Ча Әз бәр Йаһоԝа Хԝә Дьдьмә Кʹьфше?
1. Чьрʹа Кʹьтеба Пироз бәрамбәри нәйньке дьбә?
1 Һун һәр гав хԝә ль нәйньке дьньһерʹьн? Гәләка жь мә һәр рʹож хԝә ль нәйньке дьньһерʹә, чьмки әԝ али мә дькә бьвиньн, һәла рʹәнг-рʹуйе мә ча нә у ль сәр чь лазьм ә дина хԝә бьдьн. Кʹьтеба Пироз бәрамбәри нәйньке дьбә. Чахе әм Хәбәра Хԝәде дьхуньн, әв йәк али мә дькә бьвиньн һәла һӧндӧрда әм мәрьвнә ча нә, у ча әм бәр Йаһоԝа тенә кʹьфше (1 Сам. 16:7; Аԛуб 1:22-24). Хәбәра Хԝәде дькарә «нет у фькьред дьла жи әʹнәнә» бькә (Ибрн. 4:12). Гәло чь щурʹәйи хԝәндьна Кʹьтеба Пирозә һәр рʹожи у дьшьрмишбун али мә дькә бьвиньн, һәла чь алида әм гәрәке хԝә ԛәԝи кьн, сәва кӧ мьзгиндаред сәрфьраз бьн? (Зәб. 1:1-3).
2. Ча Кʹьтеба Пироз али мә дькә кӧ хԝә бьщерʹьбиньн?
2 Кʹьтеба Пироз Мина Нәйньке Бьдә Хәбате: Сәрһатийед ԛӧльхкʹаред Йаһоԝайи амьн, дәрһәԛа кʹижана кӧ дь Кʹьтеба Пирозда ньвисар ә, мә һин дькә ԝәки чь хәйсәт-һʹӧнӧр Йаһоԝарʹа хԝәш тен. Мәсәлә Даԝьд пʹехәмбәр бь хирәт ԛәдьре наве Хԝәде гьрт (1 Сам. 17:45, 46). Ишайа бь мерхаси у бь рʹәзадьлийа хԝә дь ԝе мьһаледа даннасин дькьр, кʹидәре кӧ зәʹф чәтьн бу (Иша. 6:8, 9). Һʹьзкьрьна Исайи мәзьн һьндава Баве ԝийи әʹзмана әԝ һелан дькьр, ԝәки ԛӧльхкьрьна хԝә һʹәсаб кә ча тьштәкә кӧ рʹьһʹәтийе тинә, нә кӧ барәки гьран (Йуһʹн. 4:34). Мәсиһийед ԛьрʹна йәке бь хирәт даннасин дькьрьн, әԝана гӧмана хԝә Йаһоԝа танин, у һазьр бун нәдана дәр (Кʹар. Шанд. 5:41, 42; 2 Корн. 4:1; 2 Тимтʹ. 4:17). Чахе әм дьшьрмиш дьбьн дәрһәԛа ԝан мәсәла, әв йәк али мә дькә кӧ ль сәр хԝә рʹаст бьньһерʹьн, сәва кӧ бькарьбьн ԛӧльхкьрьна хԝәйә пироз һе баш кьн.
3. Чьма әм гәрәке хԝә әглә нәкьн у гӧһастьнед лазьм нав хԝәда бькьн?
3 Бьхәбьтә ԝәки Кемасийед Хԝә Рʹаст ки: Һәмьки әԝ йәк кӧ мә нәйнькеда кемасийед хԝә дит, найе һʹәсабе кӧ әв кемаси хԝәха ԝе рʹаст бьн. Әм гәрәке жь Йаһоԝа аликʹарийе бьхԝазьн кӧ ль сәр хԝә рʹаст бьньһерʹьн, у паше жи бькарьбьн гӧһастьнед лазьм нав хԝәда бькьн (Зәб. 139:23, 24; Луԛа 11:13). Рʹаст ә ԝәхт һьндьк ә у шьхӧлед мә зәʹф ьн, ле йәкә әм гәрәке хԝә әглә нәкьн у гӧһастьнед лазьм нав хԝәда бькьн (1 Корн. 7:29; 1 Тимтʹ. 4:16).
4. Чь дьԛәԝьмә тʹәви ԝи мәрьви, йе кӧ чʹәʹве хԝә жь Хәбәра Хԝәде набьрә, у паше жи дьхәбьтә кӧ нав хԝәда кемасийед хԝә бьгӧһезә?
4 Йаһоԝа дина хԝә дьдә нә кӧ ль сәр ԝе йәке һәла ча әм тенә кʹьфше, ле сәва ԝи гәләк фәрз ә һәла һӧндӧрда әм мәрьвнә ча нә (1 Пәт. 3:3, 4). Чь дьԛәԝьмә тʹәви ԝи мәрьви, йе кӧ чʹәʹве хԝә жь Хәбәра Хԝәде набьрә, у паше жи дьхәбьтә кӧ нав хԝәда әԝан кемасийед хԝә бьгӧһезә, кʹижана кӧ әԝи дитьбу? Мәрьвәки ӧса чь кӧ «дьбьһе бир накә, ле дьԛәдинә» у «кьрьнед хԝәда хԝәзьли йә» (Аԛуб 1:25). Бәле, әме хԝәзьли бьн демәк бәхтәԝар бьн у бьбьнә ԛӧльхкʹаред хирәт, чьмки әм «мина нәйньке шәԝԛа рʹумәта Хӧдан вәдьгәрʹиньн» (2 Корн. 3:18).