹешед кö әw дьдә мә. Һәрге бал мә тʹәне әw тьшт бьминьн бона кʹижана мә Йаһоwарʹа рʹазибуна хwә дайә кʹьфше, гәло wе чьqас тьшт бал мә бьминьн?

QИМӘТА ЩЕРʹЬБАНДЬНА ТӘ

12, 13. Чьрʹа фәрз ә бьфькьри сәр qәнщийа Йаһоwа хут һьндава хwә?

¹² Даwьд Пʹадша гәләк тәнгаси дит. Ле чахе әwи дәрһәqа әʹмьре хwә гьли дькьр, гьлийед öса гот: «Тәʹм кьн у бьзаньбьн кö Хöдан ча qәнщ ә! Хwәзи wи мәрьви, йе кö хwә дайә бьн сийа Wи» (Зәб. 34:8). Әв рʹез дьдә кʹьфше, wәки әм дькарьн wәʹде чәтьнайа qәнщийа Йаһоwа һьндава хwә бьвиньн. Чахе әм Кʹьтеба Пироз у әʹдәбйәтед мә дьхуньн, у öса жи тенә щьвата, әм педьһʹәсьн дәрһәqа гәләк сәрһатийа кö чаwа Хwәде али хьзмәткʹаред хwә кьрийә, wәки жерʹа амьн бьминьн. Чахе тö рʹöһʹанида мәзьн би, тö ида хwәха гәрәке бьвини, кö Йаһоwа ча хут али тә дькә. Ле тә әʹмьре хwәда сәр хwә тʹәхмин кьрийә qәнщийа Йаһоwа?

¹³ Һәр Мәсиһи qәнщийа Йаһоwа һьндава хwә дитийә. Хwәде мә һәр кәс незики хwә у Кöрʹе хwә кьрийә. Иса гот: «Тʹö кәс нькарә бе щәм мьн, һʹәта Баве кö әз шандьмә, wи бәрбь мьн нәкʹьшинә» (Йуһʹн. 6:44). Гәло тö һʹәсаб дьки wәки Йаһоwа хут тö незики хwә кьри? Йан тö öса дьфькьри: «Йаһоwа де-баве мьн незики хwә кьрийә, у әз жи пәй wан дьчьм». Ле бир нәкә, кö чахе тә хwә тʹәсмили Йаһоwа кьр у һати ньхöмандьне, һьнгева һәләqәтийа тә тʹәви Йаһоwа дәстпебу, чь кö qәдьрәки гәләк мәзьн ә. Кʹьтеба Пироз мәрʹа дьбежә: «Һәгәр йәк Хwәде һʹьз дькә, әw жь алийе wива наскьри йә» (1 Корн. 8:3). Тʹьме qимәт кә у бьшекьринә щийе хwә тʹәшкиләта Йаһоwада.

14, 15. Хьзмәти ча дькарә баwәрийа тә qәwи кә?

¹⁴ Чахе тö дәрһәqа баwәрийа хwә мәрьвед дьнрʹа гьли дьки, һьнге жи тö дькари аликʹарийа Йаһоwа бьвини. Мәсәлә, чахе тö хьзмәт дьки йан жи мәкʹтәбеда шәʹдәтийе дьди, әw дькарә мерхасийе бьдә тә. Дьбәкә тәрʹа чәтьн ә һәвалед дәрсхана хwәрʹа шәʹдәтийе бьди, чьмки ньзани әwана wе чь бежьн у хwә ча бьдьнә кʹьфше. Ле һе чәтьн ә дәрһәqа баwәрийа хwә гьли ки бәр гәләк мәрьва, нә кö бәр йәке. Ле чь дькарә али тә бькә?

¹⁵ Пешийе бьфькьрә кö тö чьрʹа баwәрийа хwәда дöдьли нини. Һәрге jw.org-да сәр зьмане тә һәйә рʹебәрийед бона һинбуне кö бона щаһьла йә, әwан рʹебәрийа бьдә хәбате. Әw рʹебәри wе али тә бькьн, wәки бьфькьри кö чьрʹа тö баwәрийа хwәда дöдьли нини у ча йед дьнрʹа баwәрийа хwә шьровәки. Чахе тö баwәрийеда qәwи би у рʹьнд һазьр би, тöйе хwәха бьхwази бь мерхаси дәрһәqа Йаһоwа шәʹдәтийе бьди (Йерәм. 20:8, 9).

16. Чь дькарә мерхасийе бьдә тә кö дәрһәqа баwәрийа хwә хәбәр ди?

¹⁶ Һәрге жи тö рʹьнд һазьр и, дьбәкә һьнге жи тәрʹа чәтьн ә дәрһәqа баwәрийа хwә хәбәр ди. Хушкәкә мә кö 18 сали йә, у 13 салийа хwәда һатийә ньхöмандьне дьбежә: «Әз заньм әз чь баwәр дькьм, ле йәкә щара мьнрʹа чәтьн ә фькьред хwә бь гьлийа бежьм». Гәло әwе әw чәтьнайи ча сафи кьр? Әw дьбежә: «Әз нә офисйали у аза хәбәрдане дәстпедькьм. Һәвалдәрсханед мьн гәләк аза хәбәр дьдьн дәрһәqа ишед хwә. У әз жи гәрәке öса бькьм. Ләма жи әз щара чахе тьштәки гьли дькьм, хәбәрданеда гьлики öса бәррʹа давежьм мәсәлә, ‹Ве рʹоже мьн Кʹьтеба Пироз һин дькьр, у . . . Паши ве йәке әз вәдьгәрʹьм гьлийед хwә. Рʹаст ә дьбәкә хәбәрдана мьн рʹастә-рʹаст дәрһәqа Кʹьтеба Пироз нибә жи, ле щара йед дьн дьхwазьн пебьһʹәсьн кö әз ча Кʹьтеба Пироз һин дькьм. Щара дәрһәqа ве йәке пьрса жи дьдьнә мьн. Әз чьqас зәʹф метода öса дьдьмә хәбате, һаqас хәбәрдан һеса дьбә мьнрʹа, у дьле мьн гәләк ша дьбә».

17. Диса чь дькарә али тә бькә аза хәбәр ди дәрһәqа баwәрийа хwә?

¹⁷ Чахе тö бь qәдьр и һьндава мәрьва у бона wан хәм дьки, әwана wе һьн qәдьре тә, һьн жи qәдьре баwәрийа тә бьгьрьн. Оливиа кö 17 сали йә, чахе зарʹ бу һатә ньхöмандьне. Әwе гот: «Тʹьме тьрса мьн һәбу кö һәрге әз хәбәрданеда Кʹьтеба Пироз бьдьмә хәбате, wе мьн ча фанатик һʹәсаб кьн». Ле паше Оливиайе фькьред хwә гöһаст. Әw дәwса кö һʹьш-аqьле хwә бьдә сәр тьрса хwә, әw фькьри: «Гәләк щаһьл дәрһәqа Шәʹдед Йаһоwа тьштәки ньзаньн. Тʹәне әм ьн Шәʹдә, рʹасти кʹижана әwана тен. Ләма әw йәк кö әм ча хwә дьдьн кʹьфше, wе һʹöкöм бә сәр wе йәке кö әwана ча wе гöһ бьдьнә мә. Һәрге әм шәрм дькьн у дьтьрсьн дәрһәqа баwәрийа хwә бежьн, йан жи хәбәрданеда дькöльн, гәло әwана wе чь бьфькьрьн? Әwана wе бьфькьрьн, кö әм шәрм дькьн wәки әм Шәʹдед Йаһоwа нә. Һәла һе жи әwана дькарьн һерс тʹәви мә хәбәр дьн, һәрге әм гьлийед хwәда дöдьли бьн. Ле һәрге әм баwәрийа хwәда дöдьли ниньн у аза тʹәви wан хәбәр дьдьн, әwана wе һе qәдьре мә бьгьрьн».

БОНА ХЬЛАЗБУНА ХWӘ БЬХӘБЬТЬН

18. Чь те һʹәсабе кö бьхәбьти бона хьлазбуна хwә?

¹⁸ Чаwа мә дит, бона хьлазбуна хwә бьхәбьтьн, әw щабдарийа мәзьн ә. Сәва ве йәке әм гәрәке Хәбәра Хwәде бьхуньн у сәр бьфькьрьн, дöа бькьн Йаһоwарʹа, у бьфькьрьн дәрһәqа кʹәрәмед кö Йаһоwа хут дьдә мә. Һәрге тö wан тьштада пешда һәрʹи, тöйе дьһа баwәр би, wәки Йаһоwа досте тә йә. Әw йәк wе тә һелан кә кö бь мерхаси хәбәр ди дәрһәqа баwәрийа хwә. (Бьхунә Зәбур 73:28.)

19. Чьрʹа һежа йә кö тö бона хьлазбуна хwә бьхәбьти?

¹⁹ Иса гот: «Һәгәр йәк дьхwазә ль пәй мьн бе, бьра хwә инкʹар кә, стуна щәфайе хwә һьлдә у ль пәй мьн бе» (Мәт. 16:24, ДТʹ). Әʹйан ә кö тʹәсмилбуйин у ньхöмандьн, әв борщдарийа тә йә, чьмки тö Мәсиһи йи. Бь сайа ве йәке тö дькари беһʹәсаб кʹәрәма бьстини ньһа, у дьнйа тʹәзәда жийина һʹәта-һʹәтайе. Бәле, мәʹнийед тә һәнә wәки бона хьлазбуна хwә бьхәбьти!