Йаһоwа Дькарә Һәр Тьшти Бькә

СЬБӘҺЕ ҺʹӘТА ЕВАРЕ ДЬХӘБЬТЬМ

Әз сала 1937-да һатьмә буйине, незики шәһәре Токмоке (Qиргизистан) кʹарханеда. Малбәта мә мьләте Qиргиз ьн, у әм сәр зьмане Qиргизи хәбәр дьдьн. Де-баве мьн хәбатчийед кʹархане бун, у әwана сьбәһе һʹәта еваре wедәре дьхәбьтин. Хwарьн тʹьме дьданә хәбатчийед кʹархане, ле һәqе хәбате тʹәне сале щарәке дьдан. Дийа мьнрʹа гәләк чәтьн бу мьн у хушка мьнә бьчʹук хwәй кә. Паши 5 салед һинбуна мәкʹтәбеда, мьн жи дәстпекьр тʹәмамийа рʹоже кʹарханеда бьхәбьтьм.

Ве регионеда кʹидәре мьн дьжит, кʹәсиббун бәлабуйи бу у мәрьв анщах йолә дьчун. Щаһьлтийеда әз нә дьфькьрим кö нета әʹмьр чь йә у нә жи дәрһәqа ахьрийе. Мьн тʹö щар нә жи дьда бәр чʹәʹве хwә, wәки рʹастийед qимәт дәрһәqа Йаһоwа Хwәде у qьрара wи, wе әʹмьре мьн лап бьгöһезьн. Чаwа рʹасти гьһиштә Qиргизистане у чаwа бәла бу, сәрһатикә һʹәwас ә. Әw йәк дәстпебу региона мьнда бакʹура Qиргизистане.

ДИЛЕД БӘРЕ РʹАСТИЙЕ ТИНЬН QИРГИЗИСТАНЕ

Рʹасти дәрһәqа Йаһоwа Хwәде сала 1956-да Qиргизистанеда шин бу. Һьнге мәрьв бьн һʹöкöме идеологийа Комунистада бун, ле чахе рʹасти бәла бу, ида лазьм бу идеологийа рʹастийе һин бьн. Чьрʹа? Qиргизистана иройин бәре дькʹәтә нава Йәктийа Кʹомаред Совйәте йед Сосйалист (USSR). Ле Шәʹдед Йаһоwа нав тʹәмамийа USSR, тʹö щар нәдькʹәтьнә политикайе у тʹәвнәбуйин хwәй дькьрьн (Йуһʹн. 18:36). Ләма жи wана һʹәсаб дькьрьн ча дьжмьнед дәwләта Комунисти у дьһатьнә зерандьне. Ле тʹö идеологийа нькарә Хәбәра Хwәде бьдә сәкьнандьне, wәки нәгьһижә дьле мәрьвед дьлсах. Бь рʹастийе бежьм, тʹәмамийа әʹмьре хwәда чь кö әз һин бумә, дәрса лапә qимәт әw ә, кö Йаһоwа «дькарә һәр тьшти бькә» (Марq. 10:27).

Зерандьне рʹе вәкьр, wәки Шәʹдед Йаһоwа Qиргизистанеда бәла бун. Чь щурʹәйи? Региона Сибирйайе жи дькʹәтә нава USSR-е, у дьжмьнед Дәwләте аксор дькьрьн дьшандьнә wедәре. Чахе йед аксоркьри аза дьбун, гәләк жь wан дьһатьнә Qиргизистане, у һьнәк жь wана тʹәви хwә рʹасти анинә. Йәк жь wан Емил Йантсен бу, йе кö сала 1919-да Qиргизистанеда һатьбу буйине. Әw шандьбунә кампе, кʹидәре кö йед аксоркьри хәбата гьран дькьрьн у wедәре әw рʹасти Шәʹдед Йаһоwа һат. Әwи рʹасти qәбул кьр у сала 1956 вәгәрʹийа мала хwә. Емил региона мьнда незики Сокулуке щи-wар бу. Сала 1958-да, Qиргизистанеда щьвата пешьн Сокулукеда саз бу.

Wәкә саләк шунда, Виктор Винтер дәрбази Сокулуке бу. Әwи бьре амьн гәләк тәнгаси пәй һәв дит. Дö щара әw сәр се сала кәледа рʹуньшт, паше әw диса дәһ сала кʹәтә кәле у һьн жи сәр пенщ сала һатә аксоркьрьне. Ле йәкә зерандьне һʹәбандьна рʹаст нәда сәкьнандьне.

РʹАСТИ ДЬГЬҺИЖӘ ШӘҺӘРЕ МЬН

Сала 1963 Qиргизистанеда ида wәкә 160 Шәʹдед Йаһоwа һәбун. Гәләк жь wан жь Алманйайе, Украине, у жь Урьсете бун. Йәк жь wан Едуард Вартер бу, йе кö аксоркьри бу, у сала 1924 Алманйайеда һатьбу ньхöмандьне. Незики сала 1940, Натсиста wи шандьнә кампе кʹидәре хәбата гьран дькьрьн, у чәнд сал шунда Комунистед USSR-е wи аксор кьрьн. Сала 1961-да әw бьре амьн дәрбази шәһәре Канте бу, кʹижан кö гәләк незики шәһәре мьн ә.

Кантеда öса жи хушкәкә мәйә амьн дьжит, наве wе Елизабет Фот бу. Әw тʹәрзи бу, демәк кʹьнщ дьдьрут, у бь ве йәке әʹбура хwә дькьр. Әw ве хәбата хwәда һостә бу, ләма жи мәрьвед навдар кʹьнщ бал wе дьданә дьруне, мәсәлә һʹәким у дәрсдара. Йәк жь мьштәрийед wе жьнькәк бу, наве Аксамай Султаналийева бу, әw жьна хьзмәткʹаре прокуротура дәwләте бу. Чахе Аксамай һатә бал Елизабете сәва кʹьнщ бьдә дьруне, әwе дәрһәqа жийине у һʹале мьрийа гәләк пьрс да wе. Елизабете рʹастә-рʹаст жь Кʹьтеба Пироз щаба wе да. Паши ве йәке Аксамай бу мьзгинвана хирәт.

Wи wәʹдәйи, Николай Чимпоеш жь Молдовайе, ча бәрпьрсийаре мьһале һатә кʹьфшкьрьне у әwи wәкә 30 сала ве кʹьфшкьрьнеда хьзмәт кьр. Ле Николай нә кö тʹәне тʹәсәлийа щьвате кьр, ле öса жи рʹебәри дькьр, wәки әʹдәбйәт бенә копикьрьне у бәлакьрьне. Әw шьхöле wи кʹәтә чʹәʹве мәрьвед дәwләте. Ләма жи Едуард Вартер ширәтәкә qәwи да Николай: «Чахе мәрьвед дәwләте гьлийа жь тә дәрхьн, рʹастә-рʹаст wанрʹа бежә wәки әм әʹдәбйәтед хwә жь офиса сәрәкә дьстиньн кö Бруклинеда йә. Чахе агенте КГБ тʹәви тә хәбәр дә, чʹәʹве wи бьньһерʹә. Тьштәки öса тʹöнә кö тö гәрәке бьтьрси» (Мәт. 10:19).

Зутьрәке паши ве хәбәрдане, гази Николай кьрьн офиса сәрәкә йа КГБ, кʹижан кö Кантеда бу. Әwи гьли кьр кö wедәре чь qәwьми: «Агент пьрси кö әм әʹдәбйәтед хwә жь кʹö тиньн. Мьн жи жерʹа гот wәки әм жь Бруклине дьстиньн. Әwи ньзаньбу чь щаба мьн бьдә. Ләма жи әwи мьн бәрʹда у тʹö щар ида гази мьн нәкьр». Әw бьраки мерхас региона мьнда, кö бакʹура Qиргизистанеда йә, фәсал бәлакьрьна мьзгинийе пешда дьбьр. Чахе рʹасти дәрһәqа Йаһоwа гьһиштә мала мьн сала 1981-да, жьна мьн Маирамбубу щара пешьн пеһʹәсийа.

ЖЬНА МЬН ДӘРБЕРʹА РʹАСТИ ТЕДӘРХЬСТ

Маирамбубу жь Нарине Региона Qиргизистане йә. Сала 1974-да мәһа Тʹәбахе, рʹожәке әw һатә мала хушка мьн, кʹидәре щара пешьн мьн ле дит. Әw дәрберʹа кʹәтә дьле мьн. Һәма ве рʹоже мә һәв станд.

Сала 1981 мәһа Чьләйе, чахе Маирамбубу пе отобусе чубу дькʹане, әwе әw хәбәрдан бьһистьбу, бәʹса кʹижани мьн дәстпекеда кьр. Жьна мьн хwәстьбу һе зедә пебьһʹәсә дәрһәqа ве йәке, ләма әwе наве wе жьньке у адреса wе пьрсибу. Әwе готьбу кö наве wе Апун ә, ле һәла һе һьнге жи салед 1981-1989 хоф бу, чьмки шьхöле Шәʹдед Йаһоwа qәдәхәкьри бу. Ләма Апун дәwса кö адреса хwә жерʹа бьгота, адреса мә жь жьна мьн хwәстьбу. Чахе жьна мьн вәгәрʹийа мал, әw гәләк ша бу.

Маирамбубу гот: «Әз тьштед öса баш пеһʹәсийам. Жьнькәке мьнрʹа гот wәки wәʹдәки öса wе бе кö мәрьв ида нәмьрьн. Һәла һе һʹәйwанед бәйани жи wе бехоф бьн». Ле бона мьн әw ча чʹирок бу. Мьн жерʹа гот: «Wәрә әм һивийа wе бьн у бьра мәрʹа һур бь һур гьли кә».

Апуне паши се мәһа тʹәсәлийа мә кьр. Паши ве йәке әм рʹасти чәнд хушкед Qиргиз һатьн, кʹижан кö жь мьләте Qиргиз Шәʹдед Йаһоwайи пешьн бун. Әwан хушка рʹастийед qимәт дәрһәqа Йаһоwа у qьрара wи бона инсанәте, мәрʹа гьли кьрьн. Wана бь сайа кʹьтеба «Жь Щьнәта Öндабуйи һʹәта Щьнәта Вәгәрʹанди» (From Paradisе Lost to Paradisе Rеgainеd)a, тʹәви мә һинбуна Кʹьтеба Пироз дәрбаз дькьрьн. У чьмки Токмокеда әв тʹәне кʹьтебәк бу, мә пе дәста хwәрʹа башqә ньвиси.

Тьштед пешьн кö мә бьһист әw пʹехәмбәртийа жь Дәстпебун 3:15 бу. Әw пʹехәмбәрти wе бе сери бь сайа Иса Мәсиһ, демәк Пʹадша Пʹадшатийа Хwәдеда. Әw әʹламәтийа фәрз һәр кәс гәрәке пебьһʹәсә! Ләма әм жи гәрәке әве әʹламәтийе бәла кьн (Мәт. 24:14). Зутьрәке рʹастийа Кʹьтеба Пироз дәстпекьр әʹмьре мә бьгöһезә.

ЩЬВИН У НЬХÖМАНДЬН WӘʹДЕ QӘДӘХӘКЬРИ

Бьраки мә Токмокеда мә тʹәглифи сәр дәʹwате кьр. Мьн жьна хwәва тедәрхьст кö Шәʹдед Йаһоwа щöдә дьбьн жь мәрьвед дьн. Ичʹкә сәр тʹәхтә тʹöнә бу, у әw дәʹwат гәләк тʹәрбәти дәрбаз бу. Әw мина һʹәму дәʹwата нибу, чьмки сәр дәʹwатед дьн кʹидәре кö әм дьчун, меван гәләк ичʹкә вәдьхwарьн, хwә нәлайиq дьданә кʹьфше у гьлийед хьраб дьготьн.

Әм чәнд щара чунә щьвата Токмокеда. Чахе һәwа хwәш бу, щьват мешәда дәрбаз дьбу. Хушк-бьра заньбун кö полис пәй мә дькʹәвә, ләма бьрак ча нобәдар данә сәкьнандьне. Ле зьвьстане әм малада тʹоп дьбун. Чәнд щара полис һатьнә мале кʹидәре щьват дәрбаз дьбу, у дәʹwа дькьрьн, wәки әм бежьн әм чьрʹа тʹоп бунә у чь дькьн. Чахе Маирамбубу у әз һатьнә ньхöмандьне мәһа Тирмәһе сала 1982, дь Чʹәма Чуда, әм фәсал бун (Мәт. 10:16). Чәнд бьра һатьн у мешәда тʹоп бун. Паше мә кʹьлама Пʹадшатийе стьра у гöһ да готара ньхöмандьне.

МӘ МӘЩАЛ ДАНӘ ХӘБАТЕ СӘВА ХЬЗМӘТИЙЕДА ҺЕ ЗЕДӘ БЬКЬН

Сала 1987-да бьра мьнрʹа готьн, wәки һәрʹьм шәһәре Баликчи тʹәсәлийа мәрьвәки бькьм. Жь мала мә пе трене әw рʹийа 4 сьһʹәта бу. Әм чәнд щара чунә шәһәре Баликчи сәва хьзмәт кьн, у мә тедәрхьст кö wедәре мәрьв рʹьнд гöһ дьдьн мьзгинийе. Әwе йәке мәрʹа мәщал вәкьр сәва хьзмәтийеда һе зедә бькьн.

Әз у Маирамбубу гәләк щар дьчунә Баликчийе. Гәләк щар әм шәми-ләʹда wедәре дьман, дьчунә хьзмәтийе у щьват дәрбаз дькьрьн. Мәрьва һе зедә у зедә әʹдәбйәтед мә дьхwәстьн. Мә жь Токмоке әʹдәбйәт дькьрә мешоке картола у дьбьрә Баликчийе. Дö мешок анщах мәһәке тʹера мә дькьр, чьмки гәләк мәрьва әʹдәбйәтед мә һьлдьдан. Һәла һе тренеда жи чахе әм дьчунә Баликчийе у вәдьгәрʹийан, мә мәрьварʹа мьзгини гьли дькьр.

Сала 1995-да, демәк һʹәйшт сал шунда чахе әм щара пешьн һатьн wи шәһәри, щьват саз бу. Нава wан салада чахе әм жь Токмоке дьчунә Баликчийе, гәләк пʹәре мә хәрщ дьбу. Пʹәре мә гәләк тʹöнә бу, ле әм ча дьчунә wедәре? Бьраки мә тʹьме пʹәрә дьда мә сәва әм хәрщед хwә дадьн. Йаһоwа дит кö әм бь дьл дьхwазьн һе зедә бона wи бькьн, у әwи «шьвакәйед әʹзманан» мәрʹа вәкьр (Малх. 3:10). Бешьк, һәр тьшт жь дәсте Йаһоwа те!

МАЛБӘТЕДА У ХЬЗМӘТИЙЕДА ХИРӘТ ЬН

Сала 1992-да, әз һатьмә кʹьфшкьрьне ча рʹуспи, у wәлатда жь мьләте Qиргиз әз бум рʹуспийе пешьн. Щьвата мәда Токмокеда, мәщалед тʹәзә вәбун бона хьзмәтийе. Мә тʹәви гәләк студента һинбуна Кʹьтеба Пироз дәрбаз дькьр, йед кö Qиргиз бун. Йәк жь wан щаһьла ньһа хьзмәт дькә Комитейа Филиаледа, у дöдед дьн жи ча пешәнгед мәхсус. Мә öса жи нет хwәрʹа дани, wәки аликʹарийе бьдьнә хушк-бьред щьвата хwәда. Дәстпека салед 1990-и, әʹдәбйәт у щьватед мә сәр зьмане Урьси бун. Ле гәләк хушк-бьра щьватеда сәр зьмане хwәйә де хәбәр дьдан, демәк сәр зьмане Qиргизи. Ләма жи щьватеда сәр зьмане Qиргизи мьн wәлдьгәрʹанд, у әwе йәке али wан кьр кö рʹастийе һе һеса у кʹур фәʹм кьн.

Мьн у Маирамбубуйе öса жи гәләк зарʹед хwә мәзьн дькьрьн. Мә wана тʹәви хwә дьбьр хьзмәтийе у щьвате. Qиза мә Гöлзаира һьнге 12 сали бу, гәләк һʹьз дькьр кʹучʹе тʹәви мәрьва хәбәр дә у дәрһәqа Кʹьтеба Пироз wанрʹа гьли кә. Зарʹед мә гәләк һʹьз дькьрьн рʹезед жь Кʹьтеба Пироз әзбәри һин бьн. Wи щурʹәйи зарʹед мә, у нәбийед мә, щьватеда гәләк хирәт бун. Иро жь нәһ зарʹед мә у 11 нәбийед мә, 16 хьзмәт дькьн Йаһоwарʹа йан жи тʹәви де-баве хwә тенә щьвате.

ГÖҺАСТЬНЕД МӘЗЬН

Хушк-бьра йед кö салед 1950-1959 шьхöле Йаһоwа дәстпекьрьн wәлате мәда, wе зәндәгьрти буна чахе бьдитана кö чьqас гöһастьнед баш бун кʹижан кö мә дит. Мәсәлә, жь сала 1990 әм ида аза мьзгинийе бәла дькьн у бь кʹомед мәзьн тʹәвайи тʹоп дьбьн.

Сала 1991 әз жьна хwәва щара пешьн чунә сәр щьвата мәзьн кö Алма-Атайеда дәрбаз бу, әw шәһәр ньһа Алмати те навкьрьне (Qазахьстан). У сала 1993-да Qиргизистанеда щара пешьн щьвата мәзьн дәрбаз бу Бишкекеда, сәр стадиона бь наве Спартак. Хушк-бьред мә һʹәфтеки әв стадион тʹәмьз дькьрьн. Директоре ве стадионе öса әʹщебмайи ма, кö бона хәбьтандьна стадионе пʹәрә жи һьлнәда.

Сала 1994, әм гьһиштьнә диса пешдачуйинәкә мәзьн. Ве сале щара пешьн әʹдәбйәтед мә сәр зьмане Qиргизи һатьнә нәшьркьрьне. Иро әʹдәбйәтед мә тʹьме тенә wәлгәрʹандьне сәр зьмане Qиргизи, у әw кʹома wәлгәрʹа хьзмәт дькә филиала Бишкекеда. Сала 1998 шьхöле Шәʹдед Йаһоwа Qиргизистанеда бь qануни һатә әʹйанкьрьне. Бәле, тʹәшкиләт гәләк пешда чу у ньһа wьра ида 5 000 мьзгинван һәнә. Иро бь тʹәмами 83 щьват һәнә, у 25 кʹом сәр зьмане Чинайи, Инглизи, Qиргизи, Урьси, Кәрʹ-Лалайа Урьси, Тʹьркʹи, Уйгури, у Узбеки. Әw һʹәму хушк-бьра жь щурʹә-щурʹә мьләта, бь йәкти Йаһоwарʹа хьзмәт дькьн. Бәле, wан һʹәму гöһастьнада дәсте Йаһоwа те кʹьфше.

Йаһоwа öса жи жийина мьн гöһаст. Әз мәзьн бумә малбәтәкә нәдәwләтида у мьн мәкʹтәбеда тʹәне 5 кʹом хьлаз кьр. Йәкә Йаһоwа әз дамә хәбате ча рʹуспи, у öса жи сәва әз мәрьвед хwәнди жи Кʹьтеба Пироз һин кьм. Рʹасти жи öса нә, Йаһоwа һәр тьшти öса дькә, кö мә нә жи дайә бәр чʹәʹве хwә. Мьн чь кö әʹмьре хwәда дитийә, мьн һелан дькә wәки бәрдәwам кьм бь амьни дәрһәqа Йаһоwа шәʹдәтийе бьдьм, кʹижан кö «һәр тьшт жь дәсте» wи те (Мәт. 19:26).