Пʹьртука «Чь Һин Дькә Кʹьтеба Пироз?», Рʹьнд Бьдьнә Хәбате

Чахе шагьрт педьһʹәсә кӧ Кʹьтеба Пироз чь һин дькә, у паше ль жийина хԝәда әве занәбуне дьдә хәбате, бь ԝе йәке әԝ рʹӧһʹанида мәзьн дьбә у бәред баш жи тинә (Зәб. 1:1-3). Әм дькарьн али шагьрте хԝә бькьн кӧ әԝ пешда һәрʹә, һәрге рʹьнд әве кʹьтебе бьдьнә хәбате.

Пьрсед Пешхәбәре: Һәр сәрик бь пьрса дәстпедьбә, щаба кʹижана кӧ ԝан сәрийада те дайине. Тӧ дькари пьрсед реторик дайни, сәва кӧ һʹәԝаса шагьрт мәзьн ки һьндава тʹемайе кӧ һуне шеԝьр кьн. Йан жи тӧ дькари ԝирʹа бежи кӧ әԝ кьн щаба ван пьрса бьдә. Һәрге шагьрт рʹаст щаба хԝә надә, нәлазьм ә ԝийа рʹаст кьн. Щабед ԝи ԝе али тә бькьн тедәрхи, һәла ль сәр чь тӧ һе зедә гәрәке дина хԝә бьди (Мәтʹлк. 16:23; 18:13).

Әʹламәтийа Зедә: Һәрге шагьрт фәʹм дькә у ԛәбул дькә тʹемайе кӧ һун шеԝьр дькьн, тӧ дькари ԝи һелан ки, кӧ паше хԝәха бьхунә әʹламәтийа зедә жи, йа кӧ дькʹәвә ве сәрийе. Ле щарәкә дьн тӧ дькари нава чәнд дәԛада һьнәки бьԝәкʹьлини, сәва кӧ избат би ԝәки шагьрт тʹеме фәʹм дькә. Хенщи ԝе йәке һәрге сәва шагьрт керһати бә, тӧ гәрәке ԝәʹде һинкьрьне шеԝьр ки фькьред жь әʹламәтийа зедә, йан һьнә пʹаред жь ԝе әʹламәтийе ԝирʹа бьхунә. Öса жи тӧ дькари ԝан пьрса бьди ԝи, чь кӧ тә пешда һазьр кьрийә.

Чаргошә бона Ԝәкʹьландьне: Кʹӧтасийа һәр сәрики һәйә чаргошә, кʹидәре кӧ те дайине щаба пьрсед кӧ дәстпека сәрийеда һәйә. Тӧ дькари әван тьшта бьди хәбате, сәва кӧ избат би ԝәки шагьрте тә фәʹм дькә у дькарә шьровәкә фькьред сәрәкә. Әԝан щабед жь чаргоше бь дәнге бьльнд тʹәвайи бьхуньн, ӧса жи әԝ рʹезед кӧ ль бәр ԝан щаба тенә дайине. Паше шагьрте хԝәрʹа бежә кӧ щаба хԝәда бьдә хәбате рʹезәке йан чәнд рʹеза, сәва кӧ шьровәкә һәла чьма әԝ баԝәр дькә кӧ әв йәк рʹаст ә (Кʹар. Шанд. 17:2, 3).