Бона Кәсед Дьн Дӧа Бькьн

1. Әм жь кʹӧ заньн ԝәки Йаһоԝа дӧайед мә ԛимәт дькә?

ДӦА пʹешкʹешәкә гәләк ԛимәт ә. Һәла бьфькьрә: Йаһоԝа һьнә щабдари данә мәләка (Зәбур 91:11). Ӧса жи әԝи һьнә щабдарийед мәзьн дайә Кӧрʹе хԝә Иса Мәсиһ (Мәтта 28:18). Ле гәло щабдарийа кӧ дӧа бьбьһен, Йаһоԝа дайә кʹе? Әԝ хԝәха гӧһ дьдә дӧайед мә. Әԝи әв щабдари нәдайә кәсәки дьн. Ләма жи, Кʹьтеба Пирозда дәрһәԛа ԝи те готьне, ԝәки әԝ ‹дӧа дьбьһе› (Зәбур 65:2).

2. Дәрһәԛа дӧакьрьна бона кәсед дьн, Паԝлосе шанди чь мәсәлә мәрʹа һишт?

² Рʹаст ә әм бь азайи дькарьн дәрһәԛа дәрдед хԝә Йаһоԝарʹа дӧа бькьн, ле әм гәрәке бона кәсед дьн жи дӧа бькьн. Паԝлосе шанди жи ӧса дькьр. Мәсәлә, әԝи щьвата Әфәсерʹа ӧса ньвиси: «Әз дӧайед хԝәда һәртʹьм ԝә тиньм бира хԝә» (Әфәси 1:16). Паԝлос шәхси бона һьнә кәса дӧа дькьр. Мәсәлә, әԝи һәвале хԝә Тимотʹейорʹа ӧса гот: «Шькьр Хԝәдерʹа . . . Әз шәв у рʹож дӧа-дьрозгед хԝәда тә бир тиньм» (2 Тимотʹейо 1:3). Рʹаст ә хәмед Паԝлосе шанди жи һәбун, сәва чь жи әԝи дькарьбу дӧа кьра (2 Корьнтʹи 11:23; 12:7, 8). Ле әԝи ԝәʹдә дьдит, ԝәки бона кәсед дьн жи дӧа бькә.

3. Дьбәкә әм чьма бир кьн кӧ бона кәсед дьн дӧа бькьн?

³ Щарна, дьбәкә әм бир кьн бона кәсед дьн дӧа бькьн. Гәло чьма? Хушкәкә бь наве Сабринаa бәʹса йәк жь сәбәба дькә. Әԝ дьбежә: «Жийина мә тʹьжә стрес ә. Сәре мә щарна бь проблема һаԛас тʹьжә йә, кӧ әм тʹәне дәрһәԛа һʹәԝщед хԝә дӧа дькьн». Гәло тӧ жи щарна ԝи һʹалида йи? Ве готареда әме пебьһʹәсьн кӧ 1) чьма фәрз ә бона кәсед дьн дӧа бькьн у 2) әм ча дькарьн ве йәке бькьн.

ЧЬМА ӘМ ГӘРӘКЕ БОНА КӘСЕД ДЬН ДӦА БЬКЬН?

4-5. Дӧайед бона кәсед дьн ча дькарьн «гәләки ԛәԝат» у бь «һʹӧкӧм» бьн? (Аԛуб 5:16)

⁴ Дӧайе бона кәсед дьн «гәләки ԛәԝат ә у һʹӧкӧм дькә» (Бьхунә Аԛуб 5:16). Гәло дӧайед мәйә бона кәсед дьн бь рʹасти дькарьн дәрәща ԝан бьгӧһезьн? Бәле. Иса, йе кӧ заньбу ԝәки ԝәʹдәки кьнда Пәтрусе шанди ԝе ԝи инкʹар кә, ӧса гот: «Мьн бона тә дӧа-дьрозгә кьр, ԝәки баԝәрийа тә сьст нәбә» (Луԛа 22:32). Паԝлосе шанди жи заньбу кӧ ԛәԝата дӧа мәзьн ә. Гава әԝ бь нәһәԛи ль Рʹоме гьрти бу, әԝи Филимонрʹа ӧса ньвиси: «Гӧмана мьн һәйә, ԝәки әзе бь сайа дӧайед ԝә вәгәрʹьм щәм ԝә» (Филимон 22). Бь рʹасти жи ӧса ԛәԝьми. Гәләк ԝәхт дәрбаз нәбу кӧ Паԝлос аза кьрьн у әԝи карьбу бәрдәԝам кә мьзгинийе бәла кә.

⁵ Һәмьки әв йәк найе һʹәсабе кӧ бь сайа дӧа, әм дькарьн зоре Йаһоԝа бькьн тьштәки сәва мә бькә. Ле әԝ хәмед хьзмәткʹаред хԝә дьвинә, у щарна әԝ сафи дькә кӧ ль гора хԝәстьна ԝан һәрәкʹәт бькә. Һәрге ӧса йә, ԝәрә әм жь дьл дӧа бькьн у паше дәрдед хԝә бьдьнә дәсте ԝи (Зәбур 37:5; ӧса жи бьньһерʹә 2 Корьнтʹи 1:11).

6. Гава әм бона кәсед дьн дӧа дькьн, әв йәк ча дькарә сәр һәстед мә һьндава ԝан һʹӧкӧм кә? (1 Пәтрус 3:8)

⁶ Дӧакьрьна бона кәсед дьн али мә дькә кӧ әм һьндава ԝанда рʹәʹм бьн (Бьхунә 1 Пәтрус 3:8). Мәрьве дьлрʹәʹм һʹале кәсед дьн рʹьнд фәʹм дькә, у әԝ һазьр ә али ԝан бькә (Маркос 1:40, 41). Рʹуспики бь наве Микайел ӧса дьбежә: «Гава әз бона һʹәԝщед кәсед дьн дӧа дькьм, әз дьһа баш фәʹм дькьм кӧ һʹале ԝан чьԛас чәтьн ә, у әз дьһа зедә ԝана һʹәз дькьм. Һәрге әԝана ве йәке ньзаньн жи, әз хԝә дьһа незики ԝан тʹәхмин дькьм». Ле рʹуспики бь наве Ричард ӧса дьбежә: «Гава әм бона кәсәки дӧа дькьн, хԝәстьна мә зедә дьбә кӧ әм али ԝи бькьн. Ӧса жи гава әм аликʹарийе дьдьнә ԝи, әм бь рʹасти ԛәԝате дьдьнә хәбате, ԝәки дӧайе мәйә сәва ԝан бе сери».

7. Дӧакьрьна бона кәсед дьн ча али мә дькә кӧ әм нәкʹәвьнә тʹәне һʹәйра проблемед хԝә? (Филипи 2:3, 4) (Бьньһерʹә ӧса жи шькьл.)

⁷ Дӧакьрьна бона кәсед дьн али мә дькә кӧ әм нәкʹәвьнә тʹәне һʹәйра проблемед хԝә (Бьхунә Филипи 2:3, 4). Тʹәмамийа дьнйайе бьн дәсте Мире-щьнада йә, ләма жи һәр кәс жь мә рʹасти тәнгасийа те (1 Йуһʹәнна 5:19; Әʹйанти 12:12). Гава әм хԝәрʹа дькьн хәйсәт кӧ бона кәсед дьн дӧа бькьн, әм тиньн бира хԝә «кӧ хушк-бьред [мә] жи тʹәмамийа дьнйайеда хут ԝан щәфа дькʹьшиньн» (1 Пәтрус 5:9). Пешәнгәкә бь наве Катрин ӧса дьбежә: «Дӧакьрьна бона кәсед дьн тинә бира мьн, ԝәки кәсед дьн жи рʹасти чәтьнайа тен у али мьн дькә кӧ әз бь зедәйи дина хԝә нәдьмә дәрдед хԝә».

ӘԜАНА ҺʹӘԜЩЕ ДӦАЙЕД МӘ НӘ

8. Әм бона кʹе дькарьн дӧа бькьн?

⁸ Гәло әм бона кʹе дькарьн дӧа бькьн? Мәсәлә, әм дькарьн бона кәсед нәхԝәш, щаһьлед кӧ мәкʹтәбеда рʹасти чәтьнайа тен йан бона кәсед әʹмьрда мәзьн дӧа бькьн. Ӧса жи сәва ԝан хушк-бьра, йед кӧ жь алийе мәрьвед хԝәва йан жь алийе дәԝләтева рʹасти пәйкʹәтьна тен (Мәтта 10:18, 36; Кʹаред Шандийа 12:5). Жь бо шәрʹ у тʹәвльһәвбуна һьнә хушк-бьра мәщбур бун жь малед хԝә бьрʹәвьн һәрʹьн. Һьнә кәс жи жь бо тʹәшԛәлед тʹәбийәте тәнгасийе дькʹьшиньн. Дьбәкә әм ван хушк-бьра шәхси нас накьн, ле гава әм бона ԝан дӧа дькьн, әм нишан дькьн ԝәки әм гӧһ дьдьнә тʹәмийа Иса кӧ «һәвдӧ һʹәз бькьн» (Йуһʹәнна 13:34).

9. Чьма әм гәрәке бона бьред щабдар у бона жьнед ԝан дӧа бькьн?

⁹ Ӧса жи, әм дькарьн бона бьред кӧ тʹәшкиләта Йаһоԝада щабдарийед ԝан һәнә, дӧа бькьн. Мәсәлә, бона Кʹома Рʹебәрийе у аликʹарчийед ԝан, бона Комитейед Бәйтʹәла у бьред кӧ Бәйтʹәлада ча бәрпьрсийаред идара хьзмәт дькьн у ӧса жи бона бәрпьрсийаред мьһале, рʹуспийа у бәрдәстийед щьвате. Рʹаст ә чәтьнайед шәхси щәм ԝан бьра һәнә, ле йәкә әԝана бона кʹара мә шьхӧле Йаһоԝада хирәт ьн (2 Корьнтʹи 12:15). Мәсәлә, бәрпьрсийарәки мьһале бь наве Марк ӧса дьбежә: «Әв йәк кӧ әз жь де-баве хԝәйи әʹмьрда мәзьн дур ьм бона мьн дәрдәки мәзьн ә, чьмки һәрдӧ жи нәхԝәш ьн. Хушка мьн у мере ԝе чьԛас бона һʹәԝщед ԝан хәм дькьн жи, дьле мьн дешә чьмки әз нькарьм кʹеләка ԝан бьм, сәва кӧ хԝәха жи али ԝан бькьм». Фьрԛи тʹӧнә әм дәрдед шәхси йед ԝан бьред хирәт заньн йан на, ԝәрә әм бона ԝан дӧа бькьн (1 Тʹесалоники 5:12, 13). Хенщи ве йәке, әм дькарьн бона жьнед ԝан жи дӧа бькьн, чьмки пьштгьрийа ԝан бона меред ԝан бь рʹасти жи гәләк ԛимәт ә у али ԝан дькә, кӧ әԝана хьзмәтийа хԝә бәрдәԝам бькьн.

10-11. Гәло Йаһоԝа жь дӧайед бона һʹәмуйа бь тʹәмами рʹазийә? Шьровәкә.

¹⁰ Чаԝа кӧ мә шеԝьр кьр, щарна әм бона һʹәму хушк-бьра бь тʹәмами дӧа дькьн. Мәсәлә, щарна әм рʹастә-рʹаст наве кәсәки һьлнадьн, ле бь тʹәмами бона кәсед кӧ кәледа ньн, йан бона кәсед кӧ мәрьвед хԝәйә һʹәзкьри ӧнда кьрьнә, дӧа дькьн. Рʹуспики бь наве Доналд ӧса дьбежә: «Чьмки гәләк хушк-бьра тәнгасийеда ньн, әм щарна бь тʹәмами бона ԝан һʹәмуйа дӧа дькьн».

¹¹ Гәло Йаһоԝа жь дӧайед ӧса рʹази йә? Бәле! Һәмьки әм һʹәԝщед һәр хушк-бьраки ньзаньн, ләма жи нормал ә кӧ әм бона ԝан һʹәмуйа бь тʹәмами дӧа бькьн (Йуһʹәнна 17:20; Әфәси 6:18). Дӧайед ӧса нишан дькьн, ԝәки әм һʹәму ‹хушк-бьра һʹәз дькьн› (1 Пәтрус 2:17).

ГАВА ӘМ ХУТ БОНА КӘСӘКИ ДӦА ДЬКЬН

12. Сәва кӧ әм бькарьбьн конкрет бона кәсәки дӧа бькьн, әм гәрәке чь бькьн?

¹² Бьра дина тә сәр мәрьва бә. Хенщи ве йәке кӧ әм дькарьн бь тʹәмами бона һʹәму хушк-бьра дӧа бькьн, ԝе баш бә ԝәки әм бона һьнә кәсед конкрет жи дӧа бькьн. Мәсәлә, гәло щьвата мәда кәсәки нәхԝәш һәйә? Гәло зарʹ йан щаһьләк һәйә, йе кӧ дьлтәнг ә, чьмки мәкʹтәбеда жь бо баԝәрийа ԝи ԛәрфед хԝә ԝи дькьн? Гәло хушк йан бьракирʹа кӧ тʹәне зарʹед хԝә мәзьн дькә, чәтьн ә зарʹа «ль гора ширәткьрьн у рʹебәрийа Йаһоԝа» һин кә? (Әфәси 6:4) Ԝәрә әм рʹьнд дина хԝә бьдьнә хушк-бьред дәр-дора хԝә у кәсед ӧса бьвиньн. Бь ви щурʹәйи әме дьһа зедә ԝана һʹәз бькьн у бьхԝазьн бона ԝан дӧа бькьнb (Рʹомайи 12:15).

13. Әм ча дькарьн бона кәсед кӧ әм шәхси нас накьн жи дӧа бькьн?

¹³ Дӧайед хԝәда навед хушк-бьра һьлдә. Һәрге әм кәсәки шәхси нас накьн жи, әм дькарьн дӧайед хԝәда наве ԝи һьлдьн. Мәсәлә, бьфькьрә дәрһәԛа ԝан хушк-бьра, йед кӧ ль Криме, Әритрейайе, Русйайе у ль Сингапуре кәледа ньн. Навед кәсед кӧ кәледа ньн әм дькарьн ль сәр jw.org бьвиньн.c Бәрпьрсийарәки мьһале бь наве Брайан ӧса дьбежә: «Сәва кӧ әз наве хушк йан бьраки кӧ кәледа йә, биньм бира хԝә у дӧайед хԝәда наве ԝи һьлдьм, әз наве ԝи хԝәрʹа дьньвисьм у бь дәнге бьльнд дьбежьм».

14-15. Әм ча дькарьн бона тьштед конкрет дӧа бькьн?

¹⁴ Бьра дӧайед тә конкрет бьн. Микайел, бәʹса кʹижани кӧ мә пешда кьрьбу, ӧса дьбежә: «Гава әз сәрһатийед хушк-бьред кӧ кәледа гьрти нә, ль сәр jw.org дьхуньм, әз дьфькьрьм кӧ һәрге әз дәԝса ԝан бума, мьне хԝә ча тʹәхмин кьра. Мәсәлә, әзе бона жьна хԝә бәр хԝә кʹәтама, у мьне бьхԝәста кӧ бона һʹәԝщед ԝе хәм кьрана. Ләма жи, гава әз бона хушк-бьред зәԝьщи, йед кӧ кʹәтьнә кәле, дӧа дькьм, әз заньм кӧ дькарьм бәʹса чь бькьм» (Ибрани 13:3, спартьн).

¹⁵ Һәрге әм жийина хушк-бьред кӧ кәледа ньн дьдьнә бәр чʹәʹве хԝә, ԝи чахи әме фәʹм бькьн кӧ әм дькарьн хут бона чь дӧа бькьн. Мәсәлә, әм дькарьн дӧа бькьн ԝәки нобәдар һьндава ԝан рʹәʹм бьн у кәсед щабдар изьне бьдьн, ԝәки хушк-бьред мә бь азайи Йаһоԝа бьһʹәбиньн (1 Тимотʹейо 2:1, 2). Әм дькарьн дӧа бькьн ԝәки хушк-бьред дьн жь мәсәла амьнийа ԝан йед кӧ кәледа ньн, һелане бьстиньн, йан жи ԝәки мәрьвед нәбаԝәрмәнд рʹабун-рʹуньштьна ԝанә баш бьвиньн у гӧһ бьдьнә мьзгинийе (1 Пәтрус 2:12). Һәмьки әм дькарьн бона хушк-бьред кӧ тәнгасийед дьн дькʹьшиньн жи ӧса дӧа бькьн. Ԝәрә әм рʹьнд дина хԝә бьдьнә дәр-дора хԝә, навед һьнә хушк-бьра дӧайед хԝәда һьлдьн у конкрет бона һʹалхԝәшийа ԝан Йаһоԝарʹа дӧа бькьн. Бь ви щурʹәйи һʹәзкьрьна кӧ нав мәда һәйә ԝе дьһа зедә бә (1 Тʹесалоники 3:12).

НЬҺЕРʹАНДЬНА РʹАСТ СӘР ДӦА

16. Әм гәрәке ча сәр дӧайед хԝә бьньһерʹьн? (Мәтта 6:8)

¹⁶ Чаԝа мә дит дӧайед мә дькарьн сәр гӧһастьна дәрәща һʹӧкӧм кьн. Диса жи әм гәрәке нәфькьрьн, ԝәки Йаһоԝа һьнә тьшта ньзанә у лазьм ә кӧ дәрһәԛа ве йәке бь сайа дӧа жерʹа бежьн. Ӧса жи әм гәрәке Йаһоԝарʹа нәбежьн кӧ чь бькә. Йаһоԝа һʹәԝщед хьзмәткʹаред хԝә занә, пешийа кӧ әԝана йан жи әм дәрһәԛа ве йәке пебьһʹәсьн (Бьхунә Мәтта 6:8). Ле һәрге ӧса нә, чьма лазьм ә кӧ әм бона кәсед дьн дӧа бькьн? Хенщи ван тьшта бәʹса чь жи мә кьр, бь дӧайед хԝә әм дькарьн нишан кьн кӧ әм бона мәрьва хәм дькьн. Әм һәвдӧ һʹәз дькьн, ләма жи дьхԝазьн бона һәв дӧа бькьн. Гава Йаһоԝа дьвинә кӧ әм чʹәʹв дьдьнә һʹәзкьрьна ԝи, әԝ гәләк ша дьбә.

17-18. Мәсәле биньн кӧ дьдә кʹьфше, ԝәки бь сайа дӧа әм бона хушк-бьред хԝә хәм дькьн.

¹⁷ Һәрге ӧса бе кʹьфше, ԝәки паши дӧайед мә фьлан дәрәщә найе гӧһастьне, йәкә бь дӧайед хԝә әм нишан дькьн кӧ хушк-бьра һʹәз дькьн. Йаһоԝа ве йәке дьвинә у дьшекьринә. Ве мәсәле бьдә бәр чʹәʹве хԝә: Малбәтәкеда дӧ зарʹед бьчʹук һәнә, кӧрʹ у ԛизәк. Кӧрʹ нәхԝәш ә у кʹәтийә нава щи-ньвина. Кәчʹьк баве хԝәрʹа дьбежә: «Баво, лава дькьм али бьре мьн бькә. Әԝ гәләк нәхԝәш ә!» Дина баве ӧса жи сәр кӧрʹе ԝи йә, чьмки әԝ ԝи һʹәз дькә у рʹьнд ле дьбә хԝәйи. Ле гава әԝ дьвинә кӧ ԛиза ԝи чьԛас бона бьре хԝә хәм дькә, әԝ гәләк ша дьбә.

¹⁸ Һәма бь ви щурʹәйи Йаһоԝа дьхԝазә кӧ әм бона һәвдӧ хәм бькьн у дӧа бькьн. Гава әм бона кәсед дьн дӧа дькьн, әм нишан дькьн кӧ әм нә тʹәне дькʹәвьнә һʹәйра хԝә, ле бь дьл у щан бона кәсед дьн жи хәм дькьн, у әв йәк Йаһоԝа хԝәш те (2 Тʹесалоники 1:3; Ибрани 6:10). Ӧса жи чаԝа мә дит, дӧайед мә щарна дькарьн сәр дәрәща һʹӧкӧм кьн. Ләма жи ԝәрә әм тʹӧ щар бир нәкьн, ԝәки бона һәвдӧ дӧа бькьн.