Әԝи Мәрьв Һʹьз Дькьрьн

1, 2. Иса һʹьзкьрьна хԝә һьндава мәрьва ча избат кьр?

КӦРʹЕ Хԝәдейи пешьн мәсәла биланийа Йаһоԝайә гринг ә. Әԝ бал Баве хԝә «һостә» бу. Бьдә бәр чʹәʹве хԝә кӧ Иса чьԛас ша дьбу у чьԛас ԝирʹа һʹәԝас бу, чахе Баве ԝи әʹзман у әʹрд чедькьр. Ле жь әʹфьринед Баве хԝә, Иса дьһа зәʹф мәрьв һʹьз дькьрьн (Мәтʹәлок 8:22-31). Бәле, әԝи мәрьв дәстпекеда һʹьз кьр.

² Иса һʹьзкьрьн у амьнийа хԝә избат кьр һьндава Баве хԝә у мәрьва, чахе әԝи бь һазьрбуне әʹзман һишт у һатә сәр әʹрде чаԝа мәрьв. Иса әԝ йәк жь һʹьзкьрьне кьр, ләма әԝи һазьр бу әʹмьре хԝә жи бьдә, ԝәки «гәләка бькʹьрʹә» (Мәтта 20:28; Филипи 2:5-8). Чахе Иса ль сәр әʹрде бу, Хԝәде ԛәԝат да ԝи ԝәки әԝ кʹәрәмәта бькә. Әԝан кʹәрәмәта дьданә кʹьфше, кӧ Иса чьԛас ԛайим мәрьва һʹьз дькә, у ӧса жи ахьрийеда ԝе тьштед чьԛас баш бькә бона инсанәте.

3. Әме чь пебьһʹәсьн дь ве тʹемайеда?

³ Һатьна Иса ль сәр әʹрде, мәщал да ԝи кӧ «Мьзгинийа Пʹадшатийа Хԝәде» даннасин кә (Луԛа 4:43). Әԝи заньбу кӧ әԝ Пʹадшати ԝе наве Баве ԝи рʹумәт кә, у ԝе һʹәму проблемед инсанәте сафи кә. Хенщи даннасинкьрьне, Иса гәләк кʹәрәмәт дькьрьн. Әԝан кʹәрәмәта әʹйан дькьр, кӧ әԝ бона һʹәму мәрьва хәм дькә. Әԝ йәк мә дьлгәрм дькә, чьмки чь кӧ Иса дькьр, гӧмане дьдә мә бона ахьрийе. Ԝәрен шеԝьр кьн дәрһәԛа чар кʹәрәмәтед Иса.

«ӘЗ ДЬХԜАЗЬМ. ПАԚЬЖ БӘ!»

4. Чь ԛәԝьми чахе Иса рʹасти мәрьве кʹоти һат?

⁴ Ԝәʹде даннасинкьрьна хԝә Иса дьчу Щәлиле. Ԝедәре дь шәһәрәкида әԝ рʹасти мерәки кʹоти һат. Нәхԝәшийа ԝи гәләк гьран бу (Марԛос 1:39, 40). Әԝ мәрьв һʹаләки ӧса гьранда бу, кӧ Луԛайе һʹәким дәрһәԛа ԝи ньвиси «сәрдапеда кʹоти» (Луԛа 5:12). Кʹьтеба Пироз дьбежә кӧ әԝи мәрьви чахе Иса дит, «хԝә дәвәрʹуйа авит же лава кьр у гот: ‹Хӧдан! Һәгәр бьхԝази, тӧ дькари мьн паԛьж ки›» (Луԛа 5:12). Әԝи мәрьви заньбу, кӧ ԛәԝата Иса һәйә ԝәки ԝи ԛәнщ кә. Ле әԝи дьхԝаст бьзаньбә һәла Иса дьхԝазә ԝи ԛәнщ кә. Ле чьрʹа? Чьмки Ферьси беԛәдьр бун һьндава мәрьвед кʹоти. Ле гәло Иса ча бу һьндава мәрьвед ӧса? Ча әԝи хԝә кʹьфш кьр һьндава ԝи мәрьве сәрдапеда кʹоти? Ле тәйе чаԝа хԝә кʹьфш кьра?

5. Чьрʹа Иса дьхԝаст мәрьве кʹоти ԛәнщ кә?

⁵ Ча те кʹьфше әԝи мәрьви нәдькьрә ԛарин «Нә паԛьж ьм, нә паԛьж ьм», чьмки ԛануна Муса ӧса дәʹԝа дькьр (Ԛануна Кʹаһинтийе 13:43-46). Ле Иса жь бо ԝе йәке һерс нәкʹәт. Дәԝсе, әԝ кʹәтә һʹәйра ԝи мәрьви у дьхԝаст али ԝи бькә. Әм ньзаньн кӧ Иса чь дьфькьри, ле әм заньн кӧ әԝи чь сәр хԝә тʹәхмин дькьр. Әԝ бона ԝи мәрьви ӧса бәрхԝәкʹәт, кӧ кʹәрәмәт кьр. Тʹӧ кәс гәрәке незики ԝи мәрьви нәбуйа, ле Иса дәсте хԝә да ԝи. Әԝи бь рʹәʹмти у дьлгәрми гот: «Әз дьхԝазьм. Паԛьж бә!» У «кʹотибун же чу» (Луԛа 5:13). Әʹйан ә, кӧ Йаһоԝа ԛәԝат дайә Иса, ԝәки әԝ кʹәрәмәтед мәзьн бькә у кʹьфш кә кӧ әԝ чьԛас зәʹф мәрийа һʹьз дькә (Луԛа 5:17).

6. Чь һʹәԝас ә дь кʹәрәмәтед Исада, у әԝ кʹәрәмәт чь кʹьфш дькьн?

⁶ Бь ԛәԝата Хԝәде Иса дькарьбу гәләк кʹәрәмәтед мәзьн бькә. Әԝи нә кӧ тʹәне кʹоти ԛәнщ дькьр, ле диса щурʹә-щурʹә нәхԝәши. Кʹьтеба Пироз дьбежә кӧ мәрьв зәндәгьрти дьман, чахе дьдитьн кӧ «лала хәбәр дан, шьлушәʹт ԛәнщ бун, сәԛәт гәрʹийан у чʹәʹве кора вәбун» (Мәтта 15:31). Рʹожа иройин, гәләк һʹәким сәва кӧ нәхԝәша ԛәнщ кьн, органед мәрьве майин дькьнә дәԝса органед мәрьве нәхԝәш. Ле ԛәԝата Иса дьгьһиште, кӧ хут орган йан щийе нәхԝәш ԛәнщ кә. Һьн жи әԝи дәрберʹа мәрьв ԛәнщ дькьрьн у һәла һе йед кӧ жь ԝи дур бун жи (Йуһʹәнна 4:46-54). Әԝ йәк мәрʹа чь әʹйан дькә? Әԝ әʹйан дькә кӧ ԛәԝат у хԝастьна Иса һәйә, ԝәки һʹәму нәхԝәшийа кʹӧта кә. У чахе әм педьһʹәсьн кӧ Иса һьндава мәрьва чаԝа бу, әԝ йәк гӧмане дьдә мә, ԝәки дьнйа тʹәзәда әԝ ԝе али кʹәсиб у һесира бькә (Зәбур 72:13). Ԝи чахи Иса ԝе һʹәму нәхԝәша ԛәнщ кә, чьмки әԝ бь рʹастийе дьхԝазә әԝе йәке бькә.

«РʹАБӘ БӘРʹА ХԜӘ ҺЬЛДӘ У БЬГӘРʹӘ»

7, 8. Иса чь кьр чахе жь Щәлиле дьчу Щьһустане?

⁷ Чәнд мәһ паши ве йәке, чахе Иса мәрьве кʹоти ԛәнщ кьр, әԝ жь Щәлиле дьчу Щьһустане, у дәстпекьр мьзгинийа хере дәрһәԛа Пʹадшатийа Хԝәде даннасин кә. Ль ԝе дәре бь һʹәзара мәрьв һәбун, кӧ дьбьһистьн мьзгинийа Иса. Ԝана һʹьзкьрьна Иса һьндава хԝә тʹәхмин дькьр. Чьмки Иса бь рʹастийе дьхԝаст мәрьвед кʹәсиб у бәләнгаз дьлгәрм кә у гӧмане бьдә ԝан (Ишайа 61:1, 2; Луԛа 4:18-21).

⁸ Мәһа Нисане, Иса чу Оршәлиме, ԝәки щәжьна Дәрбазбуне дәрбаз кә. Мәрьв шәһәрда тʹьжә бун, чьмки дьһатьнә сәр ве щәжьне. Жь пʹарьстгәһе алийе бакʹуре, һʹәԝз һәбу бь наве Бәйтһаста. Ль ԝе дәре Иса рʹасти мәрьвәки һат, кӧ нькарьбу рʹе бьчуйа.

9, 10. а) Чьрʹа мәрьв дьчунә Бәйтһастайе? б) Бәйтһастайе Иса чь кьр, у әԝ йәк мә чь һин дькә? (Бьньһерʹьн шькьле әʹԝльн.)

⁹ Гәләк мәрьвед нәхԝәш дьчунә Бәйтһастайе. Гәло чьрʹа? Чьмки әԝана дьфькьрин, кӧ һәрге мәрьв бькʹәвә ви һʹәԝзи дәма кӧ ав дьләԛә, дькарә бь кʹәрәмәт ԛәнщ бә. Бьдә бәр чʹәʹве хԝә кӧ мәрьв ль ԝедәре чь һʹалида бун. Әԝана нәхԝәш у бегӧман бун, у дьлтәнг бун чьмки гәләк дьхԝәстьн ԛәнщ бьн. Ле чьрʹа Иса чу ԝе дәре? Нә әԝ ԛәданди бу у һʹәԝще ԛәнщкьрьне нибу. Иса чу ль ԝедәре, чьмки әԝи мәрьв һʹьз дькьрьн. Ԝедәре әԝ рʹасти ԝи мәрьви һат, кʹижан кӧ жь нәхԝәшийа хԝә дьчәрчьри һе зедә сал, нә кӧ чьԛас сал Иса ль сәр әʹрде жит. (Бьхунә Йуһʹәнна 5:5-9.)

¹⁰ Иса жь ԝи мәрьви пьрси һәла әԝ дьхԝазә ԛәнщ бә. Бьдә бәр чʹәʹве хԝә кӧ әԝ мәрьв чьԛас дьлтәнг бу, чахе әԝи Исарʹа гьли кьр, кӧ әԝ дьхԝазә ԛәнщ бә ле нькарә. Чьмки тʹӧ кәси али ԝи нәдькьр кӧ бькʹәвә һʹәԝз. Паше Иса готә ԝи мәрьви кӧ тьштәки нәбуйи бькә. Әԝи гот, ԝәки әԝ мәрьв бәрʹа хԝә һьлдә у бьгәрʹә. У әԝ мәрьве сәԛәт бәрʹа хԝә һьлда у дәстпекьр бьгәрʹә! Әԝ кʹәрәмәта баш избат дькә, кӧ Иса ԝе чь бькә дьнйа тʹәзәда. Һьн жи әԝ нишан дькә кӧ Иса мәрьва чьԛас зәʹф һʹьз дькә. Иса мәрьвед ӧса дьгәрʹийан, кʹижанарʹа аликʹари лазьм бу. Мәсәла ԝи мә һелан дькә, ԝәки әм чахе даннасин дькьн али ԝан мәрьва бькьн, йед кӧ дьлтәнг дьбьн жь бо тәнгасийед ве дьнйайе.

«КʹЕ ЛЬ КʹЬНЩЕД МЬН КʹӘТ?»

11. Сәрһатийа жь Марԛос 5:25-34, ча әʹйан дькә дьлшәԝатийа Иса һьндава мәрьвед нәхԝәш?

¹¹ Бьхунә Марԛос 5:25-34. Жьнькәк 12 сала дьчәрчьри жь нәхԝәшикә шәрми. Әԝ нәхԝәшийа ԝе гәләк һʹӧкӧм бу сәр жийина ԝе, у һьн жи сәр ԛӧльхкьрьна ԝе. Әԝ жьньк дьчу щәм гәләк һʹәкима у гәләк пʹәрә хәрщ дькьр ԝәки хԝә ԛәнщ кә, ле һе хьраб дьбу. Щарәке әԝе сафи кьр, кӧ бь щурʹәки майин хԝә ԛәнщ кә. Ле әԝ щурʹә мьԛабьли ԛануне бу. Ле ча? Изьна ԝе тʹӧнә бу кӧ дәсте хԝә бьдә кәсәки. Ле йәкә әԝ нав щьмәʹтерʹа дәрбаз бу у дәсте хԝә да кʹьнще Иса (Ԛануна Кʹаһинтийе 15:19, 25). Чахе Иса тʹәхмин кьр кӧ ԛәԝат жь ԝи чу, әԝи пьрси һәла кʹе дәсте хԝә да ԝи. Паше әԝ жьньк «бь тьрсе у ләрьзәке һат хԝә авитә бәр ԝи у һәр тьшт рʹаст гот». Иса заньбу кӧ Йаһоԝа әԝ жьньк ԛәнщ кьр, у ләма әԝи бь дьлшәԝати жерʹа гот: «Әʹвде! Баԝәрийа тә тӧ ԛәнщ кьри. Бь хер у сьламәт һәрʹә у жь еша хԝә ԛәнщ бә».

12. а) Әԝ кӧ Иса ча бу һьндава мәрьва, дәрһәԛа ԝи чь әʹйан дькә? б) Әм чь һин дьбьн жь мәсәла Иса?

¹² Гәләк мә дьлгәрм дькә әԝ йәк, кӧ Иса чаԝа бу һьндава мәрьва, илаһи һьндава мәрьвед нәхԝәш. Әԝ щӧдә дьбә жь Шәйтʹан, кʹижан кӧ дьхԝазә мә бьдә баԝәркьрьне, кӧ әм тʹӧ тьшт ниньн у тʹӧ кәс мә һʹьз накә. Ле кʹәрәмәтед Иса избат дькьн, кӧ Иса бь рʹастийе жи дәрһәԛа мә у проблемед мә хәм дькә. Әм гәрәке гәләк рʹази бьн чьмки Пʹадшайе мәйи ӧса һәйә, кʹижан кӧ мә һʹьз дькә! (Ибрани 4:15) Мәрʹа дькарә чәтьн бә кӧ фәʹм кьн һʹале мәрьвед нәхԝәш, илаһи һәрге әм нәхԝәш ниньн. Ле һәла бьфькьрьн дәрһәԛа Иса. Әԝ дьлшәԝат бу һьндава мәрвед нәхԝәш, ле йәкә хԝәха тʹӧ щар нәхԝәш нибу. Ԝәрен әм жи һʹәму тьшти бькьн, сәва кӧ чʹәʹв бьдьнә мәсәла Иса (1 Пәтрус 3:8).

«ИСА ГЬРИЙА»

13. Сахкьрьна Лазар чь мәрʹа әʹйан дькә дәрһәԛа Иса?

¹³ Чахе мәрьва дәрд дькʹьшанд, сәр Иса зәʹф һʹӧкӧм дьбу. Мәсәлә, чахе һәвале Иса Лазар мьр, «кʹәсәра кʹур һате у дьле ԝи ешийа», чьмки әԝи дит ча малбәта Лазар у һәвалед ԝи бәрхԝәдькʹәвьн. (Бьхунә Йуһʹәнна 11:33-36.) Рʹаст ә Иса заньбу кӧ әԝ ԝе Лазар сах кә, ле йәкә әԝ гьрийа. Әԝ нәдьтьрсийа кӧ һәстед ԝи мәрьварʹа әʹйан бьн. Иса һаԛас зәʹф Лазар у малбәта ԝи һʹьз дькьр, кӧ ԛәԝата Хԝәде да хәбате, сәва кӧ Лазар вәгәрʹинә жийине! (Йуһʹәнна 11:43, 44)

14, 15. а) Жь чь те кʹьфше кӧ Йаһоԝа дьхԝазә кӧл-дәрдед мәрьва кʹӧта кә? б) Чь лазьм ә бона сахкьрьне?

¹⁴ Кʹьтеба Пироз гьли дькә кӧ Иса хут мина Баве хԝә Йаһоԝа йә (Ибрани 1:3). Демәк, кʹәрәмәтед Иса избат дькьн, кӧ Йаһоԝа жи дьхԝазә ԝәки нәхԝәшийа, кӧл-дәрда у мьрьне бьдә һьлдане. У зутьрәке, Йаһоԝа у кӧрʹе ԝи ԝе гәләк мәрьва вәгәрʹиньн жийине. Иса гот кӧ «ԝәхт незик дьбә, кӧ һʹәмуйед тʹьрбада» ԝе бенә сахкьрьне (Йуһʹәнна 5:28, 29).

¹⁵ Ле бона сахкьрьне лазьм ә кӧ Хԝәде ԝан һʹәму мәрьва бира хԝәда хԝәй кә. Хԝәдайе Һьмзор, әʹфьрандаре тʹәмамийа гәрдуне, дькарә бинә бира хԝә һʹәму детал у хәйсәт-һʹӧнӧред мәрьвед мәйи кӧ мьрьнә (Ишайа 40:26). У Йаһоԝа нә кӧ тʹәне дькарә, ле ӧса жи дьхԝазә ԝана бира хԝәда хԝәй кә. Сахкьрьнед кӧ тенә гьликьрьне Кʹьтеба Пирозда, мәсәлед баш ьн, кӧ ԝе чь бьԛәԝьмә дьнйа тʹәзәда.

ЖЬ КʹӘРӘМӘТЕД ИСА ӘМ ЧЬ ҺИН ДЬБЬН

16. Ԛӧльхкʹаред Йаһоԝа ԝе чь кʹәрәмәта нәбуйи бьвиньн?

¹⁶ Һәрге әм Хԝәдерʹа амьн бьминьн, әме бькарьбьн кʹәрәмәтәкә кӧ тʹӧ щар нәԛәԝьмийә бьвиньн. Әԝ кʹәрәмәт әԝ ә, кӧ әм дькарьн ԝәʹде тәнгасийа мәзьн хьлаз бьн! У паши Һармәгәдоне жи, әме һе гәләк кʹәрәмәта бьвиньн. Һьнге һʹәму мәрьв ԝе сьһʹәт-ԛәԝата кʹамьл бьстиньн (Ишайа 33:24; 35:5, 6; Әʹйанти 21:4). Мәрьв ԝе аза бьн жь бәрчʹәʹвка, гопала, кʹӧрсийед сәԛәта у жь һащәтед бона бьһистьне. Йаһоԝа занә ԝәки йед кӧ жь Һармәгәдоне хьлаз бьн, ԝанрʹа сьһʹәт-ԛәԝат ԝе лазьм бә, чьмки әԝана гәләк шьхӧл ԝе бькьн. Әԝана планета мәйә бәдәԝ, демәк Әʹрде ԝе бь тʹәмами бькьнә щьнәт (Зәбур 115:16).

17, 18. а) Иса чьрʹа кʹәрәмәт дькьрьн? б) Чьрʹа мәрʹа лазьм ә ԛәԝате хәрщ кьн сәва бькʹәвьнә дьнйа тʹәзә?

¹⁷ Иро ԛӧльхкʹаред Хԝәде чахе дьхуньн, кӧ чаԝа Иса нәхԝәш ԛәнщ дькьрьн, гәләк дьлгәрм дьбьн. Әԝ кʹәрәмәтед Иса, гӧмана мә ԛәԝи дькьн кӧ әме ахьрийеда бь тʹәмами сьһʹәт-ԛәԝат бьн. Әԝ ӧса жи мәрʹа әʹйан дькьн кӧ чаԝа Кӧрʹе Хԝәдейи пешьн инсанәте һʹьз дькә (Йуһʹәнна 10:11; 15:12, 13). У дьлшәԝатийа Исайә гьринг, мәрʹа дьдә кʹьфше, кӧ Йаһоԝа һәр ԛӧльхкʹарәки хԝә чьԛас зәʹф һʹьз дькә (Йуһʹәнна 5:19).

¹⁸ Дьне иро бь кӧл-дәрда, тәнгасийа у мьрьне тʹьжә йә (Рʹомайи 8:22). Ләма жи мәрʹа гәләк лазьм ә дьнйа тʹәзә. Чаԝа кӧ Хԝәде соз дайә, ль ԝе дәре һʹәму мәрьв ԝе сьһʹәт-ԛәԝата кʹамьл бьстиньн. Гьлийед жь Малахи 4:2 гӧмане дьдьнә мә, кӧ әԝед кӧ ԝе ԛәнщ бьн, жь шабуне ԝе «банздьн, (ДТʹ)», чьмки ԝе жь нәхԝашийа у жь нәкʹамьлбуне аза бьн. Бьра рʹазибуна мә у баԝәрийа мә һьндава Йаһоԝа, мә һелан кә кӧ һʹәму тьшти бькьн, сәва кӧ бькʹәвьнә дьнйа тʹәзә. Рʹасти жи, чьԛас әм дьлгәрм дьбьн, чахе заньн, кӧ кʹәрәмәтед Иса бона мә мәсәлә бун. Чьмки зутьрәке ԝәʹде сәрԝертийа ԝи һʹәму инсанәт ԝе бәхтәԝар бә!