Йаһоwарʹа, Хwәдейе Азайерʹа Хьзмәт Бькьн

1, 2. а) Чьрʹа wәʹде Паwлосе шандида щьмәʹте дәрһәqа азайе у хöламтийе хәбәр дьда? б) Паwлос сәр кʹе гот кö әw Канийа азайе йә?

ЩЬМӘʹТА Империйа Рʹомеда, кʹидәре кö Мәсиһи жи дьжитьн, гәләк qöрʹә дьбун чьмки wәлате wанда qанун, система һʹакьмтийе, у азайи һәбу. Ле йәкә һʹәчʹи зәʹф бь сайа хöлама бу кö wәлат öса нав у дәнг бу. Wәʹдәке, wедәре жь бьнәлийа wәкә 30 сәләф хöлам бун. Фәʹмдари йә, wәки щьмәʹта wедәре у öса жи Мәсиһи, гәләк щар дәрһәqа азайе у хöламтийе хәбәр дьдан.

² Паwлос нәʹмед хwәда гәләк щар бәʹса азайе дькьр. Ле нета wи әw нибу кö бькʹәвә нав политикайе чаwа мәрьвед дьн, йед кö дьхwәстьн проблемед дәwләтеда сафи кьн у һʹале дьнйайе баш кьн. Дәwсе, Паwлос у Мәсиһийед дьн аликʹари дьданә мәрьва сәва мьзгинийа дәрһәqа Пʹадшатийа Хwәде у qимәте qöрбана Иса Мәсиһ пебьһʹәсьн. Паwлос дина хушк-бьра да сәр Канийа азайа рʹаст. Әwи нәʹма хwәйә дöдада, Мәсиһийед Корьнтʹирʹа ньвиси: «Хöдан Рʹöһʹ ә у рʹöһʹе Хöдан ль кʹö дәре бә, ль wе дәре жи азайи һәйә» (2 Корн. 3:17).

3, 4. а) Пешийа рʹеза жь 2 Корьнтʹи 3:17, Паwлос бәʹса чь кьр? б) Әм гәрәке чь бькьн сәва азайа кö Йаһоwа дьдә, бьстиньн?

³ Паwлос нәʹма хwәда Корьнтʹийарʹа дәрһәqа Муса гьли кьр. Әwи гот кö чахе Муса паши хәбәрдана тʹәви мәләке Йаһоwа жь чʹийайе Синайе бәржер бу, у незики щьмәʹте дьбу, әwана тьрсийан, чьмки рʹуйе wи дьчʹурьси у әwи «хели авит ль сәр рʹуйе хwә» (Дәркʹ. 34:29, 30, 33; 2 Корн. 3:7, 13). Ле Паwлос шьровәкьр кö «гава йәк ль Хöдан вәгәрʹә, һьнге әw хели те һьлдане» (2 Корн. 3:16). Гәло бь wан гьлийа Паwлос чь дьхwәст бьгота?

⁴ Чаwа мә готара дьнда дит, азайа Йаһоwа, Әʹфьрандаре һәр тьшти, бесинор ә. Демәк, фәʹмдари йә кö «рʹöһʹе Хöдан ль кʹö дәре бә», wе дәре азайи һәйә. Ле сәва кö әве азайе бьстиньн, әм гәрәке вәгәрʹьн бал Йаһоwа, демәк һәләqәтийа мә тʹәви wи гәрәке незик бә. Исраели йед кö бәрʹийеда бун, бь ньһерʹандьна хwә сәр тьшта дьньһерʹин, нә кö пе ньһерʹандьна Йаһоwа. Бь симболик дьле wан у һʹьше wан дадайи бу у һʹьшк бьбу, чьмки wана дьхwәст азайа хwә кö тʹәзәда сьтандьбун, бьдьнә хәбате сәва хwәстьнед хwә биньн сери (Ибрн. 3:8-10).

5. а) Рʹöһʹе Йаһоwа кʹижан щурʹә азайе дьдә? б) Әм жь кʹö заньн кö мәрьве гьрти йан хöлам жи, дькарә азайа жь Йаһоwа бьстинә? с) Әме ве готареда кʹижан пьрса шеwьр кьн?

⁵ Азайа кö жь рʹöһʹе Йаһоwа йә, һе бьльнд ә, нә кö азабуна жь хöламтийа физики. Әw рʹöһʹ азайикә öса тинә кö мәрьв тʹö щар нькарә бинә. Әw жь хöламтийа гöнә, мьрьне, у öса жи жь хöламтийа һʹәбандьна qәлп у кьред wе аза дькә (Рʹом. 6:23; 8:2). Рʹасти жи әw азайикә чьqас баш ә! Мәрьв дькарә ве азайе бьстинә һәла һе жи һәрге әw гьрти йә йан жи хöлам ә (Дәстп. 39:20-23). Сәрһатийед хушка Ненси Йуен у бьре Һаролд Кинг, ве йәке рʹьнд дьдьнә кʹьфше. Әwана нава гәләк салада бона баwәрийа хwә кәледа бун. Һун дькарьн сәрһатийа wан бьвиньн JW Library-да (Бьньһерʹьн ИНТЕРВИУ У СӘРҺАТИ > СӘБЬРКЬРЬН ТӘНГАСИЙАДА). Wәрә әм ньһа шеwьр кьн wан дö пьрса: Ча әм дькарьн нишан кьн, wәки әм азайа хwә qимәт дькьн? У әм чь дькарьн бькьн сәва әве азайа хwә бь билани бьдьнә хәбате?

QИМӘТ КЬН АЗАЙА КÖ ХWӘДЕ ДЬДӘ

6. Исраелийа ча нишан кьрьн wәки нәшекьрандьн азайа кö Йаһоwа дабу wан?

⁶ Чахе кәсәк мәрʹа пʹешкʹешәкә бьһа дьдә, әм дьшекьриньн у жь wи гәләк рʹази дьбьн. Ле Исраелийа азайа хwә qимәт нәкьрьн чахе Йаһоwа wана жь хöламтийа Мьсьре аза кьр. Чахе әwана аза бун, паши чәнд мәһа, wана бира хwарьна Мьсьре дькьрьн, у сәр хwарьна кö Йаһоwа дьда wан, дькьрьнә чʹурʹә-чʹур. Wана һәла һе жи дьхwәстьн диса вәгәрʹьнә Мьсьре. Бьдьнә һʹәсабе хwә, бона wан «хийар, зәвәш, пивазок, пиваз у сир» дьһа фәрз бу, нә кö азайи кö Хwәдейе рʹаст, Йаһоwа да wан. Ләма жи әʹщебмайи нинә кö һьнге һерса Йаһоwа рʹабу сәр щьмәʹта wи (Жьмар 11:5, 6, 10; 14:3, 4). Әw дәрсәкә гәләк фәрз ә бона мә!

7. Паwлос ча хwәха ширәт дьда хәбате кʹижан кö 2 Корьнтʹи 6:1-да әwи ньвисийә, у әм жи ча дькарьн әве ширәте бьдьнә хәбате?

⁷ Паwлосе шанди һʹәму Мәсиһи ширәт кьрьн, wәки бьшекьриньн ве азайе кö Йаһоwа дьдә бь сайа Кöрʹе хwә Иса Мәсиһ. (Бьхунә 2 Корьнтʹи 6:1.) Биньн бира хwә кö Паwлос гәләк дьлтәнг дьбу, чьмки мәрьвәки гöнәкʹар бу у хöламе гöнә у мьрьне бу. Ле әwи гот: «Шькьр жь Хwәдерʹа, бь сайа Хöдане мә Иса Мәсиһ!» Чьрʹа Паwлос әw гьли гот? Әwи шьровәкьр: «Чьмки qануна рʹöһʹе кö жийине дьдә, бь сайа Мәсиһ Иса әз жь qануна гöна у мьрьне хьлаз кьрьм» (Рʹом. 7:24, 25; 8:2). Бәле, әм жи гәрәке чʹәʹв бьдьнә Паwлос, у бьшекьриньн ве йәке кö Йаһоwа мә жь хöламтийа гöнә у мьрьне аза кьр. Бь сайа qöрбана Иса, әм дькарьн бь исафа тʹәмьз Хwәдерʹа хьзмәт кьн у шабуне жь ве йәке бьстиньн (Зәб. 40:8).

8, 9. а) Пәтрус чь ширәт да дәрһәqа азайе? б) Кʹижан хоф иро һәйә?

⁸ Бәле, әм гәрәке әве азайа жь Хwәде qимәт кьн. Ле öса жи фәрз ә әм бир нәкьн, wәки әве азайе рʹаст бьдьнә хәбате. Пәтрусе шанди ширәтәкә фәрз да Мәсиһийа, wәки азайа хwә нәдьнә хәбате сәва хwәстьнед хwәйә нәрʹаст биньн сери у хwә һәq дәрхьн бона кьред хwәйи нәрʹаст. (Бьхунә 1 Пәтрус 2:16.) Әв ширәта Пәтрус тинә бира мә кö бәрʹийеда чь qәwьми тʹәви Исраелийа, у әw сәрһатийа wан бона мә дәрсәкә фәрз ә. Шәйтʹан у дьнйа wи мәрьва һелан дькьн кö пәй хwарьн-вәхwарьне, кʹьнща, һесабуне, у wәʹдәдәрбазкьрьне у диса тьштед дьн кʹәвьн. Әwед кö реклама дькьн, мәрьвед бәрбьчʹәʹв дьдьнә хәбате, сәва мә һелан кьн wан тьшта бькʹьрʹьн, кʹижан кö бь рʹасти мәрʹа нәлазьм ьн. Мәрьв гәләк һеса дькарә бькʹәвә wан тʹәлька у азайа хwә нәрʹаст бьдә хәбате.

⁹ Ширәта Пәтрус öса жи әм дькарьн бьдьнә хәбате сафикьрьнед шәхсида кö әм әʹмьре хwәда дькьн, мәсәлә бона хwәндьна бьльнд, хәбате у кариере. Бәʹса хәбәре, щаһьл иро тенә һеланкьрьне wәки һәр тьшти бькьн сәва университета башда хwәндьна бьльнд бьстиньн, чьмки әw рʹе вәдькә кö хәбата баш бьстиньн у гәләк пʹәра qазанщ кьн. Һʹәсаба нишани wан щаһьла дькьн, wәки йед кö хwәндьна бьльнд дьстиньн дьһа зәʹф пʹәра qазанщ дькьн у пешдачуйи нә, нә кö әwед кö тʹәне мәкʹтәбе хьлаз дькьн. Чахе щаһьл гәрәке wан бьжартьна бькьн кʹижан кö дькарьн сәр әʹмьре wан һʹöкöм бьн, wанрʹа хwәндьна бьльнд дькарә бе кʹьфше ча нетәкә гәләк баш. Ле гәло һьнге щаһьл у де-бавед wан гәрәке чь бир нәкьн?

10. Әм чь гәрәке бир нәкьн чахе әʹмьре хwәда бьжартьнед шәхси дькьн?

¹⁰ Һьнәк дьфькьрьн, кö әw бьжартьнед шәхси нә бәʹса кʹижана мә жоре кьр, у һәрге исафа wан дьһелә, азайа wан һәйә чь дьхwазьн ве бьжберьн. Дьбәкә әwана әв гьлийед Паwлос дьбежьн: «Чьма гәрәке азайийа мьн бона . . . исафа йәки майин бе ломәкʹаркьрьне?» (1 Корн. 10:29). Әв рʹаст ә кö азайа мә һәйә бьжартьнед шәхси бькьн мәсәлә, бона хwәндьна бьльнд у хәбате. Ле әм гәрәке öса жи бир нәкьн, wәки азайа мә бь синор ә у һʹәму сафикьрьнед мә сәр әʹмьре мә һʹöкöм дьбьн. Әw йәк Паwлос рʹьнд да кʹьфше чахе гот: «‹Һәр тьшт әʹдәт ә›, бәле, ле һәр тьшт нә кʹар ә. ‹Һәр тьшт әʹдәт ә›, ле һәр тьшт ава накә» (1 Корн. 10:23). Әв рʹез рʹьнд нишан дькә wәки йа лапә фәрз хwәстьнед мә ниньн чахе әм әʹмьре хwәда бьжартьна дькьн, чьмки һәнә тьштед һе фәрз кö әм гәрәке һьлдьнә һʹәсабе хwә.

ХЬЗМӘТИЙА ЙАҺОWАДА АЗАЙА ХWӘ БЬ БИЛАНИ БЬДЬНӘ ХӘБАТЕ

11. Нета Йаһоwа чь бу чахе әwи әм аза кьрьн?

¹¹ Чахе Пәтрус гот wәки азайа хwә хьрабийеда нәдьнә хәбате, паше әwи шьровәкьр кö чаwа азайа хwә рʹаст бьдьнә хәбате. Әwи гот кö әм гәрәке азайа хwә бьдьнә хәбате «чаwа хöламед Хwәде». Чахе Йаһоwа бь сайа Иса мә жь хöламтийа гöнә у мьрьне аза кьр, нета wи әw бу, кö паше әм ида әʹмьре хwә тʹәсмили Wи кьн, демәк бьжин «чаwа хöламед Хwәде».

12. Жь Нöһ у малбәта wи әм чь дькарьн һин бьн?

¹² Йа лапә баш кö чаwа әм азайа хwә дькарьн бьдьнә хәбате әw ә, һәрге әм һʹьш-аqьле хwә бь тʹәмами дайньн сәр нетед рʹöһʹани, демәк сәр хьзмәтийе. Wи щурʹәйи әме нәбьнә хöламед хwәстьнед нәрʹаст у нәкʹәвьнә пәй нетед ве дьнйайе (Галт. 5:16). Дина хwә бьдьнә мәсәла Нöһ у малбәта wи. Әwана дьнйакә гәләк зöлм у хьрабда дьжитьн, ле wана тʹö щар чʹәʹв нәдьданә мәрьвед дор бәре хwә. Чьрʹа? Чьмки әwана бь тʹәмами нав шьхöле Йаһоwада бун кö әwи wанрʹа дабу, демәк гәми ава дькьрьн, хwарьн тʹоп дькьрьн һьн бона хwә һьн жи бона һʹәйwана, у дәрһәqа Селаве мәрьварʹа әʹлам дькьрьн. «Нöһ һәр тьшт кьр, Хwәде чаwа тʹәми дабу wи, әwи öса жи кьр» (Дәстп. 6:22). Ле ахьрийа ве йәке чь бу? Нöһ малбәта хwәва жь кʹöтакьрьна wе дьнйайе хьлаз бун (Ибрн. 11:7).

13. Йаһоwа чь тʹәми дайә мә?

¹³ Ле иро Йаһоwа чь тʹәмийе дьдә мә? Әм шагьртед Иса нә у тʹәмийа Хwәде рʹьнд заньн, wәки әм гәрәке мьзгинийе бәла кьн. (Бьхунә Луqа 4:18, 19.) Иро Шәйтʹан чʹәʹве һʹәчʹи зәʹф мәрьва кор кьрийә. Әwана нә жи тедәрдьхьн wәки хöламед религийа qәлп, һәбуке, у политике нә (2 Корн. 4:4). Бона мә qәдьрәки гәләк мәзьн ә, кö мина Иса али мәрьва бькьн сәва әwана дәрһәqа Йаһоwа пебьһʹәсьн у жерʹа хьзмәт кьн (Мәт. 28:19, 20). Әw шьхöләкә нәһеса йә, у гәләк чәтьнайи жи һәнә. Һьнә щийада, мәрьв дьбьнә бетʹалаш у һәла һе жи гәләк һерс. Ле һәр кәс жь мә гәрәке пьрсәкә öса бьдә хwә: «Гәло әз дькарьм азайа хwә öса бьдьмә хәбате сәва һе зедә Йаһоwарʹа хьзмәт кьм?».

14, 15. Иро щьмәʹта Хwәде ча дьньһерʹә сәр бәлакьрьна мьзгинийе? (Бьньһерʹә шькле әʹwльн.)

¹⁴ Әм qәwи дьбьн чахе дьвиньн кö гәләк хьзмәткʹаред Хwәде тедәрдьхьн, wәки ахьри гәләк незик ә у әʹмьре хwә сьвьк дькьн сәва хьзмәтийа һәртʹьм дәстпекьн (1 Корн. 9:19, 23). Һьнәк мьһала хwәда хьзмәт дькьн, һьнәк жи дәрбази щики дьн дьбьн кʹидәре һʹәwщәти һәйә. Нава пенщ салед пашwәхтийеда, һʹәсаба нишан кьрьн кö wәкә 250 000 пешәнг зедә бунә у иро һәжмара пешәнгед һәртʹьм буйә 1 100 000 зедәтьр. Рʹасти жи чьqас баш ә кö гәләк хушк-бьра азайа хwә бь билани дьдьнә хәбате, у Йаһоwарʹа хьзмәт дькьн (Зәб. 110:3).

¹⁵ Ле гәло чь али wан хушк-бьра кьр, кö азайа хwә бь билани данә хәбате? Дина хwә бьдьнә мәсәла Щон у Щуди, йед кö ида 30 сал ә щурʹә-щурʹә wәлатада хьзмәт дькьн. Wана гьли кьр кö чахе сала 1977-да Мәкʹтәба сәва Пешәнга дәстпебу, пешәнг дьһатьнә һеланкьрьне кö дәрбази wан щийа бьн кʹидәре һʹәwщәти һәйә. Щон дьбежә кö сәва әве нете биньн сери, әwи гәләк щар хәбата хwә гöһаст, сәва әʹмьре хwә һеса кә. Ахьрийеда чахе әwана дәрбази wәлате хәриб бун, wана тедәрхьст кö дöа у итʹбарийа һьндава Йаһоwа, али wан кьр кö wана чәтьнайада тәйах кьр, мәсәлә зьмане тʹәзә һин бун, һини әʹдәт у култура тʹәзә бун у öса жи климата чәтьнда тәйах кьрьн. Ле әwана чь дьбежьн дәрһәqа wан салед хьзмәтийа хwә? Щон дьбежә: «Мьн шьхöләкә лапә баш дькьр у мьн нә жи заньбу кö әзе шабунәкә öса бьстиньм. Йаһоwа бона мьн һе реали буйә, чаwа баве һʹьзкьри. Ньһа әз һе кʹур фәʹм дькьм гьлийед жь Аqуб 4:8: ‹Хwә ль Хwәде бьгьрьн, Хwәде жи wе хwә ль wә бьгьрә›. Мьн фәʹм кьр wәки мьн әw йәк дит чь кö дьгәрʹийам, демәк нета әʹмьре мьн һәйә».

16. Чаwа бь һʹәзара хушк-бьра азайа хwә бь билани дьдьнә хәбате?

¹⁶ Мина Щон у Щуди, хушк-бьред дьн жи чахе дәрәща wан дьһелә, сәр wәʹдәки кьн хьзмәт дькьн ча хьзмәткʹаред һәртʹьм. Нав тʹәмамийа дьнйайе гәләк хушк-бьра бь рʹәзәдьли хьзмәт дькьн шьхöле авакьрьнеда. Бәʹса хәбәре, чахе Wорwикеда (Нийу Йорк), филиала сәрәкә дьһатә авакьрьне, wәкә 27 000 хушк-бьра бь рʹәзәдьли һатьн аликʹарийе бьдьн. Һьнәк һатьн сәр чәнд һʹәфтийа, чәнд мәһа, һьнәк сәр саләке йан жи һе зедә. Гәләк жь wана гәлә тьшт жь хwә кем кьрьн, wәки wедәре хьзмәт кьн. Әw хушк-бьра рʹасти жи мәсәлед гәләк баш ьн, чьмки әwана азайа хwә дьдьнә хәбате сәва Йаһоwа, кö Хwәдейе азайе йә, һöрмәт у рʹумәт кьн.

17. Һәрге әм азайа хwә бь билани бьдьнә хәбате, әме чь кʹәрәма бьстиньн?

¹⁷ Әм гәләк дьшекьриньн ве йәке, кö әм Йаһоwа нас дькьн у азайа мә һәйә кʹижан кö хьзмәти тинә. Wәрә әм пе бьжартьн у сафикьрьнед хwә нишан кьн, wәки әм әве азайе гәләк qимәт дькьн. Дәwса кö әwе азайе алийе хьрабда бьдьнә хәбате, wәрә әм һәр тьшти бькьн, сәва һе зедә Йаһоwарʹа хьзмәт кьн. Һәрге әм öса бькьн, әме кʹәрәмед Йаһоwа бьстиньн кʹижан кö соз дайә: «Әʹфьрине хwәха жи жь wе хöламтийа пʹучʹ аза бьн у тʹәви азайи у рʹумәта зарʹед Хwәде бьн» (Рʹом. 8:21).