Шабун: Һʹöнöр кö Әм жь Хwәде Дьстиньн

ҺʹӘМУ мәрьв дьхwазьн бәхтәwар бьн. Ле иро әм дьжин рʹожед ахьрийеда, у проблемед мә һәр кәси һәнә (2 Тимтʹ. 3:1). Нәһәqи, сьһʹәт-qәwата хьраб, бехәбати, мьрьн, у диса гәләк мәʹнийед дьн кö мәрьварʹа кöл-дәрда тиньн, дькарьн öса һʹöкöм кьн сәр мәрьва, кö мәрьв шабуна хwә öнда кә. Һәла һе хьзмәткʹаред Хwәде жи дькарьн дьлтәнг бьн у һеди-һеди шабуна хwә öнда кьн. Һәрге тö һʹаләки öсада ни, ча тö дькари шабуна хwә пашда вәгәрʹини?

Сәва щаба ве пьрсе пебьһʹәсьн, пешийе әм гәрәке рʹьнд фәʹм кьн кö чь йә шабуна рʹаст, у чаwа һьнәка wәʹде чәтьнайа шабуна хwә хwәй кьрьнә. Паше әме пебьһʹәсьн кö ча әм дькарьн шабуна хwә хwәй кьн, у һәла һе жи зедә кьн.

ЧЬ ЙӘ ШАБУН?

Шабуна рʹаст әw нинә чахе мәрьв дькʹәнә йан жи ша йә. Бәʹса хәбәре: Мәрьве кö гәләк ичʹкә вәхwәрийә, дькарә гәләк бькʹәнә у кʹефхwәш бә. Ле чахе әw те сәр һʹьше хwә, ида нә жи дькʹәнә, ле диса дькʹәвә һʹәйра проблем у дәрдед хwә. Әв кʹефхwәшийа wийә wәʹдәлу шабуна рʹаст нибу (Мәтʹлк. 14:13).

Ле шабуна рʹаст дьлда йә, у мәрьв ве шабуне тʹәхмин дькә гава тьштәки баш дьстинә йан жи һивийа тьштәки баш ә. Шабуна wи щурʹәйи һьн wәʹде башда, һьн жи тәнгасийада дьлда дьминә (1 Тʹеслн. 1:6). Бь рʹастийе öса нә, мәрьв дькарә бона тьштәки дьлтәнг бә, ле диса жи дьле wида шабун һәбә. Мәсәлә, чахе шандийа дәрһәqа Иса мьзгини бәла дькьрьн, һатьнә кʹöтане, ле йәкә чахе әwана «жь щьвина гьрәгьра чун, ша дьбун кö бона наве Иса һежайи рʹәзилкьрьне бунә» (Кʹар. Шанд. 5:41). Әшкәрә йә, кö әwана ша дьбун нә бона ве йәке кö һатьнә кʹöтане, ле әwана ша дьбун чьмки Хwәдерʹа амьн ман.

Әм пе ви һʹöнöри нәһатьнә буйине, у әw хwәха жи нав мәда пешда найе. Чьрʹа? Чьмки шабуна рʹаст әw һәйә пʹара бәре рʹöһʹе Хwәдейи пироз. Пе аликʹарийа рʹöһʹе Хwәде әм дькарьн бь тʹәмами бьбьнә «мәрьве ну», кö нава wе йәкеда нә öса жи шабун (Әфәс. 4:24; Галт. 5:22). Чахе әм шабуне нав хwәда пешда тиньн, әм һе һеса тәнгасийа у чәтьнайа дәрбаз дькьн.

МӘСӘЛЕД КÖ ӘМ ДЬХWАЗЬН ЧʹӘʹВ БЬДЬНЕ

Йаһоwа дьхwәст wәки сәр әʹрде һәр тьшт баш бә, нә кö хьраб чаwа әм иро дьвиньн. Рʹаст ә иро мәрьв хьрабийе дькьн, ле йәкә Йаһоwа шабуна хwә öнда накә. Хәбәра Хwәде дьбежә: «Qöдрәт у кʹефхwәши ль щиһе кö әw ле рʹудьне нә» (1 Дир. 16:27). Хенщи ве йәке, кьред баш кö хьзмәткʹаред Йаһоwа дькьн, дьле wи ша дькьн (Мәтʹлк. 27:11).

Әм дькарьн чʹәʹв бьдьнә Йаһоwа кö гәләк бәрхwә нәкʹәвьн у шабуне öнда нәкьн, һәрге жи тьштәки öса бьqәwьмә кö әм һивийе нибун. Һе баш ә әм дина хwә бьдьн wан тьштед баш кʹижан кö иро бал мә һәнә, у бь сәбьр һивийа wәʹде хwәш бьн кö пешийа мә йә.a

Кʹьтеба Пирозда һәнә гәләк сәрһатийед wан мәрьва, йед кö wәʹде тәнгасийа шабуна хwә хwәй кьрьнә. Мәсәлә, биньн бира хwә кö Бьраһим рʹасти гәләк чәтьнайа һат у һәла һе әʹмьре wи жи дькʹәтә бьн qәзийе жь бо мәрьвед дьн (Дәстп. 12:10-20; 14:8-16; 16:4, 5; 20:1-18; 21:8, 9). Ле йәкә әwи шабуна дьле хwәда öнда нәкьр. Чьрʹа? Чьмки әw тʹьме дьфькьри дәрһәqа созе Хwәде кö wе дьнйа тʹәзәда бьн сәрwертийа Мәсиһда бьжи (Дәстп. 22:15-18; Ибрн. 11:10). Иса гот: «Баве wә Бьраһим һʹәйра wе рʹожа мьнда бу» (Йуһʹн. 8:56). Әм дькарьн чʹәʹв бьдьнә Бьраһим у бьфькьрьн дәрһәqа ве шабуне, кö әме ахьрийеда бьстиньн (Рʹом. 8:21).

Мина Бьраһим, Паwлосе шанди у Силас жи дина хwә дьданә созед Хwәде. Рʹаст ә әwана жи рʹасти чәтьнайа дьһатьн, ле баwәрийа wан qәwи бу у wана шабуна хwә öнда нәдькьрьн. Мәсәлә, щарәке чахе әwана qайим кʹöтан у авитьнә кәле, wана «незики ниве шәве . . . дöа дькьрьн у әшqи Хwәде дьстьран» (Кʹар. Шанд. 16:23-25). Wана öса жи заньбун кö әwана бона наве Мәсиһ тенә зерандьне, ләма шабуна хwә öнда нәдькьрьн. Әм жи дькарьн чʹәʹв бьдьнә Паwлос у Силас, у бир нәкьн кö әме чьqас бәред баш бьстиньн һәрге бь амьни Хwәдерʹа хьзмәт кьн (Фили. 1:12-14).

Иро жи һәнә гәләк мәсәлед хушк-бьра, йед кö wәʹде тәнгасийа шабуна хwә хwәй кьрьнә. Мәсәлә, сала 2013-да Филипинеда фьртонәкә мәзьн рʹабу у 1 000 зедәтьр малед Шәʹдед Йаһоwа һьлшийан. Бьраки мә бь наве Щорщ, мала кʹижани бь тʹәмами һьлшийабу, дьбежә: «Рʹаст ә әw qәзи һатә сәре мә, ле йәкә хушк-бьра бәхтәwар ьн. Мьнрʹа чәтьн ә гьли кьм кö әм чь шабуне тʹәхмин дькьн». Чахе әм дькʹәвьнә тәнгасийед мәзьн, әме шабуна хwә öнда нәкьн, һәрге әм бьшекьриньн у бьфькьрьн сәр wан тьштед баш кö Йаһоwа бона мә дькә. Ле гәло Йаһоwа диса ча али мә дькә, wәки шабуна мә һәбә?

МӘʹНИЙЕД МӘ БОНА ШАБУНЕ

Мәʹнийа мәзьн кö әм ша бьн һәйә һәләqәтийа мә тʹәви Йаһоwа. Бьдьнә һʹәсабе хwә, әм Кәсе Һәри Жорьн нас дькьн. Әw һәйә Бав, Хwәде, у Досте мә! (Зәб. 71:17, 18).

Әм öса жи qимәт дькьн жийина хwә у ве йәке кö дькарьн жийинерʹа ша бьн (Wаиз 3:12, 13). Йаһоwа әм незики хwә кьрьн, у әм дькарьн qьрара wи дәрһәqа хwә фәʹм кьн (Колс. 1:9, 10). Әм ве йәке заньн у ләма нета әʹмьре мә һәйә, ле ве дьнйайеда мәрьв ньзаньн әwана чьрʹа дьжин у нета әʹмьре wан жи тʹöнә. Әв фьрqи Паwлос бь wан гьлийа да кʹьфше: «‹Әw тьштед кö чʹәʹва нәдитьнә у гöһа нәбьһистьнә, дьле мерьврʹа дәрбаз нәбунә, Хwәде бона wан һазьр кьрьнә, йед кö wи һʹьз дькьн›. Ле бәле Хwәде бь рʹöһʹе хwә әв йәк ль бәр мә вәкьр» (1 Корн. 2:9, 10). Рʹасти жи әм чьqас ша дьбьн кö дькарьн qьрар у нетед Йаһоwа фәʹм кьн.

Бьфькьрьн öса жи сәр ве йәке кö Йаһоwа диса чь дькә бона щьмәʹта хwә. Әw гöнед мә дьбахшинә мә (1 Йуһʹн. 2:12). Хенщи ве йәке, бь рʹәʹма Хwәде әм һивийа жийина дьнйа тʹәзәда ньн, кʹижан кö зутьрәке wе бе (Рʹом. 12:12). Һьн жи һәла һе иро жи Йаһоwа бьратийа баш дайә мә, у әм дькарьн тʹәвайи wи бьһʹәбиньн (Зәб. 133:1). Öса жи Хәбәра Хwәде мә дьдә баwәркьрьне кö Йаһоwа wе щьмәʹта хwә жь Шәйтʹан у щьнед wи хwәй кә (Зәб. 91:11). Һәрге әм бьфькьрьн сәр wан һʹәму кʹәрәма кö Хwәде дьдә мә, шабуна мә wе һе зедә бә (Фили. 4:4).

ЧАWА ШАБУНА ХWӘ ҺЕ ЗЕДӘ КЬН

Гәло Мәсиһийе кö ида шабуна wи һәйә, дькарә шабуна хwә һе зедә кә? Иса гот: «Мьн әв йәк wәрʹа готьн, wәки шабуна мьн нава wәда бьминә у шабуна wә тʹәмам бә» (Йуһʹн. 15:11). Әв гьли дьдьнә кʹьфше wәки әм тʹьме дькарьн шабуна хwә зедә кьн. Бәʹса хәбәре дина хwә бьдьнә ве мәсәле: Чахе агьр дьшьхöлә, лазьм ә тʹьме дара зедә кьн, wәки агьр гöрʹ бә. Öса жи әм гәрәке рʹöһʹанийа хwә qәwи кьн, сәва шабуна мә зедә бә. Бир нәкьн, шабун бь сайа рʹöһʹе Хwәде пешда те. Ләма жи һуне һьнге шабуна хwә һе зедә кьн, чахе тʹьме аликʹарийа рʹöһʹе Йаһоwа бьхwазьн у кʹур бьфькьрьн сәр Хәбәра wи, кʹижан кö бь рʹебәрийа рʹöһʹе wийи пироз һатийә ньвисаре (Зәб. 1:1, 2; Луqа 11:13).

Һун öса жи дькарьн шабуна хwә зедә кьн чахе хирәт бьн шьхöле Йаһоwада (Зәб. 35:27; 112:1). Чьрʹа? Чьмки әм öса һатьнә әʹфьрандьне кö жь Хwәде бьтьрсьн у qанунед wи биньн сери, әw йәк жь мәрьва те дәʹwакьрьне (Wаиз 12:13). Демәк әм öса һатьнә әʹфьрандьне кö qьрара Хwәде биньн сери. Ләма жи чахе әм Йаһоwарʹа хьзмәт дькьн, жь ве йәке әм әʹмьре хwәда шабунәкә лапә мәзьн дьстиньн.b

КʹАРА ШАБУНЕ

Чахе әм шабуна хwә зедә кьн, әме гәләк кʹаре бьстиньн. Мәсәлә, Йаһоwа wе жь мә һе рʹази бә, чьмки wәʹде чәтьнайа жи әме бь шабуне тʹьме жерʹа хьзмәт кьн (Qан. Дщр. 16:15; 1 Тʹеслн. 5:16-18). Öса жи чахе шабуна мә рʹаст бә, әме нәкʹәвьнә пәй һәбуке, ле бона Пʹадшатийа Хwәде qöрбана бькьн у пʹадшатийе дайньн щийе пешийе (Мәт. 13:44). Чахе әм бьвиньн кö әв йәк чьqас кʹаре тинә, шабуна мә wе зедә бә, әме дьлрʹьһʹәт бьн, у мәрьвед дьнрʹа жи шабуне биньн (Кʹар. Шанд. 20:35; Фили. 1:3-5).

«Һәрге тö ньһа бәхтәwар и у әʹмьре хwәрʹа ша дьби, тöйе ахьрийеда сьһʹәт-qәwат би». Әв гьли леколинкʹарәки жь Дәwләтед Йәкбуйи гот, кʹижани кö чәнд леколин кьрьбу дәрһәqа сьһʹәт-qәwате. Әв гьли ль гора гьлийед Кʹьтеба Пироз ьн кʹидәре ньвисийә: «Дьле ша мина дәрмане керһати йә» (Мәтʹлк. 17:22). Бәле әв йәк öса нә, һәрге шабуна wә зедә бә, сьһʹәт-qәwата wә жи wе баш бә.

Рʹаст ә әм иро wәʹде чәтьнда дьжин, йәкә әм дькарьн шабунәкә рʹаст у дьреж бьстиньн, ле фәрз ә дöа бькьн сәва Йаһоwа рʹöһʹе пироз бьдә мә, Хәбәра wи леколин бькьн у сәр бьфькьрьн. Әме öса жи шабуна хwә зедә кьн, һәрге бьфькьрьн сәр кʹәрәмед кö бал мә һәнә, чʹәʹв бьдьнә баwәрийа мәрьвед дьн, у qьрара Хwәде биньн сери. Һәрге әм öса бькьн әме гьлийед жь Зәбур 64:10 сәр хwә тʹәхмин кьн, кʹидәре ньвисар ә: «Рʹасте пе Хöдан ша бьн, бьн сийа Wида сьтʹар бьн».