Дь Ԛӧльхкьрьнеда Дәст Бьдьнә бәр Ԝәхт
Нава сала хьзмәтийейә 2014, Шәʹдед Йаһоԝа ԝәкә 1 945 487 604 сьһʹәт ԛӧльх кьрьнә. Әʹшкәрә те кʹьфше, кӧ әм һазьр ьн ԛӧльхкьрьнева мьжул бьн! (Зәб. 110:3; 1 Корн. 15:58). Рʹаст ә «ԝәхт һьндьк майә», ле гәло әме бькарьбьн сьһʹәтед хԝәйә ԛимәт дь ԛӧльхкьрьнеда ӧса бьдьнә хәбате, ԝәки һе зедә мәрьварʹа даннасин кьн? (1 Корн. 7:29).
Сәва кӧ бькарьбьн рʹьнд дәст бьдьнә бәр ԝәхт, әм гәрәке дәрәщед мәрийа һьлдьн һʹәсаб. Бәса хәбәре, һәрге тӧ һәр рʹож ԝәкә сьһʹәтәке йан һе зедә ԛӧльх дьки, у набә кӧ тʹәви кәсәки хәбәрдане дәстпеки, һьнге дькари гӧһастьна бьки, сәва кӧ бькарьби һе зедә мәрийа бьвини у ԝанарʹа хәбәр ди. Щи-щийа, дәрәщә тенә гӧһастьне. Ләма жи һәрге һьлдьн һʹәсаб әван ширәтед жере ньвисар, әԝе али мә бькә һе рʹьнд дәст бьдьнә бәр ԝәхт, сәва кӧ «бадиһәԝа кʹӧлма хԝә навежьн һәԝайе» (1 Корн. 9:26, ИМ).
Шәʹдәтикьрьна Мал бь Мал: Ида гәләк сал ә, ԛӧльхкʹар чаԝа кӧ ԛәйдә йә, рʹожа хԝә дәстпедькьн бь даннасинкьрьна мал бь мал. Әм заньн ԝәки гәләк мәрьв рʹож дьхәбьтьн. Ләма жи әм дькарьн жь алийе хԝәда бьхәбьтьн, ԝәки бәре еваре мал бь мал даннасин кьн, чахе гәләк мәрьв мал ьн у һеса дьбьн. Нава рʹожеда, шәʹдәтикьрьна ль кʹуче у ль щийед кӧ мәрьв дьхәбьтьн, дькарә бәред баш пешда бинә.
Шәʹдәтикьрьна ль Щийед кӧ Гәләк Мәрьв Тʹоп Дьбьн: Тʹәхт у стендед щигӧһастьне гәрәке ль ԝан щийа бенә данине, сәва кʹижани кӧ ԝе щьвата мьһала ԝә щабдар бә у кʹидәре кӧ гәләк мәрьв тʹоп дьбьн. (Бьньһерʹә «Ԛӧльхкьрьна Мәйә Пʹадшатийе» йа мәһа Тирмәһе сала 2013, рʹупʹ. 5, (ru).) Һәрге ль ван щийа кʹидәре кӧ тʹәхт у стендед щигӧһастьне сәкьнинә, ида гәләк мәрьв тʹоп набьн, һьнге Комитейа Хьзмәтийе йа Щьвате дькарә сафи кә кӧ ван стенда дәрбази ԝан щийа бькә, кʹидәре кӧ гәләк мәрьв тʹоп дьбьн.
Сәрледана Дӧбарә у Һинкьрьна Кʹьтеба Пироз: Һәрге тӧ дьвини ԝәки щурʹе даннасинкьрьна тә, керһати дәрбаз набә, һьнге дькари тьштәки бьгӧһези нава ԝи ԝәʹдәйида, чахе тӧ сәрледанед хԝә дьки йан һинкьрьна Кʹьтеба Пироз дәрбаз дьки. Соз мәсәлә, һәрге даннасинкьрьна мал бь мал рʹожед Шәмийа шәбәԛа даһа керһати йә, һьнге тӧ дькари һинкьрьна Кʹьтеба Пироз, дәрбази нивро йан евара бьки?
Рʹаст ә әм ша дьбьн чахе дьвиньн кӧ сьһʹәтед мәйә ԛӧльхкьрьне зедә нә, ле шабуна мә һьнге һе зедә дьбә, чахе шьхӧле мә керһати дәрбаз дьбә. Һәрге тӧ дь щурʹе даннасинкьрьнеда кʹар дьки у дьвини ԝәки әԝ ԝәʹдә сәва ве йәке керһати нинә, дькари тьштәки бәрнама хԝәда бьгӧһези. Йаһоԝарʹа дӧа бькә, йе кӧ һәйә «хԝәйе дьруне», ԝәки әԝ рʹебәрийа тә бькә кӧ бькарьби дь ԛӧльхкьрьнеда, рʹьнд дәст бьди бәр ԝәхт! (Мәт. 9:38).