Чаwа Әм Дькарьн Азайа Рʹаст Бьстиньн?

1, 2. а) Мәрьв иро чь дькьн сәва азайе бьстиньн? б) Ахьрийа кьред wан чь йә?

ИРО нав тʹәмамийа дьнйайеда мәрьв дәрһәqа изьне у азайе хәбәр дьдьн. Һьнәк дьхwазьн аза бьн жь зорбәтийе, жь кʹәсибийе у жь фьрqийа ортʹа мәрьва. Һьнәк жи дьхwазьн wәки изьна wан һәбә аза гьлийед хwә бежьн, хwәха бьжберьн чь кö дьхwазьн у хwә сәри хwә бьн. Бәле, һʹәму щийада мәрьв дьхwазьн аза бьжин.

² Ле сәва кö азайа öса бьстиньн, мәрьв щурʹә-щурʹә тьшта дькьн. Мәсәлә, әwана протеста дькьн, шәрʹ-дәʹwа пешда тиньн у һәла һе револусийа жи дькьн. Ле гәло әwана бь ве йәке дьгьһижьнә мәрәма хwә? На, йазьх әwана гәләк щар бона ве йәке кöл-дәрда дькʹьшиньн у һәла һе жи әʹмьре хwә öнда дькьн. Әw йәк рʹастийа гьлийед Сьлеман Пʹадша избат дькә: «Сәрwерийа зьламәки, ль сәр йәки дьн, бь хәсара [зийана] wи йә» (Wаиз 8:9).

3. Әм ча дькарьн бәхтәwар бьн у ләзәте бьвиньн?

³ Аqуб шьровәкьр кö ча мәрьв дькарә бь рʹастийе бәхтәwар бә у ләзәте бьвинә. Әwи ньвиси: «Әwе кö чʹәʹве хwә жь qануна кʹамьлә кö аза дькә набьрʹә у нава wеда дьминә, . . . әw wан кьрьнед хwәда хwәзьли йә» (Аqуб 1:25). Йаһоwа кö хwәха әв qануна кʹамьл дайә, һе рʹьнд занә чь лазьм ә мәрьварʹа сәва бәхтәwар бьжин у әʹмьре хwәрʹа ша бьн. Әwи мер у жьна пешьнрʹа һәр тьшт, демәк азайи жи да, сәва әwана бәхтәwар бьжин.

КʹӘНГЕ АЗАЙА МӘРЬВА ЙА РʹАСТ ҺӘБУ?

4. Азайа Адәм у Һеwайе чь щурʹәйи бу? (Бьньһерʹә шькле әʹwльн.)

⁴ Чахе әм дö сәред пешьн жь кʹьтеба Дәстпебун дьхуньн, әм педьһʹәсьн азайа Адәм у Һеwайе чь щурʹәйи бу. Иро мәрьв һәма азайа wи щурʹәйи дьхwазьн, ле дәст wан накʹәвә. Кемасийа жьн у мере пешьн тʹö тьштида тʹöнә бу, нә тьрс нә жи зорбәти һәбу. Wана бона хwарьне, хәбате, нәхwәшийа у мьрьне, дәрд нәдькʹьшандьн (Дәстп. 1:27-29; 2:8, 9, 15). Ле гәло әв те һʹәсабе wәки Адәм у Һеwа бь тʹәмами аза бун, демәк азайа wан бесинор бу? Wәрә әм әве пьрсе шеwьр кьн.

5. Сәва мәрьв жь азайе кʹаре бьстинә, чь лазьм ә?

⁵ Иро гәләк мәрьв дьфькьрьн, wәки азайа рʹаст әw ә, кö мәрьв бькарьбә чь дьхwазә wе бькә у нәфькьрә әw йәк чь ахьрийе дькарә бинә. Әнсиклопедийакеда һатә шьровәкьрьне, wәки азайи «мәщал ә wәки бьжартьна бькьн у биньн сери» (Thе World Book Еncyclopеdia). Ле паши wан гьлийа wедәре те готьне, кö щьмәʹт һьнге аза йә, чахе дәwләт синора датинә бь щурʹе рʹаст, лазьм у аqьлайи. Әw те һʹәсабе кö лазьм ә һьнә синор һәбьн, сәва һәр мәрьв жь азайе кʹаре бьстинә. Ле ньһа пьрс пешда те: Изьна кʹе һәйә сафи кә кö кʹижан синор рʹаст, лазьм, у аqьлайи нә?

6. а) Чьрʹа тʹәне азайа Йаһоwа бесинор ә? б) Азайа мәрьва чь щурʹә йә, у чьрʹа?

⁶ Гәләк фәрз ә әм бир нәкьн wәки тʹәне азайа Йаһоwа Хwәде бесинор ә. Чьрʹа? Чьмки әw ә Әʹфьрандаре һәр тьшти у Сәрwере һьмзор (1 Тимтʹ. 1:17; Әʹйан. 4:11). Даwьд Пʹадша бь гәләк гьлийед бәдәw шьровәкьр кö тʹәне Йаһоwа щийе һәри бьльнд дьгьрә. (Бьхунә 1 Дирок 29:11, 12.) Рʹаст ә азайа һʹәму әʹфьринед сәр әʹзмана у сәр әʹрде жи һәйә, ле йәкә азайа wан синоркьри йә. Әм гәрәке рʹьнд фәʹм кьн wәки тʹәне һʹöкöм у изьна Йаһоwа Хwәде һәйә, кö сафи кә кʹижан синор рʹаст, лазьм, у аqьлайи нә. Бь рʹасти Йаһоwа жь дәстпека әʹфьрандьна мәрьва әв синор данин.

7. Әм кʹижан тьшта пе инстинкте дькьн у ләзәте дьстиньн?

⁷ Азайа Адәм у Һеwайе һәбу, ле йәкә әw азайи бь синора бу. Һьнә синор тʹәбийәти бун, демәк һьнә тьшт wана бь инстинкте дькьр. Бәʹса хәбәре, әwана һәрдö жи заньбун, wәки сәва бьжин лазьм ә бина хwә бькʹьшиньн, бьхwьн, рʹазен у диса тьштед дьн. Ле гәло жь бо ван тьшта азайа wан öнда дьбу? На, Йаһоwа заньбу кö әwана wе жь wан тьшта шабун у ләзәте бьвиньн (Зәб. 104:14, 15; Wаиз 3:12, 13). Рʹасти жи öса нә, чахе мәсәлә әм һәwа тʹәмьз дькʹьшиньн, хwарьна дьле хwә дьхwьн, йан жи чахе хәwа хwә дьстиньн у һʹьшйар дьбьн, әм ләзәте дьвиньн. Әw тьшт мәрʹа баргьран ниньн у әʹмьре мә чәтьн накьн. Бешьк, Адәм у Һеwайе жи әw йәк заньбун.

8. Хwәде кʹижан тʹәми да жьн у мере пешьн, у нета Хwәде чь бу?

⁸ Йаһоwа тʹәми да Адәм у Һеwайе, wәки әʹрде тʹьжә кьн у хwәйитийе ле бькьн (Дәстп. 1:28). Ле гәло әве тʹәмийе азайа wан öнда дькьр? Тʹö щар на! Әw тʹәми мәщал да wан кö әʹрде бькьнә щьнәт, сәва мәрьв һʹәта-һʹәтайе бьжин. Әw йәк qьрара Хwәде бу (Иша. 45:18). Иро жи һәрге мәрьв сафи дькьн кö нәзәwьщьн, йан жи зарʹа нәйньн, бь ве йәке мьqабьли qьрара Хwәде начьн. Ле рʹаст ә зәwащ чәтьнайа жи тʹәви хwә тинә, йәкә мәрьв диса жи дьзәwьщьн у зарʹа тиньн (1 Корн. 7:36-38). Чьрʹа? Чьмки чахе һʹал баш ә, мәрьв жь ве йәке шабуне у ләзәте дьстиньн (Зәб. 127:3). Һәрге Адәм у Һеwайе гöһ бьдана Йаһоwа, әwана wе бькарьбуна зәwащ у малбәта хwәрʹа һʹәта-һʹәтайе шабуна.

ЧАWА АЗАЙА РʹАСТ ÖНДА БУ?

9. Чьрʹа тʹәмийа Хwәде кö Дәстпебун 2:17-да ньвисар ә, рʹаст, лазьм, у билани бу?

⁹ Йаһоwа тʹәмикә дьн жи дабу Адәм у Һеwайе, у öса жи шьровәкьрьбу кö wе чь бьqәwьмә һәрге әwана әве тʹәмийе нәйньн сери. Хwәде гот: «Жь дара qәнщи у хьраби наскьрьне нәхwә, чьмки wе рʹожа гава тö жь wе бьхwи, те әʹсә бьмьри» (Дәстп. 2:17). Гәло әв тʹәми qә тьштәкида нәрʹаст бу, йан жи нәлазьм у нәаqьлайи бу? Гәло бь ве йәке Адәм у Һеwайе азайа хwә öнда дькьрьн? На. Һәла һе гәләк зандаред Кʹьтеба Пироз жи дьбежьн кö әв тʹәми логики у билани бу. Мәсәлә, зандарәки гот: «Әв тʹәмийа Хwәде кö [Дәстпебун 2:16, 17-да] ньвисар ә, дьдә кʹьфше кö тʹәне Хwәде занә чь qәнщ ә . . . бона мәрьва, у чь хьраб ә . . . Сәва кö мәрьв ‹qәнщийерʹа› ша бьн, әwана гәрәке итʹбарийа хwә Хwәде биньн у гöрʹа wи бькьн. Һәрге әwана гöрʹа wи нәкьн, wе хwәха хwәрʹа сафи кьн чь qәнщ ә . . . у чь хьраб ә». Ле мәрьв нькарьн әве йәке öса бькьн, wәки һʹәму тьшт баш у рʹаст бә.

10. Чьрʹа әм гәрәке фәʹм кьн фьрqийа ортʹа азайа бьжартьне у изьна сафикьрьне кö чь qәнщ ә у чь хьраб ә?

¹⁰ Һьнә мәрьв чахе әве тʹәмийа Йаһоwа дьхуньн, дьбежьн wәки бь ве йәке азайи жь Адәм һатә стандьне у әwи ида нькарьбу чь дьхwәст бькьра. Ле әw мәрьв фәʹм накьн кö чь фьрqи һәйә ортʹа азайа бьжартьне у изьна кö сафи кьн чь qәнщ ә у чь хьраб ә. Азайа Адәм у Һеwайе һәбу, wәки бьжберьн гöрʹа Хwәде бькьн йан на. Ле йәкә тʹәне изьна Йаһоwа һәйә сафи кә чь рʹаст ә у чь хьраб ә. «Дара qәнщи у хьраби наскьрьне» кö бахче Әдәнеда бу, бь симболик әw йәк дьһатә һʹәсабе (Дәстп. 2:9). Әм гәрәке биньн сәр хwә wәки әм һәр гав ньзаньн кö бьжартьнед мә wе чь ахьрийе мәрʹа биньн, у нә жи заньн wе мәрʹа кʹаре биньн йан на. Ләма жи иро әм дьвиньн кö чахе мәрьв бь дьле сах бьжартьн йан жи сафикьрьна дькьн, ахьрийеда кöл-дәрда дькʹьшиньн (Мәтʹлк. 14:12). Бәле, синоред мәрьва һәйә у әw йәк гәләк фәрз ә. Йаһоwа бь сайа тʹәмийа хwә, бь һʹьзкьрьне Адәм у Һеwа һин кьр, кö әwана ча дькарьн азайа рʹаст бьдьнә хәбате. Ле гәло Адәм у Һеwайе чь сафи кьрьн?

11, 12. Чьрʹа бьжартьна Адәм у Һеwайе qәзийа wанрʹа ани? Мәсәле биньн.

¹¹ Сәд һʹәйф, Адәм у Һеwайе бьжартьн wәки гöрʹа Хwәде нәкьн. Шәйтʹан чахе соз да Һеwайе «чʹәʹвед wәйе вәбьн» у һуне «бьбьнә мина Хwәде», Һеwайе гöһ да готьна wи у әw гьли дьле wе хwәш һатьн (Дәстп. 3:5). Гәло бь ве йәке Адәм у Һеwайе һе зедә азайи стандьн? На. Бьжартьна wан әw йәк wанрʹа нәани, чь кö Шәйтʹан wанрʹа гот кö wе бьстиньн. Паше wана фәʹм кьр кö ахьрийа хьраб хwәрʹа анин, чьмки тʹәмийа Йаһоwа пьшт гöһе хwәва авитьн у хwә сәри хwә бун (Дәстп. 3:16-19). Чьрʹа? Чьмки Йаһоwа мәрьварʹа азайи нәда бона ве йәке кö хwәха сафи кьн чь qәнщ ә у чь хьраб ә. (Бьхунә Мәтʹәлок 20:24; Йерәмйа 10:23.)

¹² Сәрһатийа wан әм дькарьн бәрамбәри мәсәла тәйарван бькьн. Тәйарван сәва кö сах-сьламәт бьгьһижә щийе хwә, әw бь сайа һащәтед навигатори кö бона тәйаре нә, дьчә wи щийи кʹидәре лазьм ә. Әw öса жи хәбәр дьдә тʹәви wан мәрьва йед кö жерʹа рʹебәрийе дьдьн, мәсәлә сәва һәрʹә кʹидәре, кʹәнге бьфьрә у тәйар кʹидәре дайнә, wәки тәйаред дьн нәкʹәвә. Ле һәрге тәйарван гöһ нәдә wан рʹебәрийа, у ча дьхwазә öса бькә, әw дькарә бькʹәвә qәзийе. Адәм у Һеwа һәма öса бун, дьхwәстьн һʹәму тьшти хwә сәри хwә бькьн. Wана рʹебәрийа Хwәде пьшт гöһе хwәва авит. Ле ахьри чь бу? Wана qәзийа анин сәре хwә, демәк гöнә у мьрьн, ча хwәрʹа öса жи зöрʹәта хwәрʹа (Рʹом. 5:12). Wана дьхwәст хwә сәри хwә бьн, ле бь рʹастийе азайа хwәйә рʹаст öнда кьрьн.

ЧАWА АЗАЙА РʹАСТ QАЗАНЩ КЬН?

13, 14. Чаwа әм дькарьн азайа рʹаст бьстиньн?

¹³ Мәрьв дькарьн бьфькьрьн кö азайа wан чьqас зедә һәбә, һаqас баш ә. Ле бь рʹасти азайа бесинор әw ча шурәки туж ә. Рʹаст ә азайи гәләк кʹаре тинә, ле һәла бьдьнә бәр чʹәʹве хwә дьнйа wе чь һʹалида буйа, һәрге синор qә тʹöнәбуна. Диса ве Әнсиклопедийайеда бәʹса кʹижане мә жоре кьр, дәрһәqа ве йәке те готьне: «Qанунед һәр дәwләтәке гәләк чәтьн ьн, чьмки әw qанун гәрәке һьн мәрьва хwәй кьн, һьн жи азайа wан бь синор кьн». Рʹасти жи тʹьме һеса нинә wан qануна биньн сери. Мәрьва гәләк qанун дәрхьстьнә, у ләма гәләк qанунзан у һʹакьм һәнә, йед кö wан qануна шьровәдькьн у рʹебәрийе дьдьн кö ча wана бьдьнә хәбате.

¹⁴ Иса Мәсиһ шьровәкьр кö чаwа әм дькарьн азайа рʹаст бьстиньн. Әwи гот: «Һәгәр һун сәр һинкьрьна мьн бьминьн, һуне рʹаст шагьртед мьн бьн. Һуне рʹастийе нас кьн у рʹастийе wә аза кә» (Йуһʹн. 8:31, 32). Бь гьлийед Иса те кʹьфше, кö сәва азайа рʹаст бьстиньн, дö тьшт лазьм ә бькьн: Йа пешийе, рʹастийа кö Иса һин кьр, qәбул кьн, йа дöда, бьбьнә шагьртед wи. Һәрге әм öса бькьн, әме бь рʹасти аза бьн. Ле жь чь әме аза бьн? Иса шьровәкьр: «Кәсе кö гöна дькә, әw хöламе гöна йә. . . . Һәгәр Кöрʹе Хwәде wә аза кә, һуне рʹасти аза бьн» (Йуһʹн. 8:34, 36).

15. Чьрʹа азайа кö Иса соз да, мә «рʹасти аза» дькә?

¹⁵ Бәле, азайа кö Иса соз да шагьртед хwә, жь азайа кö иро мәрьв жь дәwләте дьстиньн, бьльндтьр у четьр ә. Чахе Иса гот, «Һәгәр Кöрʹе Хwәде wә аза кә, һуне рʹасти аза бьн», әwи дәрһәqа азабуна жь «гöна» дьгот, кʹижан кö мәрьва дькә хöлам. Гöнә мә һелан дькә нә кö тʹәне тьштәки хьраб бькьн, ле әw öса жи рʹе мә дьгьрә сәва нәкьн wан тьшта, чь кö әм заньн рʹаст ьн у чь дәсте мәва те. Бәле, әм хöламед гöнә нә, у ахьрийа ве йәке һәйә еш, кöл-дәрд у мьрьн (Рʹом. 6:23). Паwлосе шанди сәр хwә тʹәхмин дькьр кö хöламтийа гöнә ешәкә чьqас гьран тинә. (Бьхунә Рʹомайи 7:21-25.) Тʹәне чахе гöнә бь тʹәмами бе кʹöтакьрьне, һьнге әме бь рʹасти азайе бьстиньн, кʹижан кö бал Адәм у Һеwайе һәбу.

16. Чаwа әм дькарьн рʹасти аза бьн?

¹⁶ Чахе Иса гот кö «һәгәр һун сәр һинкьрьна мьн бьминьн», әwи бь wан гьлийа да кʹьфше wәки сәва әм жь гöнә аза бьн, гәрәке әм һьнә тьшта бькьн. Чаwа Мәсиһийед кö хwә тʹәсмили Хwәде кьрьнә, мә хwә инкʹар кьрийә у бьжартийә кö мина шагьртед Иса пе wан синора бьжин кʹижан кö әwи һин дькьр (Мәт. 16:24). Иса соз да кö әме аза бьн чахе бь тʹәмами кʹаре бьстиньн жь qöрбана wи.

17. а) Ча әм дькарьн бәхтәwар бьн у ләзәте бьвиньн? б) Готара дьнда әме дәрһәqа чь шеwьр кьн?

¹⁷ Һәрге әм гöрʹа һинкьрьнед Иса бькьн, әме бәхтәwар бьн у ләзәте бьвиньн. Әw йәк öса жи рʹе вәдькә бона ахьрийа баш, демәк әме бь тʹәмами жь гöнә у мьрьне аза бьн. (Бьхунә Рʹомайи 8:1, 2, 20, 21.) Готара дьнда әме шеwьр кьн кö чаwа әм дькарьн бь билани азайа хwә бьдьнә хәбате, сәва кö һöрмәте бьдьн Йаһоwа, демәк Хwәдейе азайа рʹаст.