Чаԝа дькарьн һазьр кьн пешхәбәра, йед кӧ ԝе рʹьнд бенә хәбьтандьне
1. Чьрʹа фәрз ә ԝәки пешхәбәра мә рʹьнд һазьркьри бә?
1 Хԝарьна хԝәш һазьркьри у рʹьнд чекьри, мәде мәрийа вәдькә. Ӧса жи пешхәбәра мәйә рʹьнд һазьркьри, мәщале дьдә кӧ мәри бьхԝазә тʹәви мә ль сәр һʹиме Кʹьтеба Пироз хәбәр дә. Пешхәбәред кӧ ԝе рʹьнд бенә хәбьтандьне, дькарьн щурʹә-щурʹә бьн, дькарьн дьреж бьн йан жи фькьрада щӧдә бьн. Ләма жи сәва кӧ хԝарьн хԝәш дәре, лазьм ә рʹьнд ль сәр бьхәбьти, ӧса жи сәва кӧ пешхәбәр рʹьнд бенә хәбьтандьне, лазьм ә хԝә рʹьнд һазьр ки у ль сәр бьхәбьти (Мәтʹлк. 15:28). Ле гәло әм чь дькарьн бькьн, кӧ пешхәбәр рʹьнд бенә хәбьтандьне?
2. Ча әм дькарьн пешхәбәра ӧса һазьр кьн, кӧ мәрьварʹа һʹәԝас бә?
2 Тʹемед һʹәԝас бьжберә: Пешхәбәра мә гәрәке ӧса бә, кӧ мәрийа хԝәш бе у һʹәԝас бә. Чьмки, һәгәр хԝайе малерʹа пешхәбәра мә хԝәш найе, әԝе нәхԝазә тʹәви мә хәбәр дә. Ләма жи чахе хԝә һазьр дьки дьшьрмиш бә, һәла мәрьвед мьһала тәрʹа ԝе чь хԝәш бе. Дьбәкә ԝанарʹа һʹәԝас бә хәбәр дьн дәрһәԛа сәрԝертийа баш, малбәта бәхтәԝар, йан жи кʹӧтакьрьна шәʹр. Һәйнәсәр мәрйа хԝәш те нет-фькьред хԝә бежьн, ләма жи пьрсед ӧса сәва ԝан һазьр кә, йед кӧ ԝана һелан кә дьшьрмиш бьн. Ле гәло тӧ дькари бьди хәбате һьнә жь ԝан пешхәбәра, йед кӧ «Ԛӧльхкьрьна мәйә Пʹадшатийе» да тенә дайине у ӧса ԝана һазьр ки, кӧ мәрьвед мьһала тәрʹа һʹәԝас бә? Ләма жи щарна ԝәʹде ԛӧльхкьрьна тʹәви малбәте, дькари һьнә жь ԝан пешхәбәра һазьр ки.
3. Чь әм дькарьн һьлдьн һʹәсаб, ԝәʹде һазьркьрьна пешхәбәра?
3 Һьлдә һʹәсаб әʹдәт у култура мәрийа: Һьнә щийа ӧса те стандьне, кӧ мәри гәрәке перʹа-перʹа бежә дәрһәԛа ԝе йәке, кӧ әԝ чьрʹа һат. Щийед дьн жи, һәгәр тӧ пешийе жь хԝайе мале пьрс нәки дәрһәԛа һалхԝәшийа ԝи, әԝ дькарә бе һʹәсабе йан чь тӧ ԛәдьре ԝи нагьри. Һәнә щийед ӧса жи, кʹидәре кӧ әм дькарьн сәрбәст пешхәбәра хԝәда, дина хԝә бьдьнә ль сәр Кʹьтеба Пироз (Кʹар. Шанд. 2:14-17). У фьрԛи тʹӧнә мәри хԝә ль религийа нә мәсиһти дьгьрә, йан жи жь религийайе хԝә дур дьгьрә, ԝи чахи ԝе һе баш бә ԝәки әм нә кӧ перʹа-перʹа, ле ԝәʹде сәрледана дӧбарә дина хԝә бьдьнә Кʹьтеба Пироз (Кʹар. Шанд. 17:22-31).
4. Хәбәред мәйә пешьн гәрәке чь щурʹәйи бьн?
4 Хәбәред пешьн: Хәбәред хԝәйә пешьн рʹьнд һазьр кә. Ԝе баш бә ԝәки, әм бь щьмлед һеса у кьн хәбәр дьн. Гәләк фәрз ә әԝ йәк, һәла чь щурʹәйи у ча әм хәбәред хԝәйә пешьн һазьр дькьн. Бь һʹәԝас хәбәр дә. Тʹәви ԝан һʹәлал бә, бьра бәшәра тә жи хԝәш у бь әʹшԛ бә, йе кӧ дьдә кʹьфше ԝәки тӧ шәхси сәва ԝан хәм дьки. Һәгәр тӧ һьлди һʹәсаб ԝан һʹәму тьштед жоре готи, әԝе али тә бькә кӧ пешхәбәред хԝә ӧса тәʹм һазьр ки, кӧ мәрьвед мьһала хԝә бькарьби һелан ки ԝәки әԝана «жь сьфра Хӧдан [Йаһоԝа, ДТʹ]» бьхԝьн (1 Корн. 10:21).