Чаԝа Бьдьнә Хәбате Щурʹед Бәлакьрьна Мьзгинийе

Дәстпебуйи жь мәһа Чьләйе сала 2018, щурʹед бәлакьрьна Мьзгинийе «Бәрнама Щьвинеда» тенә дайине сәр рʹупʹела пешьн. Чаԝа әм дькарьн ԝана бьдьнә хәбате?

Чахе Тӧ Пе Дәрса Дәрдькʹәви: Тӧ дькари бьди хәбате пьрс, рʹез у пьрса вәкьри бьһели. Әв найе һʹәсабе, ԝәки тӧ гәрәке ԝан пешанина бь әзбәри хәбәр пәй хәбәра һин би. Ле тӧ дькари ль сәр һʹиме ве пешанине хәбәрдане щурʹәки майин дәстпеки у тʹәви мәрьва шеԝьр ки. Тӧ ӧса жи дькари бьди хәбате әʹдәбйәтәкә бона һинбуне, һәла һәрге әв йәк пешанинеда найе кʹьфшкьрьне жи.

Чахе Тӧ Дәрдькʹәви Хьзмәте: Щурʹед бәлакьрьна мьзгинийе бона мә мәсәлә нә, кӧ бьзаньбьн чаԝа тʹәви мәрийа хәбәр дьн. Һәрге мәрьв дьхԝазә һе зедә пебьһʹәсә, тӧ дькари хәбәрдане бәрдәԝам ки у бьди хәбате фькьред жь щурʹед бәлакьрьна мьзгинийе йа сәва сәрледана дӧда. Тӧ дькари әве пешанине һʹәвәки бьгӧһези йан жи щурʹәки майин бежи. Һәла бьфькьрә: Дьбәкә тӧйе бьди хәбате пешанин йан рʹезәкә дьн, чь кӧ ԝе бона мьһала тә дьһа керһати бә. Дьбәкә ԝан мәрьварʹа һʹәԝас ә хәбәр дьн дәрһәԛа ԛәԝьмандьнед кӧ ԝан пашԝәхтийа ԛәԝьминә. Фьрԛи тʹӧнә тӧ чаԝа ԝан пешанина бьди хәбате, нета тә гәрәке мина йа Паԝлосе шанди бә, йе кӧ гот: «Ван һ′әму тьшта әз иди бона Мьзгинийе дькьм, ԝәки әз бьбьмә һәвал-п′аре дӧа-дьрозгед сәр ԝе» (1 Кр. 9:22, 23).