Кʹьтеба Пироз Дькарә Али Мьн Бькә, ԝәки Хԝә Гӧнәкʹар Нәкьм?

Щаба Кʹьтеба Пироз

Бәле. Кʹьтеба Пироз дькарә али мә бькә, ԝәки әм һәстед хԝәгӧнәкʹаркьрьне алт кьн (Зәбур 32:1-5). Һәрге мә тьштәки нәрʹаст кьрийә, ле әм бь дьл у щан пʹошман дьбьн, Хԝәде ԝе бьбахшинә мә у али мә бькә, ԝәки әм дьлрʹьһʹәтийе бьстиньн (Зәбур 86:5). Жь Кʹьтеба Пироз те кʹьфше, ԝәки щарна һәсте хԝәгӧнәкʹаркьрьне кʹаре тинә, чьмки әԝ мә һелан дькә, ԝәки әм рʹийа хԝәйә нәрʹаст бьгӧһерʹьн у һʹәму тьшти бькьн, сәва кӧ әве шашийа хԝә диса ԝәнәкʹьлиньн (Зәбур 51:17; Мәтʹәлок 14:9). Ле Кʹьтеба Пироз мә ширәт дькә, ԝәки әм гәләки хԝә гӧнәкʹар нәкьн у нәфькьрьн, ԝәки әм бәр чʹәʹве Хԝәде бекер ьн. Һәрге әм ӧса бьфькьрьн, әме зәʹф дьлтәнг бьн у сьст бьн (2 Корьнтʹи 2:7).

• Чь дькарә һәсте хԝәгӧнәкʹаркьрьне пешда бинә?

• Әз ча дькарьм һәсте хԝәгӧнәкʹаркьрьне алт кьм?

• Рʹезед Кʹьтеба Пироз дәрһәԛа хԝәгӧнәкʹаркьрьне у бахшандьне

Чь дькарә һәсте хԝәгӧнәкʹаркьрьне пешда бинә?

Дьбәкә әм жь бо гәләк мәʹнийа хԝә гӧнәкʹар һʹәсаб дькьн. Дьбәкә мә мәрьве хԝәйи һʹьзкьри дайә хәйдандьне, йан жи чь кӧ гәрәке бькьра, нәкьрийә. Щарна жи дьбәкә бейи мәʹни һәсте хԝәгӧнәкʹаркьрьне щәм мә пешда те. Мәсәлә, дьбәкә мә нетед ӧса хԝәрʹа данийә, кӧ нькарьн бьгьһижьнә ван у жь бо ве йәке хԝә гӧнәкʹар һʹәсаб дькьн. Ләма жи Кʹьтеба Пироз мә ширәт дькә, ԝәки әм тьштед жь ԛәԝата хԝә дәр, жь хԝә дәʹԝа нәкьн (Ԝаиз 7:16).

Әз ча дькарьм һәсте хԝәгӧнәкʹаркьрьне алт кьм?

Дәԝса кӧ дьлтәнг би, чьԛас дькари һʹәму тьшти бькә, ԝәки әве дәрәще рʹаст ки. Ле чь щурʹәйи?

• Ԛәбул кә, кӧ тӧ шаш буйи. Йаһоԝарʹаa дӧа бькә, ԝәки бьбахшинә тә (Зәбур 38:18; Луԛа 11:4). Баԝәр бә ԝәки Хԝәде ԝе дәнге тә бьбьһе, һәрге тӧ бь дьл у щан тʹобә бьки у һʹәму тьшти бьки, ԝәки әве шашийе диса нәки (2 Дирок 33:13; Зәбур 34:18). Хԝәде дьле мәрьва дьвинә, демәк әԝ чь кӧ мәрьв навинә. Чахе Хԝәде дьвинә ԝәки әм һʹәму тьшти дькьн, сәва кӧ сәр рʹийа рʹаст бьсәкьньн, әԝ дьбахшинә мә, чьмки «әԝ хԝәйе созе хԝә йә у һәԛийе дькә» (1 Йуһʹәнна 1:9; Мәтʹәлок 28:13).

  Һәмьки һәрге тә кәсәк дайә хәйдандьне, тӧ гәрәке ԛәбул ки кӧ шаш буйи у бь дьл у щан бахшандьне бьхԝази. Дьбәкә әв йәк һеса нибә у сәва ве йәке мерхаси у мьлукти лазьм бә. Ле һәрге тӧ бь дьл у щан бахшандьне бьхԝази, һьнге ԝе дӧ проблем сафи бьн. Йа йәке, ԝе кәвьре гьран жь дьле тә бькʹәвә. Йа дӧда, һәләԛәтийа ԝә ԝе баш бә (Мәтта 3:8; 5:23, 24).

• Бьфькьрә сәр ԝан рʹезед Кʹьтеба Пироз, йед кӧ дәрһәԛа дьлрʹәʹмийа Хԝәде нә. Мәсәлә, ԝәрә әм бьньһерʹьн 1 Йуһʹәнна 3:19, 20. Жь ԝан рʹеза әм дьвиньн, ԝәки дьле мә щарна дькарә «мә нәһәԛ кә». Демәк әм һьндава хԝәда дькарьн гәләк сәрт бьн у бьфькьрьн, кӧ һежайи һʹьзкьрьна Хԝәде ниньн. Ле ԝьра ӧса жи те кʹьфшкьрьне, ԝәки «Хԝәде жь дьле мә мәстьр ә». Әв чь те һʹәсабе? Әв һʹәму тьшти дәрһәԛа мә занә у һәстед мә у сьстбунед мә фәʹм дькә. Әԝ ӧса жи занә, ԝәки әм гӧнәкʹар һатьнә буйине, жь бо чь жи тьштед нәрʹаст дькарьн бькьнb (Зәбур 51:5). Ләма жи Хԝәде тʹәхсир накә ԝан мәрьва, йед кӧ бь дьл пʹошман дьбьн бона шашийед хԝә (Зәбур 32:5).

• Пәй тьштед дәрбазбуйи нәкʹәвә. Кʹьтеба Пирозда гәләк сәрһатийед ԝан мәрьва һәнә, йед кӧ хԝә рʹийа нәрʹаст гьртьбун, ле паше һатьнә гӧһастьне. Мәсәлә, жь ԝан йәк Шаԝуле жь Тарсусе бу, кʹижан ԝәʹдә шунда һатә наскьрьне ча Паԝлосе шанди. Әԝ Ферьс бу у пәй шагьртед Иса дькʹәт (Кʹаред Шандийа 8:3; 9:1, 2, 11). Ле чахе әԝи фәʹм кьр, ԝәки бь рʹасти әԝ мьԛабьли Хԝәде у Иса Мәсиһ дьчә, әԝи тʹобә кьр, һатә гӧһастьне у бу Мәсиһики баш. Рʹаст ә Паԝлос гәләк бәрхԝә дькʹәт бона кьред хԝәйә бәре, ле әԝ пәй тьштед дәрбазбуйи нәдькʹәт. Паԝлос бир нәдькьр, ԝәки Йаһоԝа һьндава ԝида чьԛас дьлрʹәʹм бу у әԝ бу мьзгинванәки хирәт. Әԝи һевийа хԝәйә дәрһәԛа жийина һʹәта-һʹәтайе тʹьме бира хԝәда хԝәй дькьр (Филипи 3:13, 14).

Рʹезед Кʹьтеба Пироз дәрһәԛа хԝәгӧнәкʹаркьрьне у бахшандьне

Йерәмийа 31:34: «Әзе ль фәсадийед [шашийед] ԝан бьбориньм у еди әзе сущед ԝан нә дь бира хԝәда биньм!»

Әв чь те һʹәсабе: Хԝәде чахе дьбахшинә мә, әԝ ида шашийед мә надә рʹуйе мә. Әԝ бь рʹасти дьлрʹәʹм ә.