Баԝәр бә кӧ Йаһоԝа Дьбахшинә Тә

1-2. Гава әм гӧнед хԝә тʹобә дькьн, Йаһоԝа һьндава мәда чаԝа нә? (Бьньһерʹә ӧса жи шькьл.)

ДАԜЬД Пʹадша рʹьнд заньбу кӧ паши гӧнәки гьран, мәрьв хԝә ча тʹәхмин дькә (Зәбур 40:12; 51:3; сәрньвисар). Даԝьд чәнд гӧнед гьран кьрьбу, ле әԝи жь дьл тʹобә кьр, ләма жи Йаһоԝа бахшандә ԝи (2 Самуйел 12:13). Гава Йаһоԝа бахшандә Даԝьд, әԝ гәләк ша бу (Зәбур 32:1).

² Гава әм фәʹм дькьн кӧ Йаһоԝа гӧне мә бахшандийә, дьле мә жи мина дьле Даԝьд рʹьһʹәт дьбә. Әм бәрдьликә чьԛас мәзьн дьстиньн гава заньн, кӧ һәрге әм жь дьл гӧне хԝә тʹобә дькьн, у чь жь дәсте мә те дькьн ԝәки диса ԝан шашийа нәкьн, Йаһоԝа һазьр ә һәла һе гӧнед гьран жи бьбахшинә мә (Мәтʹәлок 28:13; Кʹаред Шандийа 26:20; 1 Йуһʹәнна 1:9). Чахе Йаһоԝа гӧне мә дьбахшинә, әԝ һьндава мәда ӧса нә, те бежи мә әв гӧнә ԛә нә жи кьрийә (Һәзәԛел 33:16).

3-4. а) Хушкәкә мә жь бо гӧнед хԝәйә бәре ча хԝә тʹәхмин дькьр? б) Ве готареда әме чь шеԝьр кьн?

³ Ле щарна һьнәкарʹа чәтьн ә баԝәр кьн, кӧ Йаһоԝа гӧнед мә дьбахшинә мә. Мәсәлә, ԝәрә әм сәрһатийа Щенифер шеԝьр кьн, кʹижан кӧ нава рʹастийеда мәзьн бьбу. Гава әԝ щаһьл бу, әԝе бь әʹмьрәки дӧрʹу дьжит. Чәнд сал шунда, әԝ вәгәрʹийа бал Йаһоԝа у ахьрийеда һатә ньхӧмандьне. Әԝ дьбежә: «Бәре мьн пʹәрә гәләк һʹәз дькьр, бенамуси дькьр, гәләк ичке вәдьхԝар у әз мәрьвәкә гәләк һерс бум. Мьн фәʹм дькьр ԝәки сәр һʹиме ԛӧрбана Иса гӧне мьн һатьнә бахшандьне, ле дьле хԝәда мьн баԝәр нәдькьр ԝәки Йаһоԝа бь рʹасти бахшандийә мьн».

⁴ Гәло тәрʹа щарна чәтьн ә баԝәр би, ԝәки Йаһоԝа гӧнед тәйи бәре бахшандийә тә? Йаһоԝа дьхԝазә ԝәки әм мина Даԝьд баԝәр бьн, кӧ Йаһоԝа дьлрʹәʹм ә. Ве готареда әме бьвиньн, кӧ әм чьма гәрәке баԝәр бьн ԝәки Йаһоԝа бь рʹасти дьбахшинә мә. Ӧса жи әме бьвиньн, кӧ чь дькарә али мә бькә ве йәкеда баԝәр бьн.

ЧЬМА ФӘРЗ Ә БАԜӘР БЬН КӦ ЙАҺОԜА ДЬБАХШИНӘ МӘ?

5. Мире-щьна дьхԝазә кӧ әм чь бьфькьрьн? Мәсәле бинә.

⁵ Һәрге әм баԝәр бьн кӧ Йаһоԝа бь рʹасти дьбахшинә мә, әме бькарьбьн жь тʹәлькед Мире-щьна хԝә бьпʹарезьн. Мире-щьна гәләк хирәт дькә мә жь хьзмәтийа Йаһоԝа дур хә. Ләма жи әԝ һәр тьшти дькә, ԝәки мә бьдә баԝәркьрьне кӧ гӧнед мә нькарьн бенә бахшандьне. Дина хԝә бьдьнә сәрһатийа мәрьвәки жь бажаре Корьнтʹе, йе кӧ жь бо бенамусийе ида пʹара щьвате нибу (1 Корьнтʹи 5:1, 5, 13). Гава әԝи гӧне хԝә тʹобә кьр, Мире-щьна дьхԝәст ԝәки хушк-бьра нәбахшандана ԝи у щьватеда пашда ԝи ԛәбул нәкьрана. Ӧса жи әԝи дьхԝәст, ԝәки әԝ мәрьв бьфькьрийа кӧ гӧне ԝи найнә бахшандьне ‹ԝәки әԝ нав хәмгинийа хԝәда бьхәньԛә› у тʹәрка хьзмәтийа Йаһоԝа бьдә. Методед Мире-щьна нәһатьнә гӧһастьне, у «әм нетед ԝи заньн» (2 Корьнтʹи 2:5-11).

6. Һәрге әм һәла һе дьфькьрьн ԝәки Йаһоԝа нәбахшандийә мә, әм гәрәке чь бькьн?

⁶ Һәрге әм баԝәр ьн кӧ Йаһоԝа бь рʹасти дьбахшинә мә, барәки гьран жь стийе мә дькʹәвә. Гава әм гӧнә дькьн, әв тьштәки нормал ә кӧ әм хԝә хьраб тʹәхмин дькьн (Зәбур 51:17). Бь рʹасти баш ә кӧ ӧса йә, чьмки исафа мә дькарә мә дәʹф дә ԝәки әм хԝә рʹаст кьн (2 Корьнтʹи 7:10, 11). Ле һәрге әм паше жи бьфькьрьн кӧ Йаһоԝа нәбахшандийә мә, дьбәкә жь бо ве йәке әм дьлтәнг бьн у ида нәхԝазьн Йаһоԝарʹа хьзмәт кьн. Ле һәрге әм баԝәр бьн кӧ Йаһоԝа бь рʹасти бахшандийә мә, әм дькарьн ида хԝә нәһәԛ нәкьн, у бь шабуне у бь исафа тʹәмьз жерʹа хьзмәт кьн (Колоси 1:10, 11; 2 Тимотʹейо 1:3). Гәло әм ча дькарьн избат бьн, кӧ Хԝәде бь рʹасти гӧне мә афу дькә?

ЧЬ ДЬКАРӘ АЛИ МӘ БЬКӘ БАԜӘР БЬН КӦ ЙАҺОԜА ДЬБАХШИНӘ МӘ?

7-8. Йаһоԝа дәрһәԛа хԝә чь готьбу, у әм дькарьн чьда баԝәр бьн? (Дәркʹәтьн 34:6, 7)

⁷ Бьфькьрьн кӧ Йаһоԝа дәрһәԛа хԝә чь гот. Мәсәлә, бинә бира хԝә кӧ Йаһоԝа сәр Чʹийайе Синайе Мусарʹа чь готьбуa (Бьхунә Дәркʹәтьн 34:6, 7). Гәләк һʹӧнӧред Йаһоԝайә баш һәнә, ле ван рʹезада әԝи дина Муса илаһи кʹьшанд сәр ве йәке, кӧ әԝ «Хԝәдейе рʹәʹм у кʹәрәме» йә. Һәрге мәрьве кӧ Йаһоԝа һʹәз дькә, гӧнә кьрийә ле жь дьл тʹобә дькә, гәло Йаһоԝа ԝе ԝи афу нәкә? Һәмьки ԝе афу кә, чьмки Йаһоԝа йәки берʹәʹм у дьлсар нинә!

⁸ Йаһоԝа тʹьме рʹастийе дьбежә, ләма жи әм дькарьн баԝәр бьн, кӧ һәр тьште кӧ әԝи дәрһәԛа хԝә готийә, рʹаст ә (Зәбур 31:5). Һәрге тӧ хԝә жь бо гӧнед хԝәйә бәре хьраб тʹәхмин дьки, жь хԝә бьпьрсә: «Гәло әз баԝәр ьм кӧ Йаһоԝа бь рʹасти йәки дьлрʹәʹм у дьлован ә у һазьр ә бьбахшинә һәр мәрьве кӧ гӧне хԝә тʹобә дькә? Һәрге ӧса йә, гәло нәлазьм ә кӧ әз баԝәр бьм ԝәки Йаһоԝа гӧне мьн жи афу кьрийә?»

9. Бахшандьн чь те һʹәсабе? (Зәбур 32:5)

⁹ Бьфькьрьн кӧ ньвискʹаред Кʹьтеба Пироз жь бина бәр Хԝәде дәрһәԛа бахшандьне чь ньвисин. Мәсәлә, дина хԝә бьдьне, кӧ Даԝьд Пʹадша дәрһәԛа бахшандьна Йаһоԝа чь готьбу (Бьхунә Зәбур 32:5). Әԝи ӧса гот: «Тә нәһәԛийа гӧнәйе мьн бахшанд». Хәбәра Ибрани, йа кӧ ве рʹезеда ча «бахшанд» һатийә ԝәлгәрʹандьне, те һʹәсабе «һьлда», «рʹакьр» йан «бьр». Гава Йаһоԝа Даԝьд афу кьр, әԝи те бежи баре гьран жь стийе ԝи һьлда бьр. Ахьрийеда, Даԝьд жь баре хԝәйи гьран аза бу (Зәбур 32:2-4). Әм жи дькарьн жь баре хԝә аза бьн! Һәрге әм шашийед хԝә жь дьл тʹобә кьн, ида нәлазьм ә кӧ әм хԝә хьраб тʹәхмин кьн, чьмки Йаһоԝа ви бари һьлдьдә у жь мә дур дьхә.

10-11. Йаһоԝа йәки ча нә? (Зәбур 86:5)

¹⁰ Бьхунә Зәбур 86:5. Даԝьд Пʹадша гот, кӧ Йаһоԝа тʹьме һазьр ә бьбахшинә. Әв йәк те һʹәсабе кӧ гава әм шашийа бәрʹдьдьн, Йаһоԝа зу һерс накʹәвә у тʹьме дьхԝазә бьбахшинә ԝан, йед кӧ гӧнед хԝә дьдьнә рʹуйе хԝә. Гәло мәʹнийа бахшандьна Йаһоԝа чь йә? Пʹара дӧда йа ве рʹезе дьбежә, ԝәки Йаһоԝа һʹәзкьрьна амьн дьдә кʹьфше һьндава ԝан мәрьва, йед кӧ гази Ԝи дькьн. Ча мә жь готара пешийа ве дит, Йаһоԝа хьзмәткʹаред хԝәйә амьн һʹәз дькә, дьхԝазә незики ԝан бә у тʹӧ щара пьшта хԝә надә ԝан. Жь бо һʹәзкьрьна хԝәйә амьн, әԝ һазьр ә һʹәму гӧнәкʹара, йед кӧ тʹобә дькьн «бь зедәбари бьбахшинә» (Ишайа 55:7, ИМ). Һәрге тәрʹа чәтьн ә баԝәр ки кӧ Хԝәде бахшандийә тә, жь хԝә бьпьрсә: «Гәло әз баԝәр ьм кӧ Йаһоԝа йәки афукʹар ә у һазьр ә һʹәму кәсед кӧ бахшандьне жь ԝи дьхԝазьн, афу бькә? Һәрге ӧса йә, гәло әз гәрәке баԝәр нәкьм кӧ гава мьн бона бахшандьне һәԝара хԝә ԝи дахьст, әԝи бахшандә мьн?»

¹¹ Кʹьтеба Пирозда те готьне, ԝәки Йаһоԝа рʹьнд фәʹм дькә кӧ әм ԛьсурдар ьн, ләма жи шашийа дькьн, у әв йәк бәрдьлийе дьдә мә (Зәбур 139:1, 2). Ньһа ԝәрә әм дина хԝә бьдьнә зәбурәкә дьн, йа кӧ дькарә али мә бькә бахшандьна Йаһоԝада баԝәр бьн.

ТЬШТЕД КӦ ЙАҺОԜА ДӘРҺӘԚА МӘ БИР НАКӘ

12-13. Ль гора Зәбур 103:14, Йаһоԝа дәрһәԛа мә чь бир накә, у әв йәк ԝи һелан дькә чь бькә?

¹² Бьхунә Зәбур 103:14. Даԝьд Пʹадша гот ԝәки Йаһоԝа бир накә «кӧ әм хали нә». Жь ван гьлийа әшкәрә йә кӧ йәк жь ԝан мәʹнийа, чьма Йаһоԝа һазьр ә хьзмәткʹаред хԝә, йед кӧ тʹобә дькьн, афу бькә әв ә кӧ әԝ бир накә ԝәки әм гӧнәкʹар ьн. Сәва кӧ әм ве йәке дьһа баш фәʹм кьн, ԝәрә әм диса дина хԝә бьдьнә гьлийед Даԝьд.

¹³ Даԝьд Пʹадша гот, ԝәки Йаһоԝа «мәйа мә» занә. Әԝи Адәм «жь аха әʹрде» әʹфьранд, у әԝ рʹьнд занә кӧ синоред мәрьвед беԛьсур жи һәнә. Мәсәлә, мәрьвед беԛьсур жи мәщбур ьн хԝарьне бьхԝьн, рʹазен у бина хԝә бькʹьшиньн (Дәстпебун 2:7). Сәрда жи, жь бо ве йәке кӧ Адәм у Һеԝайе гӧнә кьрьн, мәʹнийа гьлийед кӧ «әм хали нә» дьһа зедә тьшт те һʹәсабе, демәк әв йәк кӧ әм гӧнәкʹар ьн у кемасийед мә һәнә. Йаһоԝа нә тʹәне занә ԝәки әм гӧнәкʹар ьн. Даԝьд гот кӧ әԝ ве йәке «бир тинә». Ләма жи әԝ һьндава мәда дьлрʹәʹм ә. Әԝ фәʹм дькә ԝәки әме щарна шашийа бькьн, у гава әм жь дьл тʹобә дькьн, әԝ һазьр ә мә афу кә (Зәбур 78:38, 39).

14. а) Даԝьд дәрһәԛа бахшандьна Йаһоԝа чь гот? (Зәбур 103:12) б) Жь ве йәке кӧ Йаһоԝа ча бахшандә Даԝьд, әм дәрһәԛа бахшандьна ԝи чь педьһʹәсьн? (Бьньһерʹә чаргошә «Йаһоԝа Ча Дьбахшинә Мә у Гӧнед Мә Бир Дькә?»)

¹⁴ Гәло бахшандьна Йаһоԝа чьԛас мәзьн ә? (Бьхунә Зәбур 103:12) Ль гора гьлийед Даԝьд, гава Йаһоԝа дьбахшинә мә, «чьԛас рʹоһьлат жь рʹоавайе дуртьр ә, һаԛаси жи гӧнәйед мә жь мә дур» дьхә. Рʹоһьлат у рʹоава һаԛас жь һәв дур ьн кӧ тʹӧ щара нагьһижьнә һәв. Гәло әв йәк дәрһәԛа гӧнед кӧ һатьнә бахшандьне чь нишан дькә? Кʹьтебәк дәрһәԛа ве рʹезе ӧса дьбежә: «Һәрге гӧнә һаԛас жь һәв тенә дурхьстьне, әм дькарьн баԝәр бьн кӧ бин, щи у биранина ԝан бь тʹәмами ӧнда дьбьн». Һәла бьфькьрә, бин дькарә тьштәки кӧ бәре ԛәԝьми бу, бинә бира мә. Ле паши ве йәке ча Йаһоԝа бахшандә мә, бина гӧнед мәйи бәре ида наминә, демәк әԝ ԝан гӧна ида тʹӧ щара найнә бира хԝә, у ԝана накә мәʹни сәва кӧ мә щәза кә (Һәзәԛел 18:21, 22; Кʹаред Шандийа 3:19).

15. Һәрге әм хԝә жь бо гӧнед хԝәйә бәре бәрдәԝам дькьн сущдар кьн, гәрәке әм чь бькьн?

¹⁵ Гьлийед Даԝьд кӧ Зәбура 103-да ньвиси нә, ча дькарьн али мә бькьн бахшандьна Йаһоԝада баԝәр бьн? Һәрге әм бона гӧнед хԝәйә бәре бәрдәԝам дькьн хԝә сущдар кьн, ԝәрә әм жь хԝә бьпьрсьн: «Гәло әз бир дькьм кӧ Йаһоԝа ча сәр мьн дьньһерʹә у чь дәрһәԛа мьн бир накә? Мәсәлә, гәло әз бир дькьм кӧ бәр чʹәʹве ԝи әз тʹәне мәрьвәки ԛьсурдар ьм у ԝәки әԝ һазьр ә гӧнәкʹаред мина мьн, йед кӧ тʹобә дькьн, афу бькә?» Һәрге Йаһоԝа дина хԝә надә гӧнед мәйә бәре, гәрәке әм жи дина хԝә нәдьнә ԝан (Зәбур 130:3). Һәрге әм бахшандьна Йаһоԝада баԝәр бьн, әме бькарьбьн хԝә бона гӧнед хԝәйә бәре афу бькьн у бь шабуне Йаһоԝарʹа хьзмәт кьн.

16. Чьма хоф ә, һәрге кәсәк тʹьме дина хԝә дьдә гӧнед хԝәйә бәре? (Бьньһерʹә ӧса жи шькьл.)

¹⁶ Ԝәрә ве мәсәле бьдьнә бәр чʹәʹве хԝә: Гава кәсәк әʹрәбе дажо, щар-щара лазьм ә ԝәки әԝ нәйньке бьньһерʹә. Ле гәләк хоф ә һәрге әԝ һәртʹьм нәйньке бьньһерʹә. Сәва кӧ ажован нәкʹәвә ԛәзийе, әԝ гәрәке дьһа зедә пешийа хԝә бьньһерʹә. Мина ве йәке, һәмьки щарна лазьм ә дина хԝә бьдьнә шашийед хԝәйә бәре, чьмки әв йәк дькарә али мә бькә диса ԝан шашийа нәкьн. Ле һәрге әм тʹьме дәрһәԛа шашийед хԝәйә бәре бьфькьрьн, дьбәкә әм шабуна хԝә ӧнда кьн у нькарьбьн бь дьл у щан Йаһоԝарʹа хьзмәт кьн. Ләма жи ԝәрә әм һәри зедә дина хԝә бьдьнә рʹийа кӧ пешийа мә йә, кʹижан кӧ бәрбь дьнйа тʹәзә дьбә. Ԝи ԝәʹдәйи тьштед хьраб ԝе ида «нәйен бьбиранин» (Ишайа 65:17, ИМ; Мәтʹәлок 4:25).

БӘРДӘԜАМ КӘ ДЬЛЕ ХԜӘ БЬДӘ БАԜӘРКЬРЬНЕ

17. Чьма фәрз ә бәрдәԝам кьн дьле хԝә бьдьнә баԝәркьрьне ве йәкеда, кӧ Йаһоԝа мә һʹәз дькә у һазьр ә мә афу кә?

¹⁷ Гәрәке әм бәрдәԝам кьн дьле хԝә бьдьнә баԝәркьрьне ве йәкеда, кӧ Йаһоԝа мә һʹәз дькә у һазьр ә кӧ мә афу кә (1 Йуһʹәнна 3:19). Гәло чьма? Мире-щьна дьхԝазә ԝәки әм тʹәрка хьзмәтийа Йаһоԝа бьдьн. Ләма жи әԝ тʹьме хирәт дькә мә бьдә баԝәркьрьне, ԝәки Йаһоԝа мә һʹәз накә у набахшинә мә. Мире-щьна занә кӧ ԝәʹде ԝи һьндьк майә, ләма жи чьԛас дьчә һаԛас әԝ дьһа зедә һʹьщуми сәр мә дькә (Әʹйанти 12:12). Ԝәрә әм изьне нәдьне кӧ әԝ сәр кʹәвә!

18. Әм ча дькарьн дьле хԝә бьдьнә баԝәркьрьне кӧ Йаһоԝа мә һʹәз дькә у һазьр ә бьбахшинә мә?

¹⁸ Жь готара пешийа ве әм пеһʹәсийан, кӧ ча әм дькарьн дьһа зедә һʹәзкьрьна Йаһоԝада баԝәр бьн. Ле жь ве готаре әм пеһʹәсийан, ԝәки әм дькарьн баԝәр бьн кӧ Йаһоԝа дьбахшинә мә. Сәва кӧ дьле хԝә ве йәкеда бьди баԝәркьрьне, бинә бира хԝә кӧ Йаһоԝа дәрһәԛа хԝә чь готийә. Кʹур бьфькьрә сәр ве йәке, чь кӧ ньвискʹаред Кʹьтеба Пироз дәрһәԛа бахшандьна Йаһоԝа ньвиси нә. Бир нәкә ԝәки әԝ йәки дьлрʹәʹм ә у әԝ бир накә кӧ әм мәрьвнә ԛьсурдар ьн. Ӧса жи бинә бира хԝә кӧ бахшандьна ԝи чьԛас мәзьн ә. Мина Даԝьд Пʹадша, йе кӧ һәԝара хԝә Хԝәде дахьст, тӧйе жи бькарьби ӧса бежи: «Шькьр жь тәрʹа, Йаһоԝа, чьмки тә ‹нәһәԛийа гӧне мьн бахшанд›!» (Зәбур 32:5).