Достийа Тʹәви Йаһоԝа Тʹәзәда Ава Бькә

ҺӘР сал, гәләк бәрхед ԛимәт вәдьгәрʹьн нав кәрийа Йаһоԝа. Һәгәр тӧ жи йәк жь ԝан и, баԝәр бә кӧ гава кәсәк вәдьгәрʹә щьвате, Йаһоԝа, Иса Мәсиһ у мәләк гәләк ша дьбьн (Луԛа 15:7, 10). Диса жи, гава тӧ вәдьгәрʹи щьвате у дьхԝази достийа тʹәви Йа-һоԝа тʹәзәда ава бьки, дьбәкә тӧ рʹасти һьнә чәтьнайа бейи. Гәло әв чь чәтьнайи нә, у чь дькарә али тә бькә?

ЧӘТЬНАЙИ

Гәләк кәс паши кӧ әԝ вәдьгәрʹьн щьвате тʹәви фькред негатив шәрʹ дькьн. Дьбәкә һʹале Даԝьд Пʹадша тәрʹа нас ә. Гӧнед ԝи чьԛас һатьн бахшандьне жи, әԝи ӧса гот: «Нәһәԛийед мьн хԝә мьнрʹа гиһандьн» (Зәбур 40:12; 65:3). Паши кӧ кәсәк вәдьгәрʹә бал Йаһоԝа, әԝ дьбәкә диса жи бь сала шәрм бькә йан хԝә сущдар бькә. Исабелa 20 сала зедәтьр вәнәдьгәрʹийа щьвате. Әԝе гот: «Мьн баԝәр нәдькьр кӧ Йаһоԝа ԝе бьбахшинә мьн». Һәгәр тӧ жи ӧса бәрхԝә кʹәви, тӧ дькари рʹӧһʹанида диса сьст би (Мәтʹәлок 24:10). Изне нәдә кӧ әв йәк бе сәре тә.

Һьнә кәс хәмгин дьбьн, ԝәки әԝе нькарьбьн һәр тьшти бькьн кӧ достийа хԝә тʹәви Йаһоԝа тʹәзәда ава бькьн. Паши кӧ бьре мә Антони вәгәрʹийа щьвате, әԝи ӧса гот: «Мьн гәләк тьштед кӧ ча Шәʹде Йаһоԝа заньбу йан дькьр, бир кьрьбу». Ләма жи һьнә кәс хԝә паш дьхьн ԝәки һʹәму шьхӧлед рʹӧһʹанида кʹар бькьн.

Мәсәлә, бинә бәр чʹәʹве хԝә кӧ мала кәсәки жь бо фьртоне һьлшийа. Гава әԝ дьфькьрә кӧ чьԛас ԝәхт у ԛәԝат лазьм ә ԝәки әԝ мала хԝә тʹәзәда ава бькә, әԝ дьлтәнг дьбә. Мина ве йәке, һәгәр достийа тә тʹәви Йаһоԝа сәва гӧнәки гьран хьраб буйә, тӧ жи дьбәкә дьлтәнг дьби гава дьфькьри ԝәки чьԛас хирәт у ԛәԝат лазьм ә кӧ һʹале хԝәйә рʹӧһʹани рʹаст бьки. Ле баԝәр бә, тӧ тʹәне нини.

Йаһоԝа мәрʹа дьбежә: «Ньһа ԝәрʹьн у әм ль доза хԝә бьньһерʹьн» (Ишайа 1:18). Тә алийе хԝәда гәләк тьшт кьрийә кӧ ‹ль доза хԝә бьньһерʹи›, ԝәки тʹәви Йаһоԝа ль һәв бейи. Сәва ве хирәта тә, Йаһоԝа тә һʹьз дькә. Бәле, әв йәк кӧ тӧ вәгәрʹийайи бал Йаһоԝа, мәщале дьдә ԝи, ԝәки әԝ избат бькә кӧ Мире-щьна дәрәԝин ә! (Мәтʹәлок 27:11).

Тә ида гава пешьн авитийә ԝәки незики Йаһоԝа би, у әԝ соз дьдә кӧ әԝе жи незики тә бә (Аԛуб 4:8). Әв йәк кӧ хушк-бьра ша нә ԝәки тӧ вәгәрʹийайи щьвате, һьлбәт тьштәки хԝәш ә. Ле бәле, әв йәк нә бәс ә. Гәрәке тӧ һʹьзкьрьна хԝә һьндава Бав у Досте хԝә Йаһоԝа, чьԛас дьчә дьһа ԛәԝи бьки. Гәло ча?

ХԜӘРʹА НЕТЕД РЕАЛИ ДАЙНӘ

Ԝе баш бә тӧ хԝәрʹа нетед реали дайни. Дьбәкә һинкьрьнед сәрәкә – рʹастийед дәрһәԛа Йаһоԝа у созед ԝи – һе бира тәда ньн. Ле бәле, гәрәке тӧ тʹәзәда бь жийина Мәсиһити бьжийи. Демәк, гәрәке тӧ мьзгине бәла ки, һәрʹи щьвина у тʹәви хушк-бьра ԝәʹдә дәрбаз ки. Һәла дина хԝә бьдә ван нета:

Һәр гав Йаһоԝарʹа дӧа бькә. Йаһоԝа рʹьнд фәʹм дькә ԝәки исафа нәрʹьһʹәт дькарә рʹийа тә бьгьрә ԝирʹа дӧа бьки (Рʹомайи 8:26). Диса жи, «һәр гав» дӧа бькә у Йаһоԝарʹа бежә ԝәки тӧ дьхԝази бьби досте ԝи (Рʹомайи 12:12). Бьре мә Андреи тинә бира хԝә: «Исафа мьн әз гәләк дьчәрчьрандьм у мьн зәʹф шәрм дькьр. Ле паши дӧа, әв һәстед негатив щәм мьн кем дьбун у әʹдьлайи дькʹәтә дьле мьн». Һәгәр тӧ ньзани кӧ дӧайед хԝәда чь бежи, готьнед Даԝьд Пʹадша, йе кӧ тʹобә дькьр, Зәбуред 51 у 65-да бьхунә.

Һәртʹьм Кʹьтеба Пироз леколин бькә. Әв йәк ԝе али тә бькә кӧ баԝәрийа тә у һʹьзкьрьна тә һьндава Йаһоԝа дьһа ԛәԝи бә (Зәбур 19:7-11). Бьраки мә бь наве Филип дьбежә: «Мәʹни кӧ чьрʹа әз рʹӧһʹанида сьст бьбум у дьле Йаһоԝа ешанд, әв бу кӧ мьн Кʹьтеба Пироз һәртʹьм леколин нәдькьр. Әз нахԝазьм диса ве шашийе бькьм, ләма әз хирәт дькьм ԝәки леколина шәхси бәрʹнәдьм». Тӧ жи дькари ӧса бьки. Һәгәр тӧ ньзани кӧ бона леколина хԝәйә шәхси кʹижан тʹема бьжбери, тӧ дькари жь достәки щерʹьбанди аликʹарийе бьхԝази.

Достийа тʹәви хушк-бьра тʹәзәда ава бькә. Һьнә кәс кӧ вәдьгәрʹьн щьвате, дьтьрсьн ԝәки хушк-бьра ԝе хԝә жь ԝан дур бьгьрьн. Лариса ӧса дьбежә: «Мьн гәләк шәрм дькьр. Әз дьфькьрим кӧ мьн нәмамийа щьвате кьрьбу. Ԝәхтәкә дьреж, мьн нькарьбу ван фькра жь һʹьше хԝә дәрхьста». Баԝәр бә кӧ рʹуспийед щьвате у кәсед дьн һазьр ьн али тә бькьн, ԝәки тӧ диса бьби досте Йаһоԝа (Чаргошә «Рʹуспийед Щьвате Дькарьн Чь Бькьн?» бьньһерʹә). Әԝана гәләк ша нә кӧ тӧ вәгәрʹийайи щьвате, у әԝана ԛәнщийа тә дьхԝазьн! (Мәтʹәлок 17:17)

Чь дькарә али тә бькә ԝәки дьһа незики хушк-бьра би? Щьвина бәрʹнәдә у тʹәви хушк-бьра дәркʹәвә хьзмәте. Әв йәк ԝе чаԝа али тә бькә? Бьре мә Феликс ӧса гот: «Хушк у бьра һивийа мьн бун кӧ әз вәгәрʹьм щьвате. Мьн һʹьзкьрьна ԝан тʹәхмин дькьр. Ԝана һʹәмуйа жи али мьн кьр, ԝәки әз тʹәзәда бьбьм пʹарәкә ве малбәта рʹӧһʹани, тʹәхмин бькьм ԝәки Йаһоԝа бахшандә мьн у хьзмәта хԝә бәрдәԝам бькьм» (Чаргошә «Ԝе Баш бә кӧ Тӧ Чь Бьки?» бьньһерʹә).

ХИРӘТА ХԜӘ ӦНДА НӘКӘ!

Мире-щьна ԝе бәрдәԝам кә «фьртонед мәзьн» бьшинә сәр тә, ԝәки тӧ нькарьби достийа хԝә тʹәви Йаһоԝа тʹәзәда ава бьки (Луԛа 4:13). Ләма ньһада достийа хԝә тʹәви Йаһоԝа дьһа ԛәԝи бькә.

Йаһоԝа ве созе дьдә пәзед хԝә: «Әз . . . йе кӧ ӧнда буйә бьгәрʹьм у йе кӧ һатийә ажотьн шӧндә биньм у әз йе шькәсти бьпʹечʹьм у йе кӧ нәхԝәш ә хԝӧрт [ԛәԝи] бькьм» (Һәзәԛел 34:16). Йаһоԝа али гәләк кәса кьрийә, ԝәки әԝана достийа хԝә тʹәви ԝи тʹәзәда ава бькьн. Баԝәр бә кӧ әԝе али тә жи бькә!

Рʹуспийед Щьвате Дькарьн Чь Бькьн?

Рʹуспино, һун дькарьн али кәсед кӧ вәдьгәрʹьн щьвате бькьн, ԝәки әԝана диса бьбьн достед Йаһоԝа! Дина хԝә бьдьн һун дькарьн чь бькьн:

Дьле ԝан ԛәԝи бькьн. Паԝлосе шанди готьбу кӧ гәрәке һун мьԛат бьн, ԝәки гӧнәкʹарәки тʹобәдар «кʹәрби бәрхԝәкʹәтьне хԝә ӧнда нәкә» (2 Корьнтʹи 2:7). Дьбәкә әԝ шәрм бькә у хԝә бечʹарә тʹәхмин бькә. Ләма жи Паԝлос щьватерʹа ӧса гот: «Һун гәрәке бьбахшиньнә ԝи у ль бәр дьле ԝида бен». Гәрәке һун ԝана бьдьн баԝәркьрьне, ԝәки Йаһоԝа у хушк-бьра ԝана һʹьз дькьн. Сәва кӧ әԝана дьлтәнг нәбьн, лазьм ә һун һәр гав пʹайе ԝан бьдьн у аликʹарийе бьдьнә ԝан.

Тʹәви ԝан дӧа бькьн. «Дӧайе йе рʹаст гәләки ԛәԝат ә у һʹӧкӧм дькә» (Аԛуб 5:16). Лариса дьбежә: «Мьн рʹуспийарʹа бәʹса шьк у тьрсед хԝә кьр. Ԝана бона мьн дӧа кьр. Һьнге мьн фәʹм кьр ԝәки рʹуспи сәр мьн һерс ниньн. Ԝана дьхԝәст али мьн бькьн, ԝәки әз достийа хԝә тʹәви Йаһоԝа тʹәзәда ава бькьм». Тео дьбежә: «Дӧайед рʹуспийа баԝәрийа мьн зедә кьр кӧ Йаһоԝа бь рʹасти мьн һʹьз дькә у нә тʹәне шашийед мьн, ле ԛәнщийа мьн жи дьвинә».

Тʹәви ԝан һәвалтийе бькьн. Кәсед кӧ вәдьгәрʹьн щьвате һʹәԝще һәвала нә. Рʹуспики бь наве Щастин дьбежә: «Һәр кӧ мәщал чебә, гази ԝан бькә ԝәки тʹәви тә хьзмәт бькьн, у йа лапә фәрз, меванти һәрʹә щәм ԝан. Һәвалти бь рʹасти жи гәләк фәрз ә!» Рʹуспики бь наве Һенри жи ӧса дьбежә: «Гава хушк-бьра дьвиньн ԝәки рʹуспи тʹәви кәсе кӧ вәгәрʹийайә щьвате, һәвалтийе дькьн, әԝана жи ԝе тʹәви ԝи һәвалтийе бькьн».

Али ԝан бькьн кӧ әԝана Кʹьтеба Пироз леколин бькьн. Достәки щерʹьбанди дькарә али кәсе кӧ вәгәрʹийайә щьвате бькә, ԝәки әԝ хԝәрʹа бәрнамәкә бона леколина Кʹьтеба Пироз чекә. Рʹуспики бь наве Дарко ӧса дьбежә: «Әз ԝанрʹа бәʹса фькред рʹӧһʹани дькьм, йед кӧ мьн жь леколина шәхси дитийә, у әз нишан дькьм, ԝәки әз жь леколина Кʹьтеба Пироз шабунәкә мәзьн дьстиньм. Ӧса жи, әз һьнә тʹема тʹәви ԝан леколин дькьм». Рʹуспики бь наве Клейтон дьбежә: «Әз ԝана һелан дькьм ԝәки һьнә сәрһатийед ԝан мәрьвед жь Кʹьтеба Пироз леколин бькьн, дәрәща кʹижана мина йа ԝан бу».

Шьвантийе ԝан бькьн. Кәсед кӧ вәдьгәрʹьн щьвате гәрәке фәʹм бькьн кӧ рʹуспи нә тʹәне һʹакьм ьн, ле шьван ьн жи (Йерәмйа 23:4). Ләма жи рʹуспино, рʹьнд гӧһ бьдьнә ԝан у пʹайе ԝан бьдьн. Гәләк щар тʹәви ԝан хәбәр дьн. Һәла бьньһерʹьн рʹуспики бь наве Маркус ԝәʹде сәрледана шьвантийе чь дькә: «Әм фькрәкә жь Кʹьтеба Пироз нишани ԝан дькьн, пʹайе ԝан дьдьн у ԝанрʹа дьбежьн ԝәки әм гәләк ша нә кӧ ԝана хирәт кьрийә вәгәрʹьн щьвате, у әм дьбежьн ԝәки Йаһоԝа жи гәләк ша йә. Хьлазийа сәрледане, әм рʹожа сәрледана майин пешда кʹьфш дькьн».

a Һьнә навед ве готареда һатьнә гӧһастьне.