Йаһоԝа Тә Ԛимәт Дькә!

1. Йаһоԝа ча сәр мә дьньһерʹә?

ЙАҺОԜА ХԜӘДЕ «щьмәʹта Хԝә бәгәм дькә» (Зәбур 149:4). Бәле, Йаһоԝа һʹӧнӧред мә йед баш дьвинә, әԝ ӧса жи фәрәсәт у синоред мә занә, у әԝ мә дькʹьшинә бәрбь хԝә. Һәгәр әм ԝирʹа амьн бьминьн, әԝе һʹәта-һʹәтайе кʹеләка мә бә (Йуһʹәнна 6:44).

2. Һьнәк чьма дьфькьрьн кӧ Йаһоԝа ԝана һʹьз накә?

² Һьнәк дьбәкә ӧса дьфькьрьн: «Әз заньм кӧ Йаһоԝа щьмәʹта хԝә һʹьз дькә, ле әз чаԝа дькарьм баԝәр бьм кӧ әԝ хут мьн ԛимәт дькә?» Гәло һьнә кәс чьма ӧса дьпьрсьн? Хушкәкә бь наве Оксанаb, йа кӧ жь бьчʹуктайеда рʹасти гәләк кӧл-дәрда һатийә, ӧса дьбежә: «Гава әз һатьм ньхӧмандьне у бумә пешәнг, әз гәләк ша бум. Ле 15 сал шунда, биранинед хьраб һатьн бира мьн. Әз дьфькьрим кӧ Йаһоԝа ида жь мьн рʹази нинә у кӧ әз лайиԛи һʹьзкьрьна ԝи ниньм». Бьчʹуктайа хушкәкә пешәнг бь наве Йуа жи нәбаш дәрбаз бу. Әԝ дьбежә: «Мьн дьхԝәст дьле Йаһоԝа ша бькьм, ләма жи мьн ԝирʹа соз да, ԝәки әзе һʹәта-һʹәтайе ԝирʹа хьзмәт бькьм. Диса жи, мьн баԝәр дькьр кӧ әз һежайи һʹьзкьрьна ԝи ниньм».

3. Ве готареда, әме дина хԝә бьдьн чь?

³ Мина ван хушкед амьн, тӧ жи Йаһоԝа гәләк һʹьз дьки, ле дьбәкә тӧ дӧдьли дьби кӧ әԝ тә һʹьз дькә. Гәло чьрʹа фәрз ә кӧ тӧ баԝәр би кӧ әԝ бь рʹасти бона тә хәм дькә у тә һʹьз дькә? Чь дькарә али тә бькә кӧ тӧ фькред нәбаш жь сәре хԝә дәрхи? Кʹа әм дина хԝә бьдьн щабен ван пьрса.

ДӦДЬЛИ НӘБӘ КӦ ЙАҺОԜА ТӘ ҺʹЬЗ ДЬКӘ

4. Гәрәке әм чьрʹа дӧдьли нәбьн кӧ Йаһоԝа мә һʹьз дькә?

⁴ Һʹьзкьрьн дькарә һелан у ԛәԝате бьдә мә. Һәгәр әм баԝәр бьн кӧ Йаһоԝа мә һʹьз дькә у пьштгьрийа мә дькә, әв йәк ԝе али мә бькә кӧ әм ԝәʹде тәнгасийа бь дьл у щан ԝирʹа хьзмәт бькьн. Жь алийе дьнва жи, һәгәр әм дӧдьли бьн кӧ Хԝәде бона мә хәм дькә, ԛәԝата мә ԝе сьст бә (Мәтʹәлок 24:10). Сәрда, һәгәр әм мерхасийа хԝә ӧнда бькьн у баԝәр нәкьн кӧ Йаһоԝа мә һʹьз дькә, Шәйтʹан ԝе һеса бькарьбә һʹьщуми сәр мә бькә (Әфәси 6:16).

5. Һәгәр әм шьк бьбьн кӧ Хԝәде мә һʹьз дькә, әв йәк дькарә ль сәр мә чаԝа һʹӧкӧм бькә?

⁵ Һьнә хушк-бьред мә сәва шькед хԝә алийе рʹӧһʹанида сьст бунә. Рʹуспики бь наве Щеймс ӧса дьбежә: «Рʹаст ә мьн Бәйтʹәледа хьзмәт дькьр у жь хьзмәта ль щьвата бь зьманәки хәриб шабун дьстанд, йәкә әз дӧдьли дьбун кӧ Йаһоԝа ԛӧрбанед мьн бь рʹасти ԛәбул дькә. Ԝәхтәке, әз һәла һе кʹәтьмә шьке жи, ԝәки Йаһоԝа гӧһ дьдә дӧайед мьн». Хушкәкә бь наве Әва, йа кӧ ль Бәйтʹәле хьзмәт дькә, дьбежә: «Мьн дит кӧ һәгәр тӧ шьк бьби кӧ Йаһоԝа тә һʹьз дькә, әв йәк дькарә ль сәр тә гәләк хьраб һʹӧкӧм кә. Тӧйе хԝәстьна хԝә бона тьштед рʹӧһʹани у шабуна кӧ тӧ жь хьзмәта Йаһоԝа дьстини, ӧнда бьки». Бьраки бь наве Майкл, йе кӧ ча пешәнге һәртʹьм у рʹуспи хьзмәт дькә, дьбежә: «Һәгәр тӧ баԝәр наки кӧ Хԝәде бона тә хәм дькә, тӧйе һеди-һеди жь ԝи дур кʹәви.»

6. Һәгәр әм һʹьзкьрьна Хԝәдеда дӧдьли дьбьн, гәрәке әм чь бькьн?

⁶ Сәрһатийед ван хушк-бьра мә һин дькьн кӧ фькред негатиф дькарьн зьраре бьдьн достийа мә тʹәви Йаһоԝа. Ләма, һәгәр дәрһәԛа һʹьзкьрьна Хԝәде шьк бькʹәвьн дьле мә, гәрәке әм ван шька зу жь дьле хԝә дәрхьн. Гәрәке әм аликʹарийе жь Йаһоԝа бьхԝазьн, кӧ «әʹдьлайийа Хԝәде» бьдә мә, кӧ һʹьш у дьле мә хԝәй кә (Зәбур 139:23; Филипи 4:6, 7). Ӧса жи, бир нәкә кӧ тӧ тʹәне нини. Хушк у бьред дьн жи һьмбәри фькред негатиф шәрʹ дькьн. Һьнә хьзмәткʹаред Йаһоԝа йед бәре жи щарна рʹасти тәнгасийед ӧса дьһатьн. Ԝәрә әм бьньһерʹьн кӧ жь сәрһатийа Паԝлос әм чь дәрса дькарьн һин бьн.

ДӘРСЕД КӦ ӘМ ЖЬ СӘРҺАТИЙА ПАԜЛОС ДЬСТИНЬН

7. Чь проблемед Паԝлос һәбун?

⁷ Гәло щабдарийед тә гәләк ьн? Гәло әв щарна бона тә дьбьн баргьрани? Щабдарийед Паԝлосе шанди жи гәләк бун. Әԝи нә тʹәне бона щьватәке, ле бона һʹәму щьвата хәм дькьр у бәрхԝә дькʹәт (2 Корьнтʹи 11:23-28). Гәло нәхԝәшикә тә шабуне жь тә дьстинә? Те кʹьфше кӧ нәхԝәшикә Паԝлос жи һәбу, чьмки әԝи гот кӧ дь бәдәна ԝида «стьрийәк» һәйә, у әԝи гәләк дьхԝәст жь ве бьфьльтә (2 Корьнтʹи 12:7-10). Гәло тӧ щарна сәва кемасийед хԝә әʹщьз дьби? Паԝлос жи сәва кемасийед хԝә әʹщьз дьбу, ләма әԝи ӧса гот: «Әз чь мәрьвәки һесир-бәләнгаз ьм!» (Рʹомайи 7:21-24).

8. Чь али Паԝлос дькьр?

⁸ Нава ван проблем у тәнгасийада, Паԝлос бәрдәԝам дькьр Йаһоԝарʹа хьзмәт кә. Гәло чь али ԝи дькьр? Паԝлос һьлбәт һаш жь кемасийед хԝә һәбу, ле ԝи баԝәрийа хԝә ԛӧрбана Иса дьани. Әԝи рʹьнд заньбу кӧ Иса Мәсиһ готьбу ԝәки «һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹәнна 3:16; Рʹомайи 6:23). Паԝлос бешьк баԝәрийа хԝә кʹьрʹине дьани. Әԝ баԝәр бу кӧ һәгәр кәсәки гӧнәки гьран кьрьбә жи, һәгәр әԝ жь дьл тʹобә бькә, Йаһоԝа һазьр ә кӧ бьбахшинә ԝи (Зәбур 86:5).

9. Әм дькарьн жь готьнед Паԝлос йед ль Галати 2:20 чь һин бьн?

⁹ Ӧса жи, Паԝлосе шанди бь ԛәԝата һʹьзкьрьна кӧ Хԝәде бь дәсте Мәсиһ әʹйан кьрьбу, баԝәр бу (Галати 2:20 бьхунә). Дина хԝә бьдә готьнед Паԝлос йед ль хьлазийа ве рʹезе: «Кӧрʹе Хԝәде . . . әз һʹьз кьрьм у щанийа хԝә бона мьн да дәр». Паԝлос нәдьфькьри кӧ һʹьзкьрьна Хԝәде бьсинор ә, у әԝ нәдьфькьри кӧ Йаһоԝа хушк-бьра һʹьз дькә, ле ԝи һʹьз накә. Паԝлос хушк у бьред ль Рʹомайерʹа ӧса гот: «Гава әмә һе гӧнәкʹар бун, Мәсиһ бона мә мьр» (Рʹомайи 5:8). Бәле, синоред һʹьзкьрьна Хԝәде тʹӧнә!

10. Әм жь Рʹомайи 8:38, 39 чь һин дьбьн?

¹⁰ Рʹомайи 8:38, 39 бьхунә. Паԝлосе шанди һʹьзкьрьна Хԝәдеда баԝәр бу. Әԝи ньвиси кӧ тʹӧ тьшт нькарә мә жь һʹьзкьрьна Хԝәде вәԛәтинә. Паԝлос заньбу кӧ Йаһоԝа чаԝа сәбра хԝә мьләте Исраелрʹа нишан кьрьбу. Әԝи дьлрʹәʹмийа Йаһоԝа сәр хԝә жи дитьбу. Бәле, Паԝлосе шанди баԝәр бу кӧ һәгәр Йаһоԝа Кӧрʹе хԝә бона ԝи ԛӧрбан кьрьбу, тʹӧ шьк тʹӧнә кӧ әԝ ԝи һʹьз дькә (Рʹомайи 8:32).

11. Рʹаст ә Паԝлос гӧнед гьран кьрьбун, ле әԝ чьрʹа баԝәр бу кӧ Хԝәде ԝи һʹьз дькә?

¹¹ 1 Тимотʹейо 1:12-15 бьхунә. Һәбу ԝәʹдә гава Паԝлосе шанди сәва гӧнед хԝә йед бәре әʹщьз дьбу. Әԝи сәр хԝә гот кӧ йе һәри гӧнәкʹар әԝ ә. Бь рʹасти жи, пешийа кӧ Паԝлос һат сәр рʹийа рʹастийе, әԝи гәләк бажарада шагьртед Иса Мәсиһ дьзерандьн. Әԝи һьнәка жь ԝан давитьн кәле у кӧштьна ԝан ԛәбул дькьр (Кʹаред Шандийа 26:10, 11). Бьдә бәр чʹәʹве хԝә кӧ Паԝлос рʹасти бьраки щаһьл һат, йе кӧ жь бо зерандьна Паԝлос де-баве хԝә ӧнда кьрьбу. Фәʹмдари йә Паԝлос ԝе гәләк хәмгин буйа. Бәле, Паԝлос жь шашийед хԝә йед бәре пʹошман бу, ле әԝи нькарьбу тьштед кӧ ида ԛәԝьмибун бьгӧһезә. Әԝ баԝәр бу кӧ Иса Мәсиһ әʹмьре хԝә бона ԝи дабу, у әԝи ньвиси: «Әз бь кʹәрәма Хԝәде мә чь жи һәмә» (1 Корьнтʹи 15:3, 10). Әм дькарьн жь ве йәке чь һин бьн? Ԛәбул бькә кӧ Иса Мәсиһ әʹмьре хԝә бона тә кьрә ԛӧрбан у рʹе вәкьрийә ԝәки тӧ бьби досте Йаһоԝа (Кʹаред Шандийа 3:19). Дьбә кӧ пешийа рʹастийе йан жи гава әм бунә Шәʹдед Йаһоԝа, мә гӧнә кьрийә. Ле бона Хԝәде тьште фәрз нә әв ә кӧ мә бәре чь кьрийә, ле әв ә кӧ әм ньһа чь дькьн у ахьрийеда әме чь бькьн (Ишайа 1:18).

12. Һәгәр әм хԝә беԛимәт һʹәсаб дькьн, готьнед 1 Йуһʹәнна 3:19, 20 чаԝа дькарьн али мә бькьн?

¹² Гава тӧ дьфькьри кӧ Иса Мәсиһ әʹмьре хԝә бона гӧнед тә дайә, тӧ дьбәкә дьбежи: «Әз һежайи ве пʹешкʹеше ниньм.» Гәло чь дькарә бьбә сәбәб кӧ тӧ ӧса бьфькьри? Әм гӧнәкʹар ьн, ләма жи дьле мә дькарә мә бьдә баԝәркьрьне кӧ әм һежайи ве йәке ниньн у бекер ьн (1 Йуһʹәнна 3:19, 20 бьхунә). Ԝи чахи, гәрәке әм биньн бира хԝә кӧ «Хԝәде жь дьле мә мәстьр ә». Һʹьзкьрьн у бахшандьна Баве мәйи әʹзмана, жь фькред мә йед негатиф ԛәԝитьр ьн. Гәрәке әм ӧса сәр хԝә бьньһерʹьн, чаԝа кӧ Йаһоԝа сәр мә дьньһерʹә. Сәва ве йәке гәләк фәрз ә кӧ әм бәрдәԝам кьн дӧа бькьн, Кʹьтеба Пироз леколин бькьн у тʹьме тʹәви хьзмәткʹаред ԝи тʹоп бьн. Гәло чьма?

ЛЕКОЛИНА КЬТЕБА ПИРОЗ, ДӦА У ДОСТЕД АМЬН ДЬКАРЬН АЛИ ТӘ БЬКЬН

13. Леколина Хәбәра Хԝәде чаԝа дькарә али мә бькә? (Чаргошә «Хәбәра Хԝәде Чаԝа Али Ԝан Дькә?» бьньһерʹә.)

¹³ Кʹьтеба Пироз һәр рʹож леколин бькә. Әв йәк ԝе али тә бькә кӧ тӧ дьлгәрмийа Йаһоԝа дьһа зәлал бьвини. Бь сайа леколина Кʹьтеба Пироз, тӧйе фәʹм бьки кӧ әԝ тә чьԛас һʹьз дькә. Һәр рʹож ль сәр Хәбәра Хԝәде кʹур бьфькьрә. Бь ве йәке, фькред тә жи ԝе бенә «рʹасткьрьне» (2 Тимотʹейо 3:16). Рʹуспики бь наве Кевин, йе кӧ хԝә щарна беԛимәт һʹәсаб дькьр, дьбежә: «Хԝәндьна Зәбура 103 у фькьрандьна кʹур сәр ве зәбуре али мьн кьр кӧ әз фькред хԝә рʹаст бькьм у фәʹм бькьм кӧ Йаһоԝа мьн бь рʹасти чаԝа дьвинә». Хушка мә Ева, йа кӧ мә жоре бәʹса ԝе кьрьбу, ӧса дьбежә: «Хьлазийа рʹоже, әз ль сәр готьнед Йаһоԝа кʹур дьфькьрьм. Әв йәк дьлрьһʹәтийе дьдә мьн у баԝәрийа мьн дьһа ԛәԝи дькә».

14. Дӧа чаԝа дькарә али мә бькә?

¹⁴ Һәр гав дӧа бькә (1 Тʹесалоники 5:17). Достед рʹаст гәләк щар бь дьл тʹәви һәв хәбәр дьдьн. Достийа мә тʹәви Йаһоԝа жи гәрәке ӧса бә. Гава әм дӧайед хԝәда ԝирʹа бәʹса һәст, фькьр у дәрдед хԝә дькьн, әм нишан дькьн кӧ әм хԝә дьсперьн ԝи у заньн кӧ әԝ мә һʹьз дькә (Зәбур 94:17-19; 1 Йуһʹәнна 5:14, 15). Йуа, йа кӧ мә жоре бәʹса ԝе кьрьбу, дьбежә: «Ԝәхта кӧ әз дӧа дькьм, әз нә тʹәне дьбежьм кӧ мьн ԝе рʹоже чь кьр, ле әз дьле хԝә Йаһоԝарʹа вәдькьм у ԝирʹа бәʹса һәстед хԝә дькьм. Әз рʹьнд избат бумә кӧ Йаһоԝа нә ча мәзьне хәбате йә кӧ гьшка контрол дькә, ле ча бавәки дьлован ә, йе кӧ зарʹед хԝә гәләк һʹьз дькә» (Бьньһерʹә чаргошә «Тә Әԝ Кʹьтеб Хԝәндийә?»).

15. Йаһоԝа һʹьзкьрьна хԝә чаԝа нишан дькә?

¹⁵ Тʹәви достед амьн ԝәхт дәрбаз кә. Әԝана пʹешкʹешед жь Йаһоԝа нә, у бь дәсте ԝан, Йаһоԝа һʹьзкьрьна хԝә мәрʹа нишан дькә (Аԛуб 1:17). Ча Кʹьтеба Пироз дьбежә: «Һәвал һәр гав һʹьз дькә, бьра буйә бона рʹожа охьрме гьран» (Мәтʹәлок 17:17). Дь нәʹма Колосийарʹада, Паԝлосе шанди гот кӧ әԝи жь һьнә бьра дьлбиникә мәзьн стандьбу (Колоси 4:10, 11). Иса Мәсиһ жи бона аликʹарийа кӧ әԝи жь достед хԝә – һьм жь мәләка һьм жи жь инсана – стандьбу, рʹази бу (Луԛа 22:28, 43).

16. Достед баш чаԝа дькарьн али мә бькьн кӧ әм незики Йаһоԝа бьн?

¹⁶ Ле тӧ аликʹарийа хушк у бьра ԛәбул дьки? Һәгәр тӧ достәки гьһиштирʹа бәʹса дәрдед хԝә бьки, әв йәк найе һʹәсабе кӧ баԝәрийа тә сьст ә. Хәбәрданед ӧса дькарьн тә бьпарезьн. Щеймс, йе кӧ мә жоре бәʹса ԝи кьрьбу, ӧса дьбежә: «Достийа тʹәви хушк у бьред гьһишти гәләк али мьн кьрийә. Гава фькред негатиф мьн әʹщьз дькьн, достед мьн йед ԛимәт бь сәбьр гӧһ дьдьн мьн у дьбежьн кӧ мьн һʹьз дькьн. Әв йәк нишани мьн дькә кӧ Йаһоԝа мьн һʹьз дькә у бона мьн хәм дькә». Бәле, гәләк фәрз ә кӧ әм тʹәви хушк у бьра достийе бькьн!

ҺʹЬЗКЬРЬНА ЙАҺОԜАДА БЬМИНӘ

17-18. Гәрәке әм гӧһ бьдьн кʹе, у чьма?

¹⁷ Шәйтʹан дьхԝазә кӧ әм сьст бьн у тьштед рʹаст нәкьн. Әԝ дьхԝазә мә бьдә баԝәркьрьне кӧ Йаһоԝа мә һʹьз накә у кӧ әм һежайи хьлазбуне ниньн. Ле чаԝа мә дит, әв йәк дәрәԝ ә.

¹⁸ Йаһоԝа тә һʹьз дькә. Әԝ гәләк тә ԛимәт дькә. Һәгәр тӧ тʹәмийед Йаһоԝа бини сери, тӧйе мина Иса Мәсиһ һʹәта-һʹәтайе һʹьзкьрьна Хԝәдеда бьмини (Йуһʹәнна 15:10). Ләма жи, гӧһ нәдә Мире-щьна. Һәгәр дьле тә тәрʹа дьбежә кӧ Йаһоԝа тә һʹьз накә, гӧһ нәдә дьле хԝә. Гӧһ бьдә Йаһоԝа, йе кӧ кьрьнед мә йед ԛәнщ дьвинә. Баԝәр бә кӧ әԝ «щьмәʹта хԝә» у тә һʹьз дькә!