Баԝәр Бә кӧ Йаһоԝа Тә Һʹәз Дькә

1. Тә чьма сонд хԝар, ԝәки тӧйе һʹәта-һʹәтайе Йаһоԝарʹа хьзмәт ки? (Бьньһерʹә ӧса жи шькьл.)

ТЕ БИРА тә кӧ тә ча сонд хԝарьбу ԝәки тӧйе һʹәта-һʹәтайе Йаһоԝарʹа хьзмәт ки? Тә әв йәк сафи кьр, чьмки тә Йаһоԝа һʹәз кьр. Ԝе дәме тә соз да ԝәки тӧйе бь тʹәмамийа дьле хԝә, щанийа хԝә, һʹьше хԝә у ԛәԝата хԝә ԝи һʹәз бьки (Маркос 12:30). Жь ԝи чахи һʹәзкьрьна тә һьндава ԝи дьһа ԛәԝи буйә. Ләма жи һәрге кәсәки жь тә бьпьрсийа, «Гәло тӧ Йаһоԝа бь рʹасти һʹәз дьки?», тәйе бе шьк бьгота, «Әре, әз жь һәр кәси у һәр тьшти зедәтьр Ԝи һʹәз дькьм!»

2-3. Йаһоԝа дьхԝазә кӧ әм чьда баԝәр бьн, у ве готареда әме дәрһәԛа чь хәбәр дьн? (Йерәмйа 31:3)

² Бәле, тӧ Йаһоԝа һʹәз дьки, ле дьԛәԝьмә тӧ дӧдьли дьби ве йәкеда кӧ әԝ тә һʹәз дькә. Хушкәкә кӧ зарʹотийа ԝе чәтьн дәрбаз бьбу, ӧса гот: «Әз заньм, ԝәки әз Йаһоԝа һʹәз дькьм, у ве йәкеда ԛә дӧдьли набьм. Ле әз баԝәр ниньм ве йәкеда кӧ Йаһоԝа мьн һʹәз дькә». Гәло тӧ ча дькари пебьһʹәси һәла ньһерʹандьна Йаһоԝа һьндава тәда чь щурʹәйи йә?

³ Йаһоԝа дьхԝазә ԝәки тӧ баԝәр би кӧ әԝ тә һʹәз дькә (Бьхунә Йерәмйа 31:3). Рʹасти әв ә, кӧ Йаһоԝа тә кʹьшандә бәрбь хԝә. Гава тә сонд хԝар кӧ тӧйе ԝирʹа хьзмәт ки у бейи ньхӧмандьне, тә тьштәки гәләк ԛимәт станд, һʹәзкьрьна ԝийә амьн. Әԝ тә гәләк һʹәз дькә у әԝе тә тʹӧ щара тʹәне нәһелә. Йаһоԝа һʹәму хьзмәткʹаред хԝә һʹәз дькә у ԝана ча мьлкʹе хԝәйи ԛимәт һʹәсаб дькә, у ньһерʹандьна ԝи һьндава тә жи һәма ӧса нә (Малахи 3:17). Чаԝа кӧ Паԝлосе шанди баԝәр бу, ԝәки Йаһоԝа ԝи һʹәз дькә, Йаһоԝа дьхԝазә ԝәки тӧ жи баԝәр би кӧ әԝ тә һʹәз дькә. Паԝлос ӧса ньвиси: «Әз баԝәр ьм кӧ тʹӧ тьшт нькарә мә жь һʹәзкьрьна Хԝәде бьԛәтинә: Нә мьрьн, нә жийин, нә мәләк, нә сәрԝерти, нә тьштед ньһа, нә тьштед кӧ ԝе бен, нә ԛәԝат, нә бьльндайи, нә кʹурайи, нә жи әʹфринәки дьн. Ԛә тʹӧ тьшт нькарә мә жь һʹәзкьрьна Хԝәде бьԛәтинә» (Рʹомайи 8:38, 39). Ве готареда әме бьвиньн кӧ чьма фәрз ә баԝәрийа хԝә дьһа ԛәԝи кьн һьндава ве йәке, кӧ Йаһоԝа мә һʹәз дькә у ча әм дькарьн ве йәке бькьн.

ЧЬМА ФӘРЗ Ә ҺʹӘЗКЬРЬНА ЙАҺОԜАДА БАԜӘР БЬН?

4. Әм ча дькарьн нәкʹәвьнә тʹәлькед Мире-щьна?

⁴ Баԝәрбуна һьндава һʹәзкьрьна Йаһоԝа али мә дькә «нәкʹәвьнә тʹәлькед Мире-щьна» (Әфәси 6:11). Мире-щьна дьхԝазә ԝәки әм тʹәрка хьзмәтийа Йаһоԝа бьдьн. Әԝ гәләк хирәт дькә кӧ бьгьһижә ве нете. Мәсәлә, әԝ һәр тьшти дькә ԝәки мә бьдә баԝәркьрьне кӧ Йаһоԝа мә һʹәз накә. Ле әв йәк дәрәԝ ә. Кʹьтеба Пироз Мире-щьна бәрамбәри шерәки бьрʹчи дькә (1 Пәтрус 5:8, 9). Шер һʹьщуми сәр һʹәйԝанед сьст дькьн, йед кӧ нькарьн хԝә бьпʹарезьн. Мина ве йәке, Мире-щьна мәщала дьгәрʹә ԝәки һʹьщуми сәр мә бькә гава әм дьлтәнг ьн, мәсәлә жь бо тьштед кӧ бәре һатьбунә сәре мә, жь бо чәтьнайед кӧ әм ньһа дькʹьшиньн, йан жи жь бо ве йәке кӧ әм ахьрийе дьтьрсьн (Мәтʹәлок 24:10). Әԝ дьхԝазә ԝәки әм ԛьдум кʹәвьн у тʹәрка хьзмәтийа Йаһоԝа бьдьн. Ләма жи, сәва кӧ әм бькарьбьн «мьԛабьли Мирещьн бьсәкьньн», әм гәрәке сәд сәләфи баԝәр бьн ԝәки Йаһоԝа мә һʹәз дькә (Аԛуб 4:7).

5. Чьма фәрз ә кӧ әм һʹәзкьрьна Йаһоԝада баԝәр бьн?

⁵ Гава әм баԝәр ьн ве йәкеда кӧ Йаһоԝа мә һʹәз дькә, әм дьһа незики ԝи дьбьн. Гәло чьма? Йаһоԝа мә ӧса әʹфьрандийә кӧ әм һьм хԝәха һʹәз бькьн һьм жи һʹәԝщә нә, ԝәки кәсед дьн мә һʹәз бькьн. Гава кәсәк мә һʹәз дькә, әм жи ԝи һʹәз дькьн. Ләма жи, чьԛас әм дьвиньн ԝәки Йаһоԝа мә һʹәз дькә у ԛимәт дькә, һаԛас әм жи дьһа зедә ԝи һʹәз дькьн (1 Йуһʹәнна 4:19). Сал пәй саларʹа һʹәзкьрьна мә һьндава һәвда дьһа ԛәԝи дьбә. Кʹьтеба Пироз ӧса дьбежә: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8). Ле әм ча дькарьн баԝәрийа хԝә һьндава ве йәке ԛәԝи кьн ԝәки Йаһоԝа мә һʹәз дькә?

ЧЬ ДЬКАРӘ АЛИ МӘ БЬКӘ ҺʹӘЗКЬРЬНА ЙАҺОԜАДА БАԜӘР БЬН?

6. Сәва кӧ әм һʹәзкьрьна Йаһоԝада баԝәр бьн, әм дькарьн бона чь дӧа бькьн?

⁶ Тʹьме дӧа бькә у жь Йаһоԝа аликʹарийе бьхԝазә кӧ фәʹм бьки ԝәки әԝ чьма тә һʹәз дькә (Луԛа 18:1; Рʹомайи 12:12). Һәрге лазьм бә рʹоже чәнд щара жь Йаһоԝа аликʹарийе бьхԝазә, ԝәки тӧ бькарьби бь чʹәʹве ԝи сәр хԝә бьньһерʹи. Щарна дьле тә дьбәкә тә нәһәԛ дькә у тӧ баԝәр наки, ԝәки Йаһоԝа тә һʹәз дькә. Ле бир нәкә, ԝәки Йаһоԝа жь дьле тә «мәстьр ә» (1 Йуһʹәнна 3:19, 20). Әԝ тә рʹьнд нас дькә у дьвинә тьштед баш, кӧ тӧ нав хԝәда дьԛәԝьмә навини жи (1 Самуйел 16:7; 2 Дирок 6:30). Ләма жи шәрм нәкә дьле хԝә ԝирʹа вәкә у аликʹарийа ԝи бьхԝазә, ԝәки һʹәзкьрьна ԝида баԝәр би (Зәбур 62:8). Паше ль гора дӧайе хԝә һәрәкʹәт бькә у ширәтед кӧ жере һатьнә дайине, бинә сери.

7-8. Кʹьтеба Зәбур ча нишан дькә, кӧ Йаһоԝа мә һʹәз дькә?

⁷ Итʹбарийа хԝә хәбәред Йаһоԝа бинә. Жь бина бәр Хԝәде, ньвискʹаред Кʹьтеба Пироз ньвиси нә, ԝәки Йаһоԝа бь рʹасти йәки чаԝа йә. Мәсәлә, Даԝьд Пʹадша дәрһәԛа ԝи ӧса гот: «Хӧдан незики дьлшкәстийа йә у мәʹрьм-бәләнгаза дьдәбьринә» (Зәбур 34:18). Гава тӧ хәмгин и, дьбәкә тӧ хԝә тʹәне тʹәхмин дьки. Ле Йаһоԝа соз дьдә кӧ ԝәʹде ӧса әԝе незики тә бә, чьмки әԝ дьвинә кӧ тӧ чьԛас һʹәԝще ԝи йи. Зәбурәкә дьнда, Даԝьд ӧса гот: «Һесьред мьн Тӧ бькә мәшке Хԝә» (Зәбур 56:8). Йаһоԝа чәтьнайед тә дьвинә. Әԝ бь тʹәмамийа дьл бона тә хәм дькә у дькʹәвә һʹәйра тә. Чаԝа кӧ рʹеԝик аве мәшка хԝәда хԝәй дькә, Йаһоԝа жи ча бежи һесьред чʹәʹвед тә хԝәй дькә. Зәбур 139:3 дәрһәԛа Йаһоԝа ӧса дьбежә: «Тәва әʹйан ә һʹәму рʹийед мьн». Бәле, Йаһоԝа һʹәму рʹейед тә дьвинә, ле әԝ дина хԝә дьдә ԛәнщийа кӧ тӧ дьки (Ибрани 6:10). Гәло чьма? Чьмки әԝ ԛимәт дькә хԝәстьна тә кӧ тӧ дьхԝази дьле ԝи ша ки.a

⁸ Бь сайа рʹезед кӧ дьле мә рʹьһʹәт дькьн, Йаһоԝа ча бежи мәрʹа дьбежә: «Әз дьхԝазьм нишани тә бькьм кӧ әз тә гәләк һʹәз дькьм у бона тә хәм дькьм». Ле чаԝа кӧ мә пешийа ве дит, Мире-щьна дьхԝазә тә бьдә баԝәркьрьне кӧ Йаһоԝа тә һʹәз накә. Ләма жи һәрге тӧ щарна бәр хԝә дькʹәви һәла Йаһоԝа бь рʹасти тә һʹәз дькә, жь хԝә бьпьрсә: «Әзе баԝәрийа хԝә гьлийед кʹе биньм, ‹баве дәрәԝа› йан ‹Хԝәдайе рʹастийе›?» (Йуһʹәнна 8:44; Зәбур 31:5, ИМ).

9. Йаһоԝа чь дьбежә ԝан, йед кӧ ԝи һʹәз дькьн? (Дәркʹәтьн 20:5, 6)

⁹ Бьфькьрә, кӧ Йаһоԝа чаԝа нә һьндава ԝан мәрьва, йед кӧ ԝи һʹәз дькьн. Дина хԝә бьде кӧ Йаһоԝа Муса у Исраелийарʹа чь готьбу (Бьхунә Дәркʹәтьн 20:5, 6). Йаһоԝа соз да ԝәки әԝе кәсед кӧ ԝи һʹәз дькьн, бь амьни һʹәз бькә. Әв гьли нишани мә дькьн, ԝәки Йаһоԝа пьшта хԝә надә кәсед кӧ ԝи һʹәз дькьн (Нәһәмйа 1:5). Ләма жи һәрге тӧ щарна бәр хԝә дькʹәви кӧ Йаһоԝа тә һʹәз дькә йан на, жь хԝә бьпьрсә: «Гәло әз Йаһоԝа һʹәз дькьм?» Паше бьфькьрә: Һәрге тӧ ԝи һʹәз дьки у чь жь дәсте тә те дьки, ԝәки дьле ԝи ша ки, тӧ дькари баԝәр би кӧ әԝ жи тә һʹәз дькә (Данийел 9:4; 1 Корьнтʹи 8:3). Демәк, һәрге тӧ дӧдьли наби ве йәкеда кӧ Йаһоԝа һʹәз дьки, гәрәке ве йәкеда жи дӧдьли нәби кӧ әԝ тә һʹәз дькә. Тӧ дькари баԝәр би ԝәки әԝе тʹьме тә һʹәз бькә у тʹӧ щара тә тʹәне нәһелә.

10-11. Йаһоԝа дьхԝазә ԝәки ньһерʹандьна тә һьндава кʹьрʹине чь щурʹәйи бә? (Галати 2:20)

¹⁰ Дәрһәԛа кʹьрʹине кʹур бьфькьрә. Ԛӧрбана Иса пʹешкʹешәкә лапи мәзьн ә жь Йаһоԝа, йа кӧ әԝи бона кʹара һʹәму мәрьва дайә (Йуһʹәнна 3:16). Ле гәло әв пʹешкʹеш бона тә жи һатийә дайине? Һәмьки әре! Ԝәрә әм сәрһатийа Паԝлосе шанди шеԝьр кьн. Пешийа кӧ әԝ бу шагьрте Иса, әԝи һьнә гӧнед гьран кьрьбу, у паше жи диса лазьм бу кӧ әԝ һьнә кемасийед хԝә алт кә (Рʹомайи 7:24, 25; 1 Тимотʹейо 1:12-14). Ле Паԝлос фәʹм кьр кӧ Йаһоԝа бона кʹара ԝи ԛӧрбан дайә (Бьхунә Галати 2:20). Әм заньн кӧ Паԝлос гьлийед хԝә жь бина бәр Хԝәде ньвиси, у һәр тьште кӧ Кʹьтеба Пироз дьбежә, бона һинкьрьна мә йә (Рʹомайи 15:4). Ләма жи гьлийед Паԝлос дьдьнә кʹьфше, кӧ Йаһоԝа дьхԝазә ԝәки тӧ жи ԛӧрбанбуна Иса ча пʹешкʹеша шәхси хут бона хԝә һʹәсаб ки. Һәрге ньһерʹандьна тәйә сәр ԛӧрбане ӧса бә, тӧйе һе зедә баԝәр би ԝәки Йаһоԝа тә жи һʹәз дькә.

¹¹ Әм жь Йаһоԝа рʹази нә, чьмки әԝи Иса шандә сәр әʹрде, ԝәки әʹмьре хԝә бона мә бәрва бьдә. Ӧса жи Иса һатә сәр әʹрде ԝәки мәрьварʹа рʹастийа дәрһәԛа Хԝәде бежә (Йуһʹәнна 18:37). Йәк жь ԝан рʹастийа кӧ әԝи мәрьварʹа гот әв ә, кӧ Йаһоԝа зарʹед хԝә һʹәз дькә.

ИСА ЧА АЛИ МӘ ДЬКӘ ԜӘКИ ӘМ ҺʹӘЗКЬРЬНА ХԜӘДЕДА БАԜӘР БЬН?

12. Әм чьма дькарьн баԝәрийа хԝә гьлийед Исайә дәрһәԛа Йаһоԝа биньн?

¹² Гава Иса сәр әʹрде бу, әԝи мәрьварʹа дьгот кӧ Йаһоԝа йәки чаԝа йә (Луԛа 10:22). Иса бь милйарда сала щәм Йаһоԝа бу у Йаһоԝа рʹьнд нас дькә, ләма жи әм дькарьн баԝәрийа хԝә гьлийед ԝи биньн (Колоси 1:15). Иса бь чʹәʹве хԝә дитьбу кӧ Йаһоԝа мәрьвед амьн чьԛас һʹәз дькә. Гәло әԝи ча али кәсед дьн дькьр, ԝәки әԝана һʹәзкьрьна Хԝәдеда баԝәр бьн?

13. Иса дьхԝазә кӧ ньһерʹандьна мә һьндава Йаһоԝа чаԝа бә?

¹³ Иса дьхԝазә ԝәки әм бьзаньбьн, кӧ Йаһоԝа һьндава мәда чаԝа нә. Әԝи зедәтьри 160 щара Йаһоԝа ча «Бав» нав кьр. Ӧса жи гава Иса тʹәви мәрьва хәбәр дьда, әԝи щарна дьгот ‹Баве ԝә› йан «Баве ԝәйи әʹзмана» (Мәтта 5:16; 6:26). Хьзмәткʹаред Хԝәдейә ԝәʹде бәре, чахе дәрһәԛа Йаһоԝа дьготьн йан тʹәви ԝи хәбәр дьдан, сәрнавед ӧса дьданә хәбате ча «Һьмзор», «Хԝәдайе Жорьн» у «Әʹфьрандаре һәр тьшти», ле Иса гәләк щар жерʹа дьгот «Бав». Әв йәк нишан дькә кӧ Йаһоԝа дьхԝазә ԝәки әм незики ԝи бьн, чаԝа кӧ зарʹ незики баве хԝә йә. Ԝәрә әм дӧ мәсәла шеԝьр кьн, йед кӧ дьдьнә кʹьфше ԝәки Иса хәбәра «Бав» ча дьда хәбате.

14. Иса ча нишан кьр кӧ Баве мәйи әʹзмана мә ԛимәт дькә? (Мәтта 10:29-31) (Бьньһерʹә ӧса жи шькьл.)

¹⁴ Ԝәрә әм дина хԝә бьдьнә гьлийед Иса кӧ Мәтта 10:29-31-да ньвиси нә (бьхунә). Чʹьвикед бьчʹук Йаһоԝарʹа хьзмәт накьн у нькарьн мина мәрьва ԝи һʹәз бькьн. Диса жи, Баве мә чʹьвика гәләк ԛимәт дькә, у гава йәк жь ԝан дькʹәвә сәр әʹрде, әԝ ве йәке занә. Һәрге әԝ чʹьвика ԛимәт дькә, бьфькьрә кӧ әԝ чьԛас һе зедә хьзмәткʹаред хԝәйә амьн ԛимәт дькә, йед кӧ ԝи һʹәз дькьн. Ӧса жи, Иса гот кӧ Баве мә занә кӧ чьԛас пʹорʹ сәр сәре мә һәнә. Әв йәк нишан дькә ԝәки әԝ бона мә һәр кәси хәм дькә. Бәле, Иса дьхԝазә кӧ әм баԝәр бьн ԝәки Баве мәйи әʹзмана гәләки мә ԛимәт дькә.

15. Гьлийед Иса жь Йуһʹәнна 6:44 дәрһәԛа Баве тәйи әʹзмана чь тәрʹа дьдьнә кʹьфше?

¹⁵ Дина хԝә бьдә мәсәләкә дьн, кʹижан кӧ нишан дькә ԝәки Иса хәбәра «Бав» ча дьда хәбате (Бьхунә Йуһʹәнна 6:44). Баве тәйи әʹзмана тә кʹьшандә сәр рʹийа рʹастийе. Гәло чьма? Чьмки әԝи хәйсәт-һʹӧнӧред тәйи баш дит (Кʹаред Шандийа 13:48). Дьԛәԝьмә Иса Йуһʹәнна 6:44-да бәʹса гьлийед Йерәмйа кьр, кʹижан кӧ рʹеза сәрәкә йа ве готаре йә: «Мьн бь һʹәзкьрьна һәрһәйи жь тә һʹәз кьр [демәк, мьн тә бь һʹәзкьрьна амьн бәрбь хԝә кʹьшанд]» (Йерәмйа 31:3, ИМ; бәрамбәр кә Һосәйа 11:4). Бьфькьрә кӧ әв йәк чь те һʹәсабе. Дьԛәԝьмә тӧ һьнә хәйсәт-һʹӧнӧред хԝәйә баш навини, ле Баве мәйи әʹзмана рʹьнд дьвинә.

16. а) Иса бь рʹасти чь дьхԝәст мәрʹа бьгота, у чьма гәрәке әм баԝәрийа хԝә гьлийед ԝи биньн? б) Чь дькарә али тә бькә баԝәр би, кӧ Йаһоԝа Бавәки лапи баш ә бона тә? (Бьньһерʹә чаргошә «Баве кӧ Әм Һәр Кәс Һʹәԝщә нә».)

¹⁶ Бь ве йәке кӧ Иса гот ԝәки Йаһоԝа Баве мә йә, әԝи бь рʹасти дьхԝәст бьгота: «Йаһоԝа нә тʹәне Баве мьн ә, әԝ Баве ԝә йә жи. Баԝәр бьн кӧ әԝ ԝә һʹәз дькә у дькʹәвә һʹәйра ԝә һәр кәси». Ләма жи, һәрге тӧ щарна дӧдьли дьби һәла Йаһоԝа бь рʹасти тә һʹәз дькә йан на, жь хԝә бьпьрсә: «Гәло әз гәрәке баԝәрийа хԝә гьлийед Иса нәйньм, йе кӧ Баве мә рʹьнд нас дькә у һәртʹьм рʹастийе дьбежә?» (1 Пәтрус 2:22).

БӘРДӘԜАМ КӘ БАԜӘРИЙА ХԜӘ ԚӘԜИ КӘ

17. Чьма фәрз ә кӧ әм баԝәрийа хԝә һьндава һʹәзкьрьна Йаһоԝа дьһа ԛәԝи кьн?

¹⁷ Әм гәрәке баԝәрийа хԝә һьндава һʹәзкьрьна Йаһоԝа дьһа ԛәԝи кьн. Чаԝа кӧ мә дит, дьжмьне мә, Мире-щьна, дьхԝазә ԝәки әм Йаһоԝарʹа хьзмәт нәкьн. Сәва кӧ мә жь Йаһоԝа дур хә, әԝ дьхԝазә мә бьдә баԝәркьрьне кӧ Йаһоԝа мә һʹәз накә. Ле әм гәрәке баԝәрийа хԝә дәрәԝед Мире-щьна нәйньн (Ибо 27:5).

18. Тӧ ча дькари баԝәрийа хԝә һьндава һʹәзкьрьна Йаһоԝа дьһа ԛәԝи ки?

¹⁸ Сәва кӧ тӧ баԝәрийа хԝә һьндава ве йәке кӧ Йаһоԝа тә һʹәз дькә, ԛәԝи ки, бәрдәԝам кә дӧа кә у аликʹарийе жь ԝи бьхԝазә кӧ бькарьби пе чʹәʹве ԝи сәр хԝә бьньһерʹи. Сәр ԝан рʹезед Кʹьтеба Пироз, йед кӧ һʹәзкьрьна ԝийә мәзьн нишан дькьн, кʹур бьфькьрә. Бир нәкә кӧ һәрге кәсәк Йаһоԝа һʹәз дькә, әԝ жи ԝи кәси һʹәз дькә. Бьдә бәр чʹәʹве хԝә кӧ ԛӧрбана Иса чьма мина пʹешкʹешәкә мәхсус ә. У итʹбарийа хԝә гьлийед Иса бинә, кӧ Йаһоԝа Баве тә йә. Һьнге, гава кәсәк жь тә бьпьрсә һәла тӧ баԝәр дьки кӧ Йаһоԝа тә һʹәз дькә йан на, тӧйе аза бькарьби бежи: «Әре, әз заньм ԝәки әԝ мьн һʹәз дькә, у чь жь дәсте мьн те дькьм, сәва кӧ нишани ԝи кьм ԝәки әз жи ԝи һʹәз дькьм!»