Чь те Һʹәсабе Бьбьн Мәрьве Рʹöһʹани?

1, 2. а) Һьнә хушк-бьра дәрһәqа рʹöһʹанийе чь дьбежьн? б) Әме ве готареда дәрһәqа рʹöһʹанийе кʹижан пьрса шеwьр кьн?

ХУШКӘКӘ мә жь Канадайе дьбежә: «Әз дьһа бәхтәwар бумә у мьнрʹа һе һеса йә чәтьнайа сафи кьм, чьмки әз бумә мәрьве рʹöһʹани». Бьрак жи жь Бразилйайе гьли дькә: «Ида 23 сал ә әз зәwащеда ньм, у әм бәхтәwар ьн, чьмки әм алийе хwәда һәр тьшти дькьн сәва бьбьнә мәрьвед рʹöһʹани». У бьрак жи жь Филипине дьбежә: «Жь бо ве йәке кö әз рʹöһʹанида гьһиштьмә, әз дьлрʹьһʹәт ьм, у дьһа бь сәбьр ьм һьндава хушк-бьред щурʹә-щурʹә мьләта у култура».

² Бәле, жь гьлийед wан әшкәрә те кʹьфше, wәки гәләк кʹар ә чахе мәрьв рʹöһʹанида гьһишти йә. Дьбәкә һун пьрсәкә öса дьдьнә хwә: «Ча әз дькарьм бьбьмә мәрьве рʹöһʹани у жь ве йәке һе зедә кʹаре бьстиньм?» Йа пешийе, әм гәрәке фәʹм кьн кö Кʹьтеба Пироз чь дьбежә дәрһәqа мәрьвед рʹöһʹанида гьһишти. Ве готареда әме щаба wан пьрса шеwьр кьн: 1) Чь те һʹәсабе бьбьнә мәрьве рʹöһʹани? 2) Кʹижан мәсәлә дькарьн али мә бькьн кö рʹöһʹанида пешда һәрʹьн? 3) Һәрге әм сәр «нет-фькьра» Иса бьн, ча әw йәк wе али мә бькә бьбьнә мәрьвнә рʹöһʹани?

МӘРЬВЕ РʹÖҺʹАНИ ЧЬ ЩУРʹӘЙИ ЙӘ?

3. Кʹьтеба Пироз ча фьрqийе дькә ортʹа мәрьве рʹöһʹани у мәрьве нәрʹöһʹани?

³ Паwлосе шанди али мә дькә, кö фәʹм кьн чь те һʹәсабе мәрьве рʹöһʹани. Әwи мәрьве рʹöһʹани бәрамбәри «мәрьве нәхwәйи-рʹöһʹ» кьр, демәк мәрьве нәрʹöһʹани. (Бьхунә 1 Корьнтʹи 2:14-16.) Ле чь фьрqи һәйә ортʹа ван дö мәрьва? Мәрьве нәхwәйи-рʹöһʹ «тьштед рʹöһʹе Хwәде qәбул накә, бь йа wи әв йәкана беһʹьши нә у нькарә жи фәʹм бькә». Ле мәрьве рʹöһʹани әw ә, йе кö «һәр тьшти әʹнәнә дькә» у сәр «нет-фькьра Мәсиһ» йә, демәк ньһерʹандьна wи мина йа Иса йә. Паwлос мә һʹәмуйа һелан дькә кö рʹöһʹани бьн. Ле гәло диса чьда мәрьве рʹöһʹани щöдә дьбә жь йе нәрʹöһʹани?

4, 5. Мәрьве нәрʹöһʹани кʹижан хәйсәт-һʹöнöра дьдә кʹьфше?

⁴ Пешийе wәрә әм шеwьр кьн дәрһәqа мәрьве нәрʹöһʹани. Иро дьнйайеда фькьр у ньһерʹандьна гәләка тʹәне сәр тьштед бәдәни йә. Паwлос дәрһәqа ве йәке гот кö «рʹöһʹе кö ньһа . . . нава wан мәрьвада йа хwә дькә, йед кö нә гöрʹа Хwәдеда нә» (Әфәс. 2:2). Әв рʹöһʹ һʹәчʹи зәʹф мәрьва һелан дькә кö пәй гәләка һәрʹьн, демәк чʹәʹв бьдьнә wан. Әwана тʹәне дәрһәqа хwәстьнед хwә дьфькьрьн. Ләма жи әwана wан тьшта дькьн кʹижан кö әwана һʹәсаб дькьн рʹаст ә, у принсипед Хwәде пьшт гöһе хwәва давежьн. Әwе нәхwәйи рʹöһʹ, демәк йе кö пәй хwәстьнед бәдәне дькʹәвә, гәләк дькʹәвә һʹәйра наве хwә, һәбуке, йан жи бона wи изьна wийә шәхси йа лапә фәрз ә.

⁵ Диса ча те кʹьфше кö мәрьв нәрʹöһʹани йә? Мәрьвед кö дькʹәвьнә бәр байе «кьред бьнйатʹа инсен», мәрьвнә нәрʹöһʹани нә (Галт. 5:19-21). Паwлос нәʹма хwәйә пешьнда Корьнтʹийарʹа, бәʹса хәйсәт-һʹöнöред дьн дькә, кʹижан кö мәрьве бь һʹьш-аqьле бәдәни дьдә кʹьфше. Мәсәлә, әwи гот кö мәрьвед wи щурʹәйи ортʹа мәрьва хьраб дькьн, дәʹw-доза пешда тиньн, һәврʹькʹийе дькьн, һәвдö дьдьнә диwане, бешекьр ьн һьндава wан йед кö рʹебәрийе дьдьнә wан, у пәй хwарьн-вәхwарьне дькʹәвьн. Чахе мәрьве бәдәни дькʹәвә щерʹьбандьне, әw нькарә хwә рʹаст бьдә кʹьфше, сьст дьбә у дькʹәвә тʹәльке (Мәтʹлк. 7:21, 22). Щьһуда дәрһәqа мәрьвед wи щурʹәйи һәла һе жи гот, wәки «рʹöһʹе пироз» бал wан тʹöнә (Щьһуд. 18, 19).

6. Мәрьве рʹöһʹани чь щурʹәйи йә?

⁶ Ле мәрьве рʹöһʹани кʹе йә? Мәрьве рʹöһʹани һәр гав дәрһәqа һәләqәтийа хwә тʹәви Хwәде дьфькьрә. Мәрьвед öса дьхwазьн «чʹәʹв бьдьнә Хwәде» (Әфәс. 5:1). Әв те һʹәсабе кö әwана дьхwазьн мина Йаһоwа бьфькьрьн у сәр тьшта пе чʹәʹве wи бьньһерʹьн. Хwәде бона wан реали йә. Әwана һʹәму тьштада принсипед Йаһоwа һьлдьдьн һʹәсаб (Зәб. 119:33; 143:10). Мәрьвед бь һʹьш-аqьле рʹöһʹани сәр хwә дьхәбьтьн, wәки бәре рʹöһʹе пироз бьдьнә кʹьфше, нә кö бькʹәвьнә пәй хwәстьнед бәдәне (Галт. 5:22, 23). Сәва фәʹм кьн кö чь те һʹәсабе мәрьве рʹöһʹани, wәрә мәсәләкә öса биньн: Мәрьве кö бь һʹьш-аqьле хwә педа дькʹәвә бизнесе у ве йәкеда пешда дьчә, wи нав дькьн ча бизнесмен. Ле әwе кö һʹьш-аqьле wан сәр тьштед рʹöһʹани йә, дькарьн wи нав кьн ча мәрьве рʹöһʹани. Бәле, мәрьве кö гәләк qимәт дькә тьштед рʹöһʹани, әw мәрьве рʹöһʹани йә.

7. Дәрһәqа мәрьвед бь һʹьш-аqьле рʹöһʹани Кʹьтеба Пирозда чь те готьне?

⁷ Кʹьтеба Пироз дәрһәqа мәрьвед рʹöһʹани дьбежә кö әwана бәхтәwар ьн. Мәтта 5:3-да әм дьхуньн: «Хwәзи ль рʹöһʹфәqира, чьмки Пʹадшатийа Әʹзмана йа wан ә». Öса жи Рʹомайи 8:6-да әм дьхуньн дәрһәqа ве кʹаре, кʹижан кö мәрьве бь һʹьш-аqьле рʹöһʹани дьстинә: «Ахьрийа фькьра бьнйатʹа мәрьвайе мьрьн ә, ле ахьрийа фькьра рʹöһʹ жийин у әʹдьлайи йә». Бәле, чахе һʹьш-аqьле мә сәр тьштед рʹöһʹани йә, әʹдьлайа мә тʹәви Хwәде у тʹәви мәрьва һәйә, у һьн жи баwәрийа мә һәйә кö әме ахьрийеда жийина һʹәта-һʹәтайе бьстиньн.

8. Чьрʹа һеса нинә кö рʹöһʹанида пешда һәрʹьн у рʹöһʹанийа хwә хwәй кьн?

⁸ Әм иро дьнйакә хьрабда дьжин. Дор бәре мә һʹәму мәрьв тʹәне дәрһәqа тьштед бәдәни дьфькьрьн, у ләма мәрʹа лазьм ә рʹöһʹанида гьһишти бьн у рʹöһʹанийа хwә хwәй кьн. Һәрге әм рʹöһʹанийа хwә öнда кьн, әв дьне wе һʹьш-аqьле мә бь фькьред бәдәни тʹьжә кә. Ле чь дькарә али мә бькә wәки нәкʹәвьнә ве qәзийе? Ча әм дькарьн рʹöһʹанида мәзьн бьн?

МӘСӘЛЕД КÖ ДӘРСЕ ДЬДЬНӘ МӘ

9. а) Чь дькарә али мә бькә рʹöһʹанида мәзьн бьн? б) Кʹижан мәсәла мәрьвед рʹöһʹани әме ве готареда шеwьр кьн?

⁹ Зарʹ дькарә бьбә гьһишти, һәрге дина хwә бьдә де-баве хwә у чʹәʹв бьдә мәсәла wанә баш. Мина ве йәке, әм жи дькарьн рʹöһʹанида мәзьн бьн, һәрге дина хwә бьдьн мәрьвед рʹöһʹанида qәwи у чʹәʹв бьдьнә wан. Ле әм дькарьн дәрсе хwәрʹа һин бьн жь мәсәла мәрьвед кö дина wан сәр тьштед бәдәни нә, у нәбьнә мина wан (1 Корн. 3:1-4). Кʹьтеба Пирозда мәсәлед баш жи һәнә у йед хьраб жи. Ле нета мә әw ә кö рʹöһʹанида мәзьн бьн, ләма жи wәрә әм шеwьр кьн чәнд мәсәлед мәрьвед рʹöһʹани, у бьвиньн кö чьда әм дькарьн чʹәʹв бьдьнә wан. Әме шеwьр кьн мәсәла Аqуб, Мәрйәме, у Иса.

10. Жь чь дьһатә кʹьфше кö Аqуб мәрьвәки рʹöһʹани бу?

¹⁰ Пешийе wәрә шеwьр кьн сәрһатийа Аqуб. Чаwа иро әʹмьре мә нәһеса йә, әʹмьре Аqуб жи нәһеса бу. Бьре wийи һʹәлал Әсаw, кʹижан кö мәрьвәки бь һʹьш-аqьле нәрʹöһʹани бу, дьхwәст wи бькöшта. Хенщи ве йәке, хәзуре Аqуб жи жерʹа һʹәйф нибу у тʹьме бона кʹара хwә wи дьда хәбате. Ле йәкә Аqуб нав әwан мәрьвед нәрʹöһʹанида, рʹöһʹанийа хwә хwәй кьр. Әwи баwәр дькьр әв созе кö Хwәде да Бьраһим. Аqуб заньбу кö әв соз малбәта wива жи гьредайи йә, ләма әw тʹьме мьqати нәфәред хwә дьбу (Дәстп. 28:10-15). Пе хәбәрдан у кьред Аqуб дьһатә кʹьфше, wәки принсип у созед Хwәде тʹьме бира wида бун. Бәʹса хәбәре чахе Аqуб тьрсийа чьмки бьре wи дьхwәст wи бькöшта, әwи дöада жь Йаһоwа һиви кьр: «Кʹәрәма хwә, мьн . . . хьлаз кә . . . Нә тә готийә: ‹Әзе әʹсәйи qәнщийе ль тә бькьм у зöрʹәта тә бькьмә wәкә qума бәʹре›» (Дәстп. 32:6-12). Бәле, әшкәрә йә кö Аqуб созед Хwәде һьндава хwә у кал-бавед хwә, qайим баwәр дькьр у ль гора qьрара Хwәде дьжит.

11. Жь чь те кʹьфше кö Мәрйәм мәрьвәкә рʹöһʹани бу?

¹¹ Wәрә ньһа мәсәла Мәрйәме шеwьр кьн. Гәло чьрʹа Йаһоwа Мәрйәм бьжарт сәва бьбә дийа Иса? Бешьк дькарьн бежьн, чьмки әw мәрьвәкә рʹöһʹани бу. Ле жь кʹö әм ве йәке заньн? Рʹöһʹанийа wе те кʹьфше жь ве йәке, кö әwе ча бь гьлийа Йаһоwа рʹумәт кьр чахе тʹәсәлийа мәрьвед хwә Зәкәрйа у Елизабете кьр. (Бьхунә Луqа 1:46-55.) Жь гьлийед wе әʹйан те кʹьфше, wәки әwе Хәбәра Хwәде чьqас qәwи һʹьз дькьр, у Ньвисаред Ибрани рʹьнд заньбу (Дәстп. 30:13; 1 Сам. 2:1-10; Малх. 3:12). Öса жи чахе әw у Усьв тʹәзә зәwьщибун, сафи кьрьбун кö һʹәта Иса wанрʹа нәбә, ча жьн-мер тʹәви һәв рʹанәзен. Гәло әв йәк чь дьдә кʹьфше? (Мәт. 1:25). Әв дьдә кʹьфше, wәки бона wан һәрда жи һе зедә qьрара Йаһоwа фәрз бу, нә кö хwәстьнед wан (Мәт. 1:25). Wәʹдә дәрбаз дьбу, Мәрйәме дина хwә дьдайе кö чь дьqәwьмә әʹмьре Исада у гöһ дьда һәр готьнед Исайә билан. Хенщи ве йәке, әwе «әв һʹәму тьшт дьле хwәда хwәй дькьрьн» (Луqа 2:51). Әw гәләк дьфькьри дәрһәqа qьрара Хwәде һьндава Мәсиһ. Wәрә әм чʹәʹв бьдьнә Мәрйәме, у әʹмьре хwәда тʹьме qьрара Хwәде дайньн щийе пешьн.

12. а) Иса чьда мина Баве хwә бу? б) Ча әм дькарьн чʹәʹв бьдьнә Иса? (Бьньһерʹә шькле әʹwльн.)

¹² Ле гәло кʹе йә мәсәла лапә мәзьн алийе рʹöһʹанида? Әw һәйә Иса! Әwи тʹәмамийа әʹмьре хwәда у хьзмәтийеда избат кьр, wәки дьхwазә бь тʹәмами чʹәʹв бьдә Баве хwә Йаһоwа. Әwи һәр тьштида, мәсәлә хәбәрданеда, фькьр у кьред хwәда чʹәʹв дьда Йаһоwа. Әwи ль гора qьрар у принсипед Хwәде дьжит (Йуһʹн. 8:29; 14:9; 15:10). Бәʹса хәбәре, дина хwә бьдьне кʹьтеба Ишайада ча дьлшәwатийа Йаһоwа те кʹьфше, у бәрамбәр кьн кö кʹьтеба Марqосда ча дьлшәwатийа Иса те кʹьфше. (Бьхунә Ишайа 63:9; Марqос 6:34.) Ле гәло әм чʹәʹв дьдьнә Иса, у тʹьме һазьр ьн дьлшәwат бьн һьндава мәрьвед кö һʹәwще ве йәке нә? Иса öса жи wәʹде хwә у qәwата хwә бь тʹәмами хәрщ дькьр сәр шьхöле бәлакьрьна мьзгинийе (Луqа 4:43). Әw һʹәму хәйсәт-һʹöнöр у кьред wи нишан дькьн кö әw рʹöһʹани бу.

13, 14. а) Әм чь дькарьн һин бьн жь хушк-бьред рʹöһʹани? б) Мәсәле гьли кьн.

¹³ Иро жи һәнә гәләк хушк-бьред рʹöһʹанида гьһишти, йед кö чʹәʹв дьдьнә Иса. Дьqәwьмә һун дьвиньн хушк-бьред öса кö хьзмәтийеда хирәт ьн, меванһʹьз ьн, дьлшәwат ьн, у һʹöнöред wанә баш һәнә. Рʹаст ә кемасийед wан жи һәнә, чьмки әwана гöнәкʹар ьн, ле йәкә әwана һәр тьшти дькьн сәва нав хwәда пешда биньн wан һʹöнöра, кʹижан кö Хwәде хwәш тен. Хушкәкә мә жь Бразилйайе бь наве Рейчел, дьбежә: «Мьн һʹьз дькьр пәй мода ве дьнйайе һәрʹьм. Ләма жи мьн кʹьнще нәлайиq хwә дькьр. Ле чьqас зәʹф мьн рʹасти фәʹм кьр, һаqас зәʹф әз һелан бум кö нав хwәда гöһастьна бькьм у бьбьмә мәрьве рʹöһʹани. Рʹаст ә һеса нибу хwә бьгöһезьм, ле әз дьһа бәхтәwар бумә у нета әʹмьре мьн жи һәйә».

¹⁴ Рален кö жь Филипине йә, рʹасти чәтьнайикә дьн һатийә. Әwе дьхwәст пешдачуйи бә, ләма жи нет хwәрʹа дани wәки хwәндьна бьльнд бьстинә у хәбатәкә баш хwәрʹа бьвинә. Әw гьли дькә: «Нетед мьнә рʹöһʹани ида һеди-һеди бира мьн дьчун. Ле паше мьн тедәрхьст, wәки әʹмьре мьнда тьштәк мьн кем ә, чь кö жь хәбате дьһа фәрзтьр ә. Ләма мьн ида нетед хwә гöһаст у дина хwә да сәр хьзмәтийа хwә Йаһоwарʹа». Жь wи wәʹдәйи, Рален бь тʹәмами нава шьхöле Йаһоwада нә у баwәр дькә, wәки Хwәде хwәйе созе хwә йә кö Мәтта 6:33, 34-да ньвисар ә. Әw дьбежә: «Әз qә дöдьли ниньм кö Йаһоwа wе бона мьн хәм бькә!» Дьбәкә щьвата wәда жи һәнә хушк-бьред кö öса дьжин. Чахе әм дьвиньн кö ча әwана чʹәʹв дьдьнә Иса, әм жи дьхwазьн чʹәʹв бьдьнә wан (1 Корн. 11:1; 2 Тʹеслн. 3:7).

СӘР «НЕТ-ФЬКЬРА МӘСИҺ» БЬН

15, 16. а) Сәва бьбьнә мина Мәсиһ, әм гәрәке чь бькьн? б) Ча нет-фькьра Мәсиһ дькарә сәре мәда бә?

¹⁵ Ча әм дькарьн чʹәʹв бьдьнә Мәсиһ? Кʹьтеба Пирозда 1 Корьнтʹи 2:16-да те готьне, wәки нет-фькьра Мәсиһ гәрәке сәре мәда бә. Ле Рʹомайи 15:5-да те готьне wәки әм гәрәке «сәр нетәке бьн, wәкә нәхш-тʹәрзе Мәсиһ Иса». Демәк, сәва кö әм бьбьнә wәк Иса, әм гәрәке бьзаньбьн кö нет-фькьред wи чь бун у әw ча дьфькьри, у дәрһәqа хәйсәт-һʹöнöред wи жи пебьһʹәсьн. Паше әм гәрәке пʹегәһа wида һәрʹьн. Иса һʹьш-аqьле хwә дабу сәр һәләqәтийа хwә тʹәви Хwәде. Ләма жи һәрге әм бьбьнә мина Иса, әме һе зәʹф чʹәʹв бьдьнә Йаһоwа. Жь ве йәке те кʹьфше, wәки чьqас фәрз ә әм һин бьн мина Иса бьфькьрьн.

¹⁶ Ле ча әм дькарьн ве йәке бькьн? Шагьртед Иса кʹәрәмәтед wи дьдитьн, гöһ дьдан һинкьрьнед wи, дина хwә дьдан кö әw ча бу һьндава һʹәму щурʹә мәрьва, у дьдитьн кö әwи чаwа принсипед Хwәде дьани сери. Ләма жи wана гот: «Әм хwәха шәʹдед wан һʹәму тьшта нә» (Кʹар. Шанд. 10:39). Рʹаст ә әм нькарьн Иса бьвиньн, ле Йаһоwа жь һʹьзкьрьне мьзгини дайә ньвисаре, кʹидәре әм дәрһәqа Иса дьхуньн у дькарьн хәйсәт-һʹöнöред wи бьвиньн. Чахе әм бьхуньн у бьфькьрьн сәр кʹьтеба Мәтта, Марqос, Луqа у Йуһʹәнна, wе нет-фькьра Мәсиһ сәре мәда бә. Wи щурʹәйи әм дькарьн «пʹегәһа wида һәрʹьн» у «бь wе нет-фькьре сильһʹкьри бьн» чаwа Мәсиһ (1 Пәт. 2:21; 4:1).

17. Һәрге әм мина Иса бьфькьрьн, әw йәк чьда wе али мә бькә?

¹⁷ Һәрге әм мина Иса бьфькьрьн, әв йәк wе чьда али мә бькә? Чаwа хwарьна баш сьһʹәт-qәwата мә qәwи дькә, öса жи чахе әм һʹьше хwә тʹьжә дькьн бь нет-фькьред Иса, әw йәк рʹöһʹанийа мә хwәй дькә. Паше, һеди-һеди әме ида тедәрхьн кö чь дәрәщада Иса wе чь бькьра. Бь сайа ве йәке, әме сафикьрьнед баш бькьн у wе исафа мә бәр Хwәде тʹәмьз бьминә. Дьбәкә һун жи qайил бьн кö һәрге әм «Хöдан Иса Мәсиһ ль хwә бькьн мәртʹал», әме кʹарәкә мәзьн бьстиньн (Рʹом. 13:14).

18. Ве готареда дәрһәqа мәрьве рʹöһʹани һун чь пеһʹәсийан?

¹⁸ Мә шеwьр кьр кö чь те һʹәсабе бьбьнә мәрьве рʹöһʹани. Мә öса жи дит кö әм жь мәрьвед рʹöһʹани чь дькарьн һин бьн. У әм öса жи пеһʹәсийан кö чахе «нет-фькьра Мәсиһ» сәре мәда йә, ча әw йәк али мә дькә кö рʹöһʹанида гьһишти бьн. Ле һәнә диса тьштед дьн, кö әм гәрәке дина хwә бьдьне. Мәсәлә, ча әм дькарьн тедәрхьн кö әм рʹöһʹанида ча ньн? Әм чь дькарьн бькьн сәва рʹöһʹанида һе qәwи бьн? У чаwа рʹöһʹанийа мә сәр әʹмьре мә һʹöкöм дькә? Готара дьнда әме щабед wан пьрса пебьһʹәсьн.