Чахе Гьран Нәхԝәш Дькʹәвьн

«Чахе әз пеһʹәсийам кӧ пʹьшьк у рʹувийе мьнда нәхԝәшийа кʹансәре һәйә, мьн заньбу ида илащ тʹӧнә». Ле чахе әз жь нәхԝашхане вәгәрийамә мал, мьн хԝәрʹа гот: ‹Рʹаст ә әз һивийа ве йәке нибум, ле әз гәрәке рʹеке бьвиньм, ԝәки әве йәке тәйах кьм›».–Линда, 71 сали.

«Әз дьчәрчьрьм жь нәхашийа гьран, кʹижан кӧ һʹӧкӧм дькә сәр нервед сьфәте мьн алийе чʹәпе. Щарна жь бо еша ԛайим әз дькʹәвьмә депресийайе. Гәләк щар мьн хԝә тʹәне тʹәхмин дькьр у дьфькьрим, ԝәки хԝә бькӧжьм». –Елис 49 сали.

Мер кʹӧрсийа бона сәԛәтада рʹуньштийә, у дора ԝи мәрьвед ԝийи һʹьзкьри сәкьнинә

ҺӘРГЕ мәрьве тәйи һʹьзкьри, гьран нәхԝәш кʹәтийә у бәр мьрьне йә, тӧ зани кӧ әв йәк дәрдәки чьԛас гьран ә. Хәнщи ԝе йәке тәрʹа чәтьн ә ве дәрәщеда емосийед хԝә контрол ки. Тьрс у хәм дькарьн һе пешда бен, хут чахе зәһмәт дьбә ԛәнщкьрьна баш у пʹәра бона ве йәке бьвини, йан жи чахе дәрман хьраб һӧкӧм дькьн. Жь бо нәхԝәшийа гьран, алийе емосийалида һʹале бәнда һе хьраб дьбә.

Гәло, кʹидәре әм дькарьн аликʹарийе бьвиньн? Гәләк мәрьва тедәрхьстьнә, ԝәки әԝана һьнге бәрдьлийа мәзьн дьстиньн, чахе Хԝәдерʹа дӧа дькьн у рʹезед һелани жь Кʹьтеба Пироз дьхуньн. Аликʹарик жи дькарьн бьстиньн жь һʹьзкьрьн у пьштгьрйа нәфәред мале у һәвала.

ЧА ҺЬНӘКА ТӘЙАХ КЬРЬН

Роберте 58 сали дьбежә: «Баԝәрийа хԝә Хԝәде бинә у әԝ ԝе али тә бькә бәр нәхԝәшийе тәйах ки. Йаһоԝарʹа дӧа бькә. Ԝирʹа гьли кә чь дьле тәда нә. Рʹӧһʹе пироз у ԛәԝате жь ԝи бьхԝазә, ԝәки бькарьби ве һʹале хԝәда ԛӧдум нәкʹәви у рʹьһʹәтийа дьл хԝәй ки. Хԝәде ԝе али тә бькә, ԝәки һәла һе нәфәред мала хԝә жи бьшьдини.

«Чахе малбәта тә алийе емосийалида пьштгьрийа тә дькә, әв аликʹарикә гәләк мәзьн ә. Тʹӧнә бу рож, ԝәки кʹәсәки мьнрʹа тʹеле нәхьста у дәрһәԛа һʹале мьн нәпьрсийа. Һәвалед мьн жь щурʹә-щурʹә щийа пьштгьрийа мьн дькьрьн. Ԝана али мьн дькьр, ԝәки хԝә баш тʹәхмин кьм, чь кӧ бь рʹасти ԛәԝате дьдә мьн».

Һәрге кәсәк жь һәвалед тә гьран нәхԝәш ә, дина хԝә бьде Линда чь дьбежә: «Мәрьве нәхԝәш дьхԝазә ӧса бьжи ча һәргав у дьԛәԝьмә ԝе нәхԝаз бә дәрһәԛа нәхԝәшийа хԝә хәбәр дә. Ләма жи тʹәви ԝи дәрһәԛа ԝан тьшта хәбәр дә, сәр чь жи ԝә һәр рʹож хәбәр дьда».

Ԛәԝата Хԝәде, бәрдьлийа жь Ньвисаред Пироз, пьштьгьрийа малбәте у һәвала, дькарә али мә бькә баԝәр бьн, ԝәки һежа йә бәрдәԝам кьн бьжин, һәла һьнге жи гава әм гьран нәхԝәш ьн.

Бәрдьлийа жь Кʹьтеба Пироз

Итʹбарийа хԝә Хԝәде бинә.

«Әз Хӧдан гәрʹийам у Әԝи щаба мьн да, әз жь һʹәму хоф-тьрса хьлаз кьрьм. Әви фәԛири кьрә гази, Хӧдан бьһист» (Зәбур 34:4, 6).

Линда дәрһәԛа кʹижани кӧ жоре һатьбу готьне, дьбежә: «Мьн дӧайед хԝәда тʹӧ щар жь Хԝәде лавайа нәдькьр ԝәки мьн ԛәнщ кә, ле мьн һәр гав дӧада жь Хԝәде һьви дькьр: ‹Али мьн бькә әз ԛәԝи бьм у бәр нәхԝәшийе тәйах кьм›».

Жь Хәбәра Хԝәде ԛәԝате бьстинә.

«Йе кӧ ль ԝьр рʹудьне, ԝе нәбежә: Әз нәхԝәш ьм» (Ишайа 33:24).

Бьфькьрә дәрһәԛа созед Хԝәде. Әв йәк ԝе һевийе бьдә тә, бь сайа чь жи те бькарьби тәйах ки.

Жь нәфәред мале у һәвала, аликʹарийе бьхԝазә.

«Һәвал һәр гав һʹьз дькә, бьра буйә бона рʹожа охьрме гьран» (Мәтʹәлок 17:17).

Елис, дәрһәԛа кʹижани кӧ жоре һатьбу готьне, дьбежә: «Хԝә жь мәрийа башԛә нәкә. Изьне бьдә, кӧ һәвалед тә али тә бькьн. Рʹожед ӧса ԝе һәбьн, чахе тӧ хԝә тʹәне тʹәхмин ки у дьԛәԝьмә тӧ бьфькьри, ԝәки тӧ бира Хԝәде чуйи. Чь жи һәбә, хԝә жь мәрийа дур нәгьрә».