Хԝәде Чьма Щаба Һʹәму Дӧа Надә?

Баве мәйи әʹзмана Йаһоԝа Хԝәде һазьр ә у ша йә гӧһ бьдә дӧайед мәйи жь дьл. Ле һьнә тьшт һәнә жь бо чь жи Хԝәде щаба һʹәму дӧа надә. Гәло чь нә әв тьшт у гава әм дӧа дькьн чь гәрәке бира хԝәда хԝәйи кьн? Дәрһәԛа ве йәке жере һьнә рʹебәрийед жь Кʹьтеба Пироз һатьнә дайине.

Кʹома мәрьва дереда, жь кʹьтебе дӧа дькьн.

«Гава кӧ һун дӧа дькьн, гьлийа диса у диса нәԝәкʹьлиньн» (Мәтта 6:7).

Йаһоԝа нахԝазә, ԝәки әм бь әзбәри дӧа бьԝәкʹьлиньн йан жи бь хԝәндьне дӧа бькьн. Ле дәԝсе әԝ дьхԝазә, кӧ әм жь дьл тʹәви ԝи хәбәр дьн. Бьдә бәр чʹәʹве хԝә һәваләки тә һәйә, у гава әԝ тʹәви тә хәбәр дьдә, һәр рʹож гьлийед мина һәв бь әзбәри дьԝәкʹьлинә. Тәйе чь тʹәхмин кьра? Һәвалед баш ԝе һәврʹа жь дьл хәбәр дьн. Чахе әм бь гьлийе хԝә дӧа дькьн, ӧса әм шәхси Баве хԝәйи әʹзманарʹа хәбәр дьдьн.

Мер ль жор дьньһерʹә у бәр ви билетед латарейайе нә.

«Гава һиви дькьн, настиньн, чьмки сәр нета хьрабийе һиви дькьн» (Аԛуб 4:3).

Һәрге дӧайед хԝәда әм тьштед ӧса дьхԝазьн, чь кӧ Хԝәде хԝәш найен, һәмьки әԝ ԝе щаба дӧайед мә нәдә. Мәсәлә, әм заньн ԝәки Йаһоԝа тьмайе сущдар дькә. Ле гәло Әԝ ԝе кʹәрәм бькә дӧайе мәрьве хӧмарбаз, кʹижан кӧ дьхԝазә ԝәки Хԝәде али ԝи бькә, кӧ гәләк пʹәра чекә? (Ишайа 65:11; Луԛа 12:15). Һәмьки Йаһоԝа ԝе щаба дӧайе ви щурʹәйи нәдә! Сәва кӧ Хԝәде щаба дӧайе мә бьдә, әм гәрәке избат бьн кӧ дӧайе мә ль гора ԛьрара ԝи йә.

«Әԝе кӧ тʹьлийа дькә гӧһе хԝә кӧ ԛануне нәбьһе, дӧайе ԝи жи һʹәта зьвер ә» (Мәтʹәлок 28:9).

Ԝәʹде бәре, Хԝәде щаба дӧайед ԝан мәрьва нәдьда, кʹижана ԛанунед ԝийи рʹаст инкʹар дькьрьн (Ишайа 1:15, 16). Ньһерʹандьна Йаһоԝа нәһатийә гӧһастьне (Малахи 3:6). Һәрге әм дьхԝазьн, Хԝәде щаба дӧайед мә бьдә, әм гәрәке һәр тьшти бькьн ԝәки гӧрʹа ԛанунед ԝида бьн. Ле һәрге мә бәре тьштед нәрʹаст дькьр? Гәло әв те һʹәсабе, ԝәки Йаһоԝа ԝе ида тʹӧ щара гӧһ нәдә дӧайед мә? Һәмьки на! Һәрге әм тʹобә дькьн у ԛәԝате дьдьнә хәбате, кӧ дьле Хԝәде ша кьн, әԝ ԝе бь һʹьзкьрьн бьбахшинә мә (Кʹаред Шандийа 3:19).

«Әԝе кӧ незики Хԝәде дьбә, гәрәке баԝәр бькә, кӧ Хԝәде һәйә у ԝе ԝан хәлат кә, кʹижан кӧ ль ԝи дьгәрʹьн» (Ибрани 11:6).

Әм нә кӧ тʹәне һьнге дӧа дькьн, гава дьлтәнг дьбьн йан рʹасти чәтьнайа тен у дьхԝазьн дьлбинийе бьстиньн, ле бь рʹасти дӧакьрьн пʹарәкә һʹәбандьна мә йә. Дӧайе мә баԝәрийа мә әʹйан дькә. Аԛубе шагьрт готийә, кӧ һәрге әм «бь баԝәрийе» нәхԝазьн, әме «тьштәки жь Хӧдан» нәстиньн (Аԛуб 1:6, 7). Сәва кӧ баԝәрийа хԝә һьндава Хԝәде бьшьдиньн, әм гәрәке ԝәʹдә у ԛәԝате бьдьнә хәбате, кӧ бь сайа леколина Кʹьтеба Пироз һе рʹьнд Ԝи нас кьн. Әв йәк ԝе али мә бькә, кӧ ԛьрара Хԝәде һе рʹьнд фәʹм бькьн у итʹбарийа хԝә ԝи биньн.