К′ЬТЕБХАНӘЙА ОНЛАЙН йа Бьрща Qәрәwьлийе
К′ЬТЕБХАНӘЙА ОНЛАЙН
Йа Бьрща Qәрәwьлийе
К′öрди Кöрманщи (Кирили)
ö
  • һ
  • ә
  • w
  • q
  • ö
  • К′ЬТЕБА ПИРОЗ
  • Ә′ДӘБЙӘТ
  • ЩЬВАТ
  • w18 Сьбат рʹупʹ. 3–7
  • Чʹәʹв Бьдьнә Баwәри у Гöһдарийа Нöһ, Данийел, у Ибо

Дәрһәqа wе йәке т′ö видео т′öнә

Бьбахшиньн, wәʹде вехьстьна видео шаши пешда һат.

  • Чʹәʹв Бьдьнә Баwәри у Гöһдарийа Нöһ, Данийел, у Ибо
  • Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә (Бона Һинбуне) — 2018
  • Бьнсәри
  • Т′емед Мина Wе
  • НӘҺ QЬРʹНА ЗЕДӘТЬР НÖҺ АМЬН БУ У ГÖРʹА ХWӘДЕ ДЬКЬР
  • ШӘҺӘРЕ ХЬРАБДА ДАНИЙЕЛ АМЬН У ГÖРʹА ХWӘДЕДА МА
  • ИБО ДӘWЛӘТИЙЕДА У КʹӘСИБИЙЕДА ЖИ АМЬН У ГÖРʹА ХWӘДЕДА МА
  • ЙАҺОWА WЕ ТӘ «QӘWАТ КӘ»
  • Тö Йаһоwа öса Нас Дьки Чаwа Нöһ, Данийел у Ибо Нас Дькьрьн?
    Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә (Бона Һинбуне) — 2018
  • Жь Мәсәла Данийел Пʹехәмбәр Һин бә
    Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә (Бона Һинбуне) — 2023
Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә (Бона Һинбуне) — 2018
w18 Сьбат рʹупʹ. 3–7
Данийел у се һәвалед wи хwарьна пʹадша инкʹар дькьн

Чʹәʹв Бьдьнә Баwәри у Гöһдарийа Нöһ, Данийел, у Ибо

«Нöһ, Данийел у Ибо . . . бь рʹастийа хwә wе әʹмьре хwә хьлаз кьрана» (ҺӘЗQЛ. 14:14, ДТʹ).

КʹЬЛАМЕД: 89, 119

КʹИЖАН ДӘРӘЩАДА ҺУНЕ ЧʹӘʹВ БЬДЬНӘ БАWӘРИЙА . . .

  • Нöһ?

  • Данийел?

  • Ибо?

1, 2. а) Чьрʹа мәсәла Нöһ, Данийел, у Ибо дькарьн мә бьшьдиньн? б) Һәзәqел кʹижан дәрәщада гьлийед жь рʹеза сәрәкә йа ве готаре ньвиси?

ДЬQӘWЬМӘ һун рʹасти чәтьнайа тен, мәсәлә алийе сьһʹәт-qәwатеда, алийе пʹәрада, йан жи дьбәкә рʹасти пәйкʹәтьна тен. Щара жи дьбәкә хьзмәтийа Йаһоwада wәрʹа чәтьн ә шабуна хwә хwәй кьн. Һәрге дәрәща wә öса нә, мәсәла Нöһ, Данийел у Ибо дькарә wә бьшьдинә. Әwана һәрсек жи гöнәкʹар бун у мина мә рʹасти тәнгасийа дьһатьн. Щара һәла һе әʹмьре wан жи дькʹәтә бьн qәзийе. Ле йәкә wана амьнийа хwә хwәй кьр, у Хwәде wана һʹәсаб кьр кö әwана баwәри у гöһдарийеда мәсәлә нә. (Бьхунә Һәзәqел 14:12-14.)

2 Һәзәqел гьлийед жь рʹеза сәрәкә йа ве готаре сала 612 Б.Д.М. Бабилонйайеда ньвисиa (Һәзqл. 1:1; 8:1). Һьнге, чаwа һатьбу пʹехәмбәртикьрьне Оршәлим ида незики wеранкьрьне бу, у сала 607 Б.Д.М. әw пʹехәмбәрти һатә сери. Wи wәʹдәйи тʹәне һьнә мәрьв хьлаз бун, йед кö мина Нöһ, Данийел у Ибо амьн бун у гöрʹа Хwәде дькьрьн (Һәзqл. 9:1-5). Нава wан һьнә мәрьвада Йерәмйа, Барук, Әбәдмәләк, у Рәкәбийа бун.

3. Ве готареда әме дәрһәqа чь шеwьр кьн?

3 Wәʹде ахьрийа ве дьнйа зöлм жи, тʹәне әw мәрьв wе хьлаз бьн, йед кö мина Нöһ, Данийел у Ибо, амьн у рʹаст ьн (Әʹйан. 7:9, 14). Ләма жи wәрә әм шеwьр кьн кö чьрʹа Йаһоwа әw һәрсек һʹәсаб кьр мәсәла амьнийе у рʹастийе. Чахе әм сәрһатийа wан шеwьр кьн, дина хwә бьдьн кö 1) әwана рʹасти кʹижан тәнгасийа һатьнә, у 2) чаwа әм дькарьн баwәрийеда у гöһдарийеда чʹәʹв бьдьнә wан.

НӘҺ QЬРʹНА ЗЕДӘТЬР НÖҺ АМЬН БУ У ГÖРʹА ХWӘДЕ ДЬКЬР

4, 5. Нöһ рʹасти кʹижан тәнгасийа һат, у чьрʹа сәбьра wи рʹасти жи мәсәләкә мәзьн ә?

4 Нöһ рʹасти кʹижан тәнгасийа һат? Wәʹде Һәнохда, демәк баве кальке Нöһ, мәрьв гәләк зöлм бун. Әwана «һʹәму готьнед хьраб» һьндава Йаһоwа хәбәр дьдан (Щьһуд. 14, 15). Зорбәти жи гәләк бәла бьбу. Рʹожед Нöһда, «хьрабийава әʹрд тʹьжи бьбу». Мьлйакʹәтед хьраб һатьбун сәр әʹрде, хwә кьрьбун мәрьв у хwәрʹа жьн дьстандьн. Һьн жи зарʹ кö wанрʹа дьбун гәләк берʹәʹм у зöлм бун (Дәстп. 6:2-4, 11, 12). Ле Нöһ жь wан һʹәмуйа гәләк щöдә дьбу. «Нöһ бәр чʹәʹве Хöдан кʹәрәм дит. . . . [Әw] нава мәрьвед wи зәманида мәрьвәки рʹаст у кʹамьл бу. Нöһ рʹийа Хwәдеда дьчу» (Дәстп. 6:8, 9).

5 Дина хwә бьдьне кö әw гьли дәрһәqа Нöһ чь дьдьнә кʹьфше. Йа пешьн, бьфькьрьн әw пешийа Селаве зәманед хьрабда чьqас wәхт рʹийа Хwәдеда дьчу. Әw нә кö 70 йан жи 80 сала wе дьнйа хьрабда дьжит, ле wәкә 600 сала! (Дәстп. 7:11). Йа дöда, wәʹде Нöһда щьват тʹöнә бу, кö али wи бькьра у әw бьшьданда. Ча те кʹьфше, һәла һе хушк-бьред wийи һʹәлал жи алийе рʹöһʹанида пьштгьрийа wи нәдькьрьн.b

6. Чь щурʹәйи Нöһ мерхасийа мәзьн да кʹьфше?

6 Нöһ нәдьфькьри wәки бәс ә тʹәне мәрьвәки баш бә. Әwи öса жи «рʹасти даннасин дькьр», у әʹйан гьшкарʹа дьгот дәрһәqа баwәрийа хwә һьндава Йаһоwа (2 Пәт. 2:5). Паwлосе шанди гот кö Нöһ «бь wе баwәрийе диwана дьне кьр» (Ибрн. 11:7). Бешьк дькарьн бежьн кö һьнге мәрьва qәрфе хwә Нöһ дькьрьн у пәй дькʹәтьн. Дьбәкә һәла һе жи wи дьданә тьрсандьне кö wе хьрабийе жерʹа бькьн. Ле Нöһ жь мәрьва нәдьтьрсийа (Мәтʹлк. 29:25). Нöһ мерхас бу, чьмки Йаһоwа мерхаси дабу wи, чаwа хьзмәткʹаред хwәйи амьнрʹа дьдә.

7. Wәʹде авакьрьна гәмийе Нöһ рʹасти чь чәтьнайа дьһат?

7 Нöһ паши пенщ qьрʹна зедәтьр рʹийа Хwәдеда дьчу, у паше Йаһоwа жерʹа гот кö гәмийа мәзьн ава кә, сәва мәрьв у һʹәйwан wәʹде Селаве хьлаз бьн (Дәстп. 5:32; 6:14). Бона Нöһ рʹасти жи нәһеса бу гәмийа мәзьн ава кә. Ле әwи заньбу кö чәтьнайи wе нә кö тʹәне авакьрьна гәмийеда бә, ле мәрьв жи wе дьһа зедә wи бькʹәньн у мьqабьли wи дәркʹәвьн. Йәкә әwан тьшта рʹе wи нәдьгьртьн, у әwи баwәрийа хwә Хwәде дьани у гöрʹа wида бу. Нöһ һәма «öса жи кьр» ча Хwәде жерʹа гот (Дәстп. 6:22).

8. Жь чь те кʹьфше кö Нöһ итʹбарийа хwә Йаһоwа дьани?

8 Чәтьнайа дьн жи бона Нöһ әw бу, кö әwи гәрәке жьн-зарʹед хwә хwәй кьра. Пешийа Селаве, мәрьв гәрәке щәфе гьран бькʹьшандана сәва әʹрд бещәр кьрана у бәред әʹрде бьстандана. Фәʹмдари йә Нöһ жи öса әʹбура хwә дькьр (Дәстп. 5:28, 29). Ле йәкә һʹьш-аqьле wи нә кö сәр ве йәке бу, ле сәр һәләqәтийа тʹәви Хwәде. Дина Нöһ сәр тьштед рʹöһʹани бу, һәла һе wәʹде авакьрьна гәмийе жи, кö wәкә 40 йан 50 сали кʹьшанд. У паши Селаве жи 350 сала әwи öса дьжит (Дәстп. 9:28). Рʹасти жи Нöһ баwәрийеда у гöһдарийеда мәсәләкә баш һиштийә!

9, 10. а) Әм ча дькарьн баwәри у гöһдарийеда чʹәʹв бьдьнә Нöһ? б) Хwәде ча дьньһерʹә сәр wан мәрьва, йед кö гöрʹа wи дькьн?

9 Ча әм дькарьн чʹәʹв бьдьнә баwәри у гöһдарийа Нöһ? Әм ве йәке дькьн чахе пьштгьрийа рʹастийа Хwәде дькьн, нә пʹара ве дьнйа Шәйтʹан ьн, у чахе әʹмьре мәда Пʹадшатийа Йаһоwа щийе пешьн дьгьрә (Мәт. 6:33; Йуһʹн. 15:19). Бона ве йәке дьне мә һʹьз накә. Мәсәлә, әм хwә ль qанунед Хwәде дьгьрьн дәрһәqа зәwаще у һәләqәтийа сексуали, ле әw йәк гәләка хwәш найе у ләма әwана щара медйайеда сәр мә хәбәр дьдьн. (Бьхунә Малахи 3:17, 18.) Ле әм мина Нöһ, Хwәде дьтьрсьн, нә кö мәрьва. Әм заньн кö тʹәне әw дькарә әʹмьре һʹәта-һʹәтайе бьдә мә (Луqа 12:4, 5).

10 Wе керһати бә һун пьрсед öса бьдьнә хwә: «Гәло әзе һьнге жи рʹийа Хwәдеда һәрʹьм, һәрге мәрьв qәрфе хwә мьн бькьн йан жи сәр мьн нәбаш хәбәр дьн? Һәрге алийе пʹәрада чәтьнайед мьн һәбьн, гәло әзе итʹбарийа хwә Йаһоwа биньм кö әw wе мьн бьбә хwәйи?». Һәрге һун чʹәʹв бьдьнә баwәри у гöһдарийа Нöһ, һуне дöдьли нәбьн кö Йаһоwа wе бона wә хәм кә у али wә бькә (Фили. 4:6, 7).

ШӘҺӘРЕ ХЬРАБДА ДАНИЙЕЛ АМЬН У ГÖРʹА ХWӘДЕДА МА

11. Данийел у се һәвалед wи рʹасти кʹижан тәнгасийа һатьн? (Бьньһерʹә шькле әʹwльн.)

11 Данийел рʹасти кʹижан тәнгасийа һат? Әw чаwа дил дьжит Бабилонеда, шәһәре кö бь пʹутпʹарьсти у сербазийева тʹьжә бу. Хенщи ве йәке, мәрьвед Бабилоне Щьһу ньмьз дькьрьн, у qәрфе хwә wан у Хwәдейе wан Йаһоwа дькьрьн (Зәб. 137:1, 3). Бьдьнә бәр чʹәʹве хwә, кö әw йәк чаwа дьле Данийел у Щьһуйед амьн дьешанд! Һьн жи, әw тʹәви се һәвалед хwә, Һананйа, Мишаел у Азарйа, дькʹәтьнә чʹәʹва, чьмки әwана һатьбунә бьжартьне у һинкьрьне сәва пʹадшарʹа хьзмәт кьн. Wанрʹа һатә готьне, wәки ве хwарьне бьхwьн, кʹижан дьданә пʹадша. Ле Данийел дьле хwәда сафи кьр, wәки wан хwарьна нәхwә, сәва хwә бәр чʹәʹве Хwәде һʹәрам нәкә (Дан. 1:5-8, 14-17).

12 а) Кʹижан хәйсәт-һʹöнöред Данийелә баш һәбун? б) Йаһоwа ча сәр Данийел дьньһерʹи?

12 Диса чәтьнайикә Данийел һәбу, кö аликива дьһатә кʹьфше те бежи әw йәк чәтьнайи нибу. Пʹадша щабдарийед мәхсус дабу Данийел, чьмки әw мәрьвәки сәрwахт у билан бу (Дан. 1:19, 20). Ле Данийел тʹö щар qöрʹә у хwәрʹази нәдьбу. Әw мьлук у шкәсти ма, у тʹьме шькьри дьда Йаһоwа (Дан. 2:30). Дина хwә бьдьне, чахе Йаһоwа гот кö Данийел, Нöһ у Ибо мәрьвед рʹаст ьн, һьнге Данийел һе щаһьл бу. Бәле, Йаһоwа бадиһәwа wида баwәр нибу. Данийел һʹәта мьрьне амьн ма у гöрʹа Хwәдеда бу. Чахе әw wәкә 100 сали бу, мьлйакʹәте Хwәде wи дьлрʹьһʹәт кьр у гот: «Йа, Данийел, тö мәрьвәки гәләк qимәт и» (Дан. 10:11, ДТʹ).

13. Чьрʹа дьбәкә Йаһоwа öса кьр wәки Данийел щийе бьльнд бьгьрә?

13 Бь аликʹарийа Йаһоwа, Данийел ча wәзир хьзмәт дькьр һьн Империйа Бабилонеда, һьн жи Мәда-Фарьседа (Дан. 1:21; 6:1, 2). Дьбәкә Йаһоwа öса кьр, wәки Данийел щийе бьльнд бьгьрә сәва кö пьшта щьмәʹта хwә бьгьрә, чаwа Усьв Мьсьреда, у öса жи Әстәр у Мордокʹаи Фарьседаc (Дан. 2:48). Бьдьнә бәр чʹәʹве хwә кö Һәзәqел у Щьһуйед дьн кö дилтийеда бун, дьбәкә чьqас дьлгәрм бун кö дитьн, wәки Йаһоwа Данийел да хәбате сәва али wан бькә!

Гәде щаһьл кö Шәʹде Йаһоwа йә пешийа хwарьне дöа дькә, мәрьвед дор бәре wи, wи дькʹәньн

Әwед кö Йаһоwарʹа амьн дьминьн, бәр чʹәʹве wи гәләк qимәт ьн (Бьньһерʹә абзаса 14, 15)

14, 15. а) Чь щурʹәйи дәрәща Данийел мина дәрәща мә йә? б) Иро де-бав жь де-баве Данийел чь дькарьн һин бьн?

14 Ча әм дькарьн чʹәʹв бьдьнә баwәри у гöһдарийа Данийел? Иро әм жи чаwа хәриб ве дьнйайеда дьжин, кʹижан кö бь бенамусийе у һʹәбандьна qәлп тʹьжә йә. Мәрьв бьн һʹöкöме Бабилона Мәзьнда ньн, демәк бьн империйа религийа qәлпда, кʹижан кö Кʹьтеба Пироз нав дькә щи-wаре «щьна» (Әʹйан. 18:2). Ле әм жь ве дьнйайе башqә дьбьн, у бона ве йәке мәрьв һәла һе жи мә дькʹәньн (Марq. 13:13). Мина Данийел, wәрә әм жи незики Хwәдайе хwә Йаһоwа бьн. Чахе әм бь мьлукти гöрʹа wи бькьн у итʹбарийа хwә wи биньн, әме жи бәр чʹәʹве wи гәләк qимәт бьн (Һаг. 2:7).

15 Де-бав дькарьн мәсәла баш жь де-баве Данийел һин бьн. Чахе Щьһудайеда Данийел һе бьчʹук бу, гәләк мәрьвед wедәре хьраб бун. Ле әw мина wан нибу, әw мәзьн дьбу у Хwәде һʹьз дькьр. Фәʹмдари йә әв һʹьзкьрьна wи хwәха нәһатьбу. Әшкәрә йә кö де-баве wи әw һин дькьрьн, wәки Хwәде һʹьз бькә (Мәтʹлк. 22:6). Һәла һе наве Данийел жи кö те һʹәсабе «Һʹакьме Мьн Хwәде йә», дьдә кʹьфше wәки де-баве wи мәрьвнә хwәдехоф бун (Дан. 1:6). Ләма жи де-бавно, бь сәбьр бьн һьндава зарʹед хwә чахе дәрһәqа Йаһоwа һин дькьн. Тʹö щар баwәрийа хwә һьндава wан öнда нәкьн (Әфәс. 6:4). Хенщи ве йәке, һьн тʹәви wан дöа бькьн, һьн жи бона wан. Чахе һун алийе хwәда һәр тьшти бькьн сәва рʹастийа Хwәде бьгьһижә дьле wан, Йаһоwа wе wә гәләк кʹәрәм кә (Зәб. 37:5).

ИБО ДӘWЛӘТИЙЕДА У КʹӘСИБИЙЕДА ЖИ АМЬН У ГÖРʹА ХWӘДЕДА МА

16, 17. Ибо рʹасти кʹижан тәнгасийа һат?

16 Ибо рʹасти кʹижан тәнгасийа һат? Әʹмьре хwәда Ибо рʹасти тәнгасийед гәләк гьран һат. Пешийа wан тәнгасийа, әw «жь һʹәмуйа лаwед Рʹожһьлате . . . йе һәри мәзьн бу» (Иб. 1:3). Әw дәwләти, навдар, у гәләк хwәйиqәдьр бу (Иб. 29:7-16). Ле йәкә әw тʹö щар qöрʹә нәбу у пьшта хwә нәда Хwәде. Йаһоwа wи нав кьр хьзмәткʹаре «мьн», у паши wан гьлийа әwи дәрһәqа Ибо гот: «[Әw] зьламе рʹаст у кʹамьл; жь Хwәде дьтьрсә у жь хьрабийе хwә вәдькʹишинә» (Иб. 1:8).

17 Ле wәхтәки гәләк кьнда, әʹмьре Ибо лаптә һатә гöһастьне. Әwи һʹәму тьшт öнда кьр, у öса дьлтәнг бьбу кö мьрьн хwәрʹа дьхwәст. Әм заньн мәʹнийа кöл-дәрдед wи Шәйтʹане бöхданбеж бу, йе кö шәрʹ авитә Ибо йанчь әw бона кʹара хwә Хwәде дьһʹәбинә. (Бьхунә Ибо 1:9, 10.) Йаһоwа әв йәк пьшт гöһе хwәва нәавит. Ле әwи мәщал да Ибо, сәва әw амьнийа хwә жерʹа избат кә, у нишан кә wәки әw бь дьле тʹәмьз у жь һʹьзкьрьне Хwәде дьһʹәбинә.

18. а) Чь wә хwәш те амьнийа Ибода? б) Әм чь педьһʹәсьн дәрһәqа Йаһоwа, кö чаwа әw һьндава Ибода бу?

18 Шәйтʹан пәй һәв бәла дьани сәре Ибо. Әwи öса ани сәре wи, wәки Ибо бьфькьрә йанчь әw кöл-дәрд жь Хwәде бун (Иб. 1:13-21). Паше, се һәвалед qәлп һатьн щәм Ибо, wәки йанчь бәр дьле wида бен, ле бь рʹастийе wана бь гьлийед хwә дьле Ибо дешандьн. Жь гьлийед wан дәрдькʹәт, wәки Хwәде öса сәре wи кьр, чьмки wи щәза дькә (Иб. 2:11; 22:1, 5-10). Ле һьнге жи Ибо амьнийа хwә хwәй кьр. Рʹаст ә wәʹдәки әw нәрʹаст дьфькьри, ле Йаһоwа фәʹм дькьр кö әw жь еша дьле хwә öса дьфькьрә (Иб. 6:1-3). Хwәде дьдит кö Ибо тʹö щар пьшта хwә надә Wи, у һәла һе һьнге жи гава Шәйтʹан пәй wи кʹәт у бь дәрәwийе wи пʹепәс кьр. Чахе тәнгасийед Ибо хьлаз бун, Йаһоwа дö щара зедәтьр wи кʹәрәм кьр, у һьн жи 140 сала әʹмьре wи дьреж кьр (Аqуб 5:11). У паши ве йәке жи, Ибо бәрдәwам дькьр Йаһоwарʹа амьн бьминә. Ле әм жь кʹö ве йәке заньн? Чахе Һәзәqел гьлийед жь рʹеза сәрәкә йа ве готаре ньвиси, ида гәләк qьрʹнә дәрбаз бьбу кö Ибо мьрьбу.

19, 20. а) Ча әм дькарьн баwәри у гöһдарийеда чʹәʹв бьдьнә Ибо? б) Ча әм дькарьн дьлшәwатийеда чʹәʹв бьдьнә Хwәде?

19 Ча әм дькарьн чʹәʹв бьдьнә баwәри у гöһдарийа Ибо? Фьрqи тʹöнә әм рʹасти чь чәтьнайа бен, бьра Йаһоwа әʹмьре мәда тʹьме сәр щийе пешьн бә, бь тʹәмами итʹбарийа хwә wи биньн, у бь тʹәмамийа дьле хwә гöрʹа wи бькьн. Мәʹнийед мә һе гәләк һәнә ве йәке бькьн, нә кö йед Ибо! Мәсәлә бьфькьрьн сәр ве йәке, кö әм дәрһәqа Шәйтʹан у тʹәлькед wи һе зедә заньн (2 Корн. 2:11). Һьн жи бь сайа кʹьтеба Ибо, әм заньн кö чьрʹа Хwәде дьһелә wәки кöл-дәрд һәбьн. Жь Кʹьтеба Данийел әм фәʹм дькьн кö Пʹадшатийа Хwәде сәрwертийа реали йә, кʹижан кö бьн сәрwеретийа Иса Мәсиһда нә (Дан. 7:13, 14). У әм заньн кö зутьрәке әв Пʹадшати wе һʹәму кöл-дәрда кʹöта кә.

20 Сәрһатийа Ибо öса жи мә һин дькә кö чьqас фәрз ә әм бәр дьле хушк-бьрада бен, чахе әwана тәʹли-тәнгийада ньн. Һьнәк жь wан хушк-бьра дьбәкә мина Ибо, тьштед нәрʹаст бежьн (Wаиз 7:7). Wәрә әм wана нәһәq нәкьн, ле wана фәʹм бькьн у дьлгәрм кьн. Wи щурʹәйи әме чʹәʹв бьдьнә Йаһоwа, Баве мәйи һʹьзкьри у рʹәʹм (Зәб. 103:8).

ЙАҺОWА WЕ ТӘ «QӘWАТ КӘ»

21. Гьлийед жь 1 Пәтрус 5:10 чь әʹйан дькьн дәрһәqа Нöһ, Данийел у Ибо?

21 Рʹаст ә Нöһ, Данийел у Ибо щурʹә-щурʹә wәʹдада дьжитьн, у дәрәща wан жи нә мина һәв бу, йәкә wана һәр тәнгасийада сәбьр дькьрьн у qәwи дьман. Сәрһатийа wан гьлийед Пәтрусе шанди тиньн бира мә, йе кö ньвиси: «Хwәдейе һʹәму кʹәрәма . . . пәй һьнәк щәфа дитьнерʹа, wе хwәха wә кʹамьл кә, бьшьдинә, qәwат кә, хwәйибьнгәһ кә» (1 Пәт. 5:10).

22. Готара дьнда әме дәрһәqа чь шеwьр кьн?

22 Әw гьлийед жь 1 Пәтрус 5:10 бона мә нә жи. Йаһоwа бь wан гьлийа дьдә кʹьфше кö әw wе хьзмәткʹаред хwә qәwат кә у бьшьдинә. Бәле, һәр кәс жь мә дьхwазә wәки Йаһоwа мә бьшьдинә у qәwат кә сәва жерʹа амьн бьминьн. Ләма жи әм дьхwазьн баwәри у гöһдарийеда чʹәʹв бьдьнә Нöһ, Данийел у Ибо! Готара дьнда әме шеwьр кьн кö әwана амьн ман чьмки wана Йаһоwа нас дькьр. Wана «тʹам фәʹм» дькьр кö Йаһоwа чь жь wана дәʹwа дькьр (Мәтʹлк. 28:5). Әм жи дькарьн бьбьнә мина wан.

a Һәзәqел сала 617 Б.Д.М. кʹәтьбу дилтийе. Сала шәшада йа дилтийа wи, әwи гьлийед жь Һәзәqел 8:1–19:14 ньвиси, демәк сала 612 Б.Д.М.

b Баве Нöһ, Ламәх, кö мәрьвәки хwәдехоф бу, wәкә пенщ сала пешийа Селаве мьр. Һәрге де у хушк-бьред Нöһ wәʹде Селаве сах бун, әwана дьбәкә Йаһоwарʹа хьзмәт нәдькьрьн, ләма әwана хьлаз нәбун.

c Ве йәке әм дькарьн бежьн сәр се һәвалед Данийел жи, чьмки әwана жи хьзмәтийа пʹадшада щийе бьльнд дьгьртьн (Дан. 2:49).

    Әʹдәбйәтед Кʹӧрди Кӧрманщи (2011-2025)
    Дәрк′әвьн
    Бьк′әвьн
    • К′öрди Кöрманщи (Кирили)
    • Бьшиньн
    • Бьqәйдәкьрьн
    • Copyright © 2025 Watch Tower Bible and Tract Society of Pennsylvania
    • Qәйде Хәбьтандьне
    • Политика Конфиденсийалийе
    • Гöһастьна Конфиденсийалийе
    • JW.ORG
    • Бьк′әвьн
    Шандьн