Бәрдәwам кьн Рʹöһʹанида Пешда Һәрʹьн
«Бь сайа рʹöһʹе пироз бьмәшьн» (ГАЛТ. 5:16).
1, 2. Ча бьраки тедәрхьст кö алийе рʹöһʹанида кемасийа wи һәйә, у бона ве йәке әwи чь кьр?
БЬРАКИ мә бь наве Роберт щаһьлтийеда һатийә ньхöмандьне, ле бона wи хьзмәти Хwәдерʹа щийе фәрз нәдьгьрт. Әw гьли дькә: «Мьн тʹö щар хьраби нәдькьр, ле хьзмәтийа мьн бе һʹәмде мьн бу. Аликива дьһатә кʹьфше кö әз рʹöһʹанида qәwи мә, чьмки әз тʹьме дьһатьмә щьвате у сале чәнд щара мьн ча пешәнге кʹомәкдар хьзмәт дькьр. Ле тьштәк әʹмьре мьнда кем бу».
2 Роберт фәʹм нәкьр кö чь wи кем бу, һʹәта кö әw нәзәwьщи. Әwи у жьна wи гәләк щар листькәк дьлистьн, кʹижан кö пьрсед Кʹьтеба Пирозва гьредайи дьданә һәв. Жьна wи рʹöһʹанида йәкә qәwи бу у һеса щаба wан пьрса дьда. Ле Роберт тедәрхьст кö әw нә жи занә ча щаба хwә бьдә у тʹьме шәрм дькьр. Әw дьбежә: «Мьн хwә öса тʹәхмин дькьр кö әз qә тьштәки ньзаньм. Мьн дьле хwәда гот, ‹Һәрге әз дьхwазьм малхеки рʹöһʹани бьм, әз гәрәке гöһастьна бькьм›». У Роберт һәма öса жи кьр. Әw гьли дькә: «Мьн Кʹьтеба Пироз леколин дькьр, һе зедә у зедә, у һеди-һеди бал мьн һәр тьшт щиwар бу. Мьн фәʹмкʹари qазанщ кьр, у йа лапә фәрз әw ә кö әз һе незики Йаһоwа бумә».
3. а) Жь сәрһатийа Роберт әм чь дькарьн һин бьн? б) Кʹижан пьрсед сәрәкә әме ньһа шеwьр кьн?
3 Жь сәрһатийа Роберт әм дәрсәкә фәрз хwәрʹа һин дьбьн. Дьбәкә занәбуна мә һәйә у әм тʹьме тенә щьвата, ле тʹәне әw тьшт мә накьнә мәрьве рʹöһʹани. Йан жи дьбәкә әм рʹöһʹанида пешда чунә, ле чахе әм хwә дьщерʹьбиньн, әм тедәрдьхьн wәки һәнә тьшт кʹижанада әм гәрәке диса пешда һәрʹьн (Фили. 3:16). Сәва кö әм бәрдәwам кьн рʹöһʹанида пешда һәрʹьн, әме ве готареда щаба се пьрсед сәрәкә шеwьр кьн: 1) Чь wе али мә бькә, кö әм тедәрхьн рʹöһʹанида әм ча ньн? 2) Ча әм дькарьн рʹöһʹанида qәwи бьн? 3) Чахе әм рʹöһʹанида qәwи нә, ча әw йәк дькарә жийина мәда али мә бькә?
РʹÖҺʹАНИЙА ХWӘ БЬЩЕРʹЬБИНЬН
4. Ширәта жь Әфәси 4:23, 24 бона кʹе йә?
4 Чахе әм бунә хьзмәткʹаред Хwәде, әм гәләк тьштада һатьнә гöһастьне. Әw йәк һʹәму алийава сәр жийина мә һʹöкöм бу. Ле паши ньхöмандьне жи мә бәрдәwам дькьр бенә гöһастьне. Кʹьтеба Пироз дьбежә, wәки әм гәрәке бәрдәwам кьн «бь рʹöһʹ у фькьред хwәда нуйәжийин бьн» (Әфәс. 4:23, 24). Әм гьшк гöнәкʹар ьн, ләма әм гәрәке тʹьме гöһастьна бькьн. Һәла һе хьзмәткʹаред Йаһоwа йед кö гәләк сала жерʹа хьзмәт дькьн, әw жи гәрәке мьqати рʹöһʹанийа хwә бьн (Фили. 3:12, 13).
5. Кʹижан пьрс дькарьн али мә бькьн рʹöһʹанийа хwә бьщерʹьбиньн?
5 Сәва рʹöһʹанида пешда һәрʹьн у рʹöһʹанийа хwә хwәй кьн, әм гәрәке һʹәлал хwә бьщерʹьбиньн. Фьрqи тʹöнә әм щаһьл ьн йан әʹмьрда мәзьн ьн, һәр кәс жь мә дькарә пьрсед öса бьдә хwә: «Гәло әз рʹöһʹанида һе пешда дьчьм, йан на? Гәло хәйсәт-һʹöнöрада әз дьбьмә мина Мәсиһ? Гәло ньһерʹандьна мьн у рʹабун-рʹуньштьна мьн щьватеда, дәрһәqа мьн чь әʹйан дькьн? Гәло хәбәрдана мьн дәрһәqа хwәстьнед мьн чь дьдә кʹьфше? Һинбуна шәхси, кʹьнщхwәкьрьн, хәмьландьн, у әw йәк кö әз ча qәбул дькьм ширәта, чь әʹйан дькьн дәрһәqа мьн? Чахе әз рʹасти щерʹьбандьна тем, әз ча хwә дьдьмә кʹьфше? Гәло әз бумә Мәсиһийе гьһишти?» (Әфәс. 4:13). Чахе әм кʹур бьфькьрьн сәр щабед wан пьрса, әw йәк wе али мә бькә фәʹм кьн кö рʹöһʹанида әм чьqас пешда чунә.
6. Сәва әм фәʹм кьн кö рʹöһʹанида әм ча ньн, диса чь дькарә али мә бькә?
6 Сәва әм тедәрхьн кö рʹöһʹанида әм гьһишти нә йан на, щара аликʹарийа мәрьвед дьн мәрʹа лазьм ә. Паwлосе шанди гот кö мәрьве нәрʹöһʹани, йане йе бәдәни, фәʹм накә кö әw бәр Хwәде чь тьштед нәрʹаст дькә. Ле мәрьве рʹöһʹани фәʹм дькә ньһерʹандьна Хwәде дәрһәqа тьшта у дьвинә кö Хwәде һʹьз накә жийина кö мәрьве бәдәни дьжи (1 Корн. 2:14-16; 3:1-3). Рʹуспи чʹәʹв дьдьнә нет-фькьра Иса, зу тʹәхмин дькьн чахе нав хушк-бьрада фькьред бәдәни пешда тен. Һәрге әwана ве йәке нав мәда бьвиньн у незики мә бьн сәва аликʹарийе бьдьнә мә, гәло әме ширәта wан qәбул кьн? Һәрге әм öса бькьн, әме нишан кьн кö әм дьхwазьн рʹöһʹанида мәрьвнә qәwи бьн (Wаиз 7:5, 9).
РʹÖҺʹАНИДА ПЕШДА ҺӘРʹЬН
7. Чьрʹа сәва бьбьнә мәрьвнә рʹöһʹани, тʹәне занәбун бәс нинә?
7 Бир нәкьн кö занәбуна Кʹьтеба Пироз бәс нинә сәва әм бьбьнә мәрьвед рʹöһʹани. Сьлеман Пʹадша гәләк тьшт заньбу дәрһәqа Йаһоwа. Готьнед wи һәла һе жи бунә пʹара Кʹьтеба Пироз. Ле хьлазийеда әwи рʹöһʹанийа хwә öнда кьр у Йаһоwарʹа амьн нәма (1 Пʹадш. 4:29, 30; 11:4-6). Демәк, хенщи занәбуна Кʹьтеба Пироз, диса чь лазьм ә? Лазьм ә әм бәрдәwам кьн рʹöһʹанида пешда һәрʹьн (Колс. 2:6, 7). Ле чаwа ве йәке бькьн?
8, 9. а) Чь wе али мә бькә баwәрийа хwә qәwи кьн? б) Нета мә гәрәке чь бә чахе әм леколина дькьн у дьфькьрьн? (Бьньһерʹә шькле әʹwльн.)
8 Паwлосе шанди Мәсиһийед qьрʹна йәке ширәт кьр wәки бьбьнә «гьһишти» (Ибрн. 6:1). Ле әве ширәте әм ча дькарьн бьдьнә хәбате? Гавәкә фәрз әw ә, кö кʹьтеба «Хwә Нава Һʹьзкьрьна Хwәдеда Хwәй кьн» хwәрʹа леколин бькьн. Әв кʹьтеб wе али wә бькә принсипед Кʹьтеба Пироз жийина хwәда бьдьнә хәбате. Һәрге wә әв кʹьтеб ида хьлаз кьрийә, wе баш бә һун әʹдәбйәтед дьн леколин бькьн, кʹижан кö wе али wә бькьн баwәрийа хwә qәwи кьн (Колс. 1:23). Öса жи һун гәрәке бьфькьрьн сәр wан тьшта чь кö һин дьбьн, у Йаһоwарʹа дöа бькьн, wәки али wә бькә wан тьшта әʹмьре хwәда бьдьнә хәбате.
9 Бир нәкьн кö чахе әм леколина дькьн у дьфькьрьн, нета мә гәрәке әw бә wәки хwәстьна мә qәwи бә кö дьле Йаһоwа ша кьн у гöрʹа qанунед wи бькьн (Зәб. 40:8; 119:97). Хенщи ве йәке, әм гәрәке инкʹар кьн һәр тьшти чь кö дькарә рʹе мә бьгьрә рʹöһʹанида пешда һәрʹьн (Тито 2:11, 12).
10. Щаһьл чь дькарьн бькьн сәва рʹöһʹанида qәwи бьн?
10 Һәрге тö щаһьл и, гәло нетед тәйә рʹöһʹани һәнә? Бьраки мә йе кö Бәйтʹәледа хьзмәт дькә, хwәрʹа кьрә хәйсәт wәки wәʹде щьвата мәзьн хәбәр дә тʹәви wан, йед кö гәрәке бенә ньхöмандьне. Гәләк жь wан щаһьл ьн. Әв бьра жь wана дьпьрсә кö чь нетед wанә рʹöһʹани һәнә. Щаба гәләка әʹйан дькә кö әwана пешда фькьринә кö чаwа әwана дьхwазьн Йаһоwарʹа хьзмәт кьн, мәсәлә бьбьнә пешәнг йан жи дәрбази wи щийи бьн кʹидәре һʹәwщәтийа мьзгинвана һәйә. Ле щара һәнә щаһьлед öса, йед кö ньзаньн ча щаба хwә бьдьн. Гәло әв те һʹәсабе кö әwана дьфькьрьн wәки нетед рʹöһʹани wанрʹа нәлазьм ьн? Һәрге тö щаһьл и, пьрсед öса бьдә хwә: «Гәло әз сәва хатре де-баве хwә хьзмәт дькьм у темә щьвате? Гәло әз һе незики Хwәде дьбьм у һәләqәтийа хwәйә шәхси тʹәви Йаһоwа qәwи дькьм?» Фәʹмдари йә кö нетед рʹöһʹани бал мә һәр кәси гәрәке һәбьн, нә кö тʹәне бал щаһьла. Әв нет wе али мә бькьн кö рʹöһʹанийа хwә qәwи кьн (Wаиз 12:1, 13).
11. а) Әм гәрәке чь бькьн сәва рʹöһʹанида пешда һәрʹьн? б) Әм дькарьн чʹәʹв бьдьнә кʹижан хьзмәткʹаре Хwәде?
11 Чахе әм кемасийа нав хwәда дьвиньн, әм гәрәке дәрберʹа сәр хwә бьхәбьтьн у гöһастьна бькьн. Гәләк фәрз ә wәки әм мәрьвнә рʹöһʹани бьн, чьмки әw әʹмьре мәва гьредайи йә (Рʹом. 8:6-8). Ле бьбьнә мәрьвнә рʹöһʹанида гьһишти, найе һʹәсабе кö бекемаси бьн. Фәрз ә әм алийе хwәда һәр тьшти бькьн сәва рʹöһʹанида пешда һәрʹьн. Ве йәкеда рʹöһʹе Йаһоwайи пироз дькарә али мә бькә. Бьраки мә бь наве Щон Бар кö бәре әндәме Кʹома Рʹебәрийе бу дәрһәqа рʹеза жь Луqа 13:24 гот: «Гәләк нькарьн ве йәке бькьн, чьмки әwана епʹещә сәр хwә нахәбьтьн сәва qәwи бьн». Әм гәрәке чʹәʹв бьдьнә Аqуб, кʹижан кö тʹәви мьлйакʹәт кʹәтә һʹöщәте һʹәта кö кʹәрәм нәстанд (Дәстп. 32:26-28). Хwәндьна Кʹьтеба Пироз һʹәwас ә, ле бона мә әw гәрәке ча мьжулбун нибә. Әм гәрәке кʹур леколин бькьн сәва кö хьзнед рʹöһʹани бьвиньн кʹижан кö wе кери мә бен.
12, 13. а) Чь wе али мә бькә сәва ширәта жь Рʹомайи 15:5 бьдьнә хәбате? б) Чаwа мәсәлә у ширәта Пәтрусе шанди дькарә али мә бькә? в) Һун чь дькарьн бькьн сәва рʹöһʹанида пешда һәрʹьн? (Бьньһерʹә чаргошә «Гав кö Әм Дькарьн Бавежьн сәва Рʹöһʹанида Пешда Һәрʹьн».)
12 Һәрге әм рʹöһʹанийа хwә qәwи кьн, рʹöһʹе пироз wе qәwате бьдә мә сәва әм фькьред хwә бьгöһезьн. У бь сайа рʹöһʹе пироз әме бькарьбьн сәр нет-фькьред Мәсиһ бьн (Рʹом. 15:5). Хенщи ве йәке, әw йәк wе али мә бькә хwәстьнед бәдәни кʹокева нав хwә дәрхьн у хәйсәт-һʹöнöред öса нав хwәда пешда биньн кö Хwәде хwәш тен (Галт. 5:16, 22, 23). Һәрге wә тедәрхьстийә кö һʹьш-аqьле wә дьчә сәр һәбуке йан жи хwәстьнед бәдәни, хwә әглә нәкьн, сәр хwә бьхәбьтьн. Тʹьме жь Йаһоwа рʹöһʹе пироз бьхwазьн, у әw wе али wә бькә, wәки һун ньһерʹандьна хwә бьгöһезьн у һʹьш-аqьле хwә дайньн сәр тьштед фәрз (Луqа 11:13). Биньн бира хwә Пәтрусе шанди. Чәнд щара әwи тьштед öса кьр ча мәрьвәки нәрʹöһʹани (Мәт. 16:22, 23; Луqа 22:34, 54-62; Галт. 2:11-14). Ле әw дьлтәнг нәбу, у Йаһоwа али wи кьр. Һеди-һеди Пәтрус һин бу мина Иса бьфькьрә у әwи ньһерʹандьна хwә гöһаст. Әм жи гәрәке öса бькьн.
13 Пәтрус паше дәрһәqа чәнд һʹöнöра гот, кʹижан кö дькарьн али мә бькьн. (Бьхунә 2 Пәтрус 1:5-8.) Һәрге әм «һәр алийава хирәт кьн» сәва һʹöнöред öса нав хwәда пешда биньн ча хwәгьртьн, сәбьр, у һʹьзкьрьн һьндава хушк-бьра, әме рʹöһʹанида һе пешда һәрʹьн. Wе баш бә әм һәр рʹож пьрсәкә öса бьдьнә хwә: «Иро әз сәр кʹижан һʹöнöри дькарьм бьхәбьтьм сәва рʹöһʹанида пешда һәрʹьм?»
ХӘБЬТАНДЬНА ПРИНСИПЕД КʹЬТЕБА ПИРОЗ ЖИЙИНА ҺӘРРʹОЖИДА
14. Һәрге әм мәрьвнә рʹöһʹани нә, әw йәк wе ча һʹöкöм бә сәр жийина мәйә һәррʹожи?
14 Һәрге әм мина Мәсиһ бьфькьрьн, әw йәк wе һʹöкöм бә сәр хәбәрдан, рʹабун-рʹуньштьна мә хәбатеда йан жи мәкʹтәбеда, öса жи сәр сафикьрьнед мәйә һәррʹожи. Әw сафикьрьнед мә wе әʹйан кьн, wәки әм дьхwазьн чʹәʹв бьдьнә Иса. Чаwа мәрьвнә рʹöһʹани, әм нахwазьн тьштәк һәләqәтийа мә тʹәви Баве мәйи әʹзмана хьраб кә. Чахе әм рʹасти щерʹьбандьна бен, ньһерʹандьна мина йа Мәсиһ wе али мә бькә кö амьн бьминьн Хwәдерʹа. У öса жи чахе әм сафикьрьна бькьн, әме ләз нәкʹәвьн у бьфькьрьн сәр ван пьрса: «Кʹижан принсипед Кʹьтеба Пироз ве сафикьрьнеда wе али мьн бькьн? Гәло Мәсиһ ве дәрәщеда wе чь бькьра? Кʹижан сафикьрьн wе Йаһоwа хwәш бе?» Әм гәрәке хwәрʹа бькьн хәйсәт кö öса бьфькьрьн. Wәрә әм дәрһәqа ве йәке чәнд дәрәща шеwьр кьн. Һәр дәрәщәкеда, әме бьвиньн кö кʹижан принсипа Кʹьтеба Пироз wе али мә бькә сафикьрьна рʹаст бькьн.
15, 16. Мәсәле биньн кö чаwа нет-фькьред мина йед Мәсиһ, дькарьн али мә бькьн сафикьрьнеда wәʹде а) бьжартьна һәвалзәwащ. б) бьжартьна һәвала.
15 Бьжартьна һәвалзәwащ. Дәрһәqа ве йәке Кʹьтеба Пирозда принсип һәйә 2 Корьнти 6:14, 15-да. (Бьхунә.) Гьлийед Паwлос әʹйан дьдьнә кʹьфше, кö мәрьве рʹöһʹани гәләк щöдә дьбә жь мәрьве бь һʹьш-аqьле бәдәни. Гәло чаwа әв принсип дькарә али wә бькә, кö һәвалзәwащ рʹаст бьжберьн?
16 Һәвалти. Дина хwә бьдьн принсипа жь 1 Корьнтʹи 15:33. (Бьхунә.) Мәрьве рʹöһʹани wе тʹәви wан мәрьва һәвалтийе нәкә, йед кö дькарьн рʹöһʹанийа wи сьст кьн. Ле кʹижан пьрс дькарьн али wә бькьн бь аqьлайи һәвала бьжберьн? Мәсәлә, чаwа һун интернете дьдьнә хәбате? Йан жи ча әw принсип дькарә али wә бькә, чахе һун тʹәви мәрьвед нәнас листькед онлайн дьлизьн?
Гәло сафикьрьнед мьн wе али мьн бькьн әз рʹöһʹанида мәзьн бьм? (Бьньһерʹә абзаса 17)
17-19. Чаwа рʹöһʹанийа мә дькарә али мә бькә а) шьхöле бекер нәкьн? б) нетед баш дайньн пешийа хwә? в) чәтьнайед ортʹа хwә у мәрьва сафи кьн?
17 Шьхöлед кö рʹе мә дьгьрьн рʹöһʹанида мәзьн бьн. Паwлосе шанди Мәсиһи пешда ширәт кьрьн, wәки әwана фәсал бьн. (Бьхунә Ибрани 6:1) Ле гәло әм гәрәке жь кʹижан «кьрьнед кö дьбьнә бәрбь мьрьне» хwә дур хwәй кьн? Әw һәнә нет у шьхöлед пʹучʹ кö тʹö кʹаре мәрʹа найньн. Әв принсип дькарә али мә бькә кö әм хwә бьщерʹьбиньн, мәсәлә ван пьрса бьдьнә хwә: «Гәло әв шьхöл кö әз дьхwазьм бькьм, шьхöле бәдәни йә? Гәло лазьм ә әз бькʹәвьмә нава wи шьхöли, кʹижан кö тʹәне сәва пʹәрәчекьрьне йә? Чьрʹа әз гәрәке нәкʹәвьмә нав wан кʹома, йед кö дьхwазьн һʹале дьнйайе бьгöһезьн?»
Гәло сафикьрьнед мьн wе али мьн бькьн нетед рʹöһʹани дайньм пешийа хwә? (Бьньһерʹә абзаса 18)
18 Нетед рʹöһʹани. Иса wәʹде даннасинкьрьна сәр чʹийе, дәрһәqа нетед рʹöһʹани рʹебәрийа зәлал да (Мәт. 6:33). Бәле, мәрьве рʹöһʹани нетед рʹöһʹани датинә пешийа хwә. У әв принсип али мә дькә щаба wан пьрса бьдьн: «Гәло лазьм ә әз паши мәкʹтәбе хwәндьна бьльнд бьстиньм? Гәло гәрәке әз әве хәбате qәбул кьм?»
Гәло сафикьрьнед мьн wе али мьн бькьн әʹдьлайиһʹьз бьм? (Бьньһерʹә абзаса 19)
19 Һәвнәфәʹмкьрьн. Чаwа ширәта Паwлосе шанди дькарә али мә бькә чахе кәсәк мә дьдә хәйдандьне? (Рʹом. 12:18) Чаwа шагьртед Мәсиһ, әме һәр тьшти бькьн сәва «тʹәви һʹәму мәрьва әʹдьлайийеда бьн». Чахе чәтьнайи ортʹа мә у кәсәкида пешда те, гәло әм ча хwә дьдьнә кʹьфше? Мәрʹа чәтьн ә бәр һәв дахьн? Гәло әм тенә наскьрьне ча мәрьве кö әʹдьлайе чедькә? (Аqуб 3:18).
20. Чьрʹа һун дьхwазьн рʹöһʹанида пешда һәрʹьн?
20 Әв тʹәне чәнд мәсәлә нә кö дьдьнә кʹьфше, wәки чаwа принсипед Хwәде дькарьн али мә бькьн кö сафикьрьнед рʹаст бькьн. Һәрге әм рʹöһʹанида qәwи бьн, әме һе бәхтәwар у дьлрʹьһʹәт бьн. Роберт бәʹса кʹижани мә жоре кьр, дьбежә: «Чахе һәләqәтийа мьн тʹәви Йаһоwа qәwи бу, әз бумә малхе у баве һе баш. Әз дьлрʹьһʹәт у бәхтәwар бумә». Әм жи дькарьн кʹәрәмед öса бьстиньн, һәрге рʹöһʹанида пешда һәрʹьн. Чаwа мәрьвед рʹöһʹани, әме һе бәхтәwар бьн, һьн ньһа, һьн жи чахе «жийина кö рʹасти жийин ә» qазанщ кьн (1 Тимтʹ. 6:19).