«Әз Ида Хьзмәте Гәләк Һʹьз Дькьм!»

ӘЗ ШАБУНА ХԜӘ ӦНДА ДЬКЬМ

Сәд һʹәйф кӧ ԝәхта кӧ әз мәзьн дьбум, достийа мьн тʹәви Йаһоԝа һеди-һеди сар дьбу. Мьнрʹа ӧса дьһат кʹьфше ԛәй азайа һәвалдәрсед мьн бесинор бу, у әз дьфькьрим кӧ әз гәләк тьшт ӧнда дькьм. Ԛәйдед мале у шьхӧлед рʹӧһʹани мьнрʹа ида баргьран бун. Мьн шьк нәдьбьр кӧ Йаһоԝа һәйә, ле мьн хԝә незики ԝи тʹәхмин нәдькьр.

Диса жи, әз дьчум хьзмәте, ле нә бь дьл у щан. Мьн хԝә бона хьзмәте һазьр нәдькьр, ләма ль мьн зор дьһат кӧ хәбәрдане дәстпекьм. Ахьрийеда, хьзмәта мьн бешабун у бекер бу, у дьле мьн һьндава хьзмәте дьһа сар бу. Әз хԝәрʹа дьфькьрим гәло хушк у бьра чаԝа дькарьн бәрдәԝам кьн жь ве хьзмәте шабуне бьстиньн.

Гава әз 17 сали бум, мьн хԝәст жь мале һәрʹьм. Ләма, мьн чәнтʹед хԝә һазьр кьрьн, у әз дәрбази Австралйайе бум. Де у баве мьн пʹьрʹ хәмгин бун жь бәр кӧ әз жь мале чум. Әԝ һәвәки дьтьрсийан, ле әԝана баԝәр бун кӧ әзе хьзмәтийа хԝә Йаһоԝарʹа нәдьм сәкьнандьне.

Ль Австралйайе, әз жь алийе рʹӧһʹанива дьһа сьст бум. Әз гәләк щара нәдьчум щьвина. Һьнә щаһьл еварәке дьчун щьвина, ле евара дьн дьчун клуба кӧ ичкʹе вәхԝьн у бьрәԛьсьн. Мьн хԝәрʹа гәләк зу һәвалед ӧса дитьн, у әз жи бумә мьна ԝан. Гава әз әʹмьре хԝәйи бәре дькьм бира хԝә, әз фәʹм дькьм кӧ әз бь ньгәки ль рʹастийе у бь ньгәки дьн ль дьнйайе сәкьни бум, у әз нә ԝьрда, нә жи веда бум.

ДӘРСӘКӘ ФӘРЗ

Ԝәкә дӧ сал шунда, мьн хушкәк нас кьр, йа кӧ али мьн кьр кӧ әз ль сәр жийина хԝә бьфькьрьм. Әз тʹәви пенщ хушкед азәп ль маләке дьмам, у мә бәрпьрсийаре мьһале у жьна ԝи Тамара тʹәглиф кьрьн кӧ әԝ һʹәфтеки бал мә бьминьн. Ԝәхта кӧ мере ԝе бь ише щьвате мьжул дьбу, Тамарайе тʹәви мә ԝәхт дәрбаз дькьр, у әм тʹәвайи гәләк дькʹәнийан. Әв йәк ль дьле мьн пʹьрʹ хԝәш дьһат. Әз шаш мам кӧ кәсәк чаԝа дькарә һьм жь алийе рʹӧһʹанива һаԛас ԛәԝи бә һьм жи һаԛас бәхтәԝар у һʹәнәкчи бә.

Дьле Тамарайе бь һʹьзкьрьна рʹастийе дькʹәлийа. Әԝе хьзмәта хԝә гәләк һʹьз дькьр, у хирәта ԝе ль сәр кәсед дьн жи һʹӧкӧм дькьр. Әԝе хирәт дькьр кӧ чьԛас жь дәсте ԝе дьһат Йаһоԝарʹа хьзмәт бькә, ле мьн бь зоре хьзмәт дькьр у жь ве йәке шабун нәдьстанд. Ньһерʹандьна ԝе йа позитиф у дьлшадийа ԝе, ль сәр жийина мьн кʹур һʹӧкӧм кьр. Мәсәла ԝе дина мьн кʹьшанд сәр рʹастикә сәрәкә: Йаһоԝа дьхԝазә кӧ әм «бь шабуне» жерʹа хьзмәт бькьн (Зәбур 100:2).

ХԜӘСТЬНА МЬН ЗЕДӘ ДЬБӘ КӦ ӘЗ ХЬЗМӘТ БЬКЬМ

Мьн дьхԝәст кӧ әз жи мина Тамарайе бәхтәԝар бьм, ле бона ве йәке, лазьм бу кӧ әз һьнә тьштед фәрз бькьм. Ԝәхт лазьм бу, у бь зәманрʹа, мьн һьнә гавед бьчʹук авитьн. Мьн ида хԝә бона хьзмәте һазьр дькьр, у әз щар щара дьбум пешәнга кʹомәкдар. Бь ви щурʹәйи, хԝәбаԝәрийа мьн зедә бу. Һәр кӧ мьн Кʹьтеба Пироз дьда хәбате, мьн жь хьзмәте дьһа шабун дьстанд. Пʹьрʹ ԝәхт дәрбаз нәбу кӧ мьн һәр мәһ ча пешәнга кʹомәкдар хьзмәт дькьр.

Ӧса жи, мьн тʹәви мьзгинванед хирәт ԝәхт дәрбаз дькьр. Мәсәла ван хушк у бьред щаһьл у йед әʹмьрда мәзьн али мьн кьр кӧ әз сафи бькьм кӧ дь жийина мьнда чь фәрз ә. Ӧса жи, мьн Кʹьтеба Пироз һәр рʹож дьхԝәнд. Хьзмәт чьԛас кӧ дьчу ль мьн хԝәш дьһат, у ахьрийеда, әз бум пешәнга һәртʹьм. Щьват диса бу ча малбәта мьн!

ҺӘВАЛӘКИ НУ

Саләк шунда, мьн бьраки бь наве Алекс нас кьр, мәрьвәки назьк у дьлован, йе кӧ Йаһоԝа у хьзмәте гәләк һʹьз дькьр. Ль ԝе дәме, әԝ бәрдәстийе щьвате бу, у ида шәш сал бу кӧ әԝ пешәнг бу. Ӧса жи, Алекс чәнд сал ль Малаԝйе хьзмәт кьрьбу. Ль ԝе дәре, әԝи тʹәви һьнә мисйонера ԝәхт дәрбаз кьрьбу, у һәвалтийа ԝан әԝ һелан кьрьбу кӧ әԝ жь һәр тьшти зедәтьр ль Пʹадшатийе бьгәрʹә.

Дь сала 2003-да, әм зәԝьщин, у жь ԝе дәмева, мә ԛәт хьзмәта һәртʹьм нәдайә сәкьнандьне. Әм гәләк дәрсед фәрз һин бунә, у Йаһоԝа әм гәләк бь щурʹә кʹәрәм кьрийә.

КʹӘРӘМЕД НУ

Дь сала 2009-да, әм һатьн тʹәглиф кьрьн кӧ ча мисйонер һәрʹьн Тимор-Ләстәйе (Әндонәзйа). Гава кʹьфшкрьна мә һат, әм һьм әʹщебмайи ман һьм жи бәрхԝә дькʹәтьн. Пенщ мәһ шунда, әм чунә бажаре Дилийе, пʹайтәхта Тимор-Ләстәйе.

Жийина мә бь тʹәмами һатә гӧһастьн. Лазьм бу кӧ әм һини културәкә ну, зьманәки ну, хԝарьнед ну у ԝарәки ну бьбьн. Гава әм дьчун хьзмәте, мә гәләк щара һʹӧкӧмед фәԛири, нәхԝәндибун у бьндәстийе дьдитьн. Мә дьдит кӧ шәрʹ у зӧльме ль сәр гәләк кәса чьԛас хьраб һʹӧкӧм кьрьбу.a

Диса жи, хьзмәт гәләк хԝәш бу! Мәсәлә, әз щарәке рʹасти кәчʹькәкә 13 сали йа бь наве Мариа һатьм.b Әԝ хәмгин бу, чьмки дийа ԝе чәнд сал бәре мьрьбу, у әԝе баве хԝә щар щара дьдит. Мина гәләк зарʹед дьн, Мариа жи беһеви дьжит. Те бира мьн кӧ әԝе щарәке дьле хԝә мьнрʹа вәкьр у гьрийа. Ле мьн фәʹм нәдькьр кӧ әԝ чь дьбежә, чьмки мьн зьмане ԝе һе рʹьнд ньзаньбу. Ләма, мьн жь Йаһоԝа аликʹари хԝәст сәва кӧ әз бькарьбьм бәр дьле ԝеда бем, у мьн ԝерʹа һьнә рʹез хԝәндьн кӧ дьле ԝе рʹьһʹәт бькьм. Нава чәнд салада, мьн дит кӧ рʹастийа Кʹьтеба Пироз ньһерʹандьн, кʹьнщхԝәкьрьн, хәмьландьн у жийана Мариайе чаԝа дьгӧһаст. Мариа һатә ньхӧмандьне, у ньһа әԝ жи һинбунед Кʹьтеба Пироз дәрбаз дькә. Ньһа, әԝ дь нав хушк у бьрада гәләк бәхтәԝар ә.

Йаһоԝа ише хԝә ль Тимор-Ләстәйе кʹәрәм дькә. Пʹьрʹанийа мьзгинвана нава 10 салед пашԝәхтийеда һатьнә ньхӧмандьне. Гәләк жь ԝан ньһа пешәнг, бәрдәстийед щьвате йан рʹуспийед щьвате нә. Һьнәк жи дь офиса ԝәлгәрʹандьнеда хԝарьна рʹӧһʹани бь зьманед һәреми һазьр дькьн. Гава әз дьбьһем кӧ әԝана чаԝа ль щьвина бь дьл у щан кʹьлама дьстьред у жь алийе рʹӧһʹанива пешда дьчьн, әз гәләк ша дьбьм.

ЖИЙАНА ҺӘРИ БАШ

Жийина ль Тимор-Ләстәйе жь жийина ль Австралйайе пʹьрʹ щӧда бу, ле гәләк хԝәш бу. Отобус щарна гәләк тʹьжә дьбу, у әм дь нав мәрьв, мәʹсийед һʹьшккьри у сәбзәда рʹудьньштьн. Ль һьнә рʹожа, әм бона һинбунед Кʹьтеба Пироз дьчун малькед бьчʹук, гәрм, шьл у әрдах. Ль дәрдора мә, мьришк дьгәрʹийан. Диса жи, әз гәләк щара дьфькьрим кӧ жийина мә чьԛас хԝәш ә!

Әз шькьрдар ьм кӧ гава әз жь алийе рʹӧһʹанива сьст бум, де у баве мьн диса жи дәсте мьн бәрʹнәдьда, у али мьн дькьрьн. Готьнед Мәтʹәлок 22:6 чьԛас рʹаст ьн! Де у баве мьн гәләк ша нә кӧ әз у Алекс шьхӧле Йаһоԝа дькьн. Дь сала 2016-да, Алекс ль һәрема Австралйайе ча бәрпьрсийаре мьһале һат кʹьфш кьрьн.

Әз фәʹм накьм кӧ гава әз щаһьл бум, хьзмәт ль мьн чьма гьран дьһат. Ньһа әз жь хьзмәте гәләк һʹьз дькьм! Мьн дитийә кӧ дь жийинеда, тʹәне хьзмәта Хԝәде дькарә мә бь рʹасти бәхтәԝар кә. Бәле, 18 салед кӧ мьн у Алекс тʹәвайи Йаһоԝарʹа хьзмәт кьрийә гәләк хԝәш дәрбаз бун. Ньһа әз бь тʹәмами фәʹм дькьм ԝан гьлийед кӧ Даԝьд Пʹадша Йаһоԝарʹа готьбу: «Һʹәмуйед хԝә спартьнә Тә бьра ша бьн, һʹәта-һʹәтайе әшԛа бьстьрен, бьн сийа дәсте Тәда бьн, йед наве Тә һʹьз дькьн, бьра пе Тә бәшәрхԝәш бьн» (Зәбур 5:11).