Чь Те Һʹәсабе Бьбьнә Мәрьве Рʹӧһʹани? Гәло Әз Дькарьм Бе Религийа Бьбьмә Мәрьве Рʹӧһʹани?
Щаба Кʹьтеба Пироз
Ль гора Кʹьтеба Пироз мәрьве рʹӧһʹани әԝ ә, кʹи кӧ дьхԝазә дьле Хԝәде ша кә, у һин дьбә сәр һәр тьшти бь чʹәʹве Хԝәде бьньһерʹә. Мәрьве рʹӧһʹани ԛәԝате дьдә хәбате, сәва кӧ ль гора принсипед Хԝәде бьжи у изьне дьдә рʹӧһʹе пироз кӧ рʹебәрийа ԝи бькәa (Рʹомайи 8:5; Әфәси 5:1).
Гәләк щар чахе Кʹьтеба Пироз дәрһәԛа рʹӧһʹанийе хәбәр дьдә, әԝ мәрьве рʹӧһʹани у нә рʹӧһʹани һьмбәри һәв дькә. Мәсәлә, һьмбәри мәрьве рʹӧһʹани «мәрьве нәхԝәйи-Рʹӧһʹ ԝан тьштед Рʹӧһʹе Хԝәде ԛәбул накә», демәк һинкьрьнед Хԝәде (1 Корьнтʹи 2:14-16). Хенщи ԝе йәке мәрьве нәхԝәйи-рʹӧһʹ «һʹәвсуди» у һәврʹькʹийе дьдә кʹьфше, дәԝса әʹдьлайе у дьлрʹәʹмийе (1 Корьнтʹи 3:1-3). Әԝе кӧ бӧхдана давежә у һәвалед незик жь һәв дьԛәтинә, мина һʹәйԝана хԝә дьгьрә, нә кӧ мина мәрьве рʹӧһʹани (Щьһуда 19; Мәтʹәлок 16:28).b
Ве готареда
Канийа рʹӧһʹанийе
Әм дькарьн рʹӧһʹанида пешда һәрʹьн, чьмки әм дьлԛе Хԝәдеда һатьнә әʹфьрандьне (Дәстпебун 1:27). Ләма жи әʹщебмайи нинә, кӧ гәләк мәрьв хԝә нә кӧ тʹәне тьштед материали у физики дьгьрьн у ԛимәт дькьн, ле дьһа тьштед фәрз.
Жь буйине әм дькарьн хәйсәт-һʹӧнӧред Йаһоԝаc Хԝәде нав хԝәда пешда биньн. Мәсәлә, әʹдьлайи, дьлрʹәʹми у һʹьзкьрьн (Аԛуб 3:17). Хенщи ԝе йәке Хԝәде рʹӧһʹанийа ԝан мәрийа ԛәԝи дькә, йед кӧ һәр тьшти дькьн, сәва кӧ ль гора ԛанунед ԝи бьжин (Кʹаред Шандийа 5:32).
Чьрʹа рʹӧһʹани ӧса фәрз ә?
Мәрьве рʹӧһʹани бәрбь «жийин» у әʹдьлайе дьчә (Рʹомайи 8:6). Жийин у әʹдьлайи әв пʹешкʹешед пʹьрʹ ԛимәт ьн жь Хԝәде.
Жийин: Хԝәде соз дьдә, ԝәки ԝе жийина һʹәта-һʹәтайе бьдә мәрьвед рʹӧһʹани (Йуһʹәнна 17:3; Галати 6:8).
Әʹдьлайи: Вьра хәбәрдан дьчә дәрһәԛа әʹдьлайа тʹәви Хԝәде. Әԝед кӧ тʹәне дәрһәԛа һʹәԝщед хԝәйә физики дьфькьрьн, дьбьнә нәйаред Хԝәде (Рʹомайи 8:7). Хенщи ԝе йәке әԝед кӧ ԛәԝате дьдьнә хәбате, сәва кӧ рʹӧһʹанида пешда һәрʹьн, әԝана дьстиньн «әʹдьлайийа Хԝәде кӧ жь һәр һʹьш-аԛьли дәрбазтьр ә» (Филипи 4:6, 7). Әʹдьлайа ви щурʹәйи али ԝан дькә, ԝәки бь рʹасти жийина хԝәда бәхтәԝар бьн (Мәтта 5:3).
Чаԝа бьбьнә мәрьве рʹӧһʹани?
Дәрһәԛа нормед Хԝәде пебьһʹәсә у ль гора ԝан бьжи. Ве йәкеда хԝәндьна Кʹьтеба Пироз дькарә али тә бькә, кʹидәре кӧ фькьред Хԝәде һатьнә ньвисаре. Әв фькьр «мәрьва бь рʹебәрийа Рʹӧһʹе Пироз» ньвисинә (2 Пәтрус 1:21). Чь кӧ тӧ жь Кʹьтеба Пироз пебьһʹәси, ԝе али тә бькә ԝәки «бь рʹӧһʹ у рʹастийе» Хԝәде бьһʹәбини, демәк бь рʹебәрийа рʹӧһʹе пироз у ль гора ԛьрара Хԝәде (Йуһʹәнна 4:24).
Дӧада аликʹарийе жь Хԝәде бьхԝазә (Луԛа 11:13). Хԝәде ԝе али тә бькә хәйсәт-һʹӧнӧред ӧса нав хԝәда пешда бини, кʹижан кӧ мәрьвед рʹӧһʹани әʹйан дькьн (Галати 5:22, 23). Хԝәде ӧса жи биланийе дьдә, сәва кӧ әм бькарьбьн бәр чәтьнайед жийине тәйах кьн (Аԛуб 1:5).
Тʹәви мәрьвед рʹӧһʹани һәвалтийе бькә. Әԝана ԝе тә һелан кьн кӧ рʹӧһʹанийа хԝә ԛәԝи ки (Рʹомайи 1:11, 12). Ле һәвалти тʹәви ԝан мәрьва ньһерʹандьна кʹижана кӧ Хԝәде ԛәбул накә, дькарә рʹӧһʹанийа тә сьст кә (Аԛуб 4:4).
Гәло лазьм ә әз хԝә ль религийәке бьгьрьм, сәва кӧ бьбьмә мәрьве рʹӧһʹани?
Әв йәк кӧ мәрьв хԝә ль религийәке дьгьрә, найе һʹәсабе кӧ әԝ мәрьвәки рʹӧһʹани йә. Кʹьтеба Пироз дьбежә: «Һәгәр йәк хԝә хԝәденас һʹәсаб дькә у зьмане хԝә нькарә, әԝ хԝәха хԝә дьхапинә, хԝәденасийа ԝи пʹучʹ ә» (Аԛуб 1:26).
Хенщи ԝе йәке Кʹьтеба Пироз дьдә кʹьфше, ԝәки мәрьвед рʹӧһʹани Хԝәде ӧса дьһʹәбиньн, чаԝа кӧ Ԝи хԝәш те. Әԝана ԛәбул дькьн у фәʹм дькьн, ԝәки «Рʹӧһʹ йәк ә», демәк рʹӧһʹе Хԝәдейи пироз. Әв рʹӧһʹ ԝана һелан дькә, ԝәки тʹәвайи бь тʹәрбәти, йәктийе у әʹдьлайеда Хԝәде бьһʹәбиньн (Әфәси 4:1-4).
Ньһерʹандьна нәрʹаст дәрһәԛа рʹӧһʹанийе
Ньһерʹандьна нәрʹаст: Бьбьнә мәрьве рʹӧһʹани те һʹәсабе, ԝәки алийе хԝәда һәр тьшти бькьн, сәва кӧ жь жийина хԝә рʹази бьн у фәрәсәтед хԝә баш кьн.
Избати: Бьбьнә мәрьвнә рʹӧһʹани те һʹәсабе, ӧса бьжин кӧ һәр тьштида ньһерʹандьна Хԝәде һьлдьн һʹәсаб. Әв найе һʹәсабе, ԝәки мәрьв бе Хԝәде дькарә фәрәсәтед хԝә баш кә у жь жийине рʹази бә. Мәрьвед рʹӧһʹани Йаһоԝа Хԝәде ча Әʹфьрандаре хԝә ԛәбул дькьн у ль гора ԛьрара ԝи дьжин. Һәма әв йәк ԝанрʹа шабуне тинә (Зәбур 100:3).
Ньһерʹандьна нәрʹаст: Мәрьв дькарә бьбә кәсе рʹӧһʹани һәрге тьштед кӧ дьле ԝи ша дькьн, жь хԝә кем кә у хԝә бьриндар кә.
Избати: Мәрьве кӧ хԝә бьриндар дькә, ль гора ньһерʹандьна хԝә Хԝәде дьһʹәбинә, ле нә кӧ ль гора ньһерʹандьна Хԝәде. Әв мәрьве рʹӧһʹани нинә (Колоси 2:18, 23). Кʹьтеба Пироз дьбежә, ԝәки жийина мәрьве рʹӧһʹани шабуне ԝирʹа тинә, нә кӧ еше (Мәтʹәлок 10:22).
Ньһерʹандьна нәрʹаст: Һʹәму щурʹә һәләԛәти тʹәви рʹӧһʹа, дькʹәвә нава ве йәке сербази у кʹочʹәкти, али мәрьва дькә кӧ бьбьнә кәсед рʹӧһʹани.
Избати: Йе кӧ сербазийева мьжул дьбә баԝәр дькә, ԝәки рʹӧһʹе мәрьве мьри дькарә тʹәви саха хәбәр дә. Ле Кʹьтеба Пироз һин дькә, ԝәки мәрьвед мьри тʹӧ тьшти ньзаньн (Ԝаиз 9:5). Демәк сербази әв һәйә һәләԛәти тʹәви әʹфринед рʹӧһʹани кӧ мьԛабьли Хԝәде дәркʹәтьн. Сербази бәр чʹәʹве Хԝәде рʹәш ә у рʹийа мәрьв дьгьрә, кӧ рʹӧһʹанида пешда һәрʹә (Ԛануна Кʹаһинтийе 20:6; Ԛануна Дӧщари 18:11, 12).
Ньһерʹандьна нәрʹаст: Рʹӧһʹанийа һәр бинбәри жь буйине һәйә.
Избати: Һәр тьшт чь кӧ Хԝәде әʹфьрандийә, ԝи рʹумәт дькә (Зәбур 145:10; Рʹомайи 1:20). Ле тʹәне әԝ әʹфьрин дькарьн бьбьнә кәсед рʹӧһʹани, бал кʹижана фәрәсәте фькьрандьне у билани һәйә. Һʹәйԝан пе инстинкта рʹебәри дьбьн у нькарьн бьбьнә достед Хԝәде, чьмки әԝана тʹәне бона һʹәԝщед хԝәйә физики хәм дькьн (2 Пәтрус 2:12). Ләма жи Кʹьтеба Пироз рʹабун-рʹуньштьн у фькьрандьна мәрьве рʹӧһʹани щӧдә дькә жь йа һʹәйԝана (Аԛуб 3:15; Щьһуда 19).
a Дәстньвисаред Кʹьтеба Пирозә орижиналида хәбәред кӧ һатьнә ԝәлгәрʹандьне ча «рʹӧһʹ» рʹастә-рʹаст тенә һʹәсабе «бинһьлдан». Әв гьли ӧса жи тенә һʹәсабе ԛәԝата кӧ найе дитьне ле һʹӧкӧме ве әшкәрә йә. Кʹьтеба Пирозда те әʹйанкьрьне кӧ Хԝәде кәсе Һьмзор у Рʹӧһʹани йә. Мәрьве рʹӧһʹани сафи дькә бь ԛьрара Хԝәде у рʹӧһʹе Ԝийи пироз рʹебәри бә.
b Кʹьтеба Пирозда гьлийед «бәдәни» у «физики» тенә хәбьтандьне һьндава ԝан мәрийа, ньһерʹандьн у кьред кʹижана ль сәр һʹиме һʹәԝщед ԝани бәдәни у физики нә. Мәрьвед ӧса нормед Хԝәде һьлнадьн һʹәсаб, гава һʹәԝщед хԝә рʹази дькьн.
c Йаһоԝа наве Хԝәде йә, кʹижан кӧ Кʹьтеба Пирозда ньвисар ә (Зәбур 83:18).