Әм Чь Һин Дьбьн жь 40 Рʹожед Исайә Пашьн сәр Әʹрде?

1-2. Гава дӧ шагьртед Иса бәрбь гӧнде Әмԝасе дьчун, чь ԛәԝьми?

САЛА 33 Д.М., 16 Нисане, дӧ шагьртед Иса жь Оршәлиме бәрбь гӧнде Әмԝасе дьчун. Әв гӧнд ԝәкә 11 километра дури бажаре Оршәлиме бу. Шагьрт гәләк дьлтәнг бун у дьтьрсийан, чьмки Иса һатә кӧштьне. Гӧмана ԝан әԝ бу, кӧ Мәсиһ ԝе бьбә хьлазкʹаре ԝан, ле ӧса дьһатә кʹьфше кӧ те бежи гӧмана ԝан пʹучʹ бу. Ле паше тьштәки әʹщебмайи ԛәԝьми.

² Рʹеда мерәки кӧ ԝана ле нас нәдькьр, незики ԝан бу у тʹәви ԝан чу. Шагьрта жерʹа бәʹса сәбәба дьлтәнгийа хԝә кьрьн у готьн кӧ чь һатә сәре Иса. Паше тьштәки ӧса ԛәԝьми, кӧ ԝана тʹӧ щар бир нәкьр. Ви мери «дәстпекьр ԝанрʹа жь Муса у жь һʹәму Пʹехәмбәра» тьштед кӧ дәрһәԛа ԝи тʹәмамийа Ньвисаред Пирозда ньвисар бун, шьровәкә. Әԝи ԝанрʹа һур бь һур зәлал кьр кӧ чьрʹа лазьм бу ԝәки Мәсиһ щәфе бькʹьшинә у бьмьрә! Гава әԝана гьһиштьнә гӧнде Әмԝасе, шагьрта фәʹм кьр кӧ әв мер Иса йә, йе кӧ жь мьрьне һатийә рʹакьрьне! Бьдьнә бәр чʹәʹве хԝә, кӧ шагьрт чьԛас ша бун! (Луԛа 24:13-35)

3-4. Чь ԛәԝьми тʹәви шагьртед Иса, у ве готареда әме чь һин бьн? (Кʹаред Шандийа 1:3)

³ Гава Иса сәр әʹрде бу, әԝ нава 40 рʹожед пашьнда чәнд щара шагьртед хԝәрʹа хӧйа бу (Бьхунә Кʹаред Шандийа 1:3). Шагьртед Иса бь сайа һеланкьрьна ԝи, жь хәм у тьрсед хԝә аза бун, у бунә дәрсдар у мьзгинванед Пʹадшатийейә ша у мерхас.a

⁴ Жь ве йәке, кӧ Иса һьнге чь дькьр, әм дькарьн гәләк дәрса һин бьн. Ве готареда әме бьвиньн кӧ Иса ԝәʹде хԝә чаԝа дьда хәбате, ԝәки (1) шагьртед хԝә ԛәԝи кә, (2) али ԝан бькә кӧ әԝана Ньвисаред Пироз дьһа рʹьнд фәʹм бькьн у (3) ԝана һин кә, ԝәки әԝана щабдарийед дьһа мәзьн һьлдьн сәр хԝә. Ӧса жи әме бьвиньн кӧ әм чаԝа дькарьн чʹәʹв бьдьнә мәсәла Иса.

ҺЕЛАНЕ БЬДӘ КӘСЕД ДЬН

5. Шагьртед Иса чьрʹа һʹәԝще һелане бун?

⁵ Шагьртед Иса һʹәԝще һелане бун. Гәло чьрʹа? Һьнәк жь ԝан мал, хәбат у мәрьвед хԝә һиштьн, ԝәки һәртʹьм пәй Иса һәрʹьн (Мәтта 19:27). Йед дьн жи жь алийе мәрьвада рʹасти нәһәԛийе дьһатьн, чьмки бунә шагьртед Иса (Йуһʹәнна 9:22). Ԝана баԝәр дькьр, кӧ Иса бь рʹасти жи Мәсиһе создайи йә, ләма жи әԝана һазьр бун бона хатьре ԝи ԛӧрбана бькьн (Мәтта 16:16). Ле гава Иса һатә дардакьрьне, гӧмана ԝан бәтавәбу у әԝана дьлшкәсти бун.

6. Чахе Иса жь мьрьне һатә рʹакьрьне, әԝи чь кьр?

⁶ Бе шьк, Иса дьдит кӧ шагьртед ԝи жь бо мьрьна ԝи гәләк дьлтәнг ьн, ле әԝи фәʹм дькьр кӧ әв йәк нормал ә, у әԝ нәдьфькьри кӧ баԝәрийа ԝан сьст ә. Ләма жи һәма ве рʹоже гава Иса жь мьрьне һатә рʹакьрьне, әԝи дәстпекьр бәр дьле һәвалед хԝәда бе. Мәсәлә, гава Мәрйәма Мәгдәлани бәр тʹьрба ԝи дьгьрийа, әԝ жерʹа хӧйа бу (Йуһʹәнна 20:11, 16). Ӧса жи, чаԝа кӧ дәстпека готареда һатьбу готьне, әԝ дӧ шагьртарʹа жи хӧйа бу. Хенщи ве йәке, әԝ Пәтрусе шандирʹа жи хӧйа бу (Луԛа 24:34). Гәло әм дькарьн жь мәсәла Иса чь һин бьн? Дина хԝә бьдьне, кӧ гава әԝ щара пешьн хӧйа бу, чь ԛәԝьми.

7. Ль гора Йуһʹәнна 20:11-16, шәбәԛе 16 Нисане, чь ԛәԝьми? (Бьньһерʹә ӧса жи шькьл.)

⁷ Бьхунә Йуһʹәнна 20:11-16. Шәбәԛе 16 Нисане, чәнд кʹӧлфәтед баԝәрмәнд чунә бәр тʹьрба Иса (Луԛа 24:1, 10). Гава Мәрйәма Мәгдәлани гьһиштә ԝедәре, әԝе дит кӧ тʹьрб вала йә. Һьнге әԝ зу чу бал Пәтрус у Йуһʹәнна ԝәки дәрһәԛа ве йәке ԝанрʹа гьли кә. Пәтрус у Йуһʹәнна бәрбь тʹьрбе рʹәвин, у Мәрйәме жи да пәй ԝан. Гава Пәтрус у Йуһʹәнна дитьн кӧ тʹьрб бь рʹасти жи вала йә, әԝана вәгәрʹийанә мал, ле Мәрйәм ԝедәре ма у дьгьрийа. Әԝе ньзаньбу кӧ Иса ле дьньһерʹә. Әԝи дит кӧ Мәрйәм чьԛас дьлтәнг ә у хԝәст бәр дьле ԝеда бе у ле ԛәԝи кә. Жь бо ве йәке, әԝ Мәрйәмерʹа хӧйа бу у жерʹа гот ԝәки әԝ һәрʹә у бьред ԝирʹа дәрһәԛа ве әʹламәтийа фәрз бежә, демәк кӧ әԝ жь мьрьне һатийә рʹакьрьне (Йуһʹәнна 20:17, 18).

8. Әм ча дькарьн чʹәʹв бьдьнә мәсәла Иса?

⁸ Әм ча дькарьн чʹәʹв бьдьнә мәсәла Иса? Мина Иса, әм жи гәрәке рʹьнд дина хԝә бьдьнә хушк-бьра у тедәрхьн һәла хәм у дәрдед ԝан чь нә. Әм дькарьн бь гьлийед хԝә ԝана ԛәԝи кьн, ԝәки әԝана Йаһоԝарʹа амьн бьминьн. Бьньһерʹьн кӧ чь һатә сәре хушкәкә бь наве Щоселин. Хушка ԝе ԛәзийеда мьр. Щоселин ӧса дьбежә: «Чәнд мәһа әз гәләк дьлшкәсти бум». Бьраки у жьна ԝи ле гази мала хԝә кьрьн, рʹьнд гӧһ данә ԝе у жерʹа готьн, кӧ Хԝәде ле гәләк ԛимәт дькә. Щоселин дьбежә: «Мьн хԝә ӧса тʹәхмин дькьр, те бежи әз бәʹрәкә кʹур у тәʹрида дьхәньԛьм, ле Йаһоԝа ԝи бьрайи у кʹӧлфәта ԝи да хәбате, ԝәки мьн хьлаз кә. Ԝана али мьн кьр хԝәстьна хԝә дьһа ԛәԝи кьм, кӧ бәрдәԝам кьм Йаһоԝарʹа хьзмәт кьм». Гава кәсед дьн дьле хԝә мәрʹа вәдькьн, ԝәрә әм жи рʹьнд гӧһ бьдьнә ԝан у бь гьлийед ширьн бәр дьле ԝанда бен. Ӧса әм дькарьн али ԝан бькьн, ԝәки әԝана бәрдәԝам кьн Йаһоԝарʹа хьзмәт кьн (Рʹомайи 12:15).

АЛИ МӘРЬВА БЬКӘ ХӘБӘРА ХԜӘДЕ ФӘʹМ КЬН

9. Проблема шагьртед Иса чь бу, у әԝи ча али ԝан кьр?

⁹ Шагьртед Иса Хәбәра Хԝәде ԛәбул кьрьн у ль гора Ньвисаред Пироз дьжитьн (Йуһʹәнна 17:6). Ле ԝана фәʹм нәдькьр, кӧ чьрʹа Иса чаԝа мәрьвәки ԛачах сәр стуне дардакьрьн. Иса заньбу кӧ баԝәрийа ԝан һәйә у әԝана Йаһоԝа һʹәз дькьн, ле әԝи дьдит кӧ ԝана гәрәке Ньвисаред Пироз дьһа баш фәʹм кьра (Луԛа 9:44, 45; Йуһʹәнна 20:9). Ләма жи гава Иса сәр рʹийа Әмԝасе дӧ шагьртед хԝәрʹа хӧйа бу, әԝи Ньвисаред Пироз ԝанрʹа шьровәкьр.

10. Иса али шагьртед хԝә кьр, кӧ әԝана чь фәʹм кьн? (Луԛа 24:18-27)

¹⁰ Бьхунә Луԛа 24:18-27. Иса дәрберʹа ԝанрʹа нәгот кӧ әԝ кʹи йә, ле дәԝсе әԝи пьрс да ԝан. Гәло чьрʹа? Әԝи дьбәкә хԝәст кӧ әԝана дьле хԝә ԝирʹа вәкьн. Ԝана ӧса жи кьр. Ԝана Исарʹа гот, кӧ әԝана гӧман бун ԝәки Мәсиһ ԝе ԝана жь һʹӧкӧме Рʹомайа хьлаз кә. Чахе ԝана дәрһәԛа һʹәму хәмед хԝә жерʹа готьн, Иса ԝанрʹа зәлал кьр, кӧ гьлийед жь Ньвисаред Пироз ча һатьнә сери.b Ԝе еваре әԝ шагьртед дьнрʹа жи хӧйа бу у мәʹна гьлийед Ньвисаред Пироз ԝанрʹа шьровәкьр (Луԛа 24:33-48). Жь ве сәрһатийе әм чь дькарьн һин бьн?

11-12. (а) Жь ве йәке кӧ Иса рʹастийа Ньвисаред Пироз чаԝа һин дькьр, әм дькарьн чь һин бьн? (Бьньһерʹә ӧса жи шькьл.) (б) Бьре кӧ тʹәви Нортей һинбуна Кʹьтеба Пироз дәрбаз дькьр, чаԝа али ԝи кьр?

¹¹ Әм ча дькарьн чʹәʹв бьдьнә мәсәла Иса? Гава тӧ һинбуна Кʹьтеба Пироз дәрбаз дьки, бь пьрсед тактики али хԝәндәкʹаред хԝә бькә, кӧ әԝана дьле хԝә тәрʹа вәкьн (Мәтʹәлок 20:5). Гава тӧ фәʹм бьки әԝ чь дьфькьрә у тʹәхмин дькә, али ԝи бькә ԝәки әԝ рʹезед кӧ һʹале ԝива гьредайи нә, бьвинә. Жерʹа нәбежә кӧ әԝ гәрәке чь бькә, ле али ԝи бькә ԝәки әԝ сәр Ньвисаред Пироз бьфькьрә у тедәрхә кӧ әԝ чаԝа дькарә принсипед Кʹьтеба Пироз әʹмьре хԝәда бьдә хәбате. Ԝәрә әм дина хԝә бьдьнә сәрһатийа бьраки бь наве Нортей, йе кӧ ль Ганайе дьжи.

¹² Гава Нортей 16 сали бу, әԝи һинбуна Кʹьтеба Пироз дәстпекьр. Ле гәләк ԝәхт дәрбаз нәбу, кӧ малбәта ԝи пәй ԝи кʹәт. Гәло чь али ԝи кьр кӧ һинбуна Кʹьтеба Пироз бәрʹнәдә? Бьре кӧ тʹәви ԝи һинбуна Кʹьтеба Пироз дәрбаз дькьр, кʹьтеба Мәтта сәре 10 тʹәви ԝи шеԝьр кьр, кʹидәреда те готьне ԝәки шагьртед Иса ԝе рʹасти пәйкʹәтьна бен. Нортей ӧса дьбежә: «Гава пәйкʹәтьн дәстпебу, мьн фәʹм кьр кӧ мьн рʹийа рʹаст дитийә». Ӧса жи дәрсдаре ԝи али ԝи кьр, кӧ әԝ сәр Мәтта 10:16 кʹур бьфькьрә. Ве рʹезе али Нортей кьр, ԝәки әԝ малбәта хԝәрʹа бь ԛәдьр у һӧрмәте дәрһәԛа баԝәрийа хԝә шьровәкә. Паши ньхӧмандьне, Нортей дьхԝәст бьбә пешәнг, ле баве ԝи дьхԝәст, кӧ әԝ хԝәндьна бьльнд бьстинә. Әв бьре кӧ тʹәви Нортей һинбун дәрбаз дькьр, жерʹа нәгот кӧ әԝ гәрәке чь бькә, ле бь сайа пьрса али ԝи кьр, ԝәки әԝ принсипед Кʹьтеба Пироз фәʹм бькә. Ахьрийеда Нортей хьзмәтийа һәртʹьм дәстпекьр. Сәд һʹәйф, баве ԝи әԝ жь мале дәрхьст. Гәло Нортей сәр тьштед кӧ һатьнә сәре ԝи, ча дьньһерʹә? Әԝ дьбежә: «Әз баԝәр ьм кӧ мьн сафикьрьна рʹаст кьрийә». Бәле, һәрге әм али кәсед дьн бькьн, ԝәки әԝана сәр Ньвисаред Пироз кʹур бьфькьрьн, әм дькарьн али ԝан бькьн, кӧ әԝана сәр рʹийа рʹастийе ԛәԝи бьсәкьньн (Әфәси 3:16-19).

АЛИ БЬРА БЬКӘ ԜӘКИ ӘԜАНА БЬБЬНӘ «ПʹЕШКʹЕШ»

13. Иса чь кьр сәва кӧ шьхӧле бәлакьрьна мьзгинийе нәсәкьнә? (Әфәси 4:8)

¹³ Гава Иса сәр әʹрде бу, әԝи шьхӧле кӧ Баве ԝи дабу ԝи, бь щурʹәки беԛьсур дьани сери (Йуһʹәнна 17:4). Ле Иса нәдьфькьри кӧ хенщи ԝи, тʹӧ кәс нькарә ви шьхӧли бькә. Ләма жи нава се сал у нив хьзмәтийа хԝәда, әԝи кәсед дьн һин дькьрьн, ԝәки әԝана жи ви шьхӧли бькьн. Пешийа кӧ Иса вәгәрʹийа әʹзмана, әԝи бәрхед Йаһоԝайә ԛимәт тʹәсмили шагьртед хԝә кьрьн у щабдарийа бәлакьрьна мьзгинийе да ԝан. Һьнге дьԛәԝьмә һьнә шагьртед Иса 30 сали жи нибун. Диса жи Иса итʹбарийа хԝә ԝан дьани (Бьхунә Әфәси 4:8). Нава чьл рʹожада, пешийа кӧ Иса вәгәрʹийа әʹзмана, гәло әԝи чаԝа али ван меред амьн кьр, ԝәки әԝана бьбьнә «пʹешкʹеш»?

14. Нава чьл рʹожед пашьнә сәр әʹрде, Иса чь шагьртед хԝә һин кьрьн? (Бьньһерʹә ӧса жи шькьл.)

¹⁴ Иса бь һʹәзкьрьне ширәт дьда шагьртед хԝә. Мәсәлә, гава әԝи дит кӧ һьнә жь ԝан дӧдьли дьбьн, әԝи ширәт да ԝан (Луԛа 24:25-27; Йуһʹәнна 20:27). Әԝи дина ԝан кʹьшандә сәр ве йәке, кӧ шьхӧле шьвантийе жь ԛазанщкьрьна пʹәра фәрзтьр ә (Йуһʹәнна 21:15). Әԝи ԝанрʹа гот, кӧ әԝана хьзмәтийеда чь дькьн, гәрәке ве йәке бәрамбәри шьхӧле кәсед дьн нәкьн (Йуһʹәнна 21:20-22). Ӧса жи әԝи һьнә фькьред ԝанә дәрһәԛа Пʹадшатийа Хԝәде рʹаст кьр у али ԝан кьр, ԝәки әԝана дина хԝә бьдьнә бәлакьрьна мьзгинийе (Кʹаред Шандийа 1:6-8). Гәло рʹуспи ча дькарьн ве йәкеда чʹәʹв бьдьнә Иса?

15-16. (а) Рʹуспийед щьвате ча дькарьн чʹәʹв бьдьнә Иса? (б) Патрик чаԝа жь ширәта рʹуспики гьһишти кʹар станд?

¹⁵ Рʹуспийед щьвате ча дькарьн чʹәʹв бьдьнә Иса? Гәләк фәрз ә ԝәки рʹуспи һʹәму бьред щьвате, һәла һе йед щаһьл жи, һин кьн, ԝәки әԝана һазьр бьн щабдарийед һе мәзьн һьлдьн сәр хԝә.c Рʹуспи заньн кӧ әԝ бьра гәрәке гәләк тьшта һин бьн. Ләма жи лазьм ә, кӧ әԝана бь һʹәзкьрьне ширәте бьдьнә бьред щаһьл, ԝәки әԝана мьлук у амьн бьн, у һазьр бьн али кәсед дьн бькьн (1 Тимотʹейо 3:1; 2 Тимотʹейо 2:2; 1 Пәтрус 5:5).

¹⁶ Ԝәрә әм сәрһатийа бьраки бь наве Патрик, шеԝьр кьн у пебьһʹәсьн кӧ әԝи чаԝа жь ширәте кʹар стандийә. Гава әԝ һе щаһьл бу, әԝи тʹәви мәрьва сәрт у бемәʹрифәт хәбәр дьда, һәла һе тʹәви хушка жи. Рʹуспики гьһишти, йе кӧ кемасийед Патрик дитьн, бь нәрми, ле зәлал ширәт да ԝи. Патрик дьбежә: «Чьԛас баш ә кӧ әԝи ширәт да мьн. Гава мьн дьдит ԝәки бьред дьн һьнә щабдарийед кӧ мьн дьхԝәстьн, дьстандьн, әз бәр хԝә дькʹәтьм. Ле ширәта ви рʹуспи нишани мьн кьр, ԝәки йа лапә фәрз нә әв ә, кӧ әз щьватеда щабдарийе бьстиньм, ле әв ә, кӧ әз бь мьлукти хушк-бьрарʹа бәрдәстийе бькьм». Чахе Патрик бу 23 сали, әԝ ча рʹуспи һатә кʹьфшкьрьне (Мәтʹәлок 27:9).

17. Иса чаԝа нишан кьр, кӧ итʹбарийа хԝә шагьртед хԝә тинә?

¹⁷ Хенщи ве йәке, кӧ шагьртед Иса мьзгини бәла дькьрьн, ӧса жи лазьм бу кӧ әԝана мәрьва һин кьн. Дьбәкә шагьрт дьфькьрин, кӧ ԝе нькарьбьн ве щабдарийе биньн сери. Ле Иса итʹбарийа хԝә ԝан дьани, кӧ әԝана ԝе бькарьбьн ви шьхӧли бь щурʹәки баш биньн сери, ләма әԝи ӧса гот: «Чаԝа кӧ Бав әз шандьмә, әз жи ԝә дьшиньм» (Йуһʹәнна 20:21).

18. Рʹуспи ча дькарьн чʹәʹв бьдьнә Иса?

¹⁸ Рʹуспийед щьвате ча дькарьн чʹәʹв бьдьнә Иса? Рʹуспийед щерʹьбанди һьнә шьхӧлед хԝә тʹәсмили кәсед дьн дькьн (Филипи 2:19-22). Мәсәлә, рʹуспи дькарьн бона тʹәмьзкьрьн у хԝәйкьрьна Ода Щьвате һьнә шьхӧл бьдьнә щаһьла. Гава әԝана шьхӧләки дьдьнә кәсәки, әԝана дькарьн ԝи һин кьн у баԝәр бьн кӧ әԝе шьхӧле хԝә рʹьнд бинә сери. Рʹуспики тʹәзә бь наве Метйу рʹази йә, чьмки рʹуспийед щерʹьбанди әԝ бона һьнә шьхӧлед щьвате һин кьрьнә. Чахе ԝана шьхӧләк дьда ԝи, ԝана итʹбарийа хԝә ԝи дьани, кӧ әԝе бькарьбә ви шьхӧли бинә сери. Метйу дьбежә: «Гава мьн шаши дькьрьн, ԝана мәщал дьда мьн, кӧ әз жь шашийед хԝә дәрса һин бьм у пешда һәрʹьм».d

19. Гәрәке әм чь бькьн?

¹⁹ Чьл рʹожед пашьн сәр әʹрде, Иса кәсед дьн һелан дькьр, һин дькьр у һазьр дькьр. Ԝәрә әм жи чʹәʹв бьдьнә ԝи (1 Пәтрус 2:21). Чьԛас әм хирәт бькьн кӧ чʹәʹв бьдьнә ԝи, һаԛас әԝе али мә бькә. Әԝи соз дайә: «Әзе һәр рʹож, һʹәта рʹожед хьлазийейә ве дьнйайе тʹәви ԝә бьм» (Мәтта 28:20).