Бахшандьна Йаһоԝа бона Мә Чь Те Һʹәсабе?

1. Чьрʹа щара чәтьн ә фәʹм кьн, кӧ нета бахшандьна кәсәки чь йә?

ЧАХЕ кәсәк дьбежә кӧ әԝ дьбахшинә мә, дьле мә рʹьһʹәт дьбә, илаһи һәрге мә дьле ԝи кәси пе гьли йан кьред хԝә ешандийә. Ле йәкә дьԛәԝьмә чәтьн бә фәʹм бькьн, кӧ бь рʹасти нета гьлийед ԝи чь йә, гава әԝ дьбежә «Әз дьбахшиньм тә». Гәло әԝ дьхԝазә бежә, кӧ һун диса жи достед һәв ьн? Йан бь ве йәке әԝ дьхԝазә ве тʹеме дадә у достийа ԝә ԝе ида мина йа бәре нибә? Бь рʹасти ньһерʹандьна мәрьва һьндава бахшандьне жь һәв щӧдә дьбә.

2. Кʹьтеба Пироз бахшандьна Йаһоԝа ча шьровәдькә? (Ӧса жи бьньһерʹә спартьн.)

² Әв йәк кӧ чаԝа Йаһоԝа дьбахшинә мә, гәләк щӧдә дьбә жь ве йәке кӧ чаԝа мәрьвед ԛьсурдар дьбахшиньнә һәв. Тʹӧ кәс нькарә ӧса бьбахшинә, чаԝа кӧ Йаһоԝа дьбахшинә. Зәбурбеж дәрһәԛа Йаһоԝа ӧса гот: «Чьмки бахшандьн дәсте Тә йә, ԝәки инсан жь Тә хоф бькә»a (Зәбур 130:4). Бәле, бахшандьна Йаһоԝа, бахшандьна рʹаст ә. Тʹәне Йаһоԝа дькарә бьдә кʹьфше, кӧ бахшандьна рʹаст чь те һʹәсабе. Һьнә рʹезед ньвисаред Йунанида, ньвискʹаред Кʹьтеба Пироз хәбәрәк дьданә хәбате, гава шьровәдькьрьн кӧ Йаһоԝа чь щурʹәйи дьбахшинә, ле ԝана әве хәбәре тʹӧ щар нәдьданә хәбате, гава шьровәдькьрьн, кӧ мәрьв чь щурʹәйи дьбахшиньн.

3. Бахшандьна Йаһоԝа ча жь бахшандьна мәрьва щӧдә дьбә? (Ишайа 55:6, 7)

³ Гава Йаһоԝа дьбахшинә кәсәки, әԝ гӧнед ԝи кәси бь тʹәмами рʹәд дькә. Мәрьвед кӧ Йаһоԝа бахшандийә ԝан, дькарьн ча достед ԝи бьминьн. Әм жь Йаһоԝа гәләк рʹази нә, кӧ әԝ диса у диса бь мәрʹдани дьбахшинә мә (Бьхунә Ишайа 55:6, 7).

4. Йаһоԝа ча али мә дькә, кӧ әм мәʹна бахшандьне рʹьнд фәʹм бькьн?

⁴ Һәрге бахшандьна Йаһоԝа жь бахшандьна мә щӧдә йә, ле мәрьвед ԛьсурдар ча дькарьн фәʹм бькьн, кӧ чь те һʹәсабе бахшандьна рʹаст? Сәва кӧ әм ве йәке фәʹм бькьн, Йаһоԝа бахшандьна хԝә бь чәнд мәсәла шьровәдькә. Ве готареда әме дина хԝә бьдьнә һьнә жь ԝан мәсәла, йед кӧ дьдьнә кʹьфше, ԝәки Йаһоԝа гӧнед мә чаԝа рʹәд дькә у изьне дьдә, кӧ әм диса бьбьнә достед ԝи. Әв мәсәлә ԝе али мә бькьн, кӧ әм бона бахшандьна Баве хԝәйи дьлован, һе зедә рʹази бьн.

ЙАҺОԜА ГӦНЕД МӘ РʹӘД ДЬКӘ

5. Гава Йаһоԝа гӧнед мә дьбахшинә, чь дьԛәԝьмә?

⁵ Кʹьтеба Пирозда, гӧнә щара бәрамбәри баре гьран дьбә. Даԝьд Пʹадша дәрһәԛа гӧнед хԝә ӧса гот: «Нәһәԛийед мьн жь сәре мьн бьльндтьр бунә, мина баре гьран әԝ ль сәр мьн гьран бунә» (Зәбур 38:4). Йаһоԝа һазьр ә бьбахшинә ԝан мәрьва, йед кӧ гӧнед хԝә тиньн рʹуйе хԝә (Зәбур 25:18; 32:5). Хәбәра Ибрани, йа кӧ ча «бахшандьн» һатийә ԝәлгәрʹандьне, те һʹәсабе «һьлдан». Демәк, гава Йаһоԝа гӧнед мә дьбахшинә, әԝ барәки гьран жь мьле мә һьлдьдә.

6. Йаһоԝа гӧнед мә жь мә чьԛас дур дьхә?

⁶ Мәсәләкә дьн жи дьдә кʹьфше, кӧ Йаһоԝа гӧнед мә жь мә чьԛас дур дьхә. Зәбур 103:12 ӧса дьбежә: «Чьԛас рʹоһьлат жь рʹоавайе дуртьр ә, һаԛаси жи гӧнәйед мә жь мә дур хьсти нә». Чаԝа кӧ рʹоһьлат у рʹоава гәләки дури һәв ьн у нькарьн бьгьһижьнә һәв, һәма бь ви щурʹәйи Йаһоԝа гӧнед мә жь мә дур дьхә. Бәле, гава Йаһоԝа гӧнед мә дьбахшинә, әм дькарьн баԝәр бьн, кӧ әԝ бь тʹәмами дьбахшинә.

7. Ль гора Кʹьтеба Пироз, Йаһоԝа гӧнед мә ча дькә? (Миха 7:18, 19)

⁷ Гава Йаһоԝа гӧнед мә жь мә дур дьхә, гәло әԝ бәрдәԝам дькә гӧнед мә бира хԝәда хԝәй кә? Һәмьки на. Һьзԛийа Пʹадша дәрһәԛа Йаһоԝа ӧса ньвиси: «Тә һʹәму сущед мьн авит паши пьшта хԝә» (Ишайа 38:9, 17). Әв мәсәлә нишани мә дькә, ԝәки Йаһоԝа ида дина хԝә надә гӧнед мәрьве кӧ тʹобә кьрийә. Гьлийед Һьзԛийа Пʹадша дькарьбун бь ви щурʹәйи жи бьһатана ԝәлгәрʹандьне: «Тә ӧса кьрийә, те бежи мьн ԛә гӧнә нәкьрьбу». Кʹьтеба Пироз әве фькьре бь мәсәләкә дьн жи нишан дькә. Ль гора Миха 7:18, 19 (бьхунә), Йаһоԝа гӧнед мә давежә бьне бәʹре. Мәсәлә, чахе ԝәʹде бәре тьштәк дькʹәтә бьне бәʹре, әв ида тʹӧ щар нәдьһатә дитьне.

8. Бь аликʹарийа ван мәсәла әм чь пеһʹәсийан?

⁸ Бь аликʹарийа ван мәсәла әм педьһʹәсьн, кӧ гава Йаһоԝа дьбахшинә мә, әԝ мә жь баре гӧна хьлаз дькә. Чаԝа кӧ Даԝьд Пʹадша готьбу, «хԝәзи ль ԝан, кӧ нәһәԛийед ԝан һатьнә бахшандьне у гӧнед ԝан һатьнә ньхамтьне. Хԝәзи ль ԝи бәндәйи, кӧ Хӧдан ԝирʹа гӧнә һʹәсаб накә» (Рʹомайи 4:6-8). Бәле, әв ә бахшандьна рʹаст!

ЙАҺОԜА ГӦНЕД МӘ ПАԚЬЖ ДЬКӘ

9. Кʹьтеба Пироз ча дьдә кʹьфше, кӧ Йаһоԝа бь тʹәмами гӧна дьбахшинә?

⁹ Бь аликʹарийа мәсәлед дьн, Йаһоԝа нишани мә дькә кӧ әԝ гӧнед ԝан мәрьва, йед кӧ тʹобә дькьн, чаԝа бь сайа кʹьрʹине паԛьж дькә. Кʹьтеба Пироз дьбежә, кӧ Әԝ ван гӧна ча бежи дьшо у мәрьве гӧнәкʹар бь ви щурʹәйи паԛьж дькә (Зәбур 51:7; Ишайа 4:4; Йерәмйа 33:8). Йаһоԝа мәрʹа дьбежә, кӧ ахьрийа ве паԛьжкьрьне чь йә: «Һәгәр сущед ԝә мина ԛьрмьз бьн жи ԝе мина бәрфе сьпи бьбьн, һәгәр мина кʹезька ԛьрмьзе гәвәз жи бьн, ԝе мина һьри сьпи бьбә» (Ишайа 1:18). Рʹасти жи гәләк чәтьн ә, кӧ ләкʹед сор бенә паԛьжкьрьне. Ле бь сайа ве мәсәле, Йаһоԝа әшкәрә дькә, ԝәки гӧнед мә дькарьн ӧса рʹьнд бенә шуштьне, кӧ ԝе ида тʹӧ щар нәйенә дитьне.

10. Кʹьтеба Пироз диса бь кʹижан мәсәле бахшандьна Йаһоԝа әʹйан дькә?

¹⁰ Чаԝа кӧ әм жь готара пешьн пеһʹәсийан, гӧнә бәрамбәри дәйна дьбьн (Мәтта 6:12; Луԛа 11:4). Әм чьԛас һьмбәри Йаһоԝа гӧнә дькьн, һаԛас дәйне мә зедә дьбә. Ле гава Йаһоԝа дьбахшинә мә, әԝ ви дәйне мәйи мәзьн бәтал дькә. Чахе гӧнед мә тенә бахшандьне, Йаһоԝа мә ида дәйндар һʹәсаб накә. Чаԝа кӧ ньге мәрьв жь шабуне әʹрд нагьрә, гава дәйне ԝи те бахшандьне, ӧса жи бина мә гәләк фьрә дьбә, гава Йаһоԝа гӧнед мә дьбахшинә мә!

11. Чахе Кʹьтеба Пирозда те готьне кӧ Йаһоԝа гӧнед мә дьбахшинә, гәло әв чь те һʹәсабе? (Кʹаред Шандийа 3:19)

¹¹ Йаһоԝа дәйнед мә, демәк гӧнед мә, нә тʹәне дадьдә, ле ӧса жи бәтал дькә (Бьхунә Кʹаред Шандийа 3:19). Щара гава дәйне кәсәки сәр кʹахазе пе ԛәләме те хәзкьрьне, диса жи бьнива әв дәйн те кʹьфше, ле чахе әв дәйн бь тʹәмами бе тʹәмьзкьрьне, демәк бәталкьрьне, әв ида тьштәки дьн ә. Сәва кӧ әм әве мәсәле фәʹм кьн, әм гәрәке биньн бира хԝә, ԝәки ԝәʹде бәре һʹӧбьрәкә ӧса дьданә хәбате, кӧ һеса пе аве дьһатә тʹәмьзкьрьне. Бь сайа луфька шьл мәрьв дькарьбу ньвисара дәйне кәсәки тʹәмьз кьра. Ләма жи гава дәйн дьһатә «паԛьжкьрьне», әв бь тʹәмами ӧнда дьбу у те бежи әв дәйн нә жи һәбу. Әм гәләк жь Йаһоԝа рʹази нә, ԝәки әԝ ӧса гӧнед мә дьбахшинә, кӧ те бежи әв гӧнед мә нә жи һәбун! (Зәбур 51:9)

12. Жь мәсәла дәрһәԛа әʹԝьре мәзьн әм чь педьһʹәсьн?

¹² Йаһоԝа диса бь мәсәләке дьдә кʹьфше, кӧ әԝ бь тʹәмами гӧна дьбахшинә. Әԝ дьбежә: «Мьн нәһәԛийед тә ԝәк әʹԝьра у гӧнед тә ԝәк мьже паԛьж кьрьн» (Ишайа 44:22, ИМ). Гава Йаһоԝа гӧнед мә дьбахшинә, әԝ ча бежи ԝан гӧна бь әʹԝьрәки мәзьн дадьдә, ԝәки әв бәтавәбьн у ида тʹӧ щар нәйенә кʹьфше.

13. Йаһоԝа ча гӧнед мә дьбахшинә?

¹³ Әм жь ван мәсәла чь педьһʹәсьн? Гава Йаһоԝа гӧнед мә дьбахшинә, әм гәрәке нәтьрсьн кӧ ләкʹа гӧнед мә ԝе һʹәта-һʹәтайе сәр мә бьминә. Бь сайа хуна Иса Мәсиһ, дәйне мә бь тʹәмами те бәталкьрьне у нә жи те кʹьфше, кӧ ԝәхтәки әв ләкʹә сәр мә бу. Бәле, чахе әм гӧнед хԝә тʹобә дькьн, Йаһоԝа һʹәма бь ԝи щурʹәйи дьбахшинә мә, кӧ те бежи мә нә жи гӧнә кьрийә.

ЙАҺОԜА МӘ ДИСА ЧА ДОСТЕД ХԜӘ ԚӘБУЛ ДЬКӘ

14. Чьрʹа әм дькарьн баԝәр бьн, кӧ Йаһоԝа ԝе гӧнед мә бь тʹәмами бьбахшинә мә? (Бьньһерʹә ӧса жи шькьл.)

¹⁴ Йаһоԝа бь рʹасти дьбахшинә мә, ләма жи әм дькарьн бьбьнә достед ԝи. Нәлазьм ә кӧ әм бәрдәԝам кьн хԝә сущдар кьн, йан жи бьтьрсьн ԝәки Йаһоԝа кʹине дажо у мәщале дьгәрʹә ԝәки мә щәза кә. Тьштәки ӧса ԝе тʹӧ щар нәԛәԝьмә! Йаһоԝа дәрһәԛа бахшандьне ӧса готә Йерәмйа пʹехәмбәр: «Әзе нәһәԛийед ԝан бьбахшиньм у иди әзе гӧнед ԝан бь бир нәйиньм» (Йерәмйа 31:34, ИМ). Паԝлосе шанди әв гьли ԝәкʹьландьн, чахе гот: «Әзе нәһәԛийед ԝан бьбахшиньм у гӧнед ԝан жи иди бир нәйньм» (Ибрани 8:12). Гәло әв йәк чь те һʹәсабе?

15. Чь те һʹәсабе кӧ Йаһоԝа гӧнед мә ида найнә бира хԝә?

¹⁵ Кʹьтеба Пирозда хәбәред «биньн бира хԝә» щара нә тʹәне те һʹәсабе кӧ кәсәк тьштед бәре тинә бира хԝә, йан жи сәр ве йәке дьшьрмиш дьбә, ле әв ӧса жи кьред кәсәки те һʹәсабе. Мәсәлә, әԝ мәрьве ԛачах, йе кӧ кʹеләка Иса һатьбу мьхкьрьне, ӧса гот: «Иса, гава тӧ бькʹәви Пʹадшатийа хԝә, мьн бинә бира хԝә» (Луԛа 23:42, 43). Бь ван гьлийа әԝи нә тʹәне дьхԝәст ԝәки Иса дәрһәԛа ԝи бьфькьрә, ле бь рʹасти әԝи дьхԝәст, кӧ Иса тьштәки бона ԝи бькә. Жь щаба Иса әм фәʹм дькьн, кӧ әԝе ԝи мәрьви жь мьрьне рʹакә. Ләма жи гава Йаһоԝа дьбежә, кӧ әԝ гӧнед мә ида найнә бира хԝә, әв те һʹәсабе ԝәки ахьрийеда әԝе мә щәза нәкә бона ван гӧна, йед кӧ әԝи ида бахшандийә мә.

16. Кʹьтеба Пироз дәрһәԛа азайа кӧ әм бь сайа бахшандьна рʹаст дьстиньн, чь дьбежә?

¹⁶ Кʹьтеба Пироз бь сайа мәсәләкә дьн жи али мә дькә фәʹм кьн, ԝәки чь те һʹәсабе азайа кӧ әм бь сайа бахшандьна рʹаст дьстиньн. Жь бәр кӧ әм гӧнәкʹар ьн, әм «хӧламед гӧнә» нә. Ле бь сайа ве йәке, кӧ Йаһоԝа бахшандийә мә, әм мина ван хӧлама нә, йед кӧ ида ‹жь гӧнә аза бунә› (Рʹомайи 6:17, 18; Әʹйанти 1:5). Бәле, әм гәләк ша нә, ԝәки бь сайа бахшандьна Йаһоԝа, әм жь хӧламтийе аза бунә.

17. Әм ча бь сайа бахшандьна Йаһоԝа тенә ԛәнщкьрьне? (Ишайа 53:5)

¹⁷ Бьхунә Ишайа 53:5. Кʹьтеба Пирозда те готьне, ԝәки жь бо гӧна әм мина ԝан мәрьва нә, йед кӧ нәхԝәшикә ӧса стандьнә, кӧ найе ԛәнщкьрьне. Бь сайа ԛӧрбана Кӧрʹе хԝә Иса Мәсиһ, Йаһоԝа мә жь ве нәхԝәшийе ԛәнщ кьрийә (1 Пәтрус 2:24). Гава әм гӧнә дькьн, достийа мә тʹәви Йаһоԝа хьраб дьбә. Ле бь сайа ԛӧрбане Йаһоԝа дьбахшинә мә у әм дькарьн диса бьбьнә достед ԝи. Чаԝа кӧ мәрьв гәләк ша дьбә, гава жь нәхԝәшикә гьран ԛәнщ дьбә, әм жи гәләк ша дьбьн, чахе рʹӧһʹанида тенә ԛәнщкьрьне у диса дьбьнә достед Йаһоԝа.

БАХШАНДЬНА ЙАҺОԜА БОНА МӘ ЧЬ ТЕ ҺʹӘСАБЕ?

18. Жь мәсәлед Кʹьтеба Пироз дәрһәԛа бахшандьна Йаһоԝа әм чь пеһʹәсийан? (Ӧса жи бьньһерʹә чаргошә «Йаһоԝа Чаԝа Дьбахшинә Мә?»)

¹⁸ Гәло әм жь ԝан мәсәлед Кʹьтеба Пироз дәрһәԛа бахшандьна Йаһоԝа, чь пеһʹәсийан? Чахе Йаһоԝа дьбахшинә мә, әԝ бь тʹәмами дьбахшинә, у бона гӧнед мәйә бәре мә щәза накә. Бь ви щурʹәйи мәрʹа мәщал те дайине, кӧ диса бьбьнә достед Баве хԝәйи әʹзмана, Йаһоԝа. Әв йәк кӧ Йаһоԝа дьбахшинә мә, найе һʹәсабе кӧ әм һежайи ве йәке нә, ле әв пʹешкʹеша ԝийә мәзьн ә, кӧ Әԝ бь ԛәнщийа хԝәйә мәзьн дьдә мә (Рʹомайи 3:24).

19. (а) Әм гәрәке бона чь шекьрдар бьн? (Рʹомайи 4:8) (б) Готара дьнда әме чь шеԝьр кьн?

¹⁹ Бьхунә Рʹомайи 4:8. Әм гәләк шекьрдар ьн, кӧ Йаһоԝа бь тʹәмами дьбахшинә мә! (Зәбур 130:4) Ле һәрге әм дьхԝазьн ԝәки Йаһоԝа бьбахшинә мә, әм гәрәке жь алийе хԝәда тьштәки фәрз бькьн. Иса гот: «Һәрге һун гӧнед мәрьва набахшиньн, Баве ԝә жи ԝе гӧнед ԝә нәбахшинә» (Мәтта 6:14, 15). Әшкәрә йә, кӧ әм гәрәке чʹәʹв бьдьнә бахшандьна Йаһоԝа. Ле әм ча дькарьн ве йәке бькьн? Готара дьнда әме пебьһʹәсьн.