Рʹебәри бона Щьвата Мәзьнә Серʹожи
Сьһʹәта Дәрбазкьрьне: Дәре авайе сьһʹәта 8:00 вәдьбә. Мьԛама дәстпебуне, һәр се рʹожа ԝе сьһʹәта 9:20 дәстпебә. Чахе мьԛам дәстпедьбә, һьнге һәр кәс жь мә гәрәке щийе хԝә бьгьрә, сәва кӧ бәрнамә бь лайиԛи дәрбаз бә. Рʹожа Инийе у Шәʹмийе, бәрнама ԝе хьлаз бә незики сьһʹәта 17:00. Ле рʹожа Ләʹде ԝе сьһʹәта 16:00 хьлаз бә.
Бь Кʹьлама, Пәсна Бьдьнә Йаһоԝа: Ԝәʹде бәре щьмәʹта Хԝәде, бь кʹьлама пәсне Йаһоԝа дьдан. У иро жи мьԛам әв пʹарәкә фәрз ә дь һʹәбандьна рʹастда (Зб. 28:7). Һәр пʹарәкә щьвата мәзьнә серʹожи, ԝе бь мьԛаме дәстпебә. Әв нә кӧ тʹәне мьԛам ьн, әв ӧса һатьнә һазьркьрьне кӧ әм һин бьн Йаһоԝа бьһʹәбиньн. Ләма жи чахе бьра әʹлам кә кӧ мьԛам ньһа ԝе дәстпебә, әв те һʹәсабе ԝәки гәрәке щийе хԝә бьгьрьн у бь рʹазибуне гӧһ бьдьнә ве мьԛаме, нә кӧ хәбәр дьн. Бь шьхӧлед хԝәйә ӧса әм нишан дькьн, ԝәки ԛимәт дькьн ԛәԝата әндәмед оркестра Бьрща Ԛәрәԝьлийе. Сале дӧ щара әԝ хушк-бьра бь кʹиси хԝә дьчьн ль Патерсоне, Нийу-Йорк, сәва кӧ мьԛаме бәдәԝ саз кьн, ԝәки ләзәте мәрʹа бинә. Паше ԝе йәке чахе әм гӧһ бьдьнә мьԛаме, әм гәрәке бьстьрен кʹьламед Пʹадшатийе у бь ве йәке пәсна бьдьнә Йаһоԝа.
Щийе Сәкьнандьна Авта: Жь бо ԝе йәке кӧ щарна щийе сәкьнандьна авта тʹере накә, ԝе баш бә ԝәки һʹәмушк бь авте хԝә нәйен, ле тʹәвайи тʹәви кәсәки бен. Ле әԝ мәрьвед кӧ проблемед сьһʹәт-ԛәԝатева гьредайи, щәм ԝана һәйә, автед ԝан ԝе ль ԝан щийа бе сәкьнандьне, кʹидәре кӧ ԝе ԝанарʹа кʹьфш кьн. Рʹаст ә дәрәщед һʹәму щийада жь һәв щӧдә дьбьн, чь жи һәбә һʹәму ажован гәрәке гӧһ бьдьнә бьред щабдар, йед кӧ сәва щийед сәкьнандьна авта хәм дькьн, у гӧһ бьдьнә рʹебәрийа ԝан.
Щийе Рʹуньштандьне: Рʹаст ә һәр шәбәԛ дәре ода щьвате ԝе вәкьри бьн, жь кʹәрәма хԝә һьлдьн һʹәсаб кӧ әм гәрәке ләз нәкʹәвьн ԝәки щийед баш хԝәрʹа бьгьрьн, ча бежи тʹәви кәсәки дькʹәвнә һʹӧщәте. Жь кʹәрәма хԝә мәрьвед дьн һьлдә һʹәсаб, у рʹӧһʹе хԝәԛӧрбанкьрьне бьдә кʹьфше сәва һʹалхԝәшийа хушк-бьра. Рʹӧһʹе хԝәԛӧрбанкьрьне дьдә кʹьфше, ԝәки әм Мәсиһийед рʹаст ьн, у йед дьнена жи һелан дькә кӧ пәсна бьдьнә Хԝәде (Йн. 13:34, 35; 1 Кр. 13:5; 1 Пт. 2:12). Щи, һун дькарьн тʹәне сәва ԝан мәрийа бьгьрьн, йед кӧ тʹәви ԝә дь автекида һатьнә, йан жи әԝед кӧ тʹәви ԝә маләкеда дьжин, йан жи әԝед тʹәви кʹижана кӧ тӧ ньһа һинкьрьна Кʹьтеба Пироз дәрбаз дьки. Жь кʹәрәма хԝә тьштед хԝә данәйнә ль ԝи щи, кʹидәре кӧ те рʹунәнейи. Шьхӧлкʹарийа тә дь ве йәкеда, ԝе али йед дьнена бькә бьвиньн, кӧ әв щи вала нә.
Кʹьнщхԝәкьрьна бь Намуси у Лайиԛ: Ԝәʹде щьвата мәзьн кʹьнщхԝәкьрьна мә гәрәке лайиԛ у бь намуси бә, у нәдә кʹьфше рʹӧһʹ у стила ве дьнйайә нәщайиз (1 Тим. 2:9). Һәла һе чахе әм һотеледа ниньн, йан жи пешийа у паше щьвата мәзьн чахе әм аза нә у һеса дьбьн, һьнге жи әм дьхԝазьн ԝәки кʹьнщхԝәкьрьна мә бь намуси у лайиԛ бә. Бь ве йәке әме фьрнаԛ бьн ль сәр хԝә бьгәриньн плакеткайе, у чахе мәщала мә һәбә, мәрʹа ԝе нә жи чәтьн бә шәʹдәтийе бьдьн. Кʹьнщхԝәкьрьн у рʹабун-рʹуньштандьна мәйә баш, ԝәʹде щьвата мәзьн, нә кӧ тʹәне дина мәрьвед һʹәлал ԝе бькʹьшинә бәрбь мьзгинийа Кʹьтеба Пироз кӧ әʹмьр хьлаз дькә, ле ӧса жи Йаһоԝа ԝе һӧрмәт-рʹумәт кә (Сф. 3:17).
Ԛәйдед Мәйә Баш, Чахе Һʹащәтед Әләктроник Дьдьнә Хәбате: Әм ԛәйдед хԝәйә баш дьдьнә кʹьфше, чахе тʹелед хԝәйә мобиле йан һащәтед әләктронейа дьн ӧса саз дькьн, ԝәки тʹӧ кәси әʹщьз нәкьн. Һәрге әм камерайе дьдьнә хәбате, сәр видео дьньвисьн йан таблета дьдьнә хәбате, әм дьхԝазьн сәрԝахт бьн, ԝәки рʹийа мәрийа нәгьрьн гӧһ бьдьнә бәрнаме. Әм ӧса жи бь ве йәке ԛәйде хԝәйә баш дьдьнә кʹьфше, чахе бейи мәʹни ԝәʹде бәрнаме, нашиньн нәма йан жи sms.
Хԝарьн: Дәԝса кӧ ԝәʹде нанхԝарьне ода щьвата мәзьн бьһельн у һәрʹьн, ԝе баш бә, ԝәки хԝарьне тʹәви хԝә биньн. Һун ӧса жи дькарьн тʹәви хԝә һьлдьн чәнтʹәкә ӧса, кʹидәре кӧ хԝарьне бькарьбьн хԝәй кьн ԝәки хьраб нәбә, у кʹижан кӧ бьн кʹорсийе щи дьбә. Ле чәнтʹед ви щурʹәйи йед кӧ мәзьн ьн, у фьраԛед шуше, изьн тʹӧнә кӧ ль сәр щьватед мәзьн биньн.
Ԛӧрбанкьрьн: Әм дькарьн бь ԝе йәке рʹазибуна хԝә һьндава һазьркьрьна щьвата мәзьн бьдьнә кʹьфше, һәрге ԛӧрбанкьрьна бь рʹәзәдьли бькьн, йед кӧ тенә хәбьтандьне ль сәр шьхӧлед мәйә һʹәмдьнйайе бона щьвата мәзьн.
Дәрман: Һәрге һун нәхԝәш ьн у дохтор ԝәрʹа дәрман ньвисийә кӧ вәхԝьн, жь кʹәрәма хԝә дәрманед хԝә бир нәкьн тʹәви хԝә биньн ль щьвата мәзьн. Чьмки дьԛәԝьмә кӧ дәрманед ви щурʹәйи ль сәр щьватед мәзьн ԝе тʹӧнә бьн. Һʹәму щурʹә дәрзийа изьн тʹӧнә кӧ бавежьнә ԛӧтʹийед гәмара, йед кӧ ль сәр територийа щьватед мәзьнда ньн у отелада. Чьмки әв йәк гәләк хоф ә.
Хԝәхԝәйкьрьн жь Ԛәзийа: Жь кʹәрәма хԝә, сәва кӧ һун бькарьбьн хԝә жь ԛәзийе хԝәй кьн, фәсал бьн кӧ ләз нәкʹәвьн у нәшьмьтьн. Һәр сал гәләк ԛәзи дьԛәԝьмьн жь бо ԝе йәке, кӧ солед пәʹнибьльнд пʹе дькьн. Сол гәрәке лайиԛ бьн, һьнге ԝе ԝәрʹа һеса бә у һуне нәтьрсьн ль сәр пʹепәлунга йан жи щийед дьн бьгәрʹьн.
Әʹрәбә бона Зарʹа (Каләскә), у Кʹӧрсийед кӧ Тенә Тʹопкьрьне: Ль щийе рʹуньштандьна хԝә, изьн тʹӧнә биньн каләскә йан жи кʹӧрсийед кӧ тенә тʹопкьрьне. Ле изьн һәйә кӧ тʹәви хԝә биньн кʹӧрсийед ӧса бона зарʹа, дь кʹижанада кӧ зарʹ бе хоф ьн. У әв кʹӧрсийе зарʹа, һун дькарьн кʹеләка кʹӧрсийа хԝә гьредьн.
Хәбьтандьна Парфийуме: Һьнә щьватед мәзьн щийед дадайида дәрбаз дьбьн, кʹидәре кӧ винтиласийа жи һьндьк ьн. Ләма жь бо һʹьзкьрьна һьндава йед дьнена, ԝе баш бә ԝәки әм тьштед парфийумейә ӧса нәдьнә хәбате, бина кʹижана кӧ зәʹф ԛайим ә. Чьмки әв йәк дькарә һʹӧкӧм кә ль сәр ԝан мәрийа, алержийа кʹижана кӧ ль сәр тьштед ӧса һәйә (1 Кр. 10:24).
Әв Кʹи кӧ Дьхԝазьн Һе Зедә Дәрһәԛа Хԝәде Пебьһʹәсьн: Һәрге ԝәʹде периода щьвата мәзьнә серʹожи, ԛӧльхкʹар кәсәкирʹа нәформал шәʹдәти дан, у әԝ мәрьв хԝәст һе зедә пебьһʹәсә, һьнге дькарьн тʹьжә кьн әԝ бланка лазьм (S-43). Бланкед тʹьжәкьри гәрәке бьдьнә Идара Әʹдәбйатерʹа, йан жи паше дькарьн бьдьнә секретаре щьвата хԝә.
Хԝарьн Паши Щьвата Мәзьн: Чахе һун паши щьвата мәзьн сафи кьн һәрʹьн щики нан бьхԝьн, ль ԝьр жи һун дькарьн бь рʹабун-рʹуньштандьна хԝәйә баш, пәсна бьдьнә наве Йаһоԝа. Кʹьнщед хԝә ӧса хԝә кьн, чаԝа кӧ лайиԛи ԛӧльхкʹаре Хԝәде йә. Һәрге ԝәрʹа лазьм ә хԝарьне сьфарʹәш кьн, һьнге дькарьн һьнә пʹәред зедә жи бьһельн хәбаткʹаред ԝан щийа, һәрге әԝ бь әʹдәте ви щи йә.
Щиԝарбуйин ль Малада:
Тʹьжә кә бланка лазьм (CO-5), сәва щиԝарбуйине.
Жь кʹәрәма хԝә бир нәкьн, ԝәки һун тʹәне ԝәʹде дәрбазкьрьна щьвата мәзьн, ль ве маледа дькарьн бьминьн.
Тʹьме дина хԝә бьдә зарʹед хԝә у тʹәне ԝана наһелә.
Һәрге тә бланк тʹьжә кьр у паше нькари ль ԝи щи бьмини, жь кʹәрәма хԝә дәрһәԛа ве йәке перʹа-перʹа әʹлами секретаре щьвата хԝә бькә.
Ԛимәт кә меванһʹьзийа ԝан хушк-бьра, мала кʹижанада кӧ тӧ дьмини.
Һотел:
Жь кʹәрәма хԝә зәʹф отʹаха нәгьрә, һәрге тӧ ԝана нади хәбате. Ӧса жи һаԛас мәрьв гәрәке тʹәви тә отʹахеда бьминьн, чьԛас кӧ һотел кʹьфш дькә.
Һәрге ньшкева тьштәк ԛәԝьми у тӧ нькари бейи ль һотеле бьмини, һьнге ԝе гәләк баш бә кӧ перʹа-перʹа дәрһәԛа ве йәке һотелерʹа әʹлам ки, сәва кӧ йед дьнена бькарьбьн әве отʹахе бьдьнә хәбате (Мт. 5:37). Паше диса щарәк избат бә ԝәки һотел бь рʹастийе жи һәжмар данә тә (йан жи избаткьрьна ԝе йәке) кӧ тә әв отʹах вәдьгәрини. Һәрге тӧ нава 48 сьһʹәтада кем, ԝанарʹа әʹлам дьки кӧ әве отʹахе нахԝази, һьнге пʹәред тә ԝе ӧнда бьн.
Еԝед кӧ картед кредите у йед дьн дьдьнә хәбате: гәләк щар һотел әв пʹәред ԝә ль сәр карте дьгьрә йе кӧ сәва отʹахе гәрәке бе дайине, сәва кӧ һәрге тьштәк бьбә, һәԛе хԝә дәрхьн. Тӧйе нькарьби ԝан пʹәрә бьди хәбате, һʹәта кӧ тӧ бь тʹәмами пʹәред хԝә тʹәсмил нәки нава чәнд рʹожада паши чуйина хԝә.
Әʹрәбәйа сәва дәрбазкьрьна баред тә, ԝи чахи һьлдә, гава тьшт ида һазьр ьн сәва кӧ ԝана дәрбаз кьн. Паши ԝе йәке перʹа-перʹа әве әʹрәбе бинә щийе ԝе, сәва кӧ йед дьнена жи бькарьбьн әԝе һьлдьн.
Һәрге дь ви щида ԛәйдә йә, һьнге дькари хәбаткʹаред һотелерʹа, йед кӧ баред тә дәрбаз дькьн йан жи отʹахе дьдьнә һәв, пʹәред зедә бьһели.
Хԝарьне тʹәне ль ԝи щи һазьр кә, кʹидәре кӧ изьн һәйә.
Ль ԝан һотелада, кʹидәре кӧ бе пʹәрә тәште дьдьн, мәсәлә ԛаһве, у тьштед дьн, бе һʹәмде хԝә у сәва меванед хԝә нәдә хәбате.
Һәр щар ԝәʹде хәбәрдана тәйә тʹәви хәбаткʹаред һотеле, бәре рʹӧһʹ бьдә кʹьфше. Әԝана шьхӧлкʹарийе тʹәви гәләк мәрьва дькьн, у ԛәнщийа тә, сәбьркьрьн у сәрԝахтийа тә жи ԝе гәләк ԛимәт кьн.
Де-бав гәрәке тʹьме мьԛати зарʹед хԝә бьн, ԝәʹде һатьна ԝан ль һотеледа. Ӧса жи ԝәхте зарʹ лифтеда ньн, һәԝзда, у щийед дьнда ньн.
Дь «Навниша Отʹахада» те кʹьфшкьрьне байе отʹахе сәва шәвәки. Һәрге сәр тә пʹәред зедә лекьрьн, сәва тьштед кӧ тә сьфарʹәш нәкьрийә у нә жи дайә хәбате, ван пʹәра тʹәсмил нәкә. У чьԛас кӧ дькари, дәрһәԛа ве йәке зу бежә Идара Щиваркьрьнерʹа.
Дәрһәԛа һәр проблемәкә, йед кӧ дь һотеледа дькарьн һәбьн, гәрәке бе әгләкьрьн бежьн Идара Щиваркьрьнерʹа.
Ԛӧльхийа Рʹәзәдьли: Һәр кәс кʹи кӧ дьхԝазә аликʹарийе бьдә сәва тʹәмьзкьрьна ода щьвата мәзьн, дькарә бежә ԝе идаре, кʹижан кӧ сәва аликʹарийа тʹәмьзкьрьна щьвате щабдар ә. Зарʹед һʹәта 16 сали жи дькарьн дь шьхӧле тʹәмьзкьрьнеда кʹар бькьн, у әԝана әве йәке дькарьн бькьн йан тʹәви де-баве хԝә, йан жи тʹәви ԝан мәрийа, йед кӧ мьԛати ԝан дьбьн у кʹижанарʹа кӧ де-бав изьн данә ԝәки бона ԝан щабдар бьн.