Кӧл-Дәрдед жь бо Шәрʹ у Тʹәвльһәвбуна
Шәрʹ дәрдәки гьран тинә ԝан мәрьварʹа, йед кӧ рʹасти ве тен. Әскәра у бьнәлийа нав тʹәмамийа дьнйайеда сәр хԝә тʹәхмин кьрьнә, ԝәки шәрʹ кӧл-дәрдед чьԛас мәзьн тинә.
ӘСКӘР
«Тӧ тʹьме дьвини кӧ дәр-доре тә мәрьв ча тенә кӧштьне, йан жи дьбьнә ньвишкан, ләма жи тʹьме хԝә бьн хофеда у нәрʹьһʹәт тʹәхмин дьки»—Гари, Британйа.
«Әз кʹәтьбумә бәр гӧла, пьшта мьн у сәрчʹәʹве мьн бьриндар бьбун, мьн дьдит кӧ гәләк мәрьв ча һатьбунә кӧштьне, у нав ԝанда зарʹ ӧса жи йед мәзьн һәбун. Шәрʹ мәрьва дькә дьлкәвьр»—Ԝилмар, Коломбйа.
«Чахе кәсәк бәр чʹәʹве тә те кӧштьне, тӧ нькари ве йәке жь һʹьше хԝә дәрхи. Налә-нал у ԛара-ԛара ԝи мәрьви жь гӧһе тә дәрнайе. У тӧ ԛә нькари ԝи бир ки»—Зафира, Дәԝләтед Йәкбуйи.
БЬНӘЛИ
«Әз дьфькьрим кӧ әзе ида тʹӧ щара бәхтәԝар нибьм. Тӧ бона әʹмьре хԝә бәр хԝә дькʹәви, ле дьһа зедә бона әʹмьре нәфәр у һәвалед хԝә дьтьрси»—Олександра, Украина.
«Тьрсәкә мәзьн дькʹәтә дьле мә, чьмки әм гәрәке бона хԝарьне сьрийеда бьсәкьнийана жь шәв сьһʹәта дӧда һʹәта шәбәԛе сьһʹәта йанздәһа, у мә ньзаньбу әме сах бьминьн йан на»—Делер, Тащикьстан.
«Жь бо шәрʹ мьн де-баве хԝә ӧнда кьр. Әз етʹим мам у кәсәк ида тʹӧнә бу, ԝәки бәр дьле мьнда бе у бона мьн хәм бькә»—Мари, Рԝанда.
Рʹаст ә ԝан һʹәму мәрьва кӧл-дәрд дитьнә, ле диса жи ԝана бәрдьли дит. Хенщи ве йәке, әԝана баԝәр ьн, кӧ һʹәму шәрʹ-дәʹԝ у зӧлми ԝе зутьрәке бенә һьлдане. Ве журнала Бьрща Ԛәрәԝьлийеда сәр һʹиме Кʹьтеба Пироз ԝе бе шьровәкьрьне, кӧ ча әв йәк ԝе бе сери.