Гәло Хwәде Дьлшәwат ә?

ӘМ ЧЬ ҺИН ДЬБЬН ЖЬ ӘʹФЬРИНА

Һатийә шьровәкьрьне кö дьлшәwати, әw «фәрәсәт ә кö бькарьби һәст у дәрде мәрьва фәʹм бьки у хwә дайни дәwса wи». Зандар у дохдьр Рик Һансен дьбежә, кö «дьлшәwати нав мәда һәйә».

ШЕWЬР КЬН: Гәло чьма дьлшәwати нав мәда һәйә, у әw хәйсәтәки пʹьр баш ә? Кʹьтеба Пироз дьбежә кö Хwәде инсанәт дьлqе хwәда әʹфьрандийә (Дәстпебун 1:26). Әм дьлqе Хwәдеда һатьнә әʹфьрандьне, ләма жи әм мина wи дькарьн хәйсәтед wийи баш бьдьнә кʹьфше. Дьлшәwати мәрийа һелан дькә али йед дьнена бькьн, у бь ве йәкә әwана дьлшәwатийа Әʹфьрандаре хwә Йаһоwа Хwәде, дьдьнә кʹьфше (Мәтʹәлок 14:31).

КʹЬТЕБА ПИРОЗ ЧЬ ДЬБЕЖӘ ДӘРҺӘQА ДЬЛШӘWАТИЙА ХWӘДЕ

Дьле Хwәде сәр мә дьшәwьтә у дешә, гава әw дьвинә кö әм дьчәрчьрьн. Щьмәʹта Исраелейә бәре тәйах кьрьн дилтийа Мьсьреда, у паше жи 40 сала дь бәрийеда рʹасти чәтьнайа һатьн. Кʹьтеба Пироз дәрһәqа Хwәде öса дьбежә: «Дь тәнгасийа wан һʹәмуйанда әw ащьз бу» (Ишайа 63:9). Дина хwә бьдьне, Хwәде нә тʹәне тәнгасийа wан дьдит, ле әʹщьз дьбу, чьмки дәрд у еше wан фәʹм дькьр. Әw дьбежә: «Чьмки әз һаш жь тәнгасийа wан һәмә» (Дәркʹәтьн 3:7, ПКʹМ). Хwәде зедә дькә: «Йе дәсте хwә ль wә бьхә wәки ль бибокен чʹәʹвен wи хьстийә дьбә» (Зәкәрйа 2:8). Демәк чахе кәсәк дьле мә дешинә, дьле Йаһоwа жи тʹәви мә дешә.

Кʹьтеба Пироз дьбежә кö һәрге әм хwә нәһәq дькьн у дьфькьрьн кö һежайи дьлшәwатийа Хwәде ниньн, «Хwәде жь дьле мә мәстьр ә у һәр тьшти занә» (1 Йуһʹәнна 3:19, 20). Хwәде мә һе рʹьнд нас дькә. Әw бь тʹәмами һʹале мә, фькьрен мә у һәстед мә фәʹм дькә. У һьм жи дьле wи сәр мә дьшәwьтә.

Әw Рʹезед Кʹьтеба Пироз мә qәwи дькьн

• «Тöйе банги аликʹарийе бьки; wе ХÖДАН бәрсьве бьдә у тöйе бьqери у wе: А вай, әз ль вьр ьм! бьбежә» (ИШАЙА 58:9).

• «‹Әз рʹьнд заньм әw, чь кö мьн сәва wә qьрар кьрийә› Йаһоwа дьбежә. ‹Мьн әʹдьлайи сәва wә qьрар кьрийә, нә кö хәзәба, сәва кö һевийе у ахьрийа баш бьдьмә wә. У һуне гази мьн бькьн у бен мьнрʹа дöа бькьн у әзе wә бьбьһем›» (ЙЕРӘМЙА 29:11, 12 ДТʹ).

• «Һесьред мьн Тö бькә мәшке Хwә. Гәло әw нә кʹьтеба Тәда нә?» (ЗӘБУР 56:8).

ХWӘДЕ ҺАШ ЖЬ МӘ ҺӘЙӘ, МӘ ФӘʹМ ДЬКӘ У ДЬЛЕ WИ СӘР МӘ ДЬШӘWЬТӘ

Чахе әм заньн кö дьле Хwәде ль сәр мә дьшәwьтә, әв йәк дькарә нава чәтьнайада али мә бькә? Wәрен әм мәсәла Марийайе шеwьр кьн:

«Кöрʹе мьни 18 сали нава 2 салада пʹьрʹ зәһмәт дькʹьшанд у дьчәрчьри жь бо кʹансәре. Чахе әw мьр, мьнрʹа чәтьн бу бьжим, у мьн тʹьре wәки әв һʹәму тьшт нәрʹаст бу. Әз һерс дькʹәтьм чьмки дьфькьрим wәки чьма Йәһоwа али кöрʹе мьн нәкьр, кö әw qәнщ буйа!

«Шәш сал шунда, һәваләкә мьнә щьвате бь дьлшәwати у һʹьзкьрьн гöһ да мьн, чахе мьн дьлә хwә жерʹа вәкьр у готе, кö Йаһоwа мьн һʹьз накә. Әwе чәнд сьһʹәта гöһ дьда мьн, у хәбәрдана мьн нәдьбьри. Паши wе йәке әwе рʹезәк жь Кʹьтеба Пироз мьнрʹа хwәнд чь кö әз гәләк шьдандьм. Әв рʹеза жь 1 Йуһʹәннайе 3:19, 20 бу, кʹидәре öса те готьне: «Хwәде жь дьле мә мәстьр ә у һәр тьшти занә». Әwе мьнрʹа шьроwәкьр, кö Йаһоwа һаш дәрд-кöле мә һәйә у бона мә хәм дькә.

«Йәкә мьнрʹа диса жи чәтьн бу, һерса хwә дахьм! Паше мьн хwәнд Зәбур 94:19, кʹижан кö дьбежә: «Дәма дәрд-кöл дьле мьнда зедә дьбьн, барьстанийед Тә нәфса мьн ша дькьн». Мьнрʹа öса һатә кʹьфше те бежи әв рʹез хут бона мьн һатьнә ньвисаре! Һьнә wәʹдә шунда мьн карьбу дьле хwә Йаһоwарʹа жи вәкьм у wирʹа хәбәр дьм бона хәмгинийа хwә, чьмки мьн заньбу кö әw гöһ дьдә мьн у мьн фәʹм дькә».

Бь рʹасти жи әм чьqас дьлрʹьһʹәт дьбьн, чахе заньн кö Хwәде мә фәʹм дькә у wәки дьле wи ль сәр мә дьшәwьтә! Ле wәки öса нә, чьма һаqас кöл-дәрд у тәнгаси һәнә? Дьбә кö Хwәде бона кьред мәйи нәрʹаст, мә щәза дькә? Гәло Хwәде wе тьштәк бькә, сәва кö һʹәму кöл-дәрда бьдә һьлдане? Әв пьрс wе готаред дьнда бенә шеwьркьрьне.