Йаһоԝа Ча Али Мә Дькә кӧ Әм Тәйах кьн?

1. Чьрʹа әм гәрәке тәйах кьн, у кʹе дькарә али мә бькә? (1 Пәтрус 5:10)

ВАН рʹожед пашьнда хьзмәткʹаред Йаһоԝа мәщбур ьн бәр гәләк тьшта тәйах кьн. Һьнә хушк-бьред мә гьран нәхԝәш ьн. Һьнәка мәрьве хԝәйи незик ӧнда кьрьнә. Һьнәк жи жь алийе малбәта хԝә йан жь дәԝләте рʹасти пәйкʹәтьна тен (Мәтта 10:18, 36, 37). Баԝәр бә кӧ тәнгасийа тә чьԛас гьран бә жи, Йаһоԝа дькарә али тә бькә ԝәки тӧ тәйах ки (Бьхунә 1 Пәтрус 5:10).

2. Чь али мә дькә тәйах кьн?

² Тәйахбун әв ә, кӧ мәрьв һьмбәри чәтьнайа, зӧлмийе, тәнгасийа йан щерʹьбандьна сәбьр дькә у гӧмана хԝә ӧнда накә. Әм нькарьн ве йәке пе ԛәԝата хԝә бькьн, ле Йаһоԝа «ԛәԝата кӧ жь синоре мәрьва зедәтьр ә» дьдә мә (2 Корьнтʹи 4:7). Ве готареда әме дәрһәԛа чар тьшта хәбәр дьн, йед кӧ Йаһоԝа дайә мә ԝәки әм бькарьбьн тәйах кьн, у әме бьвиньн кӧ ча дькарьн жь ԝан тьшта кʹаре бьстиньн.

ДӦА

3. Дӧа чьрʹа кʹәрәмәт ә?

³ Рʹаст ә әм мәрьвнә гӧнәкʹар ьн, ле диса жи Йаһоԝа мәщале дьдә кӧ әм перʹа хәбәр дьн. Бь ве йәке әԝ али мә дькә, ԝәки әм сәбьр кьн (Ибрани 4:16). Һәла бьфькьрә: Әм дькарьн тʹьме у дәрһәԛа һәр тьшти Йаһоԝарʹа дӧа кьн. Фьрԛи тʹӧнә әм кʹидәре бьн у сәр кʹижан зьмани хәбәр дьн, Әԝ мә дьбьһе, һәла һе һәрге әм дәрәщәкә ӧсада ньн кӧ әм тʹәне нә, мәсәлә кәледа (Уньс 2:1, 2; Кʹаред Шандийа 16:25, 26). Һәрге әм гәләк дьлтәнг ьн у ньзаньн бь кʹижан гьлийа дьле хԝә Йаһоԝарʹа вәкьн, Әԝ диса жи занә кӧ чь әм дьхԝазьн ԝирʹа бежьн (Рʹомайи 8:26, 27). Дӧа бь рʹасти жи кʹәрәмәт ә!

4. Әм жь кʹӧ заньн кӧ дӧайед дәрһәԛа сәбьркьрьне ль гора хԝәстьна Хԝәде нә?

⁴ Йаһоԝа соз дайә кӧ «һәгәр әм тьштәки ль гора хԝәстьна ԝи же бьхԝазьн, әԝ дәнге мә дьбьһе» (1 Йуһʹәнна 5:14). Гәло әм дькарьн аликʹарийе жь Йаһоԝа бьхԝазьн, кӧ әм сәбьр бькьн? Һәмьки әре! Әв йәк ль гора хԝәстьна ԝи йә, чьмки гава әм сәбьр дькьн у Йаһоԝарʹа амьн дьминьн, әм мәщале дьдьнә Йаһоԝа, ԝәки әԝ щаба Мире-щьна бьдә (Мәтʹәлок 27:11). Ӧса жи Кʹьтеба Пироз дьбежә, кӧ Йаһоԝа һазьр ә али ԝан мәрьв бькә, йед кӧ ԝирʹа амьн ьн (2 Дирок 16:9). Ләма жи әм дькарьн баԝәр бьн, кӧ Йаһоԝа һьм дькарә һьм жи дьхԝазә али мә бькә, ԝәки әм сәбьр кьн (Ишайа 30:18; 41:10; Луԛа 11:13).

5. Дӧа ча дькарә әʹдьлайе бьдә мә? (Ишайа 26:3)

⁵ Кʹьтеба Пироз дьбежә кӧ гава әм дәрһәԛа хәмед хԝә жь дьл дӧа дькьн, «әʹдьлайа Хԝәде, йа кӧ сәр фәʹмкьрьна мәрьварʹа йә, ԝе дьл у һʹьше [мә] . . . бьпʹарезә» (Филипи 4:7). Ԝәрә әм шеԝьр кьн кӧ әв чь те һʹәсабе. Гава мәрьвед кӧ Йаһоԝарʹа хьзмәт накьн дькʹәвьнә тәнгасийе, әԝана гәләк метода дьдьнә хәбате, ԝәки әʹдьлайи бькʹәвә дьле ԝан. Мәсәлә, һьнә мәрьв медитасийайева мьжул дьбьн, ԝәки һʹәму фькьр у хәмед хԝә жь һʹьше хԝә дәрхьн. Ле кәсе кӧ ӧса дькә, дькарә бькʹәвә бьн һʹӧкӧме щьна, ләма жи әв йәк гәләк хоф ә (Бәрамбәр кә Мәтта 12:43-45). Әʹдьлайа кӧ Йаһоԝа дьдә мәрьвед кӧ жерʹа дӧа дькьн, жь әʹдьлайа кӧ бь сайа медитасийайе дьстиньн, мәзьнтьр ә. Гава әм Йаһоԝарʹа дӧа дькьн, әм нишан дькьн кӧ әм хԝә бь тʹәмами дьсперьнә ԝи, у әԝ «әʹдьлайа дьреж» дьдә мә (Бьхунә Ишайа 26:3). Йәк жь ԝан методед кӧ Йаһоԝа дьдә хәбате, ԝәки әʹдьлайе бьдә мә әв ә, кӧ әԝ али мә дькә ԝан рʹезед кӧ әм бәре һин бьбун, бькьнә бира хԝә. Рʹезед ӧса дькарьн әʹдьлайе бьдьнә мә, чьмки әԝ нишан дькьн кӧ Йаһоԝа дькʹәвә һʹәйра мә у дьхԝазә ԝәки әм рʹьһʹәтийа дьл хԝәй кьн (Зәбур 62:1, 2).

6. Дӧайед хԝәда, әм дькарьн бәʹса чь бькьн? (Бьньһерʹә ӧса жи шькьл.)

⁶ Тӧ чь дькари бьки? Гава баԝәрийа тә те щерʹьбандьне, «баре хԝә бьдә Хӧдан» у дӧа бькә ԝәки әԝ әʹдьлайе бьдә тә (Зәбур 55:22). Ӧса жи биланийе жь Йаһоԝа бьхԝазә ԝәки тӧ бьзаньби кӧ гәрәке чь бьки (Мәтʹәлок 2:10, 11). Хенщи ве йәке, бир нәкә кӧ шекьрдар би (Филипи 4:6). Һәр тьшти бькә, ԝәки дәсте ԝи әʹмьре хԝәда бьвини, у бона аликʹарийа ԝи дӧада рʹазибуна хԝә ԝирʹа бьди кʹьфше. Бьра чәтьнайед тә нәбьнә мәʹни, ԝәки тӧ кʹәрәмед кӧ тә стандьнә, нәвини (Зәбур 16:5, 6).

КʹЬТЕБА ПИРОЗ

7. Лекʹолина Кʹьтеба Пироз ча дькарә али мә бькә, ԝәки әм чәтьнайада тәйах кьн?

⁷ Йаһоԝа бь сайа Кʹьтеба Пироз али мә дькә кӧ әм сәбьр кьн. Гәләк рʹез нишан дькьн, ԝәки Йаһоԝа али мә дькә. Мәсәлә, Мәтта 6:8-да ӧса те готьне: «Һʹәта кӧ һун тьштәки жь Баве хԝәйи әʹзмана бьхԝазьн, әԝ ида занә чь ԝәрʹа лазьм ә». Әва гьлийед Иса нә. Әм заньн кӧ Иса Мәсиһ Йаһоԝа гәләк баш нас дькә. Ләма жи әм гәрәке ԛә дӧдьли нәбьн кӧ гава әм рʹасти чәтьнайа тен, Йаһоԝа занә кӧ әм һʹәԝще чь нә у дьхԝазә али мә бькә. Кʹьтеба Пирозда гәләк рʹезед дьн жи һәнә, йед кӧ дькарьн ԛәԝате бьдьнә мә, ԝәки әм тәйах кьн (Зәбур 94:19).

8. а) Кʹижан принсипа Кʹьтеба Пироз дькарә али мә бькә тәйах кьн? Мәсәле биньн. б) Чь дькарә али мә бькә кӧ әм принсипед Кʹьтеба Пироз биньн бира хԝә?

⁸ Принсипед Кʹьтеба Пироз дькарьн али мә бькьн сәбьр кьн у биланийе бьдьнә мә, кӧ әм сафикьрьнед рʹаст бькьн (Мәтʹәлок 2:6, 7). Мәсәлә, Кʹьтеба Пироз дьбежә кӧ әм гәрәке бона ахьрийе бәр хԝә нәкʹәвьн, ле дәԝсе һәр рʹож итʹбарийа хԝә Йаһоԝа биньн кӧ әԝе бона мә хәм бькә (Мәтта 6:34). Гәләк фәрз ә кӧ әм хԝәрʹа бькьнә хәйсәт ԝәки Ньвисаред Пироз бьхуньн у кʹур сәр бьфькьрьн. Һьнге һәрге әм рʹасти чәтьнайике бен, мәрʹа ԝе дьһа һеса бә принсипед керһати биньн бира хԝә.

9. Сәрһатийед Кʹьтеба Пироз баԝәрийа һьндава аликʹарийа Йаһоԝа ча дьһа ԛәԝи дькьн?

⁹ Ӧса жи Кʹьтеба Пирозда дәрһәԛа мәрьвед ԝәʹде бәре те готьне, йед кӧ итʹбарийа хԝә Йаһоԝа дьанин у аликʹарийа ԝи дьдитьн (Ибрани 11:32-34; Аԛуб 5:17). Гава әм дәрһәԛа сәрһатийед ӧса дьфькьрьн, баԝәрийа мә зедә дьбә кӧ Йаһоԝа «сьтʹаргәһ у ԛәԝата мә йә, кʹомәкдаре мәйи тәнгасийада һәри незик ә» (Зәбур 46:1). Чахе әм дьдьнә бәр чʹәʹве хԝә, кӧ хьзмәткʹаред Йаһоԝайи бәре, ԝәʹде чәтьнайа ча амьнийа хԝә хԝәй дькьрьн, хԝәстьна мә дьһа зедә дьбә кӧ әм чʹәʹв бьдьнә баԝәри у сәбьра ԝан (Аԛуб 5:10, 11).

10. Сәва кӧ әм жь Кʹьтеба Пироз кʹаре бьстиньн, әм гәрәке чь бькьн?

¹⁰ Тӧ чь дькари бьки? Һәр рʹож Кʹьтеба Пироз бьхунә у рʹезед кӧ бона тә керһати нә, хԝәрʹа бьньвисә. Гәләк мәрьв шәбәԛа рʹеза рʹоже дьхуньн ԝәки бькарьбьн тʹәмамийа рʹоже сәр бьфькьрьн у ԛәԝате бьстиньн. Ԝәрә әм сәрһатийа хушкәкә мә бь наве Мариa шеԝьр кьн. Һьм дийа ԝе һьм жи баве ԝе бь кʹансәре нәхԝәш кʹәтьн. Мәһед пашьнда, гава әԝана ида бәр мьрьне бун, гәло чь али хушка мә кьр, ԝәки әԝ тәйах кә? Әԝ дьбежә: «Һәр шәбәԛе, мьн рʹеза рʹоже жь брошура Һәр Рʹож Ньвисаред Пироз Лекʹолин Бькьн дьхԝәнд, у әз кʹур сәр дьфькьрим. Бь сайа ве йәке һʹьше мьн бь фькьрәкә жь Кʹьтеба Пироз тʹьжә дьбу, кʹижан кӧ али мьн дькьр нә кӧ тʹьме дәрһәԛа дәрдед хԝә бьфькьрьм, ле дина хԝә бьдьмә созед Йаһоԝа» (Зәбур 61:2).

ХУШК-БЬРА

11. Гава әм рʹасти чәтьнайа тен, чьрʹа баш ә кӧ әм заньн ԝәки әм тʹәне ниньн?

¹¹ Йаһоԝа бь сайа хушк-бьред мә али мә дькә ԝәки әм сәбьр кьн. Әв йәк кӧ «хушк-бьред [мә] жи тʹәмамийа дьнйайеда хут ԝан щәфа дькʹьшиньн» мә дьшьдинә, чьмки әм заньн кӧ әм тʹәне ниньн (1 Пәтрус 5:9). Бәле, һʹале мә чьԛас чәтьн бә жи, әм заньн кӧ хушк-бьред дьн жи рʹасти чәтьнайед ӧса һатьнә у ԝана сәбьр кьрийә. Әв те һʹәсабе, ԝәки әм жи дькарьн сәбьр кьн (Кʹаред Шандийа 14:22).

12. Хушк-бьред мә ча дькарьн али мә бькьн, у әм ча дькарьн али хушк-бьра бькьн? (2 Корьнтʹи 1:3, 4)

¹² Ԝәʹде чәтьнда, хушк-бьред мә дькарьн мә ԛәԝи кьн. Гава Паԝлосе шанди мала хԝәда гьрти бу, әԝи жь хушк-бьра бәрдьли, мерхаси у аликʹари дьстанд, у әԝи гәләк щара бь рʹазибуне бәʹса ԝан дькьр (Филипи 2:25, 29, 30; Колоси 4:10, 11). Иро жи гава мәрʹа аликʹари лазьм дьбә ԝәки әм чәтьнайада сәбьр кьн, хушк-бьред мә һазьр ьн али мә бькьн. Жь алийе дьнва жи, гава ԝанрʹа аликʹари лазьм дьбә, әм жи гәрәке һазьр бьн али ԝан бькьн (Бьхунә 2 Корьнтʹи 1:3, 4).

13. Чь али хушка мә Майайе кьр ԝәки әԝ сәбьр кә?

¹³ Русйайеда, хушка мә бь наве Майа жь хушк-бьра аликʹарийа мәзьн станд. Сала 2020-да полис ньшкева кʹәтьнә мала ԝе у мала ԝе сәробьниһәв кьрьн. Паше хушка мә данә бәр диԝане бона ве йәке, кӧ әԝе дәрһәԛа баԝәрийа хԝә мәрьварʹа гьли дькьр. Майа дьбежә: «Ԝе дәме һʹале мьн тʹӧнә бу. Хушк-бьра мьнрʹа тʹеле дьхьстьн, дьньвисин у дьготьн кӧ әԝана мьн һʹәз дькьн. Мьн бәре жи заньбу кӧ әм малбәтәкә мәзьн у дьлован ьн, ле жь сала 2020 әз дьһа баԝәр бум, кӧ әв йәк бь рʹасти жи ӧса йә».

14. Гава әм рʹасти чәтьнайа тен, әм ча дькарьн жь аликʹарийа хушк-бьра кʹаре бьстиньн? (Бьньһерʹә ӧса жи шькьл.)

¹⁴ Тӧ чь дькари бьки? Гава тӧ рʹасти чәтьнайа тейи, гәләк фәрз ә хԝә незики хушк-бьра бьгьри, чьмки әв йәк ԝе али тә бькә сәбьр ки. Шәрм нәкә жь рʹуспийа аликʹарийе бьхԝази. Әԝана дькарьн бьбьнә мина щики ӧса, кӧ мәрьв хԝә жь ба вәдьшерә у мина сьтʹара ԝәʹде фьртоне (Ишайа 32:2). Ӧса жи бир нәкә, кӧ хушк-бьред дьн жи рʹасти чәтьнайа тен. Һәрге тӧ аликʹарийе бьди ԝан, йед кӧ һʹәԝщә нә, әв йәк ԝе шабуне тәрʹа бинә у али тә бькә ԝәки тӧ жи чәтьнайада сәбьр ки (Кʹаред Шандийа 20:35).

ГӦМАНА МӘ

15. Гӧмане ча али Иса кьр у ча али мә дькә? (Ибрани 12:2)

¹⁵ Йаһоԝа бь сайа гӧмана кӧ әԝи дайә мә, али мә дькә ԝәки әм сәбьр кьн (Рʹомайи 15:13). Ԝәрә әм биньн бира хԝә, кӧ гӧмане ча али Иса дькьр ԝәки әԝ рʹожа лапә чәтьнда сәбьр кә (Бьхунә Ибрани 12:2). Әԝи заньбу кӧ амьнийа ԝи бона пирозкьрьна наве Йаһоԝа фәрз ә. Ӧса жи әԝ һивийе бу, ԝәки вәгәрʹә бал Баве хԝә у паше жи тʹәви бьред хԝә Пʹадшатийа әʹзманада хьзмәт кә. Мина ве йәке, гӧмана жийина һʹәта-һʹәтайе дькарә али мә жи бькә, ԝәки әм бәр һʹәму чәтьнайед кӧ Мире-щьна тинә пешийа мә, сәбьр кьн.

16. Гӧмане ча али хушкәкә мә кьр сәбьр кә, у тӧ жь гьлийед ԝе чь дәрсе һин дьби?

¹⁶ Дина хԝә бьде кӧ гӧмана жийина дьнйа тʹәзәда ча али хушка мә Аллайе кьр, йа кӧ ль Русйайе дьжи. Мере ԝе һатә гьртьне у һʹәта рʹожа диԝанкьрьне кәледа ма. Чахе әв һʹәму тьшт ԛәԝьми, Аллайе ӧса гот: «Дӧа у фькьрандьна кʹур сәр гӧмана мә али мьн дькә ԝәки бь зедәйи хәмгин нәбьм. Әз заньм ԝәки паши ван чәтьнайа, рʹожед хԝәш ԝе бен. Йаһоԝа ԝе дьжмьнед хԝә алт кә, у кʹәрәма сәр мәда бьбаринә».

17. Әм ча дькарьн бьдьнә кʹьфше, ԝәки әм гӧмана хԝә ԛимәт дькьн? (Бьньһерʹә ӧса жи шькьл.)

¹⁷ Тӧ чь дькари бьки? Дәрһәԛа созед Йаһоԝа кʹур бьфькьрә. Бьдә бәр чʹәʹве хԝә кӧ тӧ дьнйа тʹәзәда ни у кʹижан кʹәрәма тӧйе бьстини. Һәрге тӧ ӧса бьки, тӧйе дьһа баш фәʹм бьки ԝәки әв тәнгаси, рʹасти кʹижани кӧ тӧ ньһа тейи, «ԝәʹдәки кьн дькʹьшиньн у сьвьк ьн» (2 Корьнтʹи 4:17). Ӧса жи, чьԛас жь дәсте тә те, мәрьварʹа дәрһәԛа баԝәрийа хԝә гьли кә. Бьдә һʹәсабе хԝә кӧ бона ԝан мәрьва, йед кӧ дәрһәԛа созед Хԝәде ньзаньн, чьԛас чәтьн ә бәр тәнгасийед кӧ дьнйа Мире-щьнада рʹасти ԝан тен, тәйах кьн. Хәбәрданәкә кьн жи дькарә бьбә мәʹни, кӧ әԝ бьхԝазә дәрһәԛа созед Йаһоԝа дьһа зедә пебьһʹәсә.

18. Әм чьма дькарьн итʹбарийа хԝә созед Йаһоԝа биньн?

¹⁸ Паши ве йәке кӧ Ибо һьмбәри гәләк тәнгасийа тәйах кьр, әԝи Йаһоԝарʹа ӧса гот: «Әз заньм тӧ дькари һәр тьшти бьки у тʹӧ . . . [нетәкә] тә найе астәнгкьрьн» (Ибо 42:2, ИМ). Ибо избат бу кӧ тʹӧ тьшт нькарә рʹийа Йаһоԝа бьгьрә, ԝәки нета хԝә бинә сери. Гава әм бәр чәтьнайа тәйах дькьн, әв фькьр дькарә ԛәԝате бьдә мә жи. Мәсәлә, кʹӧлфәтәкә нәхԝәш бьдә бәр чʹәʹве хԝә, йа кӧ хәмгин ә чьмки гәләк һʹәкима нькарьбун ле ԛәнщ кьрана. Ле гава һʹәкимәки щерʹьбанди у бь итʹбар тедәрдьхә кӧ проблем чьда нә у шьровәдькә кӧ әԝе нәхԝәшийа ԝе ча ԛәнщ кә, әԝ кʹӧлфәт ша дьбә. Рʹаст ә, ԝәʹдә лазьм ә һʹәта кӧ әԝ ԛәнщ бә, ле әԝ һазьр ә сәбьр кә, чьмки ида гӧмана ԝе һәйә кӧ рʹожәке әԝе ԛәнщ бә. Мина ве йәке, гӧмана мә һьндава Щьнәта создайи али мә дькә ԝәки әм сәбьр кьн.

19. Чь дькарә али мә бькә тәйах кьн?

¹⁹ Чаԝа кӧ әм пеһʹәсийан, Йаһоԝа бь сайа дӧа, Кʹьтеба Пироз, хушк-бьред мә у ӧса жи бь сайа гӧмана мә али мә дькә ԝәки әм тәйах кьн. Һәрге әм чь жь дәсте мә те бькьн ԝәки жь ван тьшта кʹаре бьстиньн, Йаһоԝа ԝе али мә бькә ԝәки әм һьмбәри һәр тәнгасике тәйах кьн, кʹижан кӧ һʹәта хьлазийа дьнйа Мире-щьна дькарьн бенә пешийа мә (Филипи 4:13).