Хԝәдайе Мә «Хԝәйе Рʹәʹма Дәԝләмәнд ә»

1. Дьлрʹәʹми чь йә?

ДЬЛРʹӘʹМИ һʹӧнӧрәки гәләк хԝәш ә. Әв һʹӧнӧр бь ԛәнщийе, дьлгәрмийе, дьлшәԝатийе, у мәрʹданийева гьредайи йә. Мәтʹәлока Иса дәрһәԛа мерәки Самәрийе дьлрʹәʹм биньн бира хԝә. Әв мер жь мьләтәки дьн бу, ле гава әԝи мерәки Щьһу дит, йе кӧ кʹәтьбу дәстед ԛачаха, «гӧне ԝи ле һат». Мере Самәри бь дьловани Щьһуйе бьриндар бу хԝәйи, чьмки дьле ԝи сәр шәԝьти (Луԛа 10:29-37). Әв мәтʹәлок дина мә дькʹьшинә сәр рʹәʹмтийа Хԝәде. Хԝәде һьндава мәда рʹәʹм ә, чьмки әԝ мә һʹьз дькә у әԝ һәр рʹож рʹәʹма хԝә мәрʹа нишан дькә.

2. Дьлрʹәʹми щарна ча те әʹйанкьрьне?

² Хенщи ве йәке, дьлрʹәʹми щарна те һʹәсабе ԝәки кәсәки кӧ һежайи щәза йә, щәза нәкьн. Йаһоԝа рʹәʹма хԝә бь ви щурʹәйи мәрʹа гәләк щар нишан дькә. Кʹьтеба Пироз ӧса дьбежә: «Әԝ ԝәкә гӧнәйед мә, сәре мә накә» (Зәбур 103:10). Ле щара лазьм ә ԝәки Йаһоԝа кәсе кӧ гӧнә кьрийә, щәза бькә.

3. Ве готареда, әме щабед кʹижан пьрса бьстиньн?

³ Ве готареда, әме се пьрса шеԝьр кьн: Гәло Йаһоԝа чьрʹа рʹәʹм ә? Гәло щәзайа сәрт ча дьлрʹәʹмийева гьредайи йә? Гәло чь дькарә али мә бькә дьлрʹәʹм бьн? Ԝәрә әм бьвиньн һәла Кʹьтеба Пироз дәрһәԛа ве йәке чь дьбежә.

ЙАҺОԜА ЧЬРʹА РʹӘʹМ Ә?

4. Йаһоԝа чьрʹа дьлрʹәʹм ә?

⁴ Рʹәʹма Йаһоԝа һʹьзкьрьна ԝива гьредайи йә. Паԝлосе шанди жь бина бәр Хԝәде ньвиси кӧ Хԝәде «хԝәйе рʹәʹма дәԝләмәнд ә». Ве контекстеда, Паԝлос зәлал дькьр кӧ Хԝәде жь рʹәʹма хԝә һевийа жийина сәр әʹзмана дьдә һьнә хьзмәткʹаред хԝәйә гӧнәкʹар (Әфәси 2:4-7). Ле Йаһоԝа рʹәʹма хԝә кәсед дьнрʹа жи әʹйан дькә. Даԝьд Пʹадша ӧса ньвиси: «Хӧдан бона һʹәмуйа ԛәнщ ә, рʹәʹма Ԝи сәр һʹәму әʹфьринед Ԝи йә» (Зәбур 145:9). Йаһоԝа мә һʹьз дькә, у һәма ча мәщал дькʹәвә дәсте ԝи, әԝ рʹәʹма хԝә мәрʹа әʹйан дькә.

5. Иса жь кʹӧ заньбу ԝәки Йаһоԝа дьлрʹәʹм ә?

⁵ Иса Мәсиһ жь һәр кәси баштьр занә кӧ Йаһоԝа чьԛас дьлрʹәʹм ә. Пешийа кӧ Иса һатә дьнйайе, әԝи тʹәви Баве хԝә гәләк ԝәхт дәрбаз кьрьбу (Мәтʹәлок 8:30, 31). Иса гәләк щар дитьбу ԝәки Баве ԝи һьндава мәрьвед гӧнәкʹар ча рʹәʹма хԝә дьда кʹьфше (Зәбур 78:37-42). Гава Иса һин дькьр, әԝи гәләк щар дина мәрьва дькʹьшанд сәр ви һʹӧнӧре хԝәш йе Баве хԝә.

6. Иса ча нишан кьр ԝәки Хԝәде дьлрʹәʹм ә?

⁶ Чаԝа мә готара пешийа веда дитьбу, Иса бь сайа мәтʹәлока дәрһәԛа кӧрʹе ӧндабуйи зәлал кьр, ԝәки Йаһоԝа чьԛас дьлрʹәʹм ә. Ве мәтʹәлокеда, хорт жь мале чу у «әʹмьре толтийе дәрбаз кьр, һʹәму һәбука хԝә пʹучʹ кьр» (Луԛа 15:13). Паше, әԝи тʹобә кьр, хԝә ньмьз кьр у вәгәрʹийа мале. Гәло баве ԝи чь кьр? Иса Мәсиһ гот: «Гава һе дурва баве әԝ дит, дьле ԝи сәр шәԝьти, бәрбь ԝи бәзи, әԝ һʹәмез кьр у рʹамуса». Кӧрʹе ӧндабуйи гӧнед мәзьн кьрьбу, ле чьмки әԝи тʹобә кьр, бав бахшандә ԝи. Бав кӧрʹе хԝә беһӧрмәт нәкьр, ле бь дьлрʹәʹми бахшанд у малбәтеда ԛәбул кьр. Баве дьлрʹәʹм жь ве мәтʹәлоке бәрамбәри Йаһоԝа дьбә. Бь ве мәтʹәлоке, Иса әшкәрә кьр кӧ Баве ԝи һазьр ә гӧнәкʹаред кӧ жь дьл тʹобә дькьн, бьбахшинә (Луԛа 15:17-24).

7. Биланийа Йаһоԝа чаԝа рʹәʹма ԝива гьредайи йә?

⁷ Рʹәʹма Йаһоԝа биланийа ԝийә мәзьнва гьредайи йә. Кʹьтеба Пироз ӧса дьбежә: «Сәрԝахтийа жорьн . . . бь рʹәʹме у бәред ԛәнщийева тʹьжи йә» (Аԛуб 3:17). Чаԝа бавәки дьлован, Йаһоԝа занә кӧ рʹәʹма ԝи кʹаре дьдә зарʹед ԝи (Зәбур 103:13; Ишайа 49:15). Мәрьв чьԛас ԛьсурдар бьн жи, әԝана дькарьн хԝә бавежьн бәр рʹәʹма Хԝәде. Биланийа Йаһоԝа бесинор ә. Ләма, һәгәр мәʹни һәбьн, әԝ һазьр ә рʹәʹмтийе бьдә кʹьфше. Йаһоԝа рʹәʹма хԝә бь сәрԝахти әʹйан дькә, ләма әв найе һʹәсабе ԝәки әԝ чʹәʹве хԝә сәр гӧна дадьдә. Бәле, сафикьрьна Йаһоԝа һәртʹьм бь билани йә у бона ԛәнщийа мә йә.

8. Щарна лазьм ә щьват чь бькә у чьма?

⁸ Бәʹса хәбәре хьзмәткʹарәки Хԝәде бь һʹәмде хԝә гӧнә кьрийә. Гәрәке әм чь бькьн? Жь бина бәр Хԝәде, Паԝлосе шанди ӧса гот: «Тʹәви ԝи нәбьн» (1 Корьнтʹи 5:11). Кәсед кӧ гӧнед гьран дькьн у тʹобә накьн, жь щьвате тенә дәрхьстьне. Әв йәк лазьм ә сәва кӧ хушк-бьред амьн бен парастьн у принсипед Йаһоԝа хԝәй кьн. Ле һьнәк дьфькьрьн кӧ гава кәсәк жь щьвате те дәрхьстьне, әв те һʹәсабе ԝәки Хԝәде рʹәʹма хԝә һьндава ԝида нәда кʹьфше. Гәло әв фькьр рʹаст ә?

ДӘРХЬСТЬНА ЖЬ ЩЬВАТЕ ЧАԜА РʹӘʹМЕВА ГЬРЕДАЙИ ЙӘ?

9-10. Ль гора Ибрани 12:5, 6, әм чьма дькарьн бежьн кӧ дәрхьстьна жь щьвате рʹәʹмева гьредайи йә? Мәсәле бинә.

⁹ Чахе әм сәр щьвате әʹламәти дьбьһен ԝәки мәрьвәки мәйи һʹьзкьри «ида Шәʹде Йаһоԝа нинә», агьр дьле мә дькʹәвә. Әм дьбәкә дьфькьрьн, гәло бь рʹасти лазьм бу кӧ әԝ жь щьвате бьһата дәрхьстьне. Гәло әв йәк кӧ кәсәк жь щьвате те дәрхьстьне рʹәʹмева гьредайи йә? Бәле. Һәгәр кәсәки ширәт у щәза дькьн, чьмки әԝ һʹәԝщә йә, әв йәк билани, дьлрʹәʹми у һʹьзкьрьне әʹйан дькә (Мәтʹәлок 13:24). Гәло әв йәк кӧ кәсәк жь щьвате те дәрхьстьне дькарә али ԝи бькә, ԝәки әԝ тʹобә бькә у хԝә рʹаст бькә? Бәле. Гәләк кәсед кӧ гӧнед гьран кьрьнә, бь сайа дәрхьстьна жь щьвате, сәр һʹьше хԝәда һатьнә, жийина хԝә гӧһастьнә у вәгәрʹийанә бьн сийа пʹәрʹе Йаһоԝа (Ибрани 12:5, 6 бьхунә).

¹⁰ Ве мәсәле бинә бәр чʹәʹве хԝә: Шьван дьвинә ԝәки бәрхәкә ԝи нәхԝәш ә. Әԝ занә кӧ бона ԛәнщкьрьна ве нәхԝәшийе, лазьм ә ве бәрха нәхԝәш жь кәри башԛә бькә. Бәрх дьхԝазьн нав кәрида бьн, у гава әԝ тен башԛәкьрьн, әԝ әʹщьз дьбьн. Гәло әв йәк кӧ шьван бәрха хԝә жь кәри дур дьхә, те һʹәсабе кӧ әԝ йәки берʹәʹм ә? Һьлбәт на. Шьван занә кӧ һәгәр бәрха нәхԝәш нав кәрида бьминә, нәхԝәши ԝе бәла бә у зьраре бьдә пәзед дьн. Ләма шьван бәрха нәхԝәш башԛә дькә, ԝәки кәри бе парастьн (Ԛануна Кʹаһинтийе 13:3, 4 бьньһерʹә).

11. (а) Кәсе кӧ жь щьвате һатийә дәрхьстьне, чьда мина бәрхәкә нәхԝәш ә? (б) Кәсед кӧ жь щьвате һатьнә дәрхьстьне, дькарьн чь аликʹарийе бьстиньн?

¹¹ Гава Мәсиһик жь щьвате те дәрхьстьне, әԝ мина бәрхәкә нәхԝәш ә, чьмки әԝ жь алийе рʹӧһʹанива нәхԝәш ә (Аԛуб 5:14). Мина һьнә нәхԝәшийед физики, нәхԝәшийа рʹӧһʹани жи дькарә дәрбази мәрьвед дьн бә. Ләма жи, щарна лазьм дьбә ԝәки кәсе кӧ рʹӧһʹанида нәхԝәш ә, жь щьвате бе дәрхьстьне. Әв ширәткьрьна Йаһоԝа һʹьзкьрьна ԝи әʹйан дькә, йе кӧ дьхԝазә бәрхед хԝәйә дьн бьпарезә. Сәрда жи, әв щәза дькарә али кәсе гӧнәкʹар бькә, ԝәки әԝ тʹобә бькә. Мәрьве жь щьвате дәрхьсти, диса жи дькарә бе щьвата у хԝарьна рʹӧһʹани бьстинә. Ӧса жи, әԝ дькарә әʹдәбйәта бьстинә у JW Бродкастинг бьньһерʹә. Рʹуспийед кӧ дина хԝә дьдьн хирәт у пешдачуйина ԝи, дькарьн щара ширәт у рʹебәрийе бьдьнә ԝи, ԝәки әԝ алийе рʹӧһʹанида ԛәнщ бә у диса бьбә Шәʹде Йаһоԝа.b

12. Һәгәр кәсәк тʹобә накә, гәрәке рʹуспи чь бькьн?

¹² Бир нәкә, ԝәки тʹәне гӧнәкʹаред кӧ тʹобә накьн, жь щьвате тен дәрхьстьне. Рʹуспи заньн, пешийа кӧ кәсәки жь щьвате дәрхьн, әԝана гәрәке кʹур бьфькьрьн у дәрәще леколин кьн. Әԝана рʹьнд заньн ԝәки Йаһоԝа мәрьв һаԛас щәза дькә, чьԛас жерʹа дькʹәвә (Йерәмийа 30:11). Рʹуспи хушк-бьра һʹьз дькьн у әԝана нахԝазьн сафикьрьнәкә ӧса бькьн, кӧ достийа ԝан тʹәви Йаһоԝа хьраб бә. Әԝана заньн ԝәки щарна сафикьрьна дьлрʹәʹм у дьлован әв ә, ԝәки кәсе кӧ гӧнә кьрийә, сәр ԝәхтәке жь щьвате дәрхьн.

13. Чьма лазьм бу ԝәки мерәки жь щьвата Корьнтʹе бьһата дәрхьстьне?

¹³ Ԛьрʹна йәкеда щьвата Корьнтʹеда мерәки тʹәви жьна баве хԝә бенамуси дькьр. Чь әʹйб ә! Бенамусийа ви мәрьви сәр щьвате жи хьраб һʹӧкӧм дькьр. Һьнә кәсед жь щьвата Корьнтʹе ве зьнекʹарийе ча гӧнәки гьран һʹәсаб нәдькьрьн. Гәло Паԝлос әв проблем ча сафи кьр? Ԛануна Мусада, Йаһоԝа Исраелийарʹа ӧса готьбу: «Әԝе кӧ сәре хԝә жьнбава хԝәрʹа дайнә, әԝи шәрма баве хԝә вәкьр, әʹсә әԝ һәр дӧ жи гәрәке бенә кӧштьне» (Ԛануна Кʹаһинтийе 20:11). Шагьртед Иса ида бьн һʹӧкӧме Ԛануна Мусада нибун, ләма жи Паԝлос нәгот ԝәки әв мер гәрәке бе кӧштьне. Ле Паԝлос щьвата Корьнтʹерʹа гот, ԝәки ԝи жь щьвате дәрхьн (1 Корьнтʹи 5:1, 2, 13).

14. Паԝлос ча рʹәʹмти һьндава мере кӧ жь щьвате һатьбу дәрхьстьне да кʹьфше, у чьрʹа? (2 Корьнтʹи 2:5-8, 11)

¹⁴ Ԝәʹдә шунда, Паԝлос бьһист ԝәки әԝ мере гӧнәкʹар пʹошман буйә у бь рʹасти тʹобә кьрийә. Рʹаст ә ви мери ләкʹә анибу сәр наве щьвате, ле диса жи Паԝлос нәдьхԝәст бь зедәйи һьндава ԝида сәрт бә. Ләма, әԝи рʹуспийарʹа гот ԝәки «бьбахшиньнә ԝи у ль бәр дьле ԝида бен». Паԝлос ӧса гот ԝәки әԝ мер «кʹәрби бәрхԝәкʹәтьне» гәләк дьлтәнг нәбә. Дьле Паԝлос бь ви мере кӧ тʹобә кьр, дьшәԝьти. Әԝи нәдьхԝәст, ԝәки әв мер бьн баре суще хԝәда бьминә у һевийа бахшандьне ӧнда кә (2 Корьнтʹи 2:5-8, 11 бьхунә).

15. Рʹуспи ча дькарьн дьлрʹәʹмтийа рʹаст бьдьнә кʹьфше?

¹⁵ Рʹуспи гәрәке мина Йаһоԝа дьлрʹәʹм бьн. Әԝана сафикьрьнед сәрт тʹәне ԝи чахи дькьн, гава бь рʹасти һʹәԝщә йә, ле диса жи дәрәщә чьԛас дәст дьдә, әԝана гәрәке дьлрʹәʹмтийе бьдьнә кʹьфше. Рʹаст ә рʹуспи гәрәке дьлрʹәʹм бьн, ле әв йәк найе һʹәсабе ԝәки әԝана гәрәке чʹәʹве хԝә сәр гӧнә дадьн. Гәло хенщи рʹуспийа, кәсед дьн ча дькарьн дьлрʹәʹм бьн?

ӘМ ЧА ДЬКАРЬН ДЬЛРʹӘʹМ БЬН?

16. Ль гора Мәтʹәлок 21:13, Йаһоԝа ча дьньһерʹә сәр кәсед берʹәʹм?

¹⁶ Әм һʹәмушк жи гәрәке чʹәʹв бьдьнә рʹәʹма Йаһоԝа. Гәло чьма? Мәʹнийа фәрз әв ә ԝәки Йаһоԝа гӧһ надә кәсед кӧ һьндава мәрьвада дьлрʹәʹм ниньн (Мәтʹәлок 21:13 бьхунә). Һәгәр әм дьхԝазьн Йаһоԝа гӧһ бьдә дӧайед мә, әм гәрәке һаш жь хԝә һәбьн, ԝәки әм нәбьнә мәрьвнә дьлсар у берʹәʹм. Әм гәрәке гӧһе хԝә сәр дәрд у газьнед хушк-бьра данәдьн, ле һәртʹьм һазьр бьн гӧһ бьдьнә ԝан. Ӧса жи әм гәрәке бир нәкьн, кӧ «бе рʹәʹм ԝе диԝана берʹәʹма бьбә» (Аԛуб 2:13). Һәгәр әм бь мьлукти биньн бира хԝә ԝәки әм хԝәха чьԛас һʹәԝще рʹәʹме нә, мәрʹа ԝе дьһа һеса бә һьндава кәсед дьн рʹәʹме бьдьнә кʹьфше. Мәсәлә, гава гӧнәкʹарәки тʹобә кьрийә у вәдьгәрʹә щьвате, әм гәрәке һьндава ԝида дьлрʹәʹм бьн у бь дьл у щан ԝи ԛәбул кьн.

17. Даԝьд Пʹадша дьлрʹәʹмти ча нишан дькьр?

¹⁷ Һьнә сәрһатийед Кʹьтеба Пироз дькарьн али мә бькьн дьлрʹәʹм бьн у һьндава мәрьвада дьлсар нәбьн. Сәрһатийа Даԝьд Пʹадша бинә бәр чʹәʹве хԝә. Әԝ гәләк щар һьндава кәсед дьн рʹәʹм бу. Мәсәлә, чахе Шаԝул Пʹадша дьхԝәст әԝ бькӧшта, Даԝьд һьндава ԝида дьлрʹәʹмти дьда кʹьфше. Әԝи тʹӧ щар изьн нәдьда хԝә, ԝәки пʹадше кʹьфшкьри бькӧжә йан һʹәйфа хԝә һьлдә (1 Самуйел 24:9-12, 18, 19).

18-19. Кʹижан дӧ дәрәщада Даԝьд берʹәʹмти да кʹьфше?

¹⁸ Ле Даԝьд нә һәртʹьм дьлрʹәʹмти дьда кʹьфше. Мәсәлә, гава Набал, йе кӧ мәрьвәки ԛӧрʹә бу, Даԝьд у әскәред ԝи беһӧрмәт кьр у хԝарьн нәда ԝан, Даԝьд һерс кʹәт у сафи кьр Набал у һʹәму меред мала ԝида, бькӧжә. Шькьр кӧ жьна Набал, Абигаил, йа кӧ жьнькәкә ԛәнщ у бьсәбьр бу, Даԝьд жь хунрʹетьне хԝәй кьр (1 Самуйел 25:9-22, 32-35).

¹⁹ Щарәке жи Натан пʹехәмбәр Даԝьдрʹа бәʹса мерәки дәԝләмәнд кьр, йе кӧ бәрха щинарәки бәләнгаз жь ԝи станд. Даԝьд һерс кʹәт у гот, ԝәки әԝ кәс һежайи мьрьне йә (2 Самуйел 12:1-6). Даԝьд заньбу ԝәки ль гора Ԛануна Муса, кәсе кӧ бәрхәке дьдьзә, гәрәке дәԝсе чар бәрха бьдә (Дәркʹәтьн 22:1). Бь рʹасти, сафикьрьна кӧ дьз гәрәке бе кӧштьне, ԝе берʹәʹмти буйа. Натан әв чʹирок ча мәсәлә да хәбате, ԝәки дина Даԝьд бькʹьшинә сәр гӧне ԝи, кӧ дьһа гьран бу. Даԝьд һьндава дьзе бәрхьке жь чʹирока Натан, дьлрʹәʹмти нәда кʹьфше, ле Йаһоԝа һьндава Даԝьд дьлрʹәʹм бу! (2 Самуйел 12:7-13)

20. Сәрһатийа Даԝьд чь мә һин дькә?

²⁰ Дина хԝә бьдьн, гава Даԝьд һерс кʹәт, әԝи гот кӧ Набал у һʹәму хӧламед ԝи һежайи мьрьне нә. Щарәке жи Даԝьд фькьри кӧ мере жь чʹирока Натан, һежайи мьрьне йә. Илаһи жь дәрәща дӧда, әм дьбәкә әʹщебмайи дьминьн ԝәки мәрьвәки дьлгәрм чьма сафикьрьна һаԛас сәрт кьр. Ԝәрә әм сәр контексте бьфькьрьн. Ԝи чахи исафа Даԝьд нәрʹьһʹәт бу. Һәгәр кәсәк һәртʹьм кәсед дьн сәрт сущдар дькә, әв йәк нишан дькә  кӧ әԝ рʹӧһʹанида сьст буйә. Иса шагьртед хԝәрʹа гот: «Лома нәкьн, кӧ ломә ль ԝә нәбьн. Һун чь лома бькьн, әԝ ломә жи ԝе ль ԝә бьбьн» (Мәтта 7:1, 2). Ләма, ԝәрә әм нәбьн кәсед дьлкәвьр, ле мина Хԝәдайе мә, «хԝәйе рʹәʹма дәԝләмәнд» бьн.

21-22. Әм ча дькарьн һьндава мәрьвада рʹәʹм бьн?

²¹ Дьлрʹәʹми нә тʹәне һәсте дьле мә йә. Кәсе кӧ бь рʹасти дьлрʹәʹм ә, пе шьхӧлед хԝә дьлрʹәʹмтийе избат дькә. Ԝе баш бә кӧ әм рʹьнд дина хԝә бьдьн һʹәԝщед малбәт у щьвата хԝә. Бь рʹасти гәләк мәщал һәнә һьндава мәрьвада рʹәʹме бьдьнә кʹьфше! Мәсәлә, һәгәр кәсәк һʹәԝще дьлбинийе йә, әм дьбәкә дькарьн бона ԝи хԝарьне чекьн йан бь щурʹәки дьн али ԝи бькьн. Йан жи, гава кәсе кӧ жь щьвате һатьбу дәрхьстьне вәдьгәрʹә щьвате, әԝ дьбәкә һʹәԝще бәрдьлийе у һәвалтийе йә. Ӧса жи, гәрәке әм мәрьварʹа бәʹса мьзгинийе бькьн. Бь ви щурʹәйи, әме рʹәʹма хԝә һьндава мәрьвада бьдьнә кʹьфше (Ибо 29:12, 13; Рʹомайи 10:14, 15; Аԛуб 1:27).

²² Һәр рʹож гәләк мәщал вәдьбьн, ԝәки әм һьндава мәрьвада дьлрʹәʹмтийе бьдьнә кʹьфше. Һәгәр әм дьлрʹәʹм бьн, Баве мәйи әʹзмана, кӧ «хԝәйе рʹәʹма дәԝләмәнд ә», ԝе жь мә рʹази бә!