Qимәт кьн Азайа Хwә

1, 2. а) Дәрһәqа азайа бьжартьне мәрьв чь дьфькьрьн? б) Әм жь Кʹьтеба пироз чь педьһʹәсьн дәрһәqа азайа бьжартьне?

ЖЬНЬКӘКЕ чахе тьштәк гәрәке сафи кьра, һәвале хwәрʹа гот: «Әз нахwазьм гәләк бьфькьрьм, дьһа һеса йә тö хwәха мьнрʹа бежи әз чь бькьм». Ве жьнькерʹа һе баш бу wәки кәсәки дьн жерʹа бежә әw чь бькә, нә кö хwәха сафи кә. Әwе нәхwәст пʹешкʹеша Хwәде, демәк азайа бьжартьне бьдә хәбате. Ле һун ча сафикьрьна дькьн? Wәрʹа дьһа дәст дьдә wәки хwәха сафикьрьна бькьн, йан кәсәки дьн дәwса wә бькә? Һун ча дьдьнә хәбате азайа бьжартьне?

² Нава qьрʹнада мәрьв һәврʹа дькʹәвьнә дәʹwе дәрһәqа азайа бьжартьне. Һьнәк дьбежьн wәки азайа бьжартьна мәрьва тʹöнә, чьмки һʹәму кьред мә Хwәде ида дәwса мә пешда сафи кьрийә. Һьнәк жи дьбежьн wәки азайа бьжартьне тʹәне әw ә, чахе һʹәму тьштида азайи у изьна тә һәйә. Ле жь Хәбәра Хwәде әм дькарьн рʹаст фәʹм кьн кö чь йә азайа бьжартьне. Гәло чьрʹа? Кʹьтеба Пироз мәрʹа зәлал әʹйан дькә, wәки Йаһоwа әм бь азайа бьжартьне әʹфьрандьнә. Демәк әwи фәрәсәт у азайи дайә мә, wәки әм хwәха бь һʹьш-аqьле хwә бьжартьнед рʹаст бькьн. (Бьхунә Йешу 24:15.) Кʹьтеба Пироз öса жи щаба ван пьрса дьдә: Ча әм гәрәке азайа хwә бьдьнә хәбате? Гәло азайа мә синоркьри йә? Ча азайа бьжартьна мә әʹйан дькә, кö әм Йаһоwа һʹьз дькьн? Әм ча дькарьн qәдьре сафикьрьна мәрьва бьгьрьн?

ӘМ ЧЬ ДЬКАРЬН ҺИН БЬН ЖЬ ЙАҺОWА У ИСА?

3. Йаһоwа ча азайа хwә дьдә хәбате, у ве йәкеда әм чь дькарьн һин бьн жь wи?

³ Азайа Йаһоwа бе синор ә, у әм гәләк тьшт дькарьн һин бьн кö әw ча әwе азайе дьдә хәбате. Мәсәлә, Йаһоwа мьләте Исраел бьжарт, wәки бьбә щьмәʹта wи, ча «мьлкʹе wи» (Qан. Дщр. 7:6-8). Әw бьжартьн Хwәде ньшкева нәкьр, ле мәʹни һәбу кö әwи wана бьжарт. Йаһоwа бь ве йәке созе хwә ани сери, кʹижан кö әwи досте хwә Бьраһимрʹа соз да (Дәстп. 22:15-18). Хенщи ве йәке, Йаһоwа азайа хwә тʹьме бь һʹьзкьрьне у рʹастийе дьдә хәбате. Әw йәк рʹьнд те кʹьфше ве йәкеда, кö Йаһоwа ча Исраели ширәт дькьрьн. Wана гәләк щар пьшта хwә дьданә wи, ле чахе wана бь дьле сах гöнед хwә дьданә рʹуйе хwә, Йаһоwа тʹьме һазьр бу диса жи һʹьзкьрьн у рʹәʹмтийе wанрʹа бьдә кʹьфше. Йаһоwа гот: «Әзе жь нәамьнийе wана qәнщ кьм. Әзе хwәха wана һʹьз бькьм» (Һос. 14:4, ДТʹ). Рʹасти жи чьqас мәсәләкә баш ә бона мә, кö Йаһоwа азайа хwә бона кʹара мәрьва дьдә хәбате.

4, 5. а) Кʹе бу йе пешьн кö жь Хwәде азайи станд? б) Кʹижан пьрса әм гәрәке бьдьнә хwә?

⁴ Чахе Йаһоwа мьлйакʹәт у мәрьв әʹфьранд ьн, жь һʹьзкьрьне әwи азайа бьжартьне да wан. Кәсе пешьн кö әw пʹешкʹеш станд, ньхöрийе wи Иса бу, йе кö бь «сурәте» Хwәде һатә әʹфьрандьне (Колс. 1:15). Ле гәло әwи ча азайа хwә дьда хәбате? Һәла һе пешийа һатьна сәр әʹрде, Иса сафи кьрьбу wәки Баве хwәрʹа амьн бьминә у тʹәви рʹабәрибуна Шәйтʹан нәбә йәк. Паше, чахе ида Иса сәр әʹрде бу, әw диса жи нәкʹәтә тʹәлькед Шәйтʹанда (Мәт. 4:10). Шәва пешийа мьрьна хwә, чахе Иса бь дьл Хwәдерʹа дöа дькьр, әwи дöада диса жи да кʹьфше, wәки дьхwазә qьрара Хwәде бинә сери. Әwи гот: «Баво, һәгәр әʹмьре тә йә, әве кʹасе жь мьн дур хә. Ле бьра хwәстьна тә бә, нә кö йа мьн» (Луqа 22:42). Wәрә әм чʹәʹв бьдьнә Иса у азайа хwә бьдьнә хәбате сәва Йаһоwа рʹумәт кьн у qьрара wи биньн сери. Ле ча әм дькарьн чʹәʹв бьдьнә Иса?

⁵ Әм жи һатьнә әʹфьрандьне бь сурәта Хwәде у һʹöнöред wи (Дәстп. 1:26). Ле һаqас азайа мә тʹöнә ча щәм Йаһоwа һәйә, чьмки синоред мә һәнә. Хәбәра Хwәде мәрʹа шьровәдькә, wәки Йаһоwа азайа мә синор кьрийә у әм гәрәке жь wан синора дәрнәйен. Мәсәлә, жьн гәрәке гöрʹа мере хwәда бә, у зарʹ гöрʹа де-бавада бьн (Әфәс. 5:22; 6:1). Әw синор ча һʹöкöм дькә сәр wе йәке кö әм ча азайа хwә дьдьнә хәбате? Щаба ве пьрсе дькарә әʹйан кә кö әме ахьрийеда жийина һʹәта-һʹәтайе бьстиньн йан на.

ЧАWА АЗАЙА ХWӘ РʹАСТ БЬДЬНӘ ХӘБАТЕ?

6. Мәсәле биньн кö чьрʹа мәрʹа кʹар ә wәки синоре азайа мә һәйә.

⁶ Һәрге синора азайа мә һәйә, гәло әм дькарьн бежьн wәки әw бь рʹастийе азайи йә? Бәле, әм дькарьн! Ле ча? Синоред кö азайа мәрьвада һәнә, бь рʹастийе бона кʹара wан ә у әw синор wана хwәй дькьн. Мәсәлә, әм дькарьн сафи кьн, wәки пе әʹрәбе һәрʹьнә шәһәрәки дур. Ле бьдьнә бәр чʹәʹве хwә wәки сәр рʹе тʹöнәнә нишан у һәр кәс ча дьхwазә öса жи дажо. Гәло һуне хwә рʹьһʹәт у бехоф тʹәхмин кьн сәр ве рʹе? Фәʹмдари йә на. Әw синор мәрʹа лазьм ьн, сәва әм азайа хwәрʹа ша бьн у кʹаре бьстиньн. Wәрә диса һьнә сәрһатийед жь Кʹьтеба Пироз шеwьр кьн у бьвиньн ча аqьлайи йә кö әм жь синоре азайе кö Йаһоwа дани, дәрнайен.

7. а) Азайа Адәм ча щöдә дьбу жь азайа һʹәйwана? б) Мәсәләке биньн кö ча Адәм азайа хwә да хәбате.

⁷ Чахе Хwәде мәрьве пешьн Адәм әʹфьранд, әwи чаwа мьлйакʹәтарʹа öса жи wирʹа азайи пʹешкʹеш да, демәк азайа бьжартьне. Адәм щöдә дьбу жь һʹәйwана, чьмки һʹәйwан пе инстинкте дьжин. Дина хwә бьдьнә сәр мәсәләке кö ча Адәм азайа хwә рʹаст да хәбате. Йаһоwа шьхöләкә һʹәwас да дәсте Адәм кö нав дайнә сәр һʹәйwана. Хwәде һʹәму һʹәйwан «анинә щәм мер, wәки бьбинә кʹа әwе чь нави ль wан кә». Чахе Адәм дина хwә да һәр һʹәйwани у наве лайиq да сәр wан, Йаһоwа нәкʹәтә нав шьхöле wи у нә жи бьжартьна wи гöһаст. Адәм «чь нав дани ль сәр һʹәйwане бинбәр, әw жи бу наве wан» (Дәстп. 2:19).

8. Чь щурʹәйи Адәм азайа хwә нәрʹаст да хәбате у ахьрийа ве йәке чь бу?

⁸ Хwәде Адәмрʹа шьхöләкә мәзьн да, wәки әw әʹрде бькә щьнәт. Хwәде гот: «Шин бьн у ль һәв зедә бьн, әʹрде тʹьжи кьн у хwәйитийе ле бькьн, һʹöкöми ль сәр мәʹсийед бәʹре тәйрәдед әʹзмен у һʹәму һʹәйwанед ль сәр әʹрдейә кö дьһʹәжьн бькьн» (Дәстп. 1:28). Ле Адәм бьжарт wәки жь wи синори дәре, йе кö Хwәде дани у бәре дара qәдәхәкьри хwар. Әwи шашийа мәзьн кьр, чьмки азайа хwә нәрʹаст да хәбате. Ахьрийа кьре wи әw бу кö зöрʹәтед wи ида бь һәзара сала кöл-дәрда дькʹьшиньн (Рʹом. 5:12). Әw шашийа wи гәрәке бона мә дәрс бә, wәки азайа хwә рʹаст бьдьнә хәбате у жь синоред кö Хwәде дани, дәрнәйен.

9. Йаһоwа чь бьжартьн да щьмәʹта хwә Исраел, у щьмәʹте ча хwә да кʹьфше?

⁹ Адәм у Һеwайе гöрʹа Хwәде нәкьрьн, у ләма һʹәму инсанәт гöнәкʹар ьн у дьмьрьн. Ле йәкә, Хwәде азайи жь мә нәстандийә. Әwе йәкеда әм баwәр ьн, чьмки әм дьвиньн кö Хwәде ча бу һьндава щьмәʹта хwә Исраелда. Йаһоwа щьмәʹта хwәрʹа мәщал да wәки бьжберьн һәла әwана дьхwазьн бьбьнә мьлкʹе Wи, демәк щьмәʹта wи, йан на (Дәркʹ. 19:3-6). Ле гәло wана чь бьжарт? Wана бь рʹәзәдьли хwәст бьбьнә щьмәʹта Хwәде. Wана әʹйан әʹлам кьрьн: «Һʹәму готьнед Хöдан әме бькьн!» (Дәркʹ. 19:8). Ле йазьх, әwе щьмәʹте жи азайа хwә нәрʹаст да хәбате у созе хwә нәани сери. Wәрә әм жь ве сәрһатийе дәрсе һьлдьн, кö тʹьме qимәт кьн азайа хwәйә бьжартьне, бәрдәwам кьн хwә ль Йаһоwа бьгьрьн у гöрʹа тʹәмийед wи бькьн (1 Корн. 10:11).

10. Кʹижан мәсәлә избат дькьн wәки мәрьвед гöнәкʹар дькарьн бь азайа хwәйә бьжартьне Хwәде рʹумәт кьн? (Бьньһерʹә шькле әʹwльн.)

¹⁰ Ибрани сәре 11-да, әм дьхуньн дәрһәqа 16 хьзмәткʹаред Хwәде, йед кö бьжартьн wәки синоред Йаһоwа qәбул кьн. У сәва ве йәке wана кʹәрәмед мәзьн станд у баwәрийа wан qәwи бу һьндава ахьрийе. Мәсәлә, Нöһ баwәрийа мәзьн да кʹьфше у бьжарт wәки гöрʹа тʹәмийед Хwәде бькә. Әwи бь готьна Хwәде гәми ава кьр, сәва малбәта wи у зöрʹәтед кö ахьрийе wе бьбуна, хьлаз бьн (Ибрн. 11:7). Бьраһим у Сәра жи бь рʹәзәдьли гöрʹа Хwәде кьрьн у чунә әʹрде создайи wар бьн. Паше, мәщала wан һәбу кö вәгәрʹьн шәһәре дәwләти бь наве Ур, ле wана һʹьш-аqьле хwә дабун сәр «созед Хwәде» у һивийа «wәлатәки» һе баш бун (Ибрн. 11:8, 13, 15, 16). Муса жи пьшта хwә да хьзнед Мьсьре, чьмки дьфькьри кö «һе qәнщ ә тʹәви щьмәʹта Хwәде бьчәрчьрә, нә кö wәхтәки кьн нава кʹефа гöнада дәрбаз кә» (Ибрн. 11:24-26). Wәрә әм чʹәʹв бьдьнә wан мәрьвед амьн wәки азайа хwә qимәт кьн у бьдьнә хәбате сәва qьрара Хwәде биньн сери.

11. а) Чь кʹәрәма әм дькарьн бьстиньн бь сайа азайа бьжартьне? б) Чь wә һелан дькә wәки азайа хwә рʹаст бьдьнә хәбате?

¹¹ Һәрге әм һʹәсаб дькьн wәки һе баш ә дәwса мә кәсәки дьн сафикьрьна бькә, wи чахи әм дькарьн öнда кьн кʹәрәма. Дәрһәqа wан кʹәрәма те готьне Qануна Дöщари 30:19, 20-да. (Бьхунә.) Рʹеза 19-да те готьне wәки Хwәде чь бьжартьн да Исраелийа. Рʹеза 20-да әм педьһʹәсьн кö Йаһоwа мәщал да wан, wәки әwана жерʹа нишан кьн чьqас wи һʹьз дькьн. Әм жи дькарьн бьжберьн wәки Йаһоwа бьһʹәбиньн. Мәщала мәйә баш һәйә wәки пʹешкʹеша азайе бьдьнә хәбате, сәва нишан кьн кö әм чьqас Хwәде һʹьз дькьн у дьхwазьн wи һöрмәт-рʹумәт кьн!

АЗАЙА ХWӘ БОНА ХЬРАБИЙЕ НӘДЬНӘ ХӘБАТЕ

12. Әм ча гәрәке бьдьнә хәбате пʹешкʹеша азайе?

¹² Бьдьнә бәр чʹәʹве хwә wәки wә пʹешкʹешәкә qимәт дайә һәвале хwә, ле әwи пʹешкʹеша wә авитийә нав гәмаре, йан һе хьраб, әwи әw пʹешкʹеш дайә хәбате сәва зийане бьдә кәсәки. Һуне чьqас бәрхwә кʹәвьн, öса нинә? Ньһа бьфькьрьн, wәки Йаһоwа чь сәр хwә тʹәхмин дькә чахе дьвинә, кö мәрьв чьqас нәрʹаст азайа хwә дьдьнә хәбате, у һәла һе жи зийане дьдьнә мәрьва. Бәле, чаwа кö Кʹьтеба Пироз пʹехәмбәрти кьр, wәʹде ван «рʹожед ахьрийеда» мәрьв бешекьр ьн (2 Тимтʹ. 3:1, 2). Wәрә әм тʹьме әw пʹешкʹеша qимәт кö Хwәде да мә, рʹаст бьдьнә хәбате у бьшекьриньн.

13. Ча әм дькарьн азайа хwә нәрʹаст бьдьнә хәбате?

¹³ Азайа мә гьшка һәйә кö хwәха бьжберьн һәвала, щурʹе кʹьнщхwәкьрьне, хәмьландьне, у һесабуне. Ле һәрге әм дьбьнә хöламед хwәстьнед хwә, йан дькʹәвьнә бәр байе ве дьнйа хьраб, азайа мә бона мә дьбә ча «хелийа хьрабикьрьне». (Бьхунә 1 Пәтрус 2:16.) Әм азайа хwә гәрәке нәдьнә хәбате, сәва хwәстьнед бәдәне биньн сери, ле әм гәрәке пәй ве тʹәмийе һәрʹьн: «Һәр тьшти бона шькьрдайина Хwәде бькьн» (Галт. 5:13; 1 Корн. 10:31).

14. Һәрге әм итʹбарийа хwә Йаһоwа тиньн, әме ча азайа хwә бьдьнә хәбате?

¹⁴ Сәва кö азайа хwә рʹаст бьдьнә хәбате, әм гәрәке итʹбарийа хwә Йаһоwа биньн у жь wан синора дәрнәйен йед кö әwи данийә. Тʹәне Йаһоwа мә һин дькә бона кʹара мә, у мә дьдә сәр wе рʹе, кʹижан мәрʹа лазьм ә (Иша. 48:17). Әм гәрәке бира хwәда хwәй кьн әв гьлийед, кö бь рʹебәрийа Хwәде һатьнә ньвисаре: «Рʹийа мәрьв нә дәсте wида йә, гавед хwә рʹасткьрьн, нә дәсте мәрьве кö дьмәшәда йә» (Йерәм. 10:23). Wәрә әм тʹö щар нәкʹәвьнә ве тʹәльке кö сәр хwә баwәр бьн, чаwа кö Адәм у Исраели бун. Ле wәрә әм тʹьме «бь тʹәмамийа дьле хwә» итʹбарийа хwә Йаһоwа биньн (Мәтʹлк. 3:5).

QӘДЬРЕ АЗАЙА БЬЖАРТЬНА МӘРЬВА БЬГЬРЬН

15. Әм чь һин дьбьн жь принсипа кö Галати 6:5-да ньвисар ә?

¹⁵ Әм гәрәке qәдьре бьжартьна мәрьва бьгьрьн, чьмки азайа wан жи һәйә. Демәк һʹәму Мәсиһи мина һәв сафикьрьна накьн. Сафикьрьнед Мәсиһийа дькарьн һәла һе щöдә бьн һьндава рʹабун-рʹуньштьне у хьзмәтийе жи. Бира хwәда хwәй кьн принсипа жь Галати 6:5. (Бьхунә.) Чахе әм фәʹм дькьн wәки һәр Мәсиһи щабдар ә сәва сафикьрьнед хwә, wи чахи әме qәдьре азайа бьжартьна wан бьгьрьн.

16, 17. а) Кʹижан чәтьнайи пешда һат ортʹа Корьнтʹийада? б) Паwлос ча әw чәтьнайи сафи кьр, у әw сәрһати чь мә һин дькә дәрһәqа сафикьрьнед мәрьва?

¹⁶ Wәрә мәсәләкә жь Кʹьтеба Пироз шеwьр кьн, кö чьрʹа әм гәрәке qәдьре азайа бьжартьна хушк-бьред хwә бьгьрьн. Мәсиһи Корьнтʹеда һәврʹа дькʹәтьнә дәʹwе, һәла изьн ә бьхwьн гоште кö дьбәкә пʹутарʹа qöрбан дькьрьн у паше базареда дьфротьн. Һьнәк öса дьфькьрин: «Пʹут пʹучʹ ьн, ләма әwи гошти дькарьн бь исафа тʹәмьз бьхwьн». Ле һьнәкед кö пешда пʹут дьһʹәбандьн, дьфькьрин һәрге әwи гошти бьхwьн, әw дькарә бе һʹәсабе пʹутпʹарьсти (1 Корн. 8:4, 7). Әw пьрсәкә öса бу, кö дькарьбу әʹдьлайа ортʹа хушк-бьред щьватеда хьраб кьра.

¹⁷ Пешийе Паwлос ани бира Мәсиһийа, wәки хwарьн wана незики Хwәде накә (1 Корн. 8:8). Паше әwи wанрʹа гот кö фәсал бьн, wәки азайа wан нәбә «кәвьрәк ль бәр ньге сьста» (1 Корн. 8:9). Паwлос ширәт да wан исафа кʹижана сьст бу, wәки сущдар нәкьн wи, кʹе гоште wи щурʹәйи дьхwә (1 Корн. 10:25, 29, 30). Әм дьвиньн wәки пьрсед фәрз дәрһәqа һʹәбандьне у хьзмәтийе, һәр Мәсиһи гәрәке бь исафа хwә сафи кә. Илаһи чахе хушк-бьра тьштед нәфәрз сафи дькьн, гәрәке qәдьре сафикьрьнед wан бьгьрьн (1 Корн. 10:32, 33).

18. Һун ча дькарьн бьдьнә кʹьфше wәки азайа хwәйә бьжартьне qимәт дькьн?

¹⁸ Йаһоwа азайа бьжартьне ча пʹешкʹеш дайә мә (2 Корн. 3:17). Әм гәләк qимәт дькьн әве пʹешкʹеше, чьмки бь сайа ве әм дькарьн сафикьрьнед öса бькьн, кʹижан кö дьдьнә кʹьфше кö әм Йаһоwа һʹьз дькьн. Wәрә әм тʹьме рʹази бьн сәва ве пʹешкʹеше, у бьдьнә хәбате сәва Хwәде рʹумәт кьн у qәдьре бьжартьн у сафикьрьнед мәрьва бьгьрьн.