Пьрсед Хԝәндәвана
Кʹе нә «мьлйакʹәтед бьжарти», дәрһәԛа кʹижана кӧ 1 Тимотʹейо 5:21-да ньвисар ә?
Паԝлосе шанди һәвале хԝә Тимотʹейорʹа ӧса ньвиси: «Әз ль бәр Хԝәде, Мәсиһ Иса у мьлйакʹәтед бьжарти дькьмә дәйне стуйе тә, кӧ тӧ ван ширәта бе тʹагери хԝәй ки, тьштәки бь фьрԛийе нәки» (1 Тимотʹейо 5:21).
Пешийе ԝәрә әм шеԝьр кьн, кӧ ве рʹезеда дәрһәԛа кʹе те готьне. Әшкәрә йә, кӧ әв рʹез бәʹса 144 000 кәсед бь рʹӧһʹ бьжарти накә. Гава Паԝлос нәʹма хԝәйә Тимотʹейорʹа ньвиси, рʹакьрьна кәсед бьжарти бона жийина сәр әʹзмана һе дәстпенәбьбу. Шанди у хушк-бьред дьн, йед кӧ бь рʹӧһʹе пироз һатьбунә бьжартьне, һе нәбьбунә кәсед рʹӧһʹ, ләма жи хәбәра «мьлйакʹәтед бьжарти» дәрһәԛа ԝан нинә (1 Корьнтʹи 15:50-54; 1 Тʹесалоники 4:13-17; 1 Йуһʹәнна 3:2).
Ӧса жи, хәбәра «мьлйакʹәтед бьжарти» дәрһәԛа ԝан мьлйакʹәта нинә, йед кӧ ԝәʹде Тофане нәамьн ман. Әԝан мьлйакʹәтед нәамьн алийе Мире-щьна гьртьн у ӧса бунә щьн, йед кӧ дьжмьнед Иса Мәсиһ нә (Дәстпебун 6:2; Луԛа 8:30, 31; 2 Пәтрус 2:4). Ахьрийеда әԝана ԝе 1 000 сал гәлийе һәй-ԝайеда бьминьн у паше жи тʹәви Мире-щьна бенә ԛьрʹкьрьне (Щьһуда 6; Әʹйанти 20:1-3, 10).
Ләма жи әшкәрә йә, кӧ ве рʹезеда Паԝлос бәʹса мәләкед сәр әʹзмана кьр, йед кӧ пьштгьрийа Хԝәде у Иса Мәсиһ дькьрьн.
Бь һʹәзара мәләкед амьн һәнә (Ибрани 12:22, 23). Әм гәрәке нәфькьрьн, кӧ әԝана гьшк шьхӧләки дькьн (Әʹйанти 14:17, 18). Мәсәлә, мәләкәки щабдари стандьбу, кӧ 185 000 әскәред Асуре бькӧжә (2 Пʹадшати 19:35). Ча кʹьфш ә, һьнә мәләка щабдари стандьнә, ԝәки «жь Пʹадшатийа [Иса] һʹәмуйед кӧ мәрийа жь рʹе дәрдьхьн у хьрабийе дькьн, тʹоп кьн» у дәрхьн (Мәтта 13:39-41). Мәләкед дьн жи, дьбәкә щабдари стандьнә, кӧ бона әʹзмана «бьжартийед ԝи тʹоп кьн» (Мәтта 24:31). Һьнә мәләка жи щабдари стандьнә ‹кӧ һʹәму рʹе-дьрбада мә хԝәй кьн› (Зәбур 91:11; Мәтта 18:10; бәрамбәр кә Мәтта 4:11; Луԛа 22:43).
Ча кʹьфш ә «мьлйакʹәтед бьжарти», дәрһәԛа кʹижана кӧ 1 Тимотʹейо 5:21-да те готьне, һьнә щабдарийед мәхсус стандьбун, йед кӧ хьзмәткʹаред Хԝәдева гьредайи бун. Рʹезед дьнда Паԝлос дәрһәԛа рʹуспийа гот, кӧ щьват гәрәке ԛәдьре ԝан бьгьрә. Жь алийе дьнва жи, рʹуспи гәрәке щабдарийед хԝә биньн сери у фьрԛийе нәкьнә ортʹа мәрьва. Әв йәк фәрз ә, чьмки дина Хԝәде, Иса Мәсиһ у «мьлйакʹәтед бьжарти», сәр кьред рʹуспийа нә. Әшкәрә йә, кӧ жь һьнә щабдарийед кӧ мәләкарʹа һатьнә дайине, щьватева гьредайи нә. Мәсәлә, әԝана щьвате дьпʹарезьн, дина хԝә дьдьнә шьхӧле бәлакьрьна мьзгинийе у тьштед кӧ әԝана дьвиньн, Йаһоԝарʹа дьбежьн (Мәтта 18:10; Әʹйанти 14:6).