«Готьнед Сәрԝахта Бьбьһе»

1. Ширәт чаԝа дькарә бе дайине, у әм гьшк чьрʹа һʹәԝще ширәта нә?

ӘМ ГЬШК жи һʹәԝще ширәта нә. Щара дьбәкә әм хԝәха ширәте жь мәрьвәки ӧса дьхԝазьн, ԛәдре кʹижани кӧ әм дьгьрьн. Щара жи дьбәкә кәсәк, кӧ бона мә хәм дькә, бе у мәрʹа бежә кӧ әм гавәкә нәрʹаст давежьн (Галати 6:1). Ӧса жи, дьԛәԝьмә паши шашикә мәйә гьран, кәсәк ширәте бьдә мә у мә рʹаст кә. Ширәт чь щурʹә жи бе дайине, ԝе баш бә ԝәки әм гӧһ бьдьне. Әв йәк бона кʹара мә йә у дькарә жийина мә хԝәй кә (Мәтʹәлок 6:23).

2. Ль гора Мәтʹәлок 12:15, гәрәке әм чьрʹа гӧһ бьдьн ширәта?

² Рʹеза сәрәкә дьбежә, кӧ гәрәке әм ‹готьнед сәрԝахта бьбьһен› (Мәтʹәлок 22:17). Гәрәке әм ԛәбул кьн, ԝәки әм һәр тьшти ньзаньн, у занәбун йан фәрәсәтед кәсәки дьн дькарә жь йа мә зедәтьр бә (Мәтʹәлок 12:15 бьхунә). Ләма жи, гәрәке әм мьлук бьн у гӧһ бьдьн ширәта. Бь ви щурʹәйи әм нишан дькьн, ԝәки әм синоред хԝә заньн у һʹәԝще аликʹарийе нә. Бь рʹасти, бе аликʹарийе әме нькарьбьн бьгьһижьн нетед хԝә. Жь бина бәр Хԝәде, Сьлеман Пʹадша ньвиси кӧ «бь сайа гәләк ширәткʹара» мәрьв пешда дьчьн (Мәтʹәлок 15:22).

3. Әм ча дькарьн ширәта бьстиньн?

³ Щарна, дьбәкә кәсәк рʹастә-рʹаст ширәте бьдә мә. Мәсәлә, дьԛәԝьмә рʹуспик йан бьраки щерʹьбанди мәрʹа бежә, кӧ гәрәке әм сәр кемасикә хԝә бьхәбьтьн. Әԝ бьра ӧса мә һʹьз дькә, кӧ сәр һʹиме Кʹьтеба Пироз ширәте дьдә мә. Гәло нә лазьм ә ԝәки әм гӧһ бьдьнә ԝи у ве ширәте ԛәбул кьн? Жь алийе дьнва жи, әм щарна бь щурʹәки нә рʹастә-рʹаст ширәте дьстиньн. Мәсәлә, дьбәкә әм Кʹьтеба Пироз йан әʹдәбйәтәке бьхуньн у тедәрхьн кӧ гәрәке әм хԝә рʹаст кьн (Ибрани 4:12).

4. Ль гора Ԝаиз 7:9, чахе әм ширәта дьстиньн, гәрәке әм чь нәкьн?

⁴ Щара чахе мәрʹа рʹастә-рʹаст ширәта дьдьн, мәрʹа һеса нинә ван ширәта ԛәбул кьн. Әм һәла һе дькарьн бьхәйдьн жи. Гәло чьрʹа? Әм һьлбәт ԛәбул дькьн ԝәки әм гӧнәкʹар ьн, ле гава кәсәк дина мә дькʹьшинә сәр кемасикә мә, әм дькарьн әʹщьз бьн (Ԝаиз 7:9 бьхунә). Дьбәкә ви чахи әм дәстпекьн хԝә һәԛ дәрхьн, у нета кәсе кӧ ширәте дьдә мә бькьнә бьн шьке, йан жи сәр щурʹе ширәтдайина ԝи һерс кʹәвьн. Дьԛәԝьмә әм мәʹнийа бьгәрʹьн у ӧса бежьн: «Чь изна ԝи һәйә кӧ ширәте бьдә мьн? Бьра пешийе хԝә бьньһерʹә!» Чахе ширәта кӧ әм дьстиньн, мә хԝәш найе, һьнге дьбәкә әм ве ширәте пьшт гӧһе хԝәва бавежьн, йан жи ширәтәкә кӧ мә хԝәш те, бьгәрʹьн.

5. Ве готареда, әме дәрһәԛа чь хәбәр дьн?

⁵ Ве готареда, әме дина хԝә бьдьнә чәнд кәсед кӧ ширәт ԛәбул нәкьрьн у чәнд кәсед кӧ ширәт ԛәбул кьрьн. Ӧса жи, әме бьвиньн кӧ чь дькарә али мә бькә, ԝәки әм ширәта ԛәбул кьн у жь ван кʹаре бьстиньн.

КӘСЕД КӦ ШИРӘТ ԚӘБУЛ НӘДЬКЬРЬН

6. Әв йәк кӧ Рʹәһобоԝам ширәта кʹе ԛәбул кьр, чь мә һин дькә?

⁶ Ԝәред әм сәрһатийа Рʹәһобоԝам шеԝьр кьн. Чахе әԝ бу пʹадше Исраеле, щьмәʹте тьштәк жь ԝи хԝәст. Ԝана готе ԝәки әԝ, баре кӧ баве ԝи Сьлеман кьрьбу стуйе ԝан, сьвьк кә. Сәрида, Рʹәһобоԝам жь рʹуспийа пьрси, кӧ чь щаб бьдә ԝан. Ԝана гот кӧ һәгәр әԝ ль гора хԝәстьна щьмәʹте бькә, әԝана ԝе һәртʹьм пьштгьрийа ԝи бькьн (1 Пʹадшати 12:3-7). Әшкәрә йә кӧ әв ширәт Рʹәһобоԝам хԝәш нәһат, ләма жи әԝи жь кәсед кӧ тʹәви ԝи мәзьн бьбун ширәт пьрси. Ча те кʹьфше, әԝана ԝәкә 40 сали бун, у әԝана жи кәсед щерʹьбанди бун (2 Дирок 12:13). Ле ижар, ԝана ширәтәкә хьраб да Рʹәһобоԝам. Ԝана ԝирʹа гот, ԝәки баре щьмәʹте дьһа гьран бькә (1 Пʹадшати 12:8-11). Әв дӧ ширәт жь һәв щӧдә бун, гәло ԝе баш нибуйа кӧ Рʹәһобоԝам дӧа бькьра у жь Йаһоԝа бьпьрсийа, кӧ кʹижан ширәт дьһа баш ә. Ле Рʹәһобоԝам ӧса нәкьр. Әԝи ширәта кӧ ԝи хԝәш һат, ԛәбул кьр у гӧһ да һәвалед хԝә. Ахьрийа ве йәке гәләк хьраб бу, һьм бона Рʹәһобоԝам һьм жи бона мьләте Исраеле. Дьбәкә ширәтед кӧ әм жи дьстиньн щарна мә хԝәш нәйен. Диса жи, һәгәр ширәт сәр һʹиме Хәбәра Хԝәде һатьбә дайине, ԝе баш бә кӧ әм ве ширәте ԛәбул кьн.

7. Сәрһатийа Узийа Пʹадша чь мә һин дькә?

⁷ Узийа Пʹадша ширәт инкʹар кьр. Щарәке, әԝ кʹәтә пʹарьстгәһа Йаһоԝа, щики ӧса, кʹидәре тʹәне изна кʹаһина һәбу бькʹәвьне, у әԝи дьхԝәст бьхуре бьшәԝьтинә. Һьнге кʹаһина ԝирʹа гот: «Йа Уззийа жь Хӧданрʹа бӧхӧр вехьстьн нә жь тәрʹа йә, ле жь кʹаһинед, жь лаԝед Һарун, йед кӧ бона бӧхӧр вехьстьне һатьнә пироз кьрьнрʹа дькʹәвә». Гәло Узийа чь кьр? Һәгәр әԝи әв ширәт бь мьлукти ԛәбул кьра у дәрберʹа жь пʹарьстгәһе дәркʹәта, дьԛәԝьмә Йаһоԝа бьбахшанда ԝи. Ле Узийа һерс кʹәт. Гәло әԝи ширәта кӧ жерʹа һатә дайине, чьрʹа инкʹар кьр? Әшкәрә йә, ԝәки әԝ дьфькьри кӧ әԝ пʹадша йә, у ләма жи изна ԝи һәйә ԝәки ль гора дьле хԝә бькә. Ле Йаһоԝа ӧса нәдьфькьри. Сәва ԛӧрʹәбуна хԝә, Узийа бь кʹотибуне һатә щәзакьрьне у «һʹәта рʹожа мьрьна хԝә» кʹоти ма (2 Дирок 26:16-21). Сәрһатийа Узийа нишан дькә, ԝәки фьрԛи тʹӧнә кӧ әм кʹи бьн жи, һәгәр әм ширәта кӧ сәр һʹиме Кʹьтеба Пироз мәрʹа те дайине, инкʹар кьн, әме достийа хԝә тʹәви Йаһоԝа ӧнда кьн.

КӘСЕД КӦ ШИРӘТ ԚӘБУЛ ДЬКЬРЬН

8. Гава Иборʹа ширәт һатә дайине, әԝи чь кьр?

⁸ Жь алийе дьнва, Кʹьтеба Пироз бәʹса һьнә кәсед дьн дькә, йед кӧ ширәт ԛәбул дькьрьн у ахьрийеда дьһатьнә кʹәрәм кьрьне. Мәсәлә, сәрһатийа Ибо бинә бәр чʹәʹве хԝә. Әԝ чьԛас жь Хԝәде дьтьрсийа жи, йәкә һьнә кемасийед ԝи һәбун. Гава әԝ бьн стресәкә мәзьнда бу, әԝи беһʹәмде хԝә хәбәр дьда у тьште шаш дьгот. Ләма жи, һьм Әлиһу һьм жи Йаһоԝа рʹастә-рʹаст ширәт данә ԝи. Гәло Ибо чь кьр? Әԝи әв ширәт бь мьлукти ԛәбул кьрьн. Әԝи гот: «Тьштед кӧ фәʹм нәкьрьмә готьм; . . . Жь бәр вейа, әз хԝә бьчʹук дьвиньм у хԝәли у тʹозеда тʹобә кьрьнеда мә». Сәва мьлуктийа ԝи, Йаһоԝа гәләк кʹәрәм сәр ԝида баранд (Ибо 42:3-6, 12-17).

9. Чахе Муса ширәт станд, әԝи чь кьр, у әм ча дькарьн чʹәʹв бьдьнә ԝи?

⁹ Муса, паши шашикә мәзьн, һазьр бу ширәте ԛәбул кә. Щарәке, әԝ һерс кʹәт у рʹумәт нәда Йаһоԝа. Ләма жи, Йаһоԝа ԝирʹа гот, ԝәки әԝе нәкʹәвә Әʹрде Создайи (Жьмар 20:1-13). Чәнд сал шунда, Муса диса жи изьн хԝәст ԝәки бькʹәвә Әʹрде Создайи, ле Йаһоԝа гот: «Бәс ә! Вьр шунда бона ԝе йәке иди мьнрʹа нәбежә!» (Ԛануна Дӧщари 3:23-27). Гәло Муса әв ширәт ԛәбул кьр? Бәле. Әԝ нәхәйди, ле әԝи сафикьрьна Йаһоԝа ԛәбул кьр, у Йаһоԝа изьн да ԝи, ԝәки әԝ ча рʹебәре мьләте Исраеле бьминә (Ԛануна Дӧщари 4:1). Ибо у Муса ширәт ԛәбул кьрьн у ԝе баш бә, кӧ әм ве йәкеда чʹәʹв бьдьнә ԝан. Ибо ньһерʹандьна хԝә рʹаст кьр у хԝә һәԛ дәрнәдьхьст. Муса жи ширәта Йаһоԝа ԛәбул кьр. Паши ве йәке кӧ Йаһоԝа ԝирʹа гот, ԝәки әԝе нәкʹәвә Әʹрде Создайи, әԝи диса жи бь амьни Йаһоԝарʹа хьзмәт дькьр.

10. (а) Ль гора Мәтʹәлок 4:10-13, кʹара ԛәбулкьрьна ширәта чь йә? (б) Һьнә кәсед кӧ ширәт стандьнә, ча хԝә данә кʹьфше?

¹⁰ Ԝе баш бә кӧ әм чʹәʹв бьдьнә Ибо, Муса у кәсед дьнә амьн, у ширәта ԛәбул кьн (Мәтʹәлок 4:10-13 бьхунә). Гәләк хушк-бьред мә ида чʹәʹв данә ԝана у ширәт ԛәбул кьрьнә. Бьраки бь наве Еммануел, йе кӧ Конгойеда дьжи, ӧса дьбежә: «Бьред гьһишти жь щьвата мьн, дитьн кӧ һьндьк мабу мьн достийа хԝә тʹәви Йаһоԝа хьраб кьра, ләма жи ԝана ширәт данә мьн. Мьн әв ширәт ԛәбул кьрьн, у ве йәке али мьн кьр, ԝәки әз сәре хԝә нәкьм бәлайе».b Пешәнгәкә жь Канадайе, бь наве Меган, дәрһәԛа ширәта ӧса дьбежә: «Ширәтед кӧ мьн дьстандьн щарна мьн хԝәш нәдьһатьн, ле әв бь рʹасти жи мьнрʹа лазьм бун». Бьраки бь наве Марко, йе кӧ Хорватйайеда дьжи, ӧса дьбежә: «Мьн щабдарикә хԝә щьватеда ӧнда кьр, ле ньһа әз фәʹм дькьм ԝәки ширәта кӧ мьн станд, али мьн кьр достийа хԝә тʹәви Йаһоԝа тʹәзәда ава кьм».

11. Бьре Карл Клеин дәрһәԛа ԛәбулкьрьна ширәта чь гот?

¹¹ Бьре мә Карл Клеин жи жь ԛәбулкьрьна ширәта кʹар станд. Сәрһатийа хԝәда, ви бьрайи, йе кӧ паше бу әндәме Кʹома Рʹебәрийе, гот кӧ әԝи чаԝа жь досте хԝә Щозеф Рутерфорд ширәтәкә сәрт стандьбу. Бьре Клеин ани сәр хԝә ԝәки серида, әв ширәт ԝи хԝәш нәһат. Әԝи гот: «Гава [Рутерфорд бьра] әз дитьм, әԝи бь бәшәра хԝәш гот: ‹Сьлав, Карл!› Ле чьмки әз сәр ԝи хәйди бум, мьн бь дәнге ньмьз щаба ԝи да. Һьнге әԝи гот: ‹Карл, мьԛати хԝә бә! Мире-щьна пәй тә кʹәтийә!› Мьн шәрм кьр у гот: ‹Һʹәму тьшт баш ә, бьре Рутерфорд›. Ле әԝи заньбу кӧ әз һе сәр ԝи хәйди бум, ләма жи әԝи гот: ‹Баш ә, кӧ һәр тьшт баш ә. Ле диса жи мьԛати хԝә бә. Мире-щьна пәй тә кʹәтийә!›. Готьнед ԝи чьԛас рʹаст бун! Гава әм сәр бьраки дьхәйдьн, илаһи һәгәр мәʹни һәбу кӧ әԝ ве йәке мәрʹа бежә, . . . Мире-щьна һеса дькарә мә бькә тʹәлька хԝә».c (Әфәси 4:25-27). Клеин бьра ширәта Рутерфорд ԛәбул кьр у достийа ԝан хьраб нәбу.

ЧЬ ДЬКАРӘ АЛИ МӘ БЬКӘ ШИРӘТЕ ԚӘБУЛ КЬН?

12. Мьлукти чаԝа дькарә али мә бькә, ԝәки әм ширәта ԛәбул кьн? (Зәбур 141:5)

¹² Гәло чь дькарә али мә бькә, ԝәки әм ширәта ԛәбул кьн? Гәрәке әм бь мьлукти биньн бира хԝә, кӧ әм гӧнәкʹар ьн у щарна тьштед нәаԛьлайи дькьн. Ча мә ида шеԝьр кьр, ньһерʹандьна Ибо шаш бу, ле паше әԝи ньһерʹандьна хԝә рʹаст кьр, ләма жи Йаһоԝа әԝ кʹәрәм кьр. Гәло чьрʹа? Чьмки Ибо йәки мьлук бу. Мьлуктийа ԝи жь ве йәке әшкәрә йә, кӧ әԝи ширәта Әлиһу, йе кӧ жь ԝи бьчʹуктьр бу, ԛәбул кьр (Ибо 32:6, 7). Һәгәр әм бьфькьрьн, кӧ әм һʹәԝще ширәта ниньн, йан һәгәр кәсе кӧ ширәте дьдә мә, жь мә щаһьлтьр бә, мьлукти ԝе али мә бькә, ԝәки әм диса жи ширәте ԛәбул кьн. Рʹуспики кӧ Канадайеда дьжи ӧса дьбежә: «Әм нькарьн хԝә кʹеләкева бьвиньн, ча мәрьвед дьн мә дьвиньн. Ләма жи набә, ԝәки әм бе ширәта пешда һәрʹьн». Бәле, мә һәр кәсирʹа лазьм ә, бәре рʹӧһʹе пироз нав хԝәда пешда биньн у хьзмәтийеда дьһа пешда һәрʹьн (Зәбур 141:5 бьхунә).

13. Гәрәке әм сәр ширәтед кӧ мәрʹа тенә дайине, ча бьньһерʹьн?

¹³ Бир нәкә ԝәки ширәткьрьн һʹьзкьрьна Хԝәде нишан дькә. Йаһоԝа ԛәнщийа мә дьхԝазә (Мәтʹәлок 4:20-22). Гава әԝ бь сайа Хәбәра хԝә, бь сайа әʹдәбйәтәкә сәр һʹиме Кʹьтеба Пироз йан бь сайа хушк-бьред гьһишти, ширәте дьдә мә, әԝ нишан дькә, кӧ әԝ мә һʹьз дькә. Ибрани 12:9, 10-да те готьне, ԝәки Хԝәде ве йәке «бона кʹара мә» дькә.

14. Гава әм ширәте дьстиньн, гәрәке әм дина хԝә бьдьнә чь?

¹⁴ Дина хԝә бьде кӧ чь те готьне, нә кӧ ча те готьне. Щарна әм дьбәкә дьфькьрьн, кӧ ширәт бь щурʹәки нә һаԛас баш мәрʹа һатийә дайине. Фәʹмдари йә кӧ чахе ширәт бь щурʹәки баш те дайине, һеса йә ԝәки мәри ве ширәте ԛәбул кәd (Галати 6:1). Диса жи, гава ширәте дьдьнә мә, ԝе баш бә кӧ әм дина хԝә бьдьне һәла чь мәрʹа дьбежьн. Жь хԝә бьпьрсә: «Һәгәр мьн хԝәш найе жи, кӧ ширәт чаԝа һатә дайине, гәло әз дькарьм жь ве ширәте дәрсе һин бьм? Гәло әз дькарьм сәр кемасийед кәсе кӧ ширәт дайә мьн, чʹәʹве хԝә бьгьрьм, у тʹәне дина хԝә бьдьмә сәр кʹара ширәте?» Бәле, ԝе баш бә кӧ әм бьфькьрьн, һәла жь ширәтед кӧ мәрʹа тенә дайине, әм чаԝа дькарьн кʹаре бьстиньн (Мәтʹәлок 15:31).

ШИРӘТЕ БЬХԜАЗӘ У КʹАРЕ БЬСТИНӘ

15. Ԝе чьма баш бә кӧ әм ширәта бьхԝазьн?

¹⁵ Кʹьтеба Пироз мә һелан дькә, кӧ әм хԝәха ширәта бьхԝазьн. Мәтʹәлок 13:10 ӧса дьбежә: «Сәрԝахти щәм ширәтһьлдайа йә». Гьлийед чьԛас рʹаст ьн, нә? Мәрьвед кӧ һивийе ниньн, ԝәки кәсәк ширәте бьдә ԝан, ле хԝәха ширәте дьхԝазә, щарна жь алийе рʹӧһʹанива дьһа зу пешда дьчьн. Ләма жи гава пешьн бавежә у ширәте бьхԝазә!

16. Чь дәрәщада ԝе баш бә ԝәки әм ширәте бьхԝазьн?

¹⁶ Гәло ԝе кʹәнге баш бә, кӧ әм жь хушк у бьра ширәте бьхԝазьн? Ван мәсәла бьдә бәр чʹәʹве хԝә: (1) Мьзгинванәк, хушкәкә щерʹьбанди гази сәр һинбуна хԝә дькә у паше жь ԝе дьпьрсә, кӧ әԝ чаԝа дькарә бьбә дәрсдарәкә дьһа баш. (2) Хушкәкә азәп жь хушкәкә гьһишти дьпьрсә һәла бь дитьна ԝе, кʹьнщед кӧ әԝ дьхԝазә хԝәрʹа бькʹьрʹә, щайиз ьн йан на. (3) Пешийа кӧ бьрак щара пешьн готаре бьхунә, әԝ жь готарванәки щерʹьбанди һиви дькә, ԝәки гӧһ бьдә готара ԝи у һьнә ширәта бьде. Һьлбәт бьраки кӧ гәләк сала готара дьхунә жи, дькарә жь ширәта готарванед щерʹьбанди кʹаре бьстинә.

17. Әм чаԝа дькарьн жь ширәте кʹаре бьстиньн?

¹⁷ Ирода, һәгәр тӧ рʹастә-рʹаст йан жи нә рʹастә-рʹаст ширәте бьстини, ширәтед жь ве готаре бинә бира хԝә. Мьлук бьминә. Дина хԝә бьде кӧ чь те готьне, нә кӧ ча те готьне. Ԝан ширәта жийина хԝәда бьдә хәбате. Ԛә йәк жь мә билан найенә буйине. Ләма жи «ширәте һьлдә у һинкьрьне бьбә йар ә, ԝәки ахьрийе тә бькә дәрсдар ә! (Мәтʹәлок 19:20).