Тӧ Дькари Хԝәстьнед Нәрʹаст Алт ки

1. Әм һʹәму жи мьԛабьли чь шәрʹ дькьн?

ЩАРНА, дьбәкә дьле мәда хԝәстьнәкә ӧса пешда бе, чь кӧ Йаһоԝа хԝәш найе. Һәрге тьштәки ӧса бе сәре тә, нәфькьрә кӧ тӧ жь һәр кәси зедәтьр тейи щерʹьбандьне. Кʹьтеба Пироз ӧса дьбежә: «Һʹәму щерʹьбандьнед кӧ тенә сәре ԝә, тенә сәре мәрьвед дьн жи» (1 Корьнтʹи 10:13). Демәк, кʹижан хԝәстьна нәрʹаст щәм тә пешда бе жи, бьзаньбә ԝәки кәсед дьн жи мьԛабьли ԝан хԝәстьна шәрʹ дькьн. Тӧ тʹәне нини у тӧ дькари бь аликʹарийа Йаһоԝа сәр кʹәви.

2. Һьнә Мәсиһи у хԝәндәкʹаред Кʹьтеба Пироз бь чь тенә щерʹьбандьне? (Бьньһерʹә ӧса жи шькьл.)

² Ӧса жи, Кʹьтеба Пирозда те готьне: «Һәр кәс дьбә машоԛе дьлһавьжийед хԝә, дьхапә у те щерʹьбандьне» (Аԛуб 1:14). Мәрьв бь щурʹә-щурʹә тьшта тенә щерʹьбандьне. Һьнә Мәсиһи дькарьн бенә щерʹьбандьне ԝәки бенамусийе бькьн, мәсәлә мер тʹәви жьна йан жьн тʹәви мера. Ле һьнәк жи тенә щерʹьбандьне, ԝәки бенамусийе бькьн, мәсәлә мер тʹәви мера йан жи жьн тʹәви жьна. Һьнәк, йед кӧ бәре порнографийайе дьньһерʹин, тенә щерʹьбандьне кӧ диса дәстпекьн бьньһерʹьн. Ԝанрʹа, йед кӧ бәре наркотика дьданә хәбате, йан бь зедәйи ичкә вәдьхԝарьн, дьԛәԝьмә чәтьн ә хԝә жь ван тьшта дур бьгьрьн. Әв һьнә хԝәстьнед нәрʹаст ьн, кӧ дькарьн бькʹәвьнә дьле Мәсиһийа у хԝәндәкʹаред Кʹьтеба Пироз. Дьԛәԝьмә тӧ жи щарна хԝә мина Паԝлосе шанди тʹәхмин дьки, йе кӧ ӧса гот: «Гава әз дьхԝазьм тьште рʹаст бькьм, жь мьн хьраби дәрте» (Рʹомайи 7:21).

3. Һәрге хԝәстьнәкә нәрʹаст жь дьле тә дәрнакʹәвә, дьбәкә тӧ хԝә ча тʹәхмин ки?

³ Һәрге хԝәстьнәкә нәрʹаст жь дьле тә дәрнакʹәвә, дьбәкә тӧ хԝә бе чʹарә тʹәхмин ки, те бежи тӧ нькари щерʹьбандьнеда сәр кʹәви. Ӧса жи дьбәкә тӧ хԝә бе гӧман тʹәхмин ки, те бежи Йаһоԝа ԝе тә инкʹар кә сәва ве йәке, кӧ хԝәстьна нәрʹаст дьле тәда һәйә. Ле баԝәр бә кӧ әв һәрдӧ фькьр жи нәрʹаст ьн! Ве готареда, әме сәр дӧ пьрса бьфькьрьн: 1) Жь кʹӧ пешда тен әв фькьр, жь бо чь жи әм хԝә бе чʹарә у бе гӧман тʹәхмин дькьн? 2) Гәло тӧ ча дькари мьԛабьли хԝәстьнед нәрʹаст шәрʹ бьки?

МИРЕ-ЩЬНА ДЬХԜАЗӘ КӦ ӘМ ХԜӘ ЧА ТʹӘХМИН КЬН?

4. а) Мире-щьна чьма дьхԝазә ԝәки әм хԝә бе чʹарә тʹәхмин кьн? б) Шәрʹе мьԛабьли хԝәстьнед нәрʹастда, әм чьма бе чʹарә ниньн?

⁴ Чахе әм тенә щерʹьбандьне, Мире-щьна дьхԝазә ԝәки әм хԝә бе чʹарә тʹәхмин кьн. Ләма жи Иса шагьртед хԝәрʹа готьбу, кӧ ӧса дӧа бькьн: «Али мә бькә кӧ әм щерʹьбандьнада шаш нәбьн, ле мә жь дәсте Мире-щьна хьлаз кә» (Мәтта 6:13). Мире-щьна готьбу кӧ һәрге мәрьв бенә щерʹьбандьне, әԝе гӧһ нәдьнә Йаһоԝа (Ибо 2:4, 5). Гәло чьма әԝ ӧса дьфькьрә? Чьмки әԝ хԝәха кʹәтә бәр байе хԝәстьна хԝә, у нәхԝәст Йаһоԝарʹа амьн бьминә. Әʹйан ә, кӧ әԝ дьфькьрә ԝәки әм жи мина ԝи нә, у әме жи щерʹьбандьнада гӧһ нәдьнә Йаһоԝа. Мире-щьна дьфькьри кӧ дькарә һәла һе Кӧрʹе Хԝәде жи бь сайа щерʹьбандьне жь рʹе дәрхә! (Мәтта 4:8, 9) Гәло шәрʹе мьԛабьли хԝәстьнед нәрʹастда, әм бь рʹасти бе чʹарә нә? На! Әм тʹәви гьлийед Паԝлосе шанди ԛайил ьн, йе кӧ гот: «Әз дькарьм бь сайа Хԝәде, йе кӧ ԛәԝате дьдә мьн, һәр тьшти бькьм» (Филипи 4:13).

5. Әм жь кʹӧ заньн кӧ Йаһоԝа баԝәр ә, ԝәки әм дькарьн шәрʹе мьԛабьли хԝәстьнед нәрʹастда сәр кʹәвьн?

⁵ Ньһерʹандьна Йаһоԝа жь ньһерʹандьна Мире-щьна бь тʹәмами щӧдә дьбә. Йаһоԝа баԝәр ә кӧ әм дькарьн хԝәстьнед нәрʹаст алт кьн. Әм ве йәке жь кʹӧ заньн? Йаһоԝа бәреда готьбу, кӧ гәләк мәрьвед амьн ԝе тәнгасийа мәзьнда сах бьминьн. Һәла бьфькьрьн әв йәк чь те һʹәсабе. Йаһоԝа, йе кӧ нькарә дәрәԝа бькә, дьбежә кӧ нә тʹәне һьнә кәс, ле гәләк мәрьв ԝе бь «чӧхед чилә-ԛәрԛаш» бькʹәвьнә дьнйа тʹәзә. Әв те һʹәсабе кӧ Йаһоԝа ԝан мәрьва ча кәсед тʹәмьз һʹәсаб дькә (Әʹйанти 7:9, 13, 14). Әшкәрә йә, кӧ Йаһоԝа нафькьрә ԝәки әм шәрʹе мьԛабьли хԝәстьнед нәрʹастда бе чʹарә нә.

6-7. Мире-щьна чьма дьхԝазә ԝәки әм хԝә бе гӧман тʹәхмин кьн?

⁶ Мире-щьна дьхԝазә кӧ әм хԝә нә тʹәне бе чʹарә, ле бе гӧман жи тʹәхмин кьн, у бьфькьрьн кӧ Йаһоԝа ԝе мә инкʹар кә, чьмки бал мә хԝәстьнед нәрʹаст һәнә. Бь рʹасти, йе кӧ бе гӧман ә, Мире-щьна йә, чьмки Йаһоԝа әԝ инкʹар кьрийә. Әԝе нькарьбә һʹәта-һʹәтайе бьжи, ле ԝе бе кʹӧтакьрьне (Дәстпебун 3:15; Әʹйанти 20:10). Бе шьк, Мире-щьна гәләк һерс ә чьмки гӧмана мәйә жийина һʹәта-һʹәтайе һәйә. Ләма жи әԝ һәр тьшти дькә, ԝәки мә бьдә баԝәркьрьне, кӧ мина ԝи, гӧмана мәйә һьндава ахьрийе тʹӧнә. Ле әм бе гӧман ниньн. Кʹьтеба Пироз дьбежә кӧ Йаһоԝа «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәтрус 3:9). Бәле, Йаһоԝа нахԝазә мә инкʹар кә, ле дьхԝазә али мә бькә.

⁷ Һәрге әм дьфькьрьн, ԝәки шәрʹе мьԛабьли хԝәстьнед нәрʹастда әм бе чʹарә у бе гӧман ьн, бь ве йәке әм дьле Мире-щьна ша дькьн. Һәрге әм ве йәке рʹьнд фәʹм кьн, әме һе зедә бьхԝазьн ԝан фькьра жь дьле хԝә дәрхьн (1 Пәтрус 5:8, 9).

ЖЬ БО ВЕ ЙӘКЕ КӦ ӘМ ГӦНӘКʹАР ЬН, ДЬБӘКӘ ӘМ ДӘРҺӘԚА ХԜӘ ЧЬ ДЬФЬКЬРЬН?

8. Хенщи кьред нәрʹаст, хәбәра гӧнә диса чь те һʹәсабе? (Зәбур 51:5) (Бьньһерʹә ӧса жи «Хәбәра Шьровәкьри».)

⁸ Хенщи һʹӧкӧме Мире-щьна, диса мәʹникә дьн жи һәйә, жь бо чь жи дьԛәԝьмә шәрʹе мьԛабьли хԝәстьнед нәрʹастда әм хԝә бе чʹарә у бе гӧман тʹәхмин кьн. Гәло әв чь мәʹни йә? Әв һәйә гӧнәкʹари, кʹижан кӧ мә жь Адәм у Һеԝайе ча мьлкʹ стандийәa (Ибо 14:4; бьхунә Зәбур 51:5).

9-10. а) Гӧнә ча сәр Адәм у Һеԝайе һʹӧкӧм кьр? (Бьньһерʹә ӧса жи шькьл.) б) Гӧнә ча сәр мә һʹӧкӧм дькә?

⁹ Бьфькьрә кӧ гӧнә ча сәр Адәм у Һеԝайе һʹӧкӧм кьр. Паши ве йәке кӧ ԝана ԛануна Йаһоԝа тʹәрьбанд, ԝана хԝә вәшарт у хԝәст ьн бәдәна хԝә дадьн. Каникеда дәрһәԛа гӧне Адәм у Һеԝайе ӧса те готьне: «Гӧнә бу сәбәб кӧ ԝана хԝә нәһәԛ тʹәхмин кьр, хәмгин бун, тьрсийан у шәрм кьрьн» (Фәʹмкьрьна Ньвисаре). Те бежи Адәм у Һеԝа маләкә ӧсада ман, кӧ теда тʹәне чар отʹах һәбун, демәк нәһәԛи, хәмгини, тьрс у шәрм. Ԝана дькарьбу жь отʹахәке дәрбази отʹахәкә дьн буна, ле әԝана нькарьбун жь ве мале дәркʹәвьн. Бәле, ԝана нькарьбу жь гӧнәкʹарийе бьрʹәвьн у аза бьн.

¹⁰ Дәрәща мә бь тʹәмами мина дәрәща Адәм у Һеԝайе хьраб нинә. Бь сайа ԛӧрбана Иса, йа кӧ сәр ԝан һʹӧкӧм накә, мәщал мәрʹа һатийә дайине, ԝәки гӧнед мә бенә бахшандьне у әм незики Хԝәде бьн (1 Корьнтʹи 6:11). Ле чь жи һәбә, гӧнә жь ԝана дәрбази сәр мә буйә. Ләма әм жи хԝә нәһәԛ тʹәхмин дькьн, хәмгин дьбьн, дьтьрсьн у шәрм дькьн. Кʹьтеба Пироз дьбежә, ԝәки гӧнә «пʹадшатийе дькә һәла һе сәр ԝан жи, гӧнед кʹижана мина йед Адәм нибун» (Рʹомайи 5:14). Сәд һʹәйф кӧ ӧса йә, ле диса жи, нәлазьм ә кӧ әм хԝә бе чʹарә у бе гӧман тʹәхмин кьн. Гәло әм ча дькарьн һәстед ӧса жь дьле хԝә дәрхьн?

11. Һәрге әм хԝә бе чʹарә тʹәхмин кьн, әм гәрәке чь бькьн у чьрʹа? (Рʹомайи 6:12)

¹¹ Щара дьԛәԝьмә әм ча бежи «дәнге гӧнәкʹарийе» бьбьһен йе кӧ мәрʹа дьбежә, ԝәки әме тʹӧ щар нькарьбьн хԝәстьнед нәрʹаст алт кьн у ләма жи әме хԝә бе чʹарә тʹәхмин кьн. Ле әм гәрәке гӧһ нәдьнә ԝи «дәнги». Кʹьтеба Пирозда те готьне: «Нәһельн кӧ гӧнә сәр жийина ԝә һʹӧкӧм кә» (Бьхунә Рʹомайи 6:12). Демәк, һәрге хԝәстьнед мәйә нәрʹаст һәбьн жи, әм дькарьн сафи кьн ԝана жь һʹьше хԝә дәрхьн у нәйньн сери (Галати 5:16). Һәрге Йаһоԝа баԝәр нибуйа кӧ әм дькарьн щерʹьбандьнада амьн бьминьн, әԝи ԝе әв йәк жь мә дәʹԝа нәкьра (Ԛануна Дӧщари 30:11-14; Рʹомайи 6:6; 1 Тʹесалоники 4:3). Әʹйан ә кӧ шәрʹе мьԛабьли хԝәстьнед нәрʹастда әм бе чʹарә ниньн.

12. Һәрге әм хԝә бе гӧман тʹәхмин дькьн, әм гәрәке чь бькьн у чьрʹа?

¹² Мина ве йәке, гава әм дьфькьрьн кӧ Йаһоԝа ԝе мә инкʹар кә чьмки хԝәстьнед мәйә нәрʹаст һәнә у жь бо ве йәке әм хԝә бе гӧман тʹәхмин дькьн, әм гәрәке фәʹм бькьн кӧ әв жи ча бежи «дәнге гӧнәкʹарийе» йә у гӧһ нәдьнә ԝи «дәнги». Гәло чьма? Чьмки Кʹьтеба Пироз дьбежә, ԝәки Йаһоԝа һʹале мәйи гӧнәкʹар фәʹм дькә (Зәбур 103:13, 14). Әԝ дәрһәԛа мә «һәр тьшти занә». Мәсәлә, әԝ занә кӧ ча гӧнәкʹарийа мә сәр мә һʹӧкӧм дькә, ԝәки хԝәстьнед нәрʹаст щәм мә пешда тен (1 Йуһʹәнна 3:19, 20). Һәрге әм мьԛабьли хԝәстьнед хԝәйә нәрʹаст шәрʹ дькьн у ԝана найньн сери, исафа мә бәр Йаһоԝа тʹәмьз ә. Гәло әм ве йәке жь кʹӧ заньн?

13-14. Һәрге дьле мәда хԝәстьнед нәрʹаст һәбьн, гәло әв йәк те һʹәсабе кӧ Йаһоԝа жь мә рʹази нинә? Шьровәкә.

¹³ Ль гора Кʹьтеба Пироз, ортʹа хԝәстьнед нәрʹаст у кьред нәрʹастда фьрԛикә мәзьн һәйә. Щарна дәсте мәрьвда нинә кӧ хԝәстьнәкә нәрʹаст бькʹәвә дьле ԝи, ле диса жи әԝ дькарә ве хԝәстьне контрол кә у хьрабийе нәкә. Мәсәлә, ԛьрʹна йәкеда һьнә хушк-бьред жь щьвата Корьнтʹе бәре һомосексуал бун. Паԝлосе шанди ӧса ньвиси: «Һьнәк жь ԝә һәма мәрьвнә ӧса бун». Гәло әв йәк те һʹәсабе кӧ хԝәстьнед һомосексуали ида ԛә нәдькʹәтьнә дьле ԝан? На. Гәләк чәтьн ә кӧ мәрьв жь хԝәстьнед ӧса бь тʹәмами аза бә, ләма жи дьԛәԝьмә хԝәстьнед ӧса щарна дькʹәтьнә дьле ԝан. Ле Йаһоԝа әԝана тʹәмьз һʹәсаб дькьрьн, чьмки ԝана ида хԝәстьнед хԝәйә нәрʹаст нәдьани сери (1 Корьнтʹи 6:9-11). Мина ԝан, әм жи дькарьн бәр чʹәʹве Йаһоԝа тʹәмьз бенә һʹәсабе.

¹⁴ Хԝәстьнед тәйә нәрʹаст чь бьн жи, тӧ дькари сәр кʹәви. Һәрге тӧ нькари ԝана бь тʹәмами жь дьле хԝә дәрхи, диса жи тӧ дькари хԝәгьртьне бьди кʹьфше у «ль гора хԝәстьнед хԝәйә гӧнәкʹар у фькьред хԝә һәрәкʹәт» нәки (Әфәси 2:3). Гәло тӧ ча дькари ве йәке бьки у хԝәстьнед нәрʹаст алт ки?

ТӦ ЧА ДЬКАРИ СӘР КʹӘВИ?

15. Сәва кӧ әм хԝәстьнед нәрʹаст алт кьн, чьма фәрз ә кӧ әм һʹәлал бьн?

¹⁵ Сәва кӧ хԝәстьнед нәрʹаст алт ки, тӧ гәрәке бь һʹәлали бини сәр хԝә ԝәки һьнә кемасийед тә һәнә. Хԝә бь фькьред шаш нәхапинә (Аԛуб 1:22). Мәсәлә, һәрге тӧ хԝәрʹа ӧса дьбежи, «Кәсед дьн жь мьн зедәтьр вәдьхԝьн», йан «Һәрге жьна мьн дьһа зедә дина хԝә бьда мьн, мьне порнографийайе нәньһерʹийа», ԝи чахи тәрʹа ԝе гәләк чәтьн бә кӧ хԝә жь тьштед нәрʹаст дур бьгьри. Ләма жи, мәʹнийа нәгәрʹә кӧ хԝә рʹаст дәрхи у шашийед хԝә бинә сәр хԝә (Галати 6:7).

16. Тӧ чь дькари бьки, сәва кӧ нәкʹәви бьн һʹӧкӧме кемасийед хԝә?

¹⁶ Хенщи ве йәке, гәләк фәрз ә хԝәрʹа нете дайни, ԝәки кемасийед тә сәр тә һʹӧкӧм нәкьн (1 Корьнтʹи 9:26, 27; 1 Тʹесалоники 4:4; 1 Пәтрус 1:15, 16). Тедәрхә кʹәнге тӧ дьһа зедә тейи щерʹьбандьне. Мәсәлә, дьбәкә гава тӧ ԝәстийайи йи йан гава ида шәв ә, тәрʹа чәтьн ә нәкʹәви бьн һʹӧкӧме щерʹьбандьне. Хԝә пешда һазьр кә у бьфькьрә кӧ тӧйе чь бьки һәрге бейи щерʹьбандьне (Мәтʹәлок 22:3).

17. Әм дькарьн жь сәрһатийа Усьв чь дәрсе һин бьн? (Дәстпебун 39:7-9) (Бьньһерʹә ӧса жи шькьл.)

¹⁷ Бинә бира хԝә кӧ Усьв ча дәрберʹа жь жьна Потифар рʹәвийа, гава әԝе дьхԝәст ԝәки Усьв сәре хԝә ԝерʹа дайнә (Бьхунә Дәстпебун 39:7-9). Әм дькарьн жь ве сәрһатийе чь дәрсе һин бьн? Пешийа кӧ жьна Потифар хԝәст Усьв жь рʹе дәрхә, Усьв ида сафи кьрьбу кӧ әԝе чь бькә. Мина ве йәке, пешийа кӧ бейи щерʹьбандьне, тӧ жи дькари хԝәрʹа сафи ки чь кӧ рʹаст ә, ве йәке бьки. Ԝи чахи тәрʹа ԝе дьһа һеса бә хԝә рʹаст бьди кʹьфше, чьмки тә пешда сафи кьрийә кӧ чь бьки.

«ҺӘР ГАВ ХԜӘ БЬЩЕРʹЬБИНЬН»

18. Тӧ ча дькари хԝәстьнед нәрʹаст алт ки? (2 Корьнтʹи 13:5)

¹⁸ Сәва кӧ шәрʹе мьԛабьли хԝәстьнед нәрʹастда сәр кʹәвьн, гәләк фәрз ә бәрдәԝам кьн «һәр гав хԝә бьщерʹьбиньн» (Бьхунә 2 Корьнтʹи 13:5). Щар-щара дәрһәԛа фькьр у кьред хԝә дьшьрмиш бә, у һәрге лазьм бә, хԝә рʹаст кә. Мәсәлә, гава тӧ щара пашьн һати щерʹьбандьне, гәло тәрʹа чәтьн бу дәрберʹа бежи «На»? Һәрге ӧса бу, хәмгин нәбә, ле бьфькьрә кӧ щарәкә дьн тӧ ча дькари дьһа баш хԝә бьди кʹьфше. Жь хԝә бьпьрсә: «Әз ча дькарьм фькьред нәрʹаст дьһа зу жь һʹьше хԝә дәрхьм? Дьԛәԝьмә жь бо тьштед кӧ әз дьхуньм йан дьньһерʹьм мьнрʹа дьһа чәтьн ә хԝә жь хԝәстьнед нәрʹаст дур бьгьрьм? Гава әз тьштәки бенамус дьвиньм, гәло әз дәрберʹа пьшта хԝә дьдьме? Чьԛас мьнрʹа ԛәԝат лазьм бә жи сәва кӧ хԝә контрол кьм, гәло әз фәʹм дькьм кӧ ԛанунед Йаһоԝа бона кʹара мьн ьн?» (Зәбур 101:3).

19. Чьма фәрз ә кӧ әм шашийед бьчʹук жи нәкьн?

¹⁹ Гава тӧ дьле хԝә дьщерʹьбини, һьндава хԝәда һʹәлал бә у хԝә рʹаст дәрнәхә, чьмки Кʹьтеба Пирозда те готьне, ԝәки «дьл жь һәр тьшти хапиноктьр ә» (Йерәмйа 17:9, ИМ). Иса жи готьбу, ԝәки «фькьред хьраб» «жь дьл дәрдькʹәвьн» (Мәтта 15:19). Мәсәлә, паши һьнә ԝәʹдә мәрьве кӧ тʹәрка порнографийайе дайә, дькарә бьфькьрә кӧ бона ԝи ида хоф нинә шькьлед ӧса бьньһерʹә, кʹидәре кӧ рʹаст ә мәрьв тәʹзи ниньн, ле әв шькьл хԝәстьнед нәрʹаст пешда тиньн. Йан жи әԝ дькарә бьфькьрә кӧ проблем нинә тьштед нәщайиз бьдә бәр чʹәʹве хԝә, һәрге әԝ ԝан тьшта накә. Бь рʹасти, бь ԝи щурʹәйи дьле хапинок пешда дьфькьрә «кӧ чаԝа хԝәстьнед бәдәна гӧнәкʹар рʹази» кә (Рʹомайи 13:14). Гәло тӧ ча дькари хԝә жь ве тʹәльке бьпʹарези? Гәләк фәрз ә кӧ хԝә бь «фькьред хьраб» нәхапини у кьред нәрʹаст һәԛ дәрнәхи, ԝәки шашийед бьчʹук жи нәки, йед кӧ дькарьн тә бәрбь шашикә мәзьн бьвьн.b

20. Шәрʹе хԝәйә мьԛабьли хԝәстьнед нәрʹастда, әм чьма бе чʹарә у бе гӧман ниньн?

²⁰ Йаһоԝа али мә дькә щерʹьбандьнада сәр кʹәвьн. Ӧса жи, сәр һʹиме ԛӧрбана Иса гӧнед мә дькарьн бенә бахшандьне, у әм дькарьн һʹәта-һʹәтайе дьнйа тʹәзәда бьжин. Әм һʹьзрәта ԝе рʹоже нә кӧ ида бь һʹьш у дьле кʹамьл Йаһоԝарʹа хьзмәт кьн. Ле һʹәта әв ԝәʹдә бе, әм гәрәке шәрʹе хԝәйә мьԛабьли хԝәстьнед нәрʹастда хԝә бе чʹарә у бе гӧман тʹәхмин нәкьн, чьмки Йаһоԝа һазьр ә али мә бькә!