ГОТАРА БОНА ҺИНБУНЕ 41
КʹЬЛАМА 108 Һʹьзкьрьна Хԝәдейә Һʹәлал
Һʹәзкьрьна Хԝәде Һʹәта-Һʹәтайе йә
«Шькьрийе бьдьнә Хӧдан, чьмки Әԝ ԛәнщ ә у һʹӧба Ԝи һʹәта-һʹәтайе йә» (ЗӘБУР 136:1).
ВЕ ГОТАРЕДА
Әме шеԝьр кьн кӧ Кʹьтеба Пироз дәрһәԛа һʹәзкьрьна Йаһоԝа чь дьбежә, у гава әм рʹасти тәнгасийа тен, әв йәк чаԝа дькарә дьле мә ԛәԝи кә.
1-2. Гәләк жь мә чь һʹалида ньн?
БЬДӘ бәр чʹәʹве хԝә гәми, йа кӧ кʹәтийә фьртоне. Пʹелед бәʹре гәмийе вьрда-ԝеда давежьн. Һʹәта кӧ гәмиван ләнгәре данәхьн, гәми ԝе нәсәкьнә. Ле бь сайа ләнгәре, гәми дькарә щида бьсәнә у фьртонә ԝе ле нәбә.
2 Гава әм рʹасти тәнгасийа тен, дьбәкә әм хԝә мина ве гәмийе тʹәхмин кьн. Емосийед мә дькарьн мина пʹелед бәʹре мә вьрда-ԝеда бавежьн. Мәсәлә, дьбәкә рʹожәке әм баԝәр ьн кӧ Йаһоԝа мә һʹәз дькә у пьштгьрийа мә дькә, ле рʹожәкә дьн әм дьфькьрьн кӧ әԝ бона мә хәм накә (Зәбур 10:1; 13:1). Бь сайа гьлийед достәки мә, дьбәкә дьле мә ԝәхтәки рʹьһʹәт бә (Мәтʹәлок 17:17; 25:11). Ле паше әм диса дькарьн бькʹәвьнә шьке, кӧ Йаһоԝа бь рʹасти кʹеләка мә йә. Гәло әм ча дькарьн тәнгасийада ԛәԝи бьсәкьньн, демәк тʹьме баԝәр бьн кӧ Йаһоԝа мә һʹәз дькә у пьштгьрийа мә дькә?
3. Зәбур 31:7 у 136:1 дәрһәԛа һʹәзкьрьн у амьнийа Йаһоԝа чь нишани мә дькьн, у чьма әм дькарьн бежьн кӧ ве йәкеда тʹӧ кәс мина Йаһоԝа нинә? (Бьньһерʹә ӧса жи шькьл.)
3 Сәва кӧ әм тәнгасийада ԛәԝи бьсәкьньн, әм гәрәке һʹәзкьрьна Йаһоԝайә амьн биньн бира хԝә (Бьхунә Зәбур 31:7; 136:1). Ван рʹезед Зәбуреда, хәбәра кӧ һатийә ԝәлгәрʹандьне ча «һʹӧб», те һʹәсабе һʹәзкьрьна амьн. Ве йәкеда тʹӧ кәс мина Йаһоԝа нинә. Кʹьтеба Пироз дьбежә кӧ әԝ бь һʹәзкьрьне тʹьжә йә (Дәркʹәтьн 34:6, 7). Ӧса жи Кʹьтеба Пироз дәрһәԛа Йаһоԝа ӧса дьбежә: «Һьндава һʹәмуйада хԝәйе һʹӧба мәзьн и, кʹижан кӧ гази Тә дькьн» (Зәбур 86:5). Һәла бьфькьрә әв йәк чь те һʹәсабе: Йаһоԝа хьзмәткʹаред хԝәйә амьн тʹӧ щара тʹәне наһелә! Гава әм нава тәнгасийада ньн, занәбуна кӧ Йаһоԝа амьн ә дькарә бона мә мина ләнгәре бә (Зәбур 23:4).
Чаԝа кӧ гәми бь сайа ләнгәре ԝәʹде фьртоне щида дьминә, баԝәрийа мәйә һьндава һʹәзкьрьна Йаһоԝа жи дькарә али мә бькә, кӧ әм ԝәʹде тәнгасийа ԛәԝи бьминьн (Бьньһерʹә абзаса 3)
БИР НӘКӘ КӦ ҺʹӘЗКЬРЬНА ЙАҺОԜА, ҺИНКЬРЬНӘКӘ КʹЬТЕБА ПИРОЗӘ СӘРӘКӘ ЙӘ
4. Кʹижан ьн һьнә һинкьрьнед Кʹьтеба Пирозә сәрәкә, у шьровәкьн кӧ чьрʹа әм баԝәрийа хԝә ван тиньн?
4 Гава әм рʹасти чәтьнайа тен, ԝәрә әм биньн бира хԝә кӧ һʹәзкьрьна Йаһоԝа һинкьрьнәкә Кʹьтеба Пирозә сәрәкә йә. Әв фькьр жи дькарә бона мә мина ләнгәре бә. Гәло һьнә һинкьрьнед сәрәкә йед Кʹьтеба Пироз кʹижан ьн? Мәсәлә, тӧ жь Кʹьтеба Пироз һин буйи кӧ наве Хԝәде Йаһоԝа йә, Иса Кӧрʹе Хԝәде йә, мьри тьштәки ньзаньн, әʹрд ԝе бьбә щьнәт у әме һʹәта-һʹәтайе бьжин (Зәбур 83:18; Ԝаиз 9:5; Йуһʹәнна 3:16; Әʹйанти 21:3, 4). Тә әв һинкьрьн ԛәбул кьрьн у тә баԝәрийа хԝә ԝан анин, чьмки тӧ избат буйи ԝәки әԝана рʹаст ьн. Ԝәрә әм ньһа бьньһерʹьн кӧ гава әм һʹәзкьрьна Йаһоԝа жи ԝәк һинкьрьнәкә сәрәкә ԛәбул дькьн, әв йәк ча дькарә али мә бькә нәфькьрьн кӧ Йаһоԝа дина хԝә надә мә йан жи бона мә хәм накә.
5. Чь али мә кьр кӧ һинкьрьнед ԛәлп инкʹар кьн?
5 Гава тә һинбуна Кʹьтеба Пироз дәстпекьр, гәло чь али тә кьр тʹәрка һинкьрьнед ԛәлп бьди? Дьԛәԝьмә тә һинкьрьнед религийа хԝәйә бәре бәрамбәри һинкьрьнед Кʹьтеба Пироз дькьр. Мәсәлә, дьбәкә тә бәре баԝәр дькьр ԝәки паши мьрьне, рʹӧһʹ жь бәдәне вәдьԛәтә у сах дьминә. Ле гава тә Кʹьтеба Пироз лекʹолин кьр, тә жь хԝә пьрси, ‹Һәла әв һинкьрьн рʹаст ә йан на?› Тӧ пеһʹәсийайи, ԝәки Кʹьтеба Пироз дәрһәԛа ве тʹеме чь дьбежә у тӧ избат буйи кӧ әв һинкьрьн нәрʹаст ә. Паше тә һинкьрьна Кʹьтеба Пироз ԛәбул кьр кӧ мьри тьштәки ньзаньн у ԝәки рʹожәке «һʹәму кәсед рʹаст у нәрʹаст ԝе жь мьрьне рʹабьн» (Ԝаиз 9:5; Кʹаред Шандийа 24:15). Рʹаст ә щарна һеса нинә кӧ һинкьрьнед ԛәлп, йед кӧ мина «бьрщед ԛәԝи» нә, «һьлшиньн» (2 Корьнтʹи 10:4, 5). Ле йәкә, тә тʹәрка һинкьрьнед ԛәлп да у ида баԝәрийа хԝә ԝана найни (Филипи 3:13).
6. Тӧ чьма дькари баԝәр би, ԝәки һʹәзкьрьна Йаһоԝа «һʹәта-һʹәтайе йә»?
6 Һәма ӧса жи тӧ дькари баԝәрийа хԝә ве һинкьрьна Кʹьтеба Пироз бини, кӧ Йаһоԝа тә һʹәз дькә. Гава тӧ рʹасти тәнгасийе тейи у һʹәзкьрьна Йаһоԝада дӧдьли дьби, жь хԝә бьпьрсә: «Гәло фькьра мьн бь логики йә?» Фькьред хԝә бәрамбәри гьлийед жь Зәбур 136:1 бькә. Гәло Йаһоԝа чьрʹа хԝәст ԝәки зәбурбеж бьньвисә кӧ һʹәзкьрьна «Ԝи һʹәта-һʹәтайе йә»? У чьрʹа әв йәк ве зәбуреда 26 щара һатийә ԝәкʹьландьне? Чаԝа кӧ әм ида пеһʹәсийан, әв йәк кӧ Йаһоԝа хьзмәткʹаред хԝә һʹәз дькә у һьндава ԝанда амьн ә, һинкьрьнәкә Кʹьтеба Пирозә сәрәкә йә. Фькьра кӧ Йаһоԝа тә ԛимәт накә у тә һʹәз накә, дәрәԝ ә. Чаԝа кӧ тә һинкьрьнед дьнә ԛәлп инкʹар кьрьбу, ве фькьра шаш жи инкʹар кә!
7. Кʹижан ьн һьнә рʹезед Кʹьтеба Пироз, йед кӧ нишан дькьн ԝәки Йаһоԝа мә һʹәз дькә?
7 Гәләк рʹезед дьн жи һәнә, кӧ дәрһәԛа һʹәзкьрьна Йаһоԝа гьли дькьн. Мәсәлә, Иса шагьртед хԝәрʹа ӧса гот: «Һун жь гәләк чʹьвика ԛимәттьр ьн» (Мәтта 10:31). Йаһоԝа жи хьзмәткʹаред хԝәрʹа ӧса гот: «Әзе тә хԝәй кьм, бәле, әзе али тә бькьм, әзе дәсте рʹасте бьгьрьм» (Ишайа 41:10, ДТʹ). Дина хԝә бьде кӧ әв готьн чьԛас ԛәԝи нә. Иса нәгот, ‹Дьбәкә һун дьһа ԛимәт ьн›, у Йаһоԝа жи нәгот, ‹Әз дьбәкә али тә бькьм›. Дәԝсе, Иса гот: «Һун . . . ԛимәттьр ьн». Йаһоԝа жи гот: «Әзе али тә бькьм». Һәрге ԝәʹде чәтьнайа тӧ дӧдьли дьби кӧ Йаһоԝа бь рʹасти тә һʹәз дькә, рʹезед ӧса ԝе нә кӧ тʹәне дьле тә рʹьһʹәт кьн, ле ӧса жи тә бьдьнә баԝәркьрьне кӧ Йаһоԝа бь рʹасти тә һʹәз дькә. Готьнед ван рʹеза избаткьри нә. Һәрге һун сәр ве рʹастийе кʹур бьфькьрьн у дӧа бькьн, ви чахи һуне жи бькарьбьн ӧса бежьн: «Әм ԝе һʹьзкьрьна Хԝәдейә һьндава хԝәда нас дькьн у баԝәр дькьн» (1 Йуһʹәнна 4:16).a
8. Һәрге щарна шьк бькʹәвә дьле тә кӧ Йаһоԝа тә һʹәз дькә, тӧ чь дькари бьки?
8 Ле һәрге щарна диса жи шьк бькʹәвьн дьле тә, кӧ Йаһоԝа тә һʹәз дькә, тӧ чь дькари бьки? Фькьред хԝә бәрамбәри ве йәке бькә, чь кӧ тӧ ида дәрһәԛа Йаһоԝа зани. Һәстед мә щарна дькарьн мә бьхапиньн, ле һʹәзкьрьна Йаһоԝа рʹастийа Кʹьтеба Пирозә сәрәкә йә. Кәсе кӧ баԝәр накә, ԝәки Йаһоԝа ԝи һʹәз дькә, бь рʹасти бир дькә кӧ һʹӧнӧре ԝийә сәрәкә, һʹәзкьрьн ә (1 Йуһʹәнна 4:8).
«БАВ ԜӘ ҺʹӘЗ ДЬКӘ»
9-10. Гава Иса гот, ԝәки «Бав ԝә һʹәз дькә», әԝи бәʹса чь дькьр? (Бьньһерʹә ӧса жи шькьл.)
9 Әм дькарьн дьһа зедә дәрһәԛа һʹәзкьрьна Йаһоԝа пебьһʹәсьн жь гьлийед Иса, йед кӧ әԝи шагьртед хԝәрʹа гот: «Бав ԝә һʹәз дькә» (Бьхунә Йуһʹәнна 16:26, 27). Нета ван гьлийа нә тʹәне әԝ бу кӧ дьле шагьртед хԝә рʹьһʹәт кә. Контекст нишан дькә, кӧ Иса нәкʹәтьбу һʹәйра һәстед ԝан. Ле әԝи бәʹса дӧа дькьр. Жь ван гьлийед Иса әм дәрһәԛа һʹәзкьрьна Йаһоԝа чь һин дьбьн?
10 Иса шагьртед хԝәрʹа гот, ԝәки әԝана гәрәке нә кӧ ԝирʹа, ле бь наве ԝи дӧа бькьн (Йуһʹәнна 16:23, 24). Гәләк фәрз бу кӧ әԝана ве йәке фәʹм бькьн. Чахе Иса жь мьрьне рʹабу, дьбәкә ԝана бьхԝәста Исарʹа дӧа кьра, чьмки Иса досте ԝан бу у ԝана һʹәз дькьр. Ләма жи әԝана дькарьбун бьфькьрьн, кӧ Иса дькарә гӧһ бьдә ԝан у хԝәстьна ԝан Баве хԝәрʹа бежә. Ле Иса ԝанрʹа гот, кӧ әԝана гәрәке ӧса нәфькьрьн. Гәло чьрʹа? Әԝи гот: «Бав ԝә һʹәз дькә». Әв һәйә һинкьрьнәкә Кʹьтеба Пирозә сәрәкә дәрһәԛа дӧа. Дина хԝә бьдьне кӧ әв чь те һʹәсабе. Бь сайа лекʹолина Кʹьтеба Пироз тә Иса нас кьрийә у тӧ ԝи һʹәз дьки (Йуһʹәнна 14:21). Диса жи мина шагьртед Исайи пешьн, тӧ дькари рʹастә-рʹаст Хԝәдерʹа дӧа бьки, чьмки әԝ тә һʹәз дькә. Һәр щар гава тӧ Йаһоԝарʹа дӧа дьки, тӧ дьди кʹьфше ԝәки итʹбарийа хԝә ван гьлийа тини (1 Йуһʹәнна 5:14).
Әм дькарьн бь баԝәри Йаһоԝарʹа дӧа бькьн, чьмки әԝ мә һʹәз дькә (Бьньһерʹә абзаса 9-10)b
ТЕДӘРХӘ КӦ ШЬК У ДӦДЬЛИБУНЕД ТӘ ЖЬ КʹӦ ТЕН
11. Мире-щьна чьрʹа дьхԝазә кӧ шьк у дӧдьлибун бькʹәвьнә дьле мә, ԝәки Йаһоԝа мә һʹәз дькә?
11 Шьк у дӧдьлибунед дәрһәԛа һʹәзкьрьна Йаһоԝа жь кʹӧ тен? Тӧ дьбәкә бежи кӧ фькьред ӧса жь Мире-щьна тен, у жь аликива әв йәк рʹаст ә. Мире-щьна дьхԝазә мә һʹуфи хԝә кә, у гава шьк дькʹәвьнә дьле мә кӧ Йаһоԝа мә һʹәз дькә, әԝ ша дьбә (1 Пәтрус 5:8). Мире-щьна дьхԝазә кӧ әм хԝә һежайи ԛӧрбана Иса һʹәсаб нәкьн, йа кӧ Йаһоԝа бь дьловани бона мә бәрва дайә (Ибрани 2:9). Һәрге һьндава һʹәзкьрьна Йаһоԝа шьк бькʹәвә дьле мә, әв йәк ԝе кʹе хԝәш бе? Мире-щьна. У һәрге әм ӧса дьлтәнг бьн кӧ ида нәхԝазьн Йаһоԝарʹа хьзмәт кьн, әв йәк ԝе кʹе хԝәш бе? Диса жи Мире-щьна. Әԝ дьхԝазә ԝәки әм бьфькьрьн кӧ Йаһоԝа мә һʹәз накә, ле бь рʹасти, йе кӧ һʹәзкьрьна Йаһоԝа ӧнда кьрийә, әԝ ә. У йәк жь «тʹәлькед» ԝи әԝ ә, кӧ мә бьдә баԝәркьрьне ԝәки Йаһоԝа мә һʹәз накә у әм инкʹар кьрьнә (Әфәси 6:11). Әм гәрәке рʹьнд фәʹм кьн кӧ нета дьжмьне мә чь йә. Ԝи чахи әме бькарьбьн мьԛабьли Мире-щьна бьсәкьньн (Аԛуб 4:7).
12-13. Әв йәк кӧ әм ԛьсурдар ьн ча дькарә бьбә сәбәб кӧ әм һʹәзкьрьна Йаһоԝада дӧдьли бьн?
12 Шькед дәрһәԛа һʹәзкьрьна Йаһоԝа дькарьн жь бо сәбәбәкә дьн жи бькʹәвьнә дьле мә. Гәло әв чь йә? Әв һәйә ԛьсурдари, йа кӧ дәрбази сәр мә буйә (Зәбур 51:5; Рʹомайи 5:12). Жь бо гӧнә инсанәт жь Йаһоԝа Хԝәде дур кʹәтийә. Ӧса жи гӧнә зьрар дайә һʹьш, дьл у бәдәна инсен.
13 Жь бо ԛьсурдарийа хԝә, дьбәкә әм хԝә щарна сущдар кьн, хәмгин бьн йан шәрм бькьн, илаһи чахе әм гӧнә дькьн. Хенщи ве йәке һәстед ӧса дькарьн щәм мә пешда бен, чьмки әм тʹьме тиньн сәр хԝә кӧ әм ԛьсурдар ьн. Әв йәк мә әʹщьз дькә, чьмки мәрьв сәрида ӧса нәһатьбунә әʹфьрандьне (Рʹомайи 8:20, 21). Чаԝа кӧ тʹәкәрәка әʹрәбейә бәрʹдайи, ләзайа әʹрәбе кем дькә, ԛьсурдари жи хирәта мә кем дькә. Ләма жи әʹщебмайи нинә кӧ әм щарна дӧдьли дьбьн, ԝәки Йаһоԝа мә һʹәз дькә. Гава ӧса дьԛәԝьмә, ԝәрә әм биньн бира хԝә, ԝәки Йаһоԝа Хԝәде һьндава кәсед кӧ ԝи һʹәз дькьн у ԛанунед ԝи хԝәй дькьн, амьн у дьлован ә (Нәһәмйа 1:5).
14. Чахе әм дәрһәԛа ԛӧрбана Иса дьфькьрьн, әв йәк ча али мә дькә дӧдьли нәбьн ԝәки Йаһоԝа мә һʹәз дькә? (Рʹомайи 5:8) (Ӧса жи бьньһерʹьн чаргошә «Жь Алийе Ԛьсурдарийа Хԝәва Нәйе Хапандьне».)
14 Дьбәкә әм щарна бьфькьрьн, ԝәки әм һежайи һʹәзкьрьна Йаһоԝа ниньн. У һәмьки әв йәк рʹаст ә. Ле әм чьԛас нәһежайи ве йәке бьн жи, йәкә Йаһоԝа мә һʹәз дькә. Ләма жи әԝи әʹмьре Кӧрʹе хԝә бәрва дайә, ԝәки сәр һʹиме ве йәке гӧнед мә бенә бахшандьне (1 Йуһʹәнна 4:10). Ӧса жи бир нәкә ԝәки Иса һатьбу, нә сәва кӧ мәрьвед беԛьсур хьлаз кә, ле сәва кӧ гӧнәкʹара хьлаз кә (Бьхунә Рʹомайи 5:8). Тʹӧ кәс нькарә һәр тьшти бь щурʹе беԛьсур бькә, у Йаһоԝа ве йәке жь мә нә жи дәʹԝа дькә. Жь бо ԛьсурдарийе шьк дькʹәвә дьле мә кӧ Йаһоԝа мә һʹәз дькә, ләма жи ԝәрә әм һәр тьшти бькьн кӧ шькед хԝә алт кьн (Рʹомайи 7:24, 25).
АМЬН БЬМИНӘ
15-16. Һәрге әм Йаһоԝарʹа амьн бьминьн, әм дькарьн чьда баԝәр бьн? (2 Самуйел 22:26)
15 Йаһоԝа дьхԝазә, ԝәки әм сафикьрьна рʹаст бькьн кӧ незики ԝи бьн (Ԛануна Дӧщари 30:19, 20). Һәрге әм ӧса бькьн, әԝе жи һьндава мәда амьн бьминә (Бьхунә 2 Самуйел 22:26). Һʹәта кӧ әм Йаһоԝарʹа амьн бьминьн, әԝе али мә бькә ԝәки әм бькарьбьн һʹәму чәтьнайада сәбьр кьн.
16 Чаԝа кӧ гәми бь сайа ләнгәре нӧԛи аве набә, Йаһоԝа һазьр ә али мә бькә, ԝәки әм һьм ньһа һьм жи ахьрийеда тәнгасийада сәбьр кьн. Кʹьтеба Пирозда рʹастә-рʹаст те готьне, ԝәки Йаһоԝа мә һʹәз дькә. У чахе шьк бькʹәвьнә дьле мә, ԝәрә әм дина хԝә бьдьнә нә кӧ һәстед хԝә, ле ве йәке кӧ әм дәрһәԛа һʹәзкьрьна Йаһоԝа чь заньн. Бәле, ԝәрә әм итʹбарийа хԝә Кʹьтеба Пироз биньн, кӧ һʹәзкьрьна Йаһоԝайә амьн һʹәта-һʹәтайе йә!
КʹЬЛАМА 159 Рʹумәте Бьдә Йаһоԝа
a Сәва кӧ дьһа зедә мәсәла бьвиньн, бьхуньн Ԛануна Дӧщари 31:8, Зәбур 94:14 у Ишайа 49:15.
b ШЬРОВӘКЬРЬНА ШЬКЬЛА: Бьрак жь Йаһоԝа аликʹарийе дьхԝазә кӧ жьна хԝәйә нәхԝәш бьбә хԝәйи, пʹәре хԝә бь билани хәрщ кә у ԛиза хԝә һин кә, ԝәки Йаһоԝа һʹәз бькә.