Зьмане Хԝә бона Ԛәнщийе Бьдьнә Хәбате

1, 2. Чьрʹа Кʹьтеба Пироз зьман бәрамбәр дькә тʹәви агьр?

САЛА 1871, дь Дәԝләтед Йәкбуйида агьр меше Ԝисконсине кʹәт. Әԝ агьр дәрберʹа бәла бу у бь тʹәмами ԝәкә дӧ милйард бах шәԝьтанд, у 1 200 зедәтьр мәрьв мьрьн. Бь рʹастийе, тʹӧ агьрида кʹижан кӧ Дәԝләтед Йәкбуйида ԛәԝьми бун, һаԛас зәʹф мәрьв нәмьрьбун, чьԛас ви агьрида. Дьԛәԝьмә кӧ әв агьре мәзьн дәстпебу жь пьрискед бьчʹук, кӧ жь трена дьпʹәкийан, кʹижан нава мешәрʹа дәрбаз дьбун. Әԝ йәк тинә бира мә рʹезәкә жь Кʹьтеба Пироз: «Дина хԝә бьдьнә пьрискә агьр, чь дарьстанәкә мәзьн дькарә бьшәԝьтинә!» (Аԛуб 3:5). Чьрʹа Аԛуб гьлийед ӧса гот?

² Аԛуб дьбежә: «Зьман жи агьрәк ә» (Аԛуб 3:6). Бь «зьман» әм дькарьн хәбәрдьн. У готьна мә жи мина агьр дькарә бьбә мәʹнийа гәләк зийана. Гьлийед мә дькарьн гәләк ԛайим сәр мәрьва һʹӧкӧм бьн. Кʹьтеба Пироз дьбежә кӧ готьна мә дькарә һәла һе жийине йан мьрьне бьдә (Мәтʹәлок 18:21). Ле гәло әԝ те һʹәсабе кӧ әм гәрәке тʹӧ тьшти нәбежьн, тʹәне жь бо ве йәке кӧ дьбәкә тьштәки хьраб жь дәʹве мә дәре? Һьлбәт на. Рʹаст ә агьр дькарә мә бьшәԝьтинә, ле әԝ найе һʹәсабе кӧ әм гәрәке агьр нәдьнә хәбате. Дәԝсе, әм гәрәке агьр фәсал бьдьнә хәбате. Мәсәлә, әм дькарьн агьр бьдьнә хәбате сәва кӧ хԝарьне чекьн, хԝә гәрм кьн, у кӧ рʹонайи һәбә. Ӧса жи зьман, һәрге әм хәбәрдана хԝәда фәсал ьн, әм әԝи фәрәсәти дькарьн бьдьнә хәбате сәва кӧ Йаһоԝа рʹумәт кьн у кʹаре биньн йед дьненарʹа (Зәбур 19:14).

3. Кʹижан се тьшт дькарьн али мә бькьн кӧ мәрьва дьлгәрм кьн чахе әм хәбәрдьдьн?

³ Йаһоԝа фәрәсәте ӧса дайә мә, кӧ әм дькарьн фькьред хԝә у һәстед хԝә бьдьнә кʹьфше йан бь хәбәрдане йан бь нишанкьрьна дәста. Ле әм ча дькарьн әԝе пʹешкʹеше бьдьнә хәбате сәва мәрьва дьлгәрм кьн? (Бьхунә Аԛуб 3:9, 10.) Әм гәрәке бьзаньбьн кӧ кʹәнге хәбәрдьн, чь бежьн, у ча бежьн.

ӘМ КʹӘНГЕ ГӘРӘКЕ ХӘБӘРДЬН?

4. Әм чьчах гәрәке һьш бьн?

⁴ Щара һе баш ә кӧ хәбәрнәдьн. Кʹьтеба Пирозда ньвисар ә кӧ «ԝәхта һьшбуне һәйә» (Ԝаиз 3:7). Мәсәлә, чахе кәсәк хәбәрдьдә әм гәрәке хԝә кәрʹ кьн, бь ве йәке әм ԛәдьр дьдьн кʹьфше һьндава ԝи кәси (Ибо 6:24). Ӧса жи әм гәрәке дәрһәԛа тьштед хԝәйә шәхси хәбәрнәдьн, кʹижан кӧ нә лазьм ә йед майин бьзаньбьн (Мәтʹәлок 20:19). У чахе кәсәк һерса мә тинә, ԝе бь биланти бә һәрге әм хԝә рʹьһʹәт хԝәй кьн у тʹӧ тьшти нәбежьн (Зәбур 4:4).

5. Әм ча дькарьн рʹазибуна хԝә Йаһоԝарʹа бьдьнә кʹьфше бона пʹешкʹеша хәбәрдане?

⁵ Ле ӧса жи һәйә ԝәʹдә кӧ лазьм ә хәбәрдьн (Ԝаиз 3:7). Мәсәлә, чахе Йаһоԝа рʹумәт дькьн, йед майин ԛәԝи дькьн, йан әʹйан дькьн кӧ чь сәр хԝә тʹәхмин дькьн, йан жи дьбежьн кӧ әм һʹәԝще чь нә (Зәбур 51:15). Һәрге әм пʹешкʹеша хәбәрдане кӧ жь Хԝәде йә бь ви щурʹәйи бьдьн хәбате, бь ве йәке әме рʹазибуна хԝә Йаһоԝарʹа бьдьнә кʹьфше. Чахе, һәвале мә пʹешкʹешәкә рʹьнд дьдә мә, әм дьхԝазьн әве пʹешкʹеше рʹаст бьдьн хәбате.

6. Чьрʹа фәрз ә кӧ бона хәбәрдане ԝәʹде рʹаст бьжберьн?

⁶ Чьрʹа бона хәбәрдане лазьмә ԝәʹде баш бьжберьн? Мәтʹәлок 25:11-да те готьне: «Готьна кӧ дь щиһе хԝәда те готьн, мина сева зерʹин йа дь нәщьрандьнед зивида йә». Рʹаст ә сева зерʹин бәдәԝ ә, ле дәрдана зивда әԝ һе бәдәԝ дьбә. Ӧса жи бал мә дькарә готьнед баш һәбьн кӧ мәрийарʹа бежьн. Ле һәрге әм ԝәʹде рʹаст дьжберьн бона хәбәрдане, бь ве йәке әм дькарьн дьһа рʹьнд али мәрьва бькьн. Ле әм әве йәке ча дькарьн бькьн?

7, 8. Чаԝа бьред мә жь Жапонйайе чʹәʹв данә Иса?

⁷ Һәрге әм ԝәʹде нәрʹаст хәбәрдьн, мәрьв дьбәкә рʹаст жь мә фәʹм нәкьн, йан жи дьбәкә готьна мә ԛәбул нәкьн. (Бьхунә Мәтʹәлок 15:23.) Мәсәлә, сала 2011 мәһа Адаре, ԝәʹде әʹрдһәже у тсунаме гәләк бажар һьлшийан Жапонйа рʹоавайеда. Һьнге 15 000 зедәтьр мәрьв мьрьн. Ль ԝедәре гәләк Шәʹдед Йаһоԝа малбәта хԝә у мәрьвед хԝәйи незик ӧнда кьрьн, ле йәкә ԝана дьхԝәстьн бь Кʹьтеба Пироз али ԝан мәрьва бькьн йед кӧ ԝи һʹалида бун. Ԝана заньбун кӧ гәләк жь ԝан мәрьва Будист бун у дәрһәԛа Кʹьтеба Пироз һьндьк заньбун. Ԝи чахи дәԝса кӧ хәбәрдьн дәрһәԛа рʹабуна мьрийа, әԝана бәр дьле ԝанда дьчун у шьровәдькьрьн кӧ чьрʹа тьштед хьраб те сәре мәрьвед ԛәнщ.

⁸ Ԝе йәкеда ԝан бьра чʹәʹв дьданә Иса. Әԝи заньбу кʹәнге лазьм ә у кʹәнге нәлазьм ә кӧ хәбәрдә (Йуһʹәнна 18:33-37; 19:8-11). У ләма әԝи ԝәʹде рʹаст дьжбарт, сәва кӧ тьштед лазьм шагьртед хԝә һин кә (Йуһʹәнна 16:12). Бьрайед жь Жапонйайе һивийа ԝәʹде рʹаст бун, ԝәки мәрьварʹа гьли кьн дәрһәԛа сахкьрьна мьрийа. Дӧ сал у нив паши тсунаме, ԝана бәлавока «Гәло бь Рʹастийе Мьри Дькарьн Диса Бьжин?» мәрьварʹа бәла дькьрьн. Гәләка әв бәлавок һьлдьдан, у чахе дьхԝәндьн әԝана дьлгәрм дьбун. Әм жи гәрәке дь територйа хԝәда култура у баԝәрийа мәрьва һьлдьнә һʹәсаб, чьмки ӧса әм дькарьн ԝәʹде рʹаст бьжберьн кӧ тʹәви ԝана хәбәр дьн.

9. Диса кʹижан дәрәще дьнда әм дькарьн ԝәʹде рʹаст бона хәбәрдане бьжберьн?

⁹ Диса кʹижан дәрәщада әм гәрәке һивийа ԝәʹде рʹаст бьн кӧ хәбәр дьн? Дьбәкә кәсәк тьштед ӧса дьбежә чь кӧ дьле мә дешинә. Дәԝса ԝе йәке кӧ дәрберʹа щаба ԝи бьдьн йан жи бе һʹәмде хԝә тьштәки бежьн, ԝе бь билани бә бьсәкьньн у бьфькьрьн: «Гәло әԝи бь рʹастийе дьхԝәст дьле мьн бешинә? Гәло әʹсәйи йә әз тʹәви ԝи дәрһәԛа ԝе йәке хәбәр дьм чь кӧ әԝи гот?» Ԝе һе баш бә кӧ ԛә тьштәки нәбежьн. Ле һәрге жи мәʹнийа лайиԛ һәйә кӧ тʹәви ԝи хәбәрдьн, әм гәрәке һивийе бьн кӧ һерса мә дайнә. (Бьхунә Мәтʹәлок 15:28.) Йан дьбәкә әм дьхԝазьн нәфәред мала хԝә, кʹижан нә Шәʹдед Йаһоԝа нә һелан кьн, кӧ Йаһоԝа нас кьн. Әм гәрәке сәбьр бьн у кʹур бьфькьрьн дәрһәԛа ԝе йәке кӧ чь әм дьхԝазьн бежьн ԝанрʹа. У һьн жи әм гәрәке ԝәʹдәки ӧса бьжберьн, ԝәки әԝана бькарьбьн гӧһ бьдьнә мә.

ЧЬ ӘМ ГӘРӘКЕ БЕЖЬН?

10. а) Чьрʹа әм гәрәке фәсал бьн дь хәбәрдана хԝәда? б) Әм гәрәке хԝә жь кʹижан хәбәрдане дур бьгьрьн?

¹⁰ Жь бо гьлийед мә мәрьв дькарьн йан хԝә һе баш тʹәхмин кьн йан һе хьраб. (Бьхунә Мәтʹәлок 12:18.) Гәләк мәрьв дьнйа Шәйтʹанда дьдьнә хәбате «готьнед тал», кʹижан кӧ ԝәк «тиред» йане «ԝәк шур» ьн, сәва кӧ дьле мәрьва бешиньн у зийане бьдьнә ԝан (Зәбур 64:3, ИМ). Гәләк мәрьв хәбәрдана ӧса һин дьбьн жь филма йан жь телевисйоне кӧ дьньһерʹьн. Ле Мәсиһи тʹӧ щар гәрәке нәдьнә хәбате әԝ хәбәре сәрт у нә лайиԛ дь хәбәре хԝәда у нә жи дь һʹәнәке хԝәда. Һʹәнәк баш ә, чьмки дькарә хәбәрдана мә һʹәԝас кә. Ле әм тʹӧ щар гәрәке ӧса хәбәрнәдьн, кӧ кәсәки бәһӧрмәт кьн йан жи кәсәки бьдьнә хәйдандьне сәва хатре ве йәке кӧ йед дьн бькʹәньн. Кʹьтеба Пироз мә һин дькә кӧ әм хԝә дур бьгьрьн жь хәбәрдана «кʹьфьри-зьфьри». У ӧса жи дьбежә: «Тʹӧ щар бьра жь дәве ԝә хәбәрәкә хьраб дәрнәйе, пештьри тьштед кӧ кери гӧһдара тен у кʹаре дьдьнә ԝан» (Әфәси 4:29, 31).

11. Чь ԝе али мә бькә кӧ рʹаст бьжберьн хәбәра?

¹¹ Иса һин дькьр кӧ «чь кӧ дьлада һәйә зар жи ԝе дьбежә» (Мәтта 12:34). Әԝ йәк те һʹәсабе кӧ чь кӧ әм дьбежьн дькарә бьдә кʹьфше кӧ әм чь бь рʹастийе дьфькьрьн. Демәк һәрге әм мәрьва һʹьз дькьн у бь рʹастийе бона ԝан хәм дькьн, ԝи чахи әме хәбәре рʹаст бьжберьн чахе тʹәви ԝан хәбәрдьн. У чь кӧ әм бежьн ԝе позитив бә у ԝана бьшьдинә.

12. Диса чь дькарә али мә бькә кӧ әм хәбәра рʹаст бьжберьн?

¹² Лазьм ә ԛәԝате бьдьнә хәбате сәва кӧ хәбәрдана хԝәда рʹаст хәбәра бьжберьн. Һәла һе Сьлеман Пʹадша жи кʹижан кӧ билан бу, кʹур дьфькьри у «леколине» дькьр, сәва кӧ ньвисара ԝи рʹаст бә у бона хԝәндьне һʹәԝас бә (Ԝаиз 12:9, 10). Ле чь дькарә али мә бькә ԝәки әм бьзаньбьн кӧ чь бежьн? Әм дькарьн жь Кʹьтеба Пироз у жь әʹдәбйәтед мә һин бьн, кӧ әм диса ча дькарьн фькьред хԝә дәрбази мәрьва кьн. Әм дькарьн леколин бькьн у фәʹм бькьн ԝан гьлийа кʹижан кӧ мә фәʹм нәдькьр. Әм ӧса жи дькарьн дәрһәԛа Иса леколин бькьн, сәва кӧ пебьһʹәсьн ча хәбәр дьн кӧ али йед дьнена бькьн. Иса дәрберʹа заньбу кӧ чь бежә, чьмки Йаһоԝа ԝи һин кьр кӧ чаԝа бь готьне бьбә «аликʹаре зьламе ԝәстийайи» (Ишайа 50:4). Ӧса жи фәрз ә бьфькьрьн, кӧ чаԝа гьлийед мә ԝе сәр йед дьн һʹӧкӧм бьн (Аԛуб 1:19). Әм дькарьн жь хԝә бьпьрсьн: «Һәрге әз ӧса бежьм, әԝ мәрьв ԝе мьн рʹаст фәʹм бькә кӧ әз чь дьхԝазьм ԝирʹа бежьм? Әԝе ча хԝә тʹәхмин кә?»

13. Чьрʹа әм гәрәке ӧса хәбәрдьн кӧ һеса бе фәʹмкьрьне?

¹³ Дь Исраеледа дәнге борʹийе дәрдьхьстьн сәва кӧ нишанәке бьдьн. Дәнгәки дьда кʹьфше кӧ щьмәʹт гәрәке тʹәвайи тʹоп бьн. Дәнгәки дьн дьһатә һʹәсабе кӧ әскәр гәрәке шәрʹ дәстпекьн. Һәла бьдьнә бәр чʹәʹве хԝә, кӧ ԝе чь бьԛәԝьмийа тʹәви әскәра, һәрге борʹийе дәнге нәнас дәрхьста! Кʹьтеба Пироз дәнге борʹийе йа зәлал, бәрамбәр дькә тʹәви хәбәред кӧ һеса тенә фәʹмкьрьне. Һәрге әм тьшта зәлал шьровәнәкьн, мәрьв дькарьн бьхальфьн йан жи бьфькьрьн кӧ готьна мә дәрәԝ ә. Рʹаст ә әм дьхԝазьн кӧ мә рʹаст фәʹм кьн, ле әм гәрәке фәсал бьн ԝәки чь кӧ әм дьбежьн сәрт йан жи беԛәдьр нибә. (Бьхунә 1 Корьнтʹи 14:8, 9.)

14. Кʹижан мәсәлә дьдә кʹьфше кӧ Иса ӧса хәбәрдьда кӧ һеса бу бона фәʹмкьрьне?

¹⁴ Жь Мәтта сәре 5-7 әм педьһʹәсьн кӧ чаԝа Иса хәбәред ӧса дьжбартьн, кʹижан кӧ һеса бун бона фәʹмкьрьне. Сәва кӧ мәрьварʹа чәтьн нибә, әԝи хәбәрдана хԝәда хәбәред чәтьн йан жи йед зедә нәдьда хәбате. У әԝи тьштед ӧса нәдьгот кӧ дьле мәрьва бешиньн. Иса тьштед гәләк фәрз у кʹур һин дькьр, ле әԝи чь жи дьгот тʹьме һеса бун бона фәʹмкьрьне. Мәсәлә, Иса дьхԝаст кӧ шагьртед ԝи баԝәр бькьн, кӧ ԝанрʹа нә лазьм ә дәрһәԛа хԝарьна һәр рʹожи хәма бькьн. У ләма әԝи ԝанрʹа шьровәкьр кӧ Йаһоԝа тʹьме тәйрәда тʹер дькә. Паше, әԝи ԝанрʹа гот: «Нә һун жь ԝан ԛимәттьр ьн?» (Мәтта 6:26). Иса бь ԝан хәбәред һеса али шагьртед хԝә кьр, кӧ дәрсәкә фәрз фәʹм кьн у дьлгәрм бьн.

ӘМ ЧА ГӘРӘКЕ ТʹӘВИ МӘРЬВА ХӘБӘРДЬН?

15. Чьрʹа әм гәрәке бь нәрми хәбәрдьн?

¹⁵ Чаԝа кӧ фәрз ә кӧ әм ча хәбәрдьдьн тʹәви мәрьва, ӧса жи гәләк фәрз ә кӧ әм чь хәбәрдьдьн. Мәрьва хԝәш дьһат кӧ Иса бьбьһен, чьмки әԝи бь «мәʹрифәти», йане нәрм (Луԛа 4:22). Һәрге әм жи бь нәрми хәбәрдьн, ԝе мәрьварʹа дьһа һʹәԝас бә мә бьбьһен, у чь әм бежьн ԝе ԛәбул кьн (Мәтʹәлок 25:15). Һәрге әм ԛәдьре мәрьва бьгьрьн у һәстед ԝан һьлдьнә һʹәсаб, әме бькарьбьн тʹәви ԝан бь нәрми хәбәрдьн. Иса һәма ӧса жи дькьр. Мәсәлә, чахе әԝи әʹлаләтәкә мәзьн дит, кʹижан кӧ гәләк ԛәԝат хәрщ кьрьн сәва кӧ ԝи бьбьһен, әԝ гәләк ша бу тʹәви ԝан ԝәʹдә дәрбаз кә у ԝана һин кә (Марԛос 6:34). Һәла һе чахе мәрьва ԝи рʹәзил дькьрьн, әԝи әԝана рʹәзил нәдькьрьн (1 Пәтрус 2:23).

16, 17. а) Әм ча дькарьн чʹәʹв бьдьнә Иса чахе тʹәви мәрьвед хԝәйи незик хәбәрдьдьн? (Бьньһерʹә шькьле әʹԝльн.) б) Ча хушкәкә мә бь хәбәрдана хԝәйә нәрм тьштәки гәләк баш кьр?

¹⁶ Рʹаст ә әм мәрьве хԝәйә незик һʹьз дькьн, ле щара әм дькарьн тʹәви ԝана сәрт хәбәрдьн, чьмки әм ԝана рʹьнд нас дькьн. У дьбәкә әм дьфькьрьн ԝәки нәлазьм ә әм фәсал бьн кӧ ча тʹәви ԝан хәбәрдьн. Ле Иса тʹәви һәвалед хԝә тʹӧ щар сәрт хәбәрнәдьда. Мәсәлә, чахе һьнәк жь ԝан һәврʹа дькʹәтьнә дәʹԝе кӧ жь ԝан кʹе мәзьн ә, әԝи бь нәрми әԝана ширәт кьрьн, у әԝи мәсәла зарʹа бьчʹук ԝанрʹа ани, сәва кӧ али ԝан бькә ԝәки ньһерʹандьна хԝә бьгӧһезьн (Марԛос 9:33-37). Рʹуспи дькарьн чʹәʹв бьдьнә Иса кӧ бь нәрми йед дьн ширәт кьн (Галати 6:1).

¹⁷ Һәла һе чахе кәсәк тьштәки ӧса мәрʹа дьбежә кӧ дьле мә дешинә, әм бь хәбәрдана хԝәйә нәрм дькарьн тьштәки гәләк баш бькьн (Мәтʹәлок 15:1). Ԝәрен әм мәсәләке бьньһерʹьн. Хушкәкә мә кӧрʹе хԝә тʹәне мәзьн дькьр. Кӧрʹе ԝе тьштед хьраб дькьр, һьн жи Йаһоԝарʹа хьзмәт дькьр. Хушкәк щьватеда бәр дьле ԝеда һат, у жерʹа гот: «Йазьх, кӧ мәзьнкьрьна зарʹеда щәфе тә бадиһәԝа чу». Әԝ де сәкьни, фькьри у паше гот: «Рʹаст ә, ньһа һʹал нәбаш ә, ле йәкә мәзьнкьрьна ԝи һе бәрдәԝам дьбә. Ԝәрә дәрһәԛа ԝе тʹемайе паши Һармәгәдоне хәбәрдьн. Ԝи чахи һʹәму тьшт ԝе әʹйан бә». Әԝ дайик һерс нәкʹәт у тʹәви ве хушке нәрм бу, ләма жи әԝана диса ман һәвалед һәв. Һьн жи, кӧрʹе ԝе хәбәрдана дийа хԝә бьһист у фәʹм кьр ԝәки дийа ԝи баԝәр дькә, кӧ әԝ дькарә хԝә бьгӧһезә. У ахьрийе, әԝи ида тʹәви һәвалед хьраб һәвалти нәдькьр, у әԝ һатә ньхӧмандьне, паше жи дь Бәйтʹәледа хьзмәт дькьр. Фьрԛи тʹӧнә әм тʹәви хушк-бьра хәбәрдьдьн, йан тʹәви малбәта хԝә, йан тʹәви ԝан әм кʹе нас накьн, гәрәке хәбәрдана мә тʹьме «мәʹрифәти у хԝекьри бә» (Колоси 4:6).

18. Әм ча дькарьн чʹәʹв бьдьнә Иса хәбәрданеда?

¹⁸ Әԝ фәрәсәт кӧ әм дькарьн мәрьварʹа гьли кьн чь кӧ дьфькьрьн у чь тʹәхмин дькьн, бь рʹастийе пʹешкʹешәкә гәләк мәзьн ә жь Йаһоԝа. Һәрге әм чʹәʹв бьдьнә Иса, әме бона хәбәрдане ԝәʹде рʹаст бьжберьн, фәсал бьн кӧ чь хәбәрдьн, у тʹьме бьхәбьтьн кӧ бь нәрми хәбәрдьн. Ԝәрә әм тʹьме бь хәбәрдана хԝә йед дьн бьшьдиньн у дьле Йаһоԝа ша кьн.