Әм Ча Дькарьн бь Сайа Дӧа Һе Незики Йаһоԝа бьн?

1-2. а) Дьԛәԝьмә чьма мәрʹа чәтьн ә дьле хԝә Йаһоԝарʹа вәкьн? б) Әм жь кʹӧ заньн ԝәки Йаһоԝа һазьр ә гӧһ бьдә мә?

ДӦАЙЕД хԝәда гәло тӧ тʹьме гьлийед мина һәв дьԝәкʹьлини? Гәло щарна тәрʹа чәтьн ә дьле хԝә Йаһоԝарʹа вәки? Баԝәр бә ԝәки гәләк кәс ԝи һʹалида ньн. Жь бо ве йәке кӧ шьхӧл-әʹмәлед мә гәләк ьн, дьбәкә әм тʹьме ләз у бәз дӧа дькьн. Йан жи, дьбәкә әм дьле хԝә Йаһоԝарʹа вәнакьн, чьмки дьфькьрьн кӧ нәһежа нә незики ԝи бьн.

² Кʹьтеба Пироз нишани мә дькә кӧ бона Йаһоԝа, тьште һәри фәрз нә әв ә, кӧ әм дӧайед хԝәда хәбәред бәдәԝ бежьн, ле әв ә кӧ әм жь дьл у бь мьлукти дӧа бькьн, чьмки әԝ гӧһ дьдә хԝәстьнед мьлука (Зәбур 10:17). Әԝ рʹьнд гӧһ дьдә һәр хәбәрәкә мә, чьмки бь рʹасти дькʹәвә һʹәйра мә (Зәбур 139:1-3).

3. Ве готареда әме щабед кʹижан пьрса бьстиньн?

³ Гәло әм чьма дькарьн аза Йаһоԝарʹа дӧа бькьн? Сәва кӧ дӧайед мә дьһа кʹур бьн, әм дькарьн чь бькьн? Дӧайед кӧ Кʹьтеба Пирозда ньвисар ьн, ча дькарьн ве йәкеда али мә бькьн? Һәрге мәрʹа чәтьн ә дьле хԝә Йаһоԝарʹа вәкьн, әм чь дькарьн бькьн? Ве готареда әме щабед ван пьрса бьстиньн.

БЬ АЗАЙИ ЙАҺОԜАРʹА ДӦА БЬКӘ

4. Чь дькарә али мә бькә кӧ әм бь азайи дӧа бькьн? (Зәбур 119:145)

⁴ Сәва кӧ әм бь азайи Йаһоԝарʹа дӧа бькьн, гәрәке әм фәʹм бькьн кӧ Йаһоԝа досте мәйи амьн ә, йе кӧ дьхԝазә ԝәки әм пешдачуйи бьн. Ньвискʹаре Зәбура 119 Йаһоԝа ча досте хԝә һʹәсаб дькьр. Ча те кʹьфше, һьнә тәнгасийед ԝи һәбун. Мәсәлә, кәсед ԛәлп бӧхдан авитьбунә ԝи (Зәбур 119:23, 69, 78). Ӧса жи, әԝ щарна дьлтәнг дьбу жь бо кемасийед хԝә (Зәбур 119:5). Диса жи, әԝ нәдьтьрсийа кӧ дьле хԝә Йаһоԝарʹа вәкә (Бьхунә Зәбур 119:145).

5. Чьма гәрәке әм шәрм нәкьн дӧа бькьн? Мәсәле бинә.

⁵ Һәрге кәсәки гӧнәки гьран кьрийә жи, Йаһоԝа дьхԝазә кӧ әԝ ԝирʹа дӧа бькә (Ишайа 55:6, 7). Ләма жи, әм гәрәке изьне нәдьнә шәрме у һәстед дьнә нәбаш кӧ рʹийа мә бьгьрьн Йаһоԝарʹа дӧа бькьн. Ве мәсәле бьдә бәр чʹәʹве хԝә: Мәрьвәки кӧ бәрʹийеда ӧнда буйә, дурва мәрьвәки кӧ дькарә ле хьлаз кә, дьвинә. Гәло әԝ гәрәке шәрм бькә ԝәки ӧнда буйә у аликʹарийе нәхԝазә? Һәмьки на! Мина ве йәке, һәрге мә шаши йан гӧнә кьрийә жи, әм дькарьн бь азайи Йаһоԝарʹа дӧа бькьн (Зәбур 119:25, 176).

СӘВА КӦ ДӦАЙЕД МӘ ДЬҺА КʹУР БЬН, ӘМ ЧЬ ДЬКАРЬН БЬКЬН?

6-7. Чахе әм дәрһәԛа һʹӧнӧред Йаһоԝа дьфькьрьн, әв йәк ча дькарә али мә бькә, ԝәки дӧайед мә дьһа кʹур бьбьн? Мәсәле бинә. (Ӧса жи бьньһерʹә спартьн.)

⁶ Сәва кӧ дӧайед мә дьһа кʹур бьн, әм гәрәке Йаһоԝарʹа бәʹса һәст у фькьред хԝә бькьн. Гәло чь дькарә али мә бькә ӧса дӧа бькьн?

⁷ Дәрһәԛа һʹӧнӧред Йаһоԝа бьфькьрә.a Чьԛас әм сәр һʹӧнӧред ԝи бьфькьрьн, һаԛас мәрʹа ԝе дьһа һеса бә дӧада фькьред хԝә бь рʹьһʹәти бежьн у дьле хԝә Йаһоԝарʹа вәкьн (Зәбур 145:8, 9, 18). Дина хԝә бьдә сәрһатийа хушкәкә мә бь наве Кристина. Баве ԝе йәки сәрт бу, у әве йәке сәр ԝе хьраб һʹӧкӧм дькьр. Хушка мә ӧса дьбежә: «Мьнрʹа һеса нибу кӧ Йаһоԝа ча Баве хԝә һʹәсаб кьм у дьле хԝә жерʹа вәкьм. Әз дьфькьрим кӧ жь бо кемасийед мьн, әԝе тʹәрка мьн бьдә». Гәло кʹижан һʹӧнӧре Йаһоԝа али ԝе кьр, ԝәки тьрсе жь дьле хԝә дәрхә? Әԝ дьбежә: «Әз сәр һʹәзкьрьна Йаһоԝайә амьн гәләк дьфькьрим, у мьн фәʹм кьр кӧ әԝ мьн һʹәз дькә. Әз заньм ԝәки әԝе тʹӧ щар пьшта хԝә нәдә мьн. Һәрге әз бькʹәвьм жи, әԝе бь дьловани дәсте хԝә дьрежи мьн кә у али мьн бькә рʹабьм сәр пʹийа. Әв йәк али мьн дькә дьле хԝә ԝирʹа вәкьм у бәʹса тьштед кӧ шабуне мьнрʹа тиньн йан жи мьн хәмгин дькьн, бькьм».

8-9. Ԝе чьма баш бә пешда бьфькьрьн, кӧ әм дьхԝазьн дӧайед хԝәда чь бежьн? Мәсәле бинә.

⁸ Бьфькьрә кӧ тӧ дьхԝази чь бежи. Пешийа кӧ дӧа бьки, жь хԝә бьпьрсә: «Гәло дәрдед мьн чь нә? Гәло дьле мьн сәр кәсәки майә у әз гәрәке бьбахшиньмә ԝи? Гәло мьнрʹа аликʹарийа Йаһоԝа лазьм ә, ԝәки әз проблемәкә кӧ тʹәзә пешда һатийә, сафи бькьм?» (2 Пʹадшати 19:15-19). Ӧса жи, дӧайе кӧ Иса ча мәсәлә һишт, бинә бира хԝә у бьфькьрә кӧ тӧ дькари дәрһәԛа наве Йаһоԝа, Пʹадшатийа Ԝи у ԛьрара Ԝи чь бежи (Мәтта 6:9, 10).

⁹ Гава хушкәкә мә бь наве Алиска пеһʹәсийа, ԝәки мере ԝе бь кʹансәра мәжу нәхԝәш ә у чʹарә тʹӧнә кӧ әԝ ԛәнщ бә, жерʹа чәтьн бу дӧа бькә. Әԝ дьбежә: «Әз һаԛас хәмгин бум у фькьред мьн һаԛас тʹәвльһәв бун кӧ гава мьн дӧа дькьр, мьн ньзаньбу чь бежьм». Гәло чь али ԝе кьр? Әԝ дьбежә: «Пешийа кӧ әз дӧа бькьм, әз чәнд дәԛа дьфькьрьм, һәла әз дәрһәԛа чь дьхԝазьм дӧа бькьм. Әв йәк али мьн дькә, ԝәки әз нә тʹәне бона хԝә у нәхԝәшийа мере хԝә дӧа бькьм. Бь ви щурʹәйи, әз ида дькарьм һьм бь дьлрʹьһʹәти, һьм жи дәрһәԛа щурʹә-щурʹә тьшта Йаһоԝарʹа дӧа бькьм».

10. Чьма әм гәрәке ләз у бәз дӧа нәкьн? (Бьньһерʹә ӧса жи шькьл.)

¹⁰ Ләз у бәз дӧа нәкә. Һәмьки дӧайед кьн жи али мә дькьн незики Йаһоԝа бьн. Жь алийе дьнва жи, дӧайед дьреж дькарьн мәщаләкә дьһа баш бьдьнә мә кӧ әм дьле хԝә ԝирʹа вәкьн у бәʹса һәст у фькьред хԝә бькьн.b Мере Алискайе, Елищаһ, ӧса дьбежә: «Нава рʹожеда әз хирәт дькьм кӧ гәләк щара дӧа бькьм. Әз бь ләз дӧа накьм, у әв йәк али мьн дькә дьһа незики Йаһоԝа бьм. Йаһоԝа жь дӧайед дьреж әʹщьз набә, ләма нә лазьм ә кӧ әз ләзә-ләз дӧа бькьм». Тӧ дькари ве йәке бьщерʹьбини: Хԝәрʹа ԝәʹдә у щики лайиԛ бьвинә кʹидәре кӧ дина тә нәчә сәр тьштәки дьн, у тӧйе бькарьби дьреж дӧа бьки, дьԛәԝьмә бь дәнге бьльнд жи, у ве йәке хԝәрʹа бькә хәйсәт.

СӘР ДӦАЙЕД КӦ КʹЬТЕБА ПИРОЗДА НЬВИСАР ЬН КʹУР БЬФЬКЬРӘ

11. Ԝе чьрʹа баш бә кӧ әм сәр дӧайед жь дьл, йед кӧ Кʹьтеба Пирозда ньвисар ьн, кʹур бьфькьрьн? (Ӧса жи бьньһерʹьн чаргошә «Гәло Һʹале Тә Мина Һʹале Ԝан ә?»)

¹¹ Дьбәкә бона тә керһати бә кӧ сәр дӧайед жь дьл, кʹьлам у зәбуред кӧ Кʹьтеба Пирозда ньвисар ьн, кʹур бьфькьри. Гава тӧ бьвини ԝәки хьзмәткʹаред Хԝәде һәст у фькьред хԝә ча әʹйан дькьрьн, әв йәк ԝе али тә бькә ԝәки тӧ жи дьле хԝә Йаһоԝарʹа вәки. Ӧса жи, дьбәкә тӧ һьнә хәбәр у фькьред тʹәзә сәва хԝә бьвини, ԝәки ча дӧайед хԝәда пәсьне Хԝәде бьди. Хенщи ве йәке, тӧ дьԛәԝьмә һьнә дӧайед ӧса бьвини, кʹижанада кӧ һәст у һʹале хьзмәткʹаред Хԝәдейә бәре мина йед тә бун, у дьбәкә дӧада ԝана һәма әв тьшт жь Йаһоԝа дьхԝәстьн, чь кӧ тӧ жи дьхԝази.

12. Гава әм сәр гьлийед дӧайед жь Кʹьтеба Пироз, дьфькьрьн, әм дькарьн кʹижан пьрса бьдьнә хԝә?

¹² Чахе тӧ сәр гьлийед дӧаки жь Кʹьтеба Пироз, дьфькьри, жь хԝә бьпьрсә: «Әв дӧайе кʹе йә, әԝ чь һʹалида бу у әԝи чьрʹа ӧса дӧа кьр? Гәло гьлийед жь ви дӧайи һʹале мьнва гьредайи нә? Әз дькарьм жь ви дӧайи чь һин бьм?» Сәва кӧ тӧ щабед ван пьрса бьстини, дьбәкә лазьм бә ԝәки тӧ дьһа зедә лекʹолине бьки. У бона ве йәке дьбәкә ԝәʹдә у хирәт лазьм бә, ле бь рʹасти һежайи йә ве йәке бьки. Ԝәрә әм дина хԝә бьдьнә чәнд мәсәла.

13. Жь сәрһатийа Һаннайе әм дькарьн дәрһәԛа дӧа чь һин бьн? (1 Самуйел 1:10, 11) (Ӧса жи бьньһерʹьн шькьл.)

¹³ Бьхунә 1 Самуйел 1:10, 11. Гава Һаннайе дӧа кьр, дӧ дәрдед ԝейә мәзьн һәбун: Йа йәке, зарʹ жерʹа нәдьбун у йа дӧда, һәԝийа ԝе дьле ԝе дешанд (1 Самуйел 1:4-7). Һәрге дәрде тә жи һәйә, йа кӧ гәләк ԝәхт ә найе сафикьрьне, гәло тӧ дькари жь дӧайе Һаннайе чь һин би? Паши кӧ әԝе дьреж дӧа кьр у Хԝәдерʹа бәʹса дәрде хԝә кьр, дьле ԝе рʹьһʹәт бу (1 Самуйел 1:12, 18). Һәрге әм Йаһоԝарʹа бежьн кӧ дәрде мә ча сәр мә һʹӧкӧм дькә у баре хԝә ԝирʹа бьһельн, дьле мә жи ԝе рʹьһʹәт бә (Зәбур 55:22).

14. а) Әм диса чь дькарьн жь сәрһатийа Һаннайе һин бьн? б) Гава әм кʹур сәр Ньвисаред Пироз бьфькьрьн, әв йәк ча дькарә али мә бькә дӧайед хԝәда бәʹса дьһа зедә тьшта бькьн? (Бьньһерʹә спартьн.)

¹⁴ Чәнд сал шунда паши кӧ Самуйел һатә буйине, дийа ԝи Һаннайе әԝ бьрә бал Кʹаһине Мәзьн Әли (1 Самуйел 1:24-28). Дӧайе хԝәда Һаннайе гот кӧ Йаһоԝа хьзмәткʹаред хԝәйә амьн дьпʹарезә у ԝан дьбә хԝәйиc (1 Самуйел 2:1, 8, 9). Дьбәкә проблемед ԝейә малбәтеда һе бь тʹәмами сафи нәбьбун, ле диса жи әԝе дина хԝә дьда ве йәке кӧ ча Йаһоԝа ле кʹәрәм кьрийә. Гәло әм чь жь ве йәке һин дьбьн? Һәрге әм дина хԝә бьдьне, кӧ Йаһоԝа һʹәта ньһа ча али мә кьрийә, ԝе мәрʹа дьһа һеса бә чәтьнайада сәбьр кьн.

15. Гава әм рʹасти нәһәԛийе тен, әм дькарьн жь дӧайе Йерәмйа чь һин бьн? (Йерәмйа 12:1)

¹⁵ Бьхунә Йерәмйа 12:1. Щарәке Йерәмйа пʹехәмбәр әʹщьз бу гава дит кӧ мәрьвед хьраб пеш дькʹәвьн. Ӧса жи әԝ дьлтәнг бу гава хәлԛе ԛәрфед хԝә ԝи дькьрьн (Йерәмйа 20:7, 8). Гава мәрьвед ԛәлп пеш дькʹәвьн йан гава мәрьв ԛәрфед хԝә мә дькьн, дьбәкә әм жи хԝә мина Йерәмйа тʹәхмин кьн. Рʹаст ә Йерәмйа бәʹса дәрдед хԝә кьр, ле әԝ тʹӧ щар һәԛийа Йаһоԝада дӧдьли нәдьбу. Гава әԝи дьдит кӧ Йаһоԝа хьзмәткʹаред хԝәйә нәгӧһдар ча ширәт дькьр, баԝәрийа ԝи һьндава һәԛийа Йаһоԝа дьһа ԛәԝи дьбу (Йерәмйа 32:19). Әм жи дькарьн дӧайед хԝәда аза бәʹса хәмед хԝә бькьн у баԝәр бьн кӧ ԝәʹде рʹастда, Йаһоԝа ԝе нәһәԛийа кӧ һьндава мәда һатийә кьрьне, бьдә һьлдане.

16. Жь дӧайе мерәки Леԝи, әм чь дькарьн һин бьн? (Зәбур 42:1-4) (Бьньһерʹә ӧса жи шькьл.)

¹⁶ Бьхунә Зәбур 42:1-4. Ньвискʹаре ве кʹьламе мерәки Леԝи бу, йе кӧ аксоркьри бу у нькарьбу һәрʹә пʹарьстгәһе, ԝәки тʹәви кәсед дьн сәре хԝә бәр Йаһоԝа дайнә. Зәбура ԝи нишани мә дькә, кӧ әԝи хԝә чаԝа тʹәхмин дькьр. Һәрге әм нькарьн жь мале дәркʹәвьн йан һәрге әм жь бо баԝәрийа хԝә кәледа ньн, дьбәкә әм жи хԝә ӧса тʹәхмин кьн. Әм чь һʹалида бьн жи, ԝе баш бә кӧ әм дӧайед хԝәда бәʹса һәстед хԝә бькьн. Әв йәк дькарә али мә бькә кӧ һәстед хԝә дьһа баш фәʹм кьн у ньһерʹандьна рʹаст сәр дәрәща хԝә хԝәй кьн. Мәсәлә, Леԝи фәʹм кьр кӧ бәр ԝи мәщалед тʹәзә ԝе вәбьн, кӧ пәсьне Йаһоԝа бьдә (Зәбур 42:5). Ӧса жи әԝи ани бира хԝә, кӧ Йаһоԝа ча ле бьбу хԝәйи (Зәбур 42:8). Дӧайед жь дьл дькарьн али мә бькьн, кӧ әм дьле хԝә лекʹолин кьн, дьлрʹьһʹәтийе у ԛәԝате бьстиньн, ԝәки сәбьр кьн.

17. а) Әм дькарьн жь дӧайе Уньс пʹехәмбәр чь һин бьн? (Уньс 2:1, 2) б) Гава әм рʹасти чәтьнайа тен, һьнә гьлийед жь Зәбура ча дькарьн али мә бькьн? (Бьньһерʹә спартьн.)

¹⁷ Бьхунә Уньс 2:1, 2. Чахе Уньс пʹехәмбәр зьке мәʹсийа мәзьнда бу, әԝи бь ван гьлийа Йаһоԝарʹа дӧа кьр. Уньс гӧһ нәдабу Йаһоԝа, ле диса жи әԝ баԝәр бу, кӧ Йаһоԝа ԝе дәнге ԝи бьбьһе. Дӧайе хԝәда Уньс гәләк гьлийед кӧ Зәбурада ньвисар ьн, ԝәкʹьландьн.d Ча кʹьфш ә әԝи әв рʹез рʹьнд заньбун. Гава әԝ сәр ван рʹеза дьфькьри, баԝәрийа ԝи ԛәԝи дьбу кӧ Йаһоԝа ԝе али ԝи бькә. Мина Уньс пʹехәмбәр, ԝәрә әм жи хирәт бькьн, кӧ һьнә рʹеза әзбәри кьн. У чахе әм рʹасти чәтьнайа бен у Йаһоԝарʹа дӧа бькьн, әв рʹез дькарьн бенә бира мә у дьлрʹьһʹәтийе бьдьнә мә.

БЬ САЙА ДӦА ДЬҺА НЕЗИКИ ЙАҺОԜА БӘ

18-19. Һәрге әм щарна ньзаньн кӧ дӧада чь Йаһоԝарʹа бежьн, Рʹомайи 8:26, 27 ча дькарә али мә бькә? Мәсәле бинә.

¹⁸ Бьхунә Рʹомайи 8:26, 27. Щарна дьбәкә хәмед мә һаԛас гьран бьн, кӧ әм ньзаньн чь Йаһоԝарʹа бежьн. Һәрге ӧса бә, «рʹӧһʹе пироз хԝәха бона мә һиви дькә». Гәло чь щурʹәйи? Бь сайа рʹӧһʹе пироз, Йаһоԝа гәләк дӧайед хьзмәткʹаред хԝә Кʹьтеба Пирозда данә ньвисаре. Һәрге әм һʹаләки чәтьнда ньн у нькарьн фькьред хԝә зәлал бежьн, Йаһоԝа дькарә гьлийед жь ван дӧа ӧса ԛәбул кә, кӧ ча бежи әԝ гьлийед мә нә, у әԝ дькарә щаба дӧайед мә бьдә.

¹⁹ Әве фькьре али хушкәкә мәйә Урьс бь наве Йелена, кьр, йа кӧ һатә гьртьне, чьмки Хԝәдерʹа дӧа дькьр у Кʹьтеба Пироз дьхԝәнд. Йелена һаԛас бәр хԝә дькʹәт, кӧ жерʹа чәтьн бу дӧа бькә. Әԝ дьбежә: «Ԝе дәме кʹәтә бира мьн кӧ гава әз хԝә бечʹарә тʹәхмин дькьм у ньзаньм ча дӧа бькьм, Йаһоԝа ԝе дӧайед хьзмәткʹаред хԝәйә бәре, йед кӧ жь бина бәр Ԝи һатьбунә ньвисаре . . . мина рʹәщайед мьн ԛәбул бькә. . . . Ван рʹожед чәтьнда, жь ве йәке мьн дьлрʹьһʹәтийа мәзьн дьстанд».

20. Гава әм стреседа ньн, әм ча дькарьн һʹьше хԝә бона дӧа һазьр кьн?

²⁰ Гава әм стреседа ньн, дьбәкә әм дәстпекьн дӧа кьн, ле паше фькьред мә тʹәвльһәв бьн у һʹьше мә һәрʹә сәр тьштед дьн. Сәва кӧ ӧса нәбә, әм дькарьн чь бькьн? Мәсәлә, пешийа кӧ әм дӧа бькьн, әм дькарьн гӧһ бьдьнә аудио-ньвисандьнед Зәбура. Йан жи мина Даԝьд Пʹадша хԝәрʹа бьньвисьн кӧ әм чь сәр хԝә тʹәхмин дькьн (Зәбур 18, 34, 142; сәрньвисар). Һәмьки ԛанун тʹӧнә нә, кӧ әм гәрәке хԝә ча бона дӧа һазьр кьн (Зәбур 141:2). Ләма жи һәр кәс бьра хԝәха сафи кә кʹижан методе бьдә хәбате.

21. Әм чьрʹа дькарьн дӧада дьле хԝә Йаһоԝарʹа вәкьн?

²¹ Ча баш ә ԝәки пешийа кӧ әм тьштәки бежьн, Йаһоԝа ида һәстед мә фәʹм дькә (Зәбур 139:4). Ле йәкә ԝи хԝәш те гава әм дьле хԝә жерʹа вәдькьн у дьбежьн кӧ итʹбарийа хԝә ԝи тиньн. Ләма жи шәрм нәкә кӧ Баве хԝәйи әʹзманарʹа дӧа бьки. Жь дӧайед кӧ Кʹьтеба Пирозда һатьнә ньвисаре, һин бә. Бь дьл у щан дӧа бькә у ԝирʹа бежә кӧ тӧ бона чь ша дьби у чьрʹа хәмгин и. Йаһоԝа досте тә йә у әԝе тʹьме кʹеләка тә бә!