ЧАԜА НӘФРʹӘТИЙЕ ЖЬ ДЬЛЕ ХԜӘ ДӘРХЬН?

4 | Бь Аликʹарийа Хԝәде Нәфрʹәтийе Алт Дькьн

Һинкьрьна Кʹьтеба Пироз:

«Бәред Рʹӧһʹ әв ьн: Һʹьзкьрьн, шабун, әʹдьлайи, сәбьркьрьн, ширьнайи, ԛәнщи, амьни, мьлукти, хԝәгьртьн» (ГАЛАТИ 5:22, 23).

Әв Чь Те Һʹәсабе:

Бь аликʹарийа Хԝәде әм дькарьн нәфрʹәтийе жь дьле хԝә дәрхьн. Бь сайа рʹӧһʹе Хԝәдейи пироз әм дькарьн хәйсәт-һʹӧнӧред ӧса нав хԝәда пешда биньн, кʹижан кӧ мәйе хԝәха тʹӧ щар нькарьбуйа ԛазанщ кьра. Ләма жи дәԝса кӧ пе ԛәԝата хԝә нәфрʹәтийе жь дьле хԝә дәрхьн у итʹбарийа хԝә, хԝә биньн, ԝе дьһа баш бә итʹбарийа хԝә ԛәԝата Хԝәде биньн. Һәрге әм ӧса бькьн, әме сәр хԝә тʹәхмин кьн әԝе йәке, чь кӧ Паԝлосе шанди сәр хԝә тʹәхмин кьр: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13). У әме мина зәбурбеж бежьн: «Аликʹарийа мьн жь Хӧдан ә» (Зәбур 121:2, ИМ).

Әԝ Һинкьрьн Ча Дькарә Али Тә Бькә:

«Йаһоԝа али мьн кьр, кӧ бь тʹәмами бемә гӧһастьне у бьбьмә мәрьвәки әʹдьлайиһʹьз» (ԜАЛДО).

Бь тʹәмамийа дьле хԝә рʹӧһʹе пироз жь Йаһоԝа бьхԝазә (Луԛа 11:13). Жь Йаһоԝа һиви кә кӧ али тә бькә, ԝәки хәйсәт-һʹӧнӧред ӧса нав хԝәда пешда бини, йед кӧ ԝи хԝәш тен. Пебьһʹәсә кӧ Кʹьтеба Пироз чь дьбежә дәрһәԛа ԝан һʹӧнӧра, бь сайа кʹижана әм дькарьн нәфрʹәтийе жь дьле хԝә дәрхьн, мәсәлә: һʹьзкьрьн, әʹдьлайи, сәбьр у хԝәгьртьн. Ԝан хәйсәт-һʹӧнӧра нав хԝәда пешда бинә у мәщала бьвинә кӧ ԝана бьди кʹьфше. Һьм жи һәвалтийе тʹәви ԝан мәрийа бькә, йед кӧ мина тә дьхԝазьн ԝан һʹӧнӧра нав хԝәда пешда биньн. Һәвалед ӧса дькарьн «һʹьзкьрьне у ԛәнщикьрьнеда һелана бьдьнә» тә (Ибрани 10:24).

Сәрһати—ԜАЛДО

Нәфрʹәти у Зӧлми Алт кьр

Бьчʹуктайа Ԝалдо гәләк чәтьн дәрбаз дьбу, жь бо чь жи дьле ԝи бь нәфрʹәтийе тʹьжә бьбу. Әԝ дьбежә: «Мьн кʹучада тʹьме тʹәви мәрьвед кӧ наркотика дьфьротьн, шәрʹ дькьр . . . Щарәке кʹомәкә ԛачаха пʹәрә дабунә мәрьвәки, ԝәки мьн бькӧжә. Рʹаст ә әԝи әз бьриндар кьрьм, ле диса жи мьн карьбу бьрʹәвьм у хԝә вәшерьм».

Чахе жьна Ԝалдо дәстпекьр тʹәви Шәʹдед Йаһоԝа Кʹьтеба Пироз һин бә, әв йәк ԝи хԝәш нәһат. Әԝ дьбежә: «Мьн Шәʹдед Йаһоԝа нәфрʹәт дькьр у гәләк щара мьн чʹерʹи ԝан дькьр. Ле диса жи әԝана тʹәви мьн бь ԛәдьр бун».

Ԝәʹдә шунда Ԝалдо жи дәстпекьр Кʹьтеба Пироз һин бә. Әԝ дьбежә: «Чь кӧ әз педьһʹәсийам, мьнрʹа һеса нибу биньм сери. Мьн тʹьре кӧ әзе тʹӧ щар нькарьбьм һерса хԝә бьтәмьриньм». Ле әԝ тьштәки ӧса жь Кʹьтеба Пироз пеһʹәсийа, чь кӧ гәләк сәр ԝи һʹӧкӧм бу.

Ԝалдо шьровәдькә: «Рʹожәке Алеһандро, бьре кӧ тʹәви мьн һинбуна Кʹьтеба Пироз дәрбаз дькьр, готә мьн кӧ Галати 5:22, 23 бьхуньм. . . . Алеһандро мьнрʹа шьровәкьр, кӧ әз нә кӧ пе ԛәԝата хԝә, ле бь сайа рʹӧһʹе Хԝәдейи пироз дькарьм ԝан һʹӧнӧра нав хԝәда пешда биньм. Әван гьлийа бь тʹәмами ньһерʹандьна мьн гӧһастьн!»

Бь аликʹарийа Хԝәде, Ԝалдо нәфрʹәти у зӧлми алт кьр. Әԝ дьбежә: «Мәрьвед мьн у һәвалед мьнә бәре, нькарьн баԝәр кьн, кӧ әз чьԛас һатьмә гӧһастьне». Әԝ зедә дькә: «Йаһоԝа али мьн кьр, кӧ бь тʹәмами бемә гӧһастьне у бьбьмә мәрьвәки әʹдьлайиһʹьз».